| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༢. དུཏིཡནཡོ སངྒཧིཏེནཨསངྒཧིཏཔདཝཎྞནཱ
2. Dutiyanayo saṅgahitenaasaṅgahitapadavaṇṇanā
༡༧༡. ཨིདཱནི སངྒཧིཏེན ཨསངྒཧིཏཔདཾ བྷཱཛེཏུཾ ཙཀྑཱཡཏནེནཱཏིཨཱདི ཨཱརདྡྷཾ། ཏཏྲིདཾ ལཀྑཎཾ – ཨིམསྨིཉྷི ཝཱརེ ཡཾ ཁནྡྷཔདེན སངྒཧིཏཾ ཧུཏྭཱ ཨཱཡཏནདྷཱཏུཔདེཧི ཨསངྒཧིཏཾ, ཁནྡྷཱཡཏནཔདེཧི ཝཱ སངྒཧིཏཾ ཧུཏྭཱ དྷཱཏུཔདེན ཨསངྒཧིཏཾ, ཏསྶ ཁནྡྷཱདཱིཧི ཨསངྒཧཾ པུཙྪིཏྭཱ ཝིསྶཛྫནཾ ཀཏཾ། ཏཾ པན རཱུཔཀྑནྡྷཱདཱིསུ ན ཡུཛྫཏི། རཱུཔཀྑནྡྷེན ཧི རཱུཔཀྑནྡྷོཝ སངྒཧིཏོ། སོ ཙ ཨཌྜྷེཀཱདསཧི ཨཱཡཏནདྷཱཏཱུཧི ཨསངྒཧིཏོ ནཱམ ནཏྠི། ཝེདནཱཀྑནྡྷེན ཙ ཝེདནཱཀྑནྡྷོཝ སངྒཧིཏོ། སོཔི དྷམྨཱཡཏནདྷམྨདྷཱཏཱུཧི ཨསངྒཧིཏོ ནཱམ ནཏྠི། ཨེཝཾ ཨསངྒཧིཏཏཱཡ ཨབྷཱཝཏོ ཨེཏཱནི ཨཉྙཱནི ཙ ཨེཝརཱུཔཱནི མནཱཡཏནདྷམྨཱཡཏནཱདཱིནི པདཱནི ཨིམསྨིཾ ཝཱརེ ན གཧིཏཱནི། ཡཱནི པན པདཱནི རཱུཔེཀདེསཾ ཨརཱུཔེན ཨསམྨིསྶཾ, ཝིཉྙཱཎེཀདེསཉྩ ཨཉྙེན ཨསམྨིསྶཾ དཱིཔེནྟི, ཏཱནི ཨིདྷ གཧིཏཱནི། པརིཡོསཱནེ ཙ –
171. Idāni saṅgahitena asaṅgahitapadaṃ bhājetuṃ cakkhāyatanenātiādi āraddhaṃ. Tatridaṃ lakkhaṇaṃ – imasmiñhi vāre yaṃ khandhapadena saṅgahitaṃ hutvā āyatanadhātupadehi asaṅgahitaṃ, khandhāyatanapadehi vā saṅgahitaṃ hutvā dhātupadena asaṅgahitaṃ, tassa khandhādīhi asaṅgahaṃ pucchitvā vissajjanaṃ kataṃ. Taṃ pana rūpakkhandhādīsu na yujjati. Rūpakkhandhena hi rūpakkhandhova saṅgahito. So ca aḍḍhekādasahi āyatanadhātūhi asaṅgahito nāma natthi. Vedanākkhandhena ca vedanākkhandhova saṅgahito. Sopi dhammāyatanadhammadhātūhi asaṅgahito nāma natthi. Evaṃ asaṅgahitatāya abhāvato etāni aññāni ca evarūpāni manāyatanadhammāyatanādīni padāni imasmiṃ vāre na gahitāni. Yāni pana padāni rūpekadesaṃ arūpena asammissaṃ, viññāṇekadesañca aññena asammissaṃ dīpenti, tāni idha gahitāni. Pariyosāne ca –
‘‘དསཱཡཏནཱ སཏྟརས དྷཱཏུཡོ,
‘‘Dasāyatanā sattarasa dhātuyo,
སཏྟིནྡྲིཡཱ ཨསཉྙཱབྷཝོ ཨེཀཝོཀཱརབྷཝོ།
Sattindriyā asaññābhavo ekavokārabhavo;
པརིདེཝོ སནིདསྶནསཔྤཊིགྷཾ,
Paridevo sanidassanasappaṭighaṃ,
ཨནིདསྶནཾ པུནདེཝ སཔྤཊིགྷཾ ཨུཔཱདཱ’’ཏི༎
Anidassanaṃ punadeva sappaṭighaṃ upādā’’ti.
ཨེཝཾ ཨུདྡཱནགཱཐཱཡ དསྶིཏཱནེཝ། ཏསྨཱ ཏེསཾ ཝསེནེཝ སངྒཧཱསངྒཧོ ཝེདིཏབྦོ། པཉྷཝསེན ཧི ཨིམསྨིཾ ཝཱརེ ཨཱཡཏནདྷཱཏུཝསེནེཝ སདིསཝིསྶཛྫནེ ཝཱིསཏི དྷམྨེ སམོདྷཱནེཏྭཱ ཨེཀོ པཉྷོ ཀཏོ, སཏྟ ཝིཉྙཱཎདྷཱཏུཡོ སམོདྷཱནེཏྭཱ ཨེཀོ, སཏྟིནྡྲིཡཱནི སམོདྷཱནེཏྭཱ ཨེཀོ, དྭེ བྷཝེ སམོདྷཱནེཏྭཱ ཨེཀོ, པརིདེཝེན ཙ སནིདསྶནསཔྤཊིགྷེཧི ཙ ཨེཀོ, ཨནིདསྶནསཔྤཊིགྷེཧི ཨེཀོ, སནིདསྶནེཧི ཨེཀོ, སཔྤཊིགྷེཧི ཙ ཨུཔཱདཱདྷམྨེཧི ཙ ཨེཀོཏི ཨཊྛ པཉྷཱ ཀཏཱ། ཏེསུ ཁནྡྷཱདིཝིབྷཱགོ ཨེཝཾ ཝེདིཏབྦོ སེཡྻཐིདཾ – པཋམཔཉྷེ ཏཱཝ ཙཏཱུཧི ཁནྡྷེཧཱིཏི ཨརཱུཔཀྑནྡྷེཧི, དྭཱིཧཱཡཏནེཧཱིཏི ཙཀྑཱཡཏནཱདཱིསུ ཨེཀེཀེན སདྡྷིཾ མནཱཡཏནེན, ཨཊྛཧི དྷཱཏཱུཧཱིཏི ཙཀྑུདྷཱཏུཨཱདཱིསུ ཨེཀེཀཱཡ སདྡྷིཾ སཏྟཧི ཝིཉྙཱཎདྷཱཏཱུཧི།
Evaṃ uddānagāthāya dassitāneva. Tasmā tesaṃ vaseneva saṅgahāsaṅgaho veditabbo. Pañhavasena hi imasmiṃ vāre āyatanadhātuvaseneva sadisavissajjane vīsati dhamme samodhānetvā eko pañho kato, satta viññāṇadhātuyo samodhānetvā eko, sattindriyāni samodhānetvā eko, dve bhave samodhānetvā eko, paridevena ca sanidassanasappaṭighehi ca eko, anidassanasappaṭighehi eko, sanidassanehi eko, sappaṭighehi ca upādādhammehi ca ekoti aṭṭha pañhā katā. Tesu khandhādivibhāgo evaṃ veditabbo seyyathidaṃ – paṭhamapañhe tāva catūhi khandhehīti arūpakkhandhehi, dvīhāyatanehīti cakkhāyatanādīsu ekekena saddhiṃ manāyatanena, aṭṭhahi dhātūhīti cakkhudhātuādīsu ekekāya saddhiṃ sattahi viññāṇadhātūhi.
ཏཏྲཱཡཾ ནཡོ – ཙཀྑཱཡཏནེན ཧི ཁནྡྷསངྒཧེན རཱུཔཀྑནྡྷོ སངྒཧིཏོ། ཏསྨིཾ སངྒཧིཏེ རཱུཔཀྑནྡྷེ ཨཱཡཏནསངྒཧེན ཙཀྑཱཡཏནམེཝེཀཾ སངྒཧིཏཾ། སེསཱནི དས ཨཱཡཏནཱནི ཨསངྒཧིཏཱནི། དྷཱཏུསངྒཧེནཔི ཏེན ཙཀྑུདྷཱཏུཡེཝེཀཱ སངྒཧིཏཱ། སེསཱ དས དྷཱཏུཡོ ཨསངྒཧིཏཱ། ཨིཏི ཡཱནི ཏེན ཨསངྒཧིཏཱནི དསཱཡཏནཱནི, ཏཱནི ཙཀྑཱཡཏནམནཱཡཏནེཧི དྭཱིཧི ཨསངྒཧིཏཱནི། ཡཱཔི ཏེན ཨསངྒཧིཏཱ དས དྷཱཏུཡོ, ཏཱ ཙཀྑུདྷཱཏུཡཱ ཙེཝ སཏྟཧི ཙ ཝིཉྙཱཎདྷཱཏཱུཧི ཨསངྒཧིཏཱཏི། རཱུཔཱཡཏནཱདཱིསུཔི ཨེསེཝ ནཡོ།
Tatrāyaṃ nayo – cakkhāyatanena hi khandhasaṅgahena rūpakkhandho saṅgahito. Tasmiṃ saṅgahite rūpakkhandhe āyatanasaṅgahena cakkhāyatanamevekaṃ saṅgahitaṃ. Sesāni dasa āyatanāni asaṅgahitāni. Dhātusaṅgahenapi tena cakkhudhātuyevekā saṅgahitā. Sesā dasa dhātuyo asaṅgahitā. Iti yāni tena asaṅgahitāni dasāyatanāni, tāni cakkhāyatanamanāyatanehi dvīhi asaṅgahitāni. Yāpi tena asaṅgahitā dasa dhātuyo, tā cakkhudhātuyā ceva sattahi ca viññāṇadhātūhi asaṅgahitāti. Rūpāyatanādīsupi eseva nayo.
༡༧༢. དུཏིཡཔཉྷེ – ཡསྨཱ ཡཱཡ ཀཱཡཙི ཝིཉྙཱཎདྷཱཏུཡཱ སངྒཧིཏོ ཝིཉྙཱཎཀྑནྡྷོ མནཱཡཏནེན ཨསངྒཧིཏོ ནཱམ ནཏྠི, ཏསྨཱ ཨཱཡཏནསངྒཧེན སངྒཧིཏཱཏི ཝུཏྟཾ། ཨེཏྠ པན ཙཏཱུཧི ཁནྡྷེཧཱིཏི རཱུཔཱདཱིཧི ཙཏཱུཧི། ཨེཀཱདསཧཱཡཏནེཧཱིཏི མནཱཡཏནཝཛྫེཧི། དྭཱདསཧི དྷཱཏཱུཧཱིཏི ཡཐཱནུརཱུཔཱ ཚ ཝིཉྙཱཎདྷཱཏུཡོ ཨཔནེཏྭཱ སེསཱཧི དྭཱདསཧི། ཙཀྑུཝིཉྙཱཎདྷཱཏུཡཱ ཧི ཙཀྑུཝིཉྙཱཎདྷཱཏུཡེཝ སངྒཧིཏཱ, ཨིཏརཱ ཨསངྒཧིཏཱ། སོཏཝིཉྙཱཎདྷཱཏུཨཱདཱིསུཔི ཨེསེཝ ནཡོ།
172. Dutiyapañhe – yasmā yāya kāyaci viññāṇadhātuyā saṅgahito viññāṇakkhandho manāyatanena asaṅgahito nāma natthi, tasmā āyatanasaṅgahena saṅgahitāti vuttaṃ. Ettha pana catūhi khandhehīti rūpādīhi catūhi. Ekādasahāyatanehīti manāyatanavajjehi. Dvādasahi dhātūhīti yathānurūpā cha viññāṇadhātuyo apanetvā sesāhi dvādasahi. Cakkhuviññāṇadhātuyā hi cakkhuviññāṇadhātuyeva saṅgahitā, itarā asaṅgahitā. Sotaviññāṇadhātuādīsupi eseva nayo.
༡༧༣. ཏཏིཡཔཉྷེ – ཙཀྑུནྡྲིཡཱདཱིནཾ ཝིསྶཛྫནཾ ཙཀྑཱཡཏནཱདིསདིསམེཝ། ཨིཏྠིནྡྲིཡཔུརིསིནྡྲིཡེསུ པན དྷམྨཱཡཏནེན སདྡྷིཾ དྭེ ཨཱཡཏནཱནི, དྷམྨདྷཱཏུཡཱ ཙ སདྡྷིཾ ཨཊྛ དྷཱཏུཡོ ཝེདིཏབྦཱ།
173. Tatiyapañhe – cakkhundriyādīnaṃ vissajjanaṃ cakkhāyatanādisadisameva. Itthindriyapurisindriyesu pana dhammāyatanena saddhiṃ dve āyatanāni, dhammadhātuyā ca saddhiṃ aṭṭha dhātuyo veditabbā.
༡༧༤. ཙཏུཏྠཔཉྷེ – ཏཱིཧཱཡཏནེཧཱིཏི རཱུཔཱཡཏནདྷམྨཱཡཏནམནཱཡཏནེཧི། ཏེསུ ཧི བྷཝེསུ རཱུཔཱཡཏནདྷམྨཱཡཏནཝསེན དྭེཝ ཨཱཡཏནཱནི ཏེཧི སངྒཧིཏཱནི ། སེསཱནི ནཝ རཱུཔཱཡཏནཱནི ཏེཧེཝ ཙ དྭཱིཧི, མནཱཡཏནེན ཙཱཏི ཏཱིཧི ཨསངྒཧིཏཱནི ནཱམ ཧོནྟི། ནཝཧི དྷཱཏཱུཧཱིཏི རཱུཔདྷཱཏུདྷམྨདྷཱཏཱུཧི སདྡྷིཾ སཏྟཧི ཝིཉྙཱཎདྷཱཏཱུཧི།
174. Catutthapañhe – tīhāyatanehīti rūpāyatanadhammāyatanamanāyatanehi. Tesu hi bhavesu rūpāyatanadhammāyatanavasena dveva āyatanāni tehi saṅgahitāni . Sesāni nava rūpāyatanāni teheva ca dvīhi, manāyatanena cāti tīhi asaṅgahitāni nāma honti. Navahi dhātūhīti rūpadhātudhammadhātūhi saddhiṃ sattahi viññāṇadhātūhi.
༡༧༥. པཉྩམཔཉྷེ – དྭཱིཧཱཡཏནེཧཱིཏི པཋམཔདཾ སནྡྷཱཡ སདྡཱཡཏནམནཱཡཏནེཧི། དུཏིཡཔདཾ སནྡྷཱཡ རཱུཔཱཡཏནམནཱཡཏནེཧི། དྷཱཏུཡོཔི ཏེསཾཡེཝ ཨེཀེཀེན སདྡྷིཾ སཏྟ ཝིཉྙཱཎདྷཱཏུཡོ ཝེདིཏབྦཱ།
175. Pañcamapañhe – dvīhāyatanehīti paṭhamapadaṃ sandhāya saddāyatanamanāyatanehi. Dutiyapadaṃ sandhāya rūpāyatanamanāyatanehi. Dhātuyopi tesaṃyeva ekekena saddhiṃ satta viññāṇadhātuyo veditabbā.
༡༧༦. ཚཊྛཔཉྷེ – དསཧཱཡཏནེཧཱིཏི རཱུཔཱཡཏནདྷམྨཱཡཏནཝཛྫེཧི། སོལ༹སཧི དྷཱཏཱུཧཱིཏི རཱུཔདྷཱཏུདྷམྨདྷཱཏུཝཛྫེཧེཝ། ཀཐཾ? ཨནིདསྶནསཔྤཊིགྷཱ ཧི དྷམྨཱ ནཱམ ནཝ ཨོལཱ༹རིཀཱཡཏནཱནི། ཏེཧི ཁནྡྷསངྒཧེན སངྒཧིཏེ རཱུཔཀྑནྡྷེ, ཨཱཡཏནསངྒཧེན ཏཱནེཝ ནཝཱཡཏནཱནི སངྒཧིཏཱནི། རཱུཔཱཡཏནདྷམྨཱཡཏནཱནི ཨསངྒཧིཏཱནི། དྷཱཏུསངྒཧེནཔི ཏཱ ཨེཝ ནཝ དྷཱཏུཡོ སངྒཧིཏཱ། རཱུཔདྷཱཏུདྷམྨདྷཱཏུཡོ ཨསངྒཧིཏཱ། ཨིཏི ཡཱནི ཏེཧི ཨསངྒཧིཏཱནི དྭེ ཨཱཡཏནཱནི , ཏཱནི རཱུཔཱཡཏནཝཛྫེཧི ནཝཧི ཨོལཱ༹རིཀཱཡཏནེཧི, མནཱཡཏནེན ཙཱཏི དསཧི ཨསངྒཧིཏཱནི། ཡཱཔི ཏེཧི ཨསངྒཧིཏཱ དྭེ དྷཱཏུཡོ, ཏཱ རཱུཔདྷཱཏུཝཛྫཱཧི ནཝཧི ཨོལཱ༹རིཀདྷཱཏཱུཧི, སཏྟཧི ཙ ཝིཉྙཱཎདྷཱཏཱུཧཱིཏི སོལ༹སཧི ཨསངྒཧིཏཱཏི ཝེདིཏབྦཱ།
176. Chaṭṭhapañhe – dasahāyatanehīti rūpāyatanadhammāyatanavajjehi. Soḷasahi dhātūhīti rūpadhātudhammadhātuvajjeheva. Kathaṃ? Anidassanasappaṭighā hi dhammā nāma nava oḷārikāyatanāni. Tehi khandhasaṅgahena saṅgahite rūpakkhandhe, āyatanasaṅgahena tāneva navāyatanāni saṅgahitāni. Rūpāyatanadhammāyatanāni asaṅgahitāni. Dhātusaṅgahenapi tā eva nava dhātuyo saṅgahitā. Rūpadhātudhammadhātuyo asaṅgahitā. Iti yāni tehi asaṅgahitāni dve āyatanāni , tāni rūpāyatanavajjehi navahi oḷārikāyatanehi, manāyatanena cāti dasahi asaṅgahitāni. Yāpi tehi asaṅgahitā dve dhātuyo, tā rūpadhātuvajjāhi navahi oḷārikadhātūhi, sattahi ca viññāṇadhātūhīti soḷasahi asaṅgahitāti veditabbā.
༡༧༧. སཏྟམཔཉྷེ – དྭཱིཧཱཡཏནེཧཱིཏི རཱུཔཱཡཏནམནཱཡཏནེཧི། ཨཊྛཧི དྷཱཏཱུཧཱིཏི རཱུཔདྷཱཏུཡཱ སདྡྷིཾ སཏྟཧི ཝིཉྙཱཎདྷཱཏཱུཧི།
177. Sattamapañhe – dvīhāyatanehīti rūpāyatanamanāyatanehi. Aṭṭhahi dhātūhīti rūpadhātuyā saddhiṃ sattahi viññāṇadhātūhi.
༡༧༨. ཨཊྛམཔཉྷེ – ཨེཀཱདསཧཱཡཏནེཧཱིཏི སཔྤཊིགྷདྷམྨེ སནྡྷཱཡ དྷམྨཱཡཏནཝཛྫེཧི, ཨུཔཱདཱདྷམྨེ སནྡྷཱཡ ཕོཊྛབྦཱཡཏནཝཛྫེཧི། དྷཱཏཱུསུཔི ཨེསེཝ ནཡོ། ཨཏྠཡོཛནཱ པནེཏྠ ཧེཊྛཱ ཝུཏྟནཡེནེཝ ཝེདིཏབྦཱཏི།
178. Aṭṭhamapañhe – ekādasahāyatanehīti sappaṭighadhamme sandhāya dhammāyatanavajjehi, upādādhamme sandhāya phoṭṭhabbāyatanavajjehi. Dhātūsupi eseva nayo. Atthayojanā panettha heṭṭhā vuttanayeneva veditabbāti.
སངྒཧིཏེནཨསངྒཧིཏཔདཝཎྞནཱ།
Saṅgahitenaasaṅgahitapadavaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / དྷཱཏུཀཐཱཔཱལི༹ • Dhātukathāpāḷi / ༢. སངྒཧིཏེནཨསངྒཧིཏཔདནིདྡེསོ • 2. Saṅgahitenaasaṅgahitapadaniddeso
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༢. དུཏིཡནཡོ སངྒཧིཏེནཨསངྒཧིཏཔདཝཎྞནཱ • 2. Dutiyanayo saṅgahitenaasaṅgahitapadavaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༢. དུཏིཡནཡོ སངྒཧིཏེནཨསངྒཧིཏཔདཝཎྞནཱ • 2. Dutiyanayo saṅgahitenaasaṅgahitapadavaṇṇanā
