| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൧൦. ദുതിയനന്ദിക്ഖയസുത്തം
10. Dutiyanandikkhayasuttaṃ
൫൨. സാവത്ഥിനിദാനം . ‘‘രൂപം , ഭിക്ഖവേ, യോനിസോ മനസി കരോഥ, രൂപാനിച്ചതഞ്ച യഥാഭൂതം സമനുപസ്സഥ. രൂപം, ഭിക്ഖവേ, ഭിക്ഖു യോനിസോ മനസി കരോന്തോ, രൂപാനിച്ചതഞ്ച യഥാഭൂതം സമനുപസ്സന്തോ രൂപസ്മിം നിബ്ബിന്ദതി. നന്ദിക്ഖയാ രാഗക്ഖയോ, രാഗക്ഖയാ നന്ദിക്ഖയോ. നന്ദിരാഗക്ഖയാ ചിത്തം വിമുത്തം സുവിമുത്തന്തി വുച്ചതി. വേദനം, ഭിക്ഖവേ, യോനിസോ മനസി കരോഥ, വേദനാനിച്ചതഞ്ച യഥാഭൂതം സമനുപസ്സഥ. വേദനം, ഭിക്ഖവേ, ഭിക്ഖു യോനിസോ മനസി കരോന്തോ, വേദനാനിച്ചതഞ്ച യഥാഭൂതം സമനുപസ്സന്തോ വേദനായ നിബ്ബിന്ദതി. നന്ദിക്ഖയാ രാഗക്ഖയോ, രാഗക്ഖയാ നന്ദിക്ഖയോ. നന്ദിരാഗക്ഖയാ ചിത്തം വിമുത്തം സുവിമുത്തന്തി വുച്ചതി. സഞ്ഞം ഭിക്ഖവേ… സങ്ഖാരേ, ഭിക്ഖവേ, യോനിസോ മനസി കരോഥ, സങ്ഖാരാനിച്ചതഞ്ച യഥാഭൂതം സമനുപസ്സഥ. സങ്ഖാരേ, ഭിക്ഖവേ , ഭിക്ഖു യോനിസോ മനസി കരോന്തോ, സങ്ഖാരാനിച്ചതം യഥാഭൂതം സമനുപസ്സന്തോ സങ്ഖാരേസു നിബ്ബിന്ദതി. നന്ദിക്ഖയാ രാഗക്ഖയോ, രാഗക്ഖയാ നന്ദിക്ഖയോ. നന്ദിരാഗക്ഖയാ ചിത്തം വിമുത്തം സുവിമുത്തന്തി വുച്ചതി. വിഞ്ഞാണം, ഭിക്ഖവേ, യോനിസോ മനസി കരോഥ, വിഞ്ഞാണാനിച്ചതഞ്ച യഥാഭൂതം സമനുപസ്സഥ. വിഞ്ഞാണം, ഭിക്ഖവേ, ഭിക്ഖു യോനിസോ മനസി കരോന്തോ, വിഞ്ഞാണാനിച്ചതഞ്ച യഥാഭൂതം സമനുപസ്സന്തോ വിഞ്ഞാണസ്മിം നിബ്ബിന്ദതി. നന്ദിക്ഖയാ രാഗക്ഖയോ, രാഗക്ഖയാ നന്ദിക്ഖയോ. നന്ദിരാഗക്ഖയാ ചിത്തം വിമുത്തം സുവിമുത്തന്തി വുച്ചതീ’’തി. ദസമം.
52. Sāvatthinidānaṃ . ‘‘Rūpaṃ , bhikkhave, yoniso manasi karotha, rūpāniccatañca yathābhūtaṃ samanupassatha. Rūpaṃ, bhikkhave, bhikkhu yoniso manasi karonto, rūpāniccatañca yathābhūtaṃ samanupassanto rūpasmiṃ nibbindati. Nandikkhayā rāgakkhayo, rāgakkhayā nandikkhayo. Nandirāgakkhayā cittaṃ vimuttaṃ suvimuttanti vuccati. Vedanaṃ, bhikkhave, yoniso manasi karotha, vedanāniccatañca yathābhūtaṃ samanupassatha. Vedanaṃ, bhikkhave, bhikkhu yoniso manasi karonto, vedanāniccatañca yathābhūtaṃ samanupassanto vedanāya nibbindati. Nandikkhayā rāgakkhayo, rāgakkhayā nandikkhayo. Nandirāgakkhayā cittaṃ vimuttaṃ suvimuttanti vuccati. Saññaṃ bhikkhave… saṅkhāre, bhikkhave, yoniso manasi karotha, saṅkhārāniccatañca yathābhūtaṃ samanupassatha. Saṅkhāre, bhikkhave , bhikkhu yoniso manasi karonto, saṅkhārāniccataṃ yathābhūtaṃ samanupassanto saṅkhāresu nibbindati. Nandikkhayā rāgakkhayo, rāgakkhayā nandikkhayo. Nandirāgakkhayā cittaṃ vimuttaṃ suvimuttanti vuccati. Viññāṇaṃ, bhikkhave, yoniso manasi karotha, viññāṇāniccatañca yathābhūtaṃ samanupassatha. Viññāṇaṃ, bhikkhave, bhikkhu yoniso manasi karonto, viññāṇāniccatañca yathābhūtaṃ samanupassanto viññāṇasmiṃ nibbindati. Nandikkhayā rāgakkhayo, rāgakkhayā nandikkhayo. Nandirāgakkhayā cittaṃ vimuttaṃ suvimuttanti vuccatī’’ti. Dasamaṃ.
അത്തദീപവഗ്ഗോ പഞ്ചമോ.
Attadīpavaggo pañcamo.
തസ്സുദ്ദാനം –
Tassuddānaṃ –
അത്തദീപാ പടിപദാ, ദ്വേ ച ഹോന്തി അനിച്ചതാ;
Attadīpā paṭipadā, dve ca honti aniccatā;
സമനുപസ്സനാ ഖന്ധാ, ദ്വേ സോണാ ദ്വേ നന്ദിക്ഖയേന ചാതി.
Samanupassanā khandhā, dve soṇā dve nandikkhayena cāti.
മൂലപണ്ണാസകോ സമത്തോ.
Mūlapaṇṇāsako samatto.
തസ്സ മൂലപണ്ണാസകസ്സ വഗ്ഗുദ്ദാനം –
Tassa mūlapaṇṇāsakassa vagguddānaṃ –
നകുലപിതാ അനിച്ചോ ച, ഭാരോ നതുമ്ഹാകേന ച;
Nakulapitā anicco ca, bhāro natumhākena ca;
അത്തദീപേന പഞ്ഞാസോ, പഠമോ തേന പവുച്ചതീതി.
Attadīpena paññāso, paṭhamo tena pavuccatīti.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൯-൧൦. നന്ദിക്ഖയസുത്താദിവണ്ണനാ • 9-10. Nandikkhayasuttādivaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൯-൧൦. നന്ദിക്ഖയസുത്താദിവണ്ണനാ • 9-10. Nandikkhayasuttādivaṇṇanā
