| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੨. ਦੁਤਿਯਨਯੋ ਸਙ੍ਗਹਿਤੇਨਅਸਙ੍ਗਹਿਤਪਦવਣ੍ਣਨਾ
2. Dutiyanayo saṅgahitenaasaṅgahitapadavaṇṇanā
੧੭੧. ਇਦਾਨਿ ਸਙ੍ਗਹਿਤੇਨ ਅਸਙ੍ਗਹਿਤਪਦਂ ਭਾਜੇਤੁਂ ਚਕ੍ਖਾਯਤਨੇਨਾਤਿਆਦਿ ਆਰਦ੍ਧਂ। ਤਤ੍ਰਿਦਂ ਲਕ੍ਖਣਂ – ਇਮਸ੍ਮਿਞ੍ਹਿ વਾਰੇ ਯਂ ਖਨ੍ਧਪਦੇਨ ਸਙ੍ਗਹਿਤਂ ਹੁਤ੍વਾ ਆਯਤਨਧਾਤੁਪਦੇਹਿ ਅਸਙ੍ਗਹਿਤਂ, ਖਨ੍ਧਾਯਤਨਪਦੇਹਿ વਾ ਸਙ੍ਗਹਿਤਂ ਹੁਤ੍વਾ ਧਾਤੁਪਦੇਨ ਅਸਙ੍ਗਹਿਤਂ, ਤਸ੍ਸ ਖਨ੍ਧਾਦੀਹਿ ਅਸਙ੍ਗਹਂ ਪੁਚ੍ਛਿਤ੍વਾ વਿਸ੍ਸਜ੍ਜਨਂ ਕਤਂ। ਤਂ ਪਨ ਰੂਪਕ੍ਖਨ੍ਧਾਦੀਸੁ ਨ ਯੁਜ੍ਜਤਿ। ਰੂਪਕ੍ਖਨ੍ਧੇਨ ਹਿ ਰੂਪਕ੍ਖਨ੍ਧੋવ ਸਙ੍ਗਹਿਤੋ। ਸੋ ਚ ਅਡ੍ਢੇਕਾਦਸਹਿ ਆਯਤਨਧਾਤੂਹਿ ਅਸਙ੍ਗਹਿਤੋ ਨਾਮ ਨਤ੍ਥਿ। વੇਦਨਾਕ੍ਖਨ੍ਧੇਨ ਚ વੇਦਨਾਕ੍ਖਨ੍ਧੋવ ਸਙ੍ਗਹਿਤੋ। ਸੋਪਿ ਧਮ੍ਮਾਯਤਨਧਮ੍ਮਧਾਤੂਹਿ ਅਸਙ੍ਗਹਿਤੋ ਨਾਮ ਨਤ੍ਥਿ। ਏવਂ ਅਸਙ੍ਗਹਿਤਤਾਯ ਅਭਾવਤੋ ਏਤਾਨਿ ਅਞ੍ਞਾਨਿ ਚ ਏવਰੂਪਾਨਿ ਮਨਾਯਤਨਧਮ੍ਮਾਯਤਨਾਦੀਨਿ ਪਦਾਨਿ ਇਮਸ੍ਮਿਂ વਾਰੇ ਨ ਗਹਿਤਾਨਿ। ਯਾਨਿ ਪਨ ਪਦਾਨਿ ਰੂਪੇਕਦੇਸਂ ਅਰੂਪੇਨ ਅਸਮ੍ਮਿਸ੍ਸਂ, વਿਞ੍ਞਾਣੇਕਦੇਸਞ੍ਚ ਅਞ੍ਞੇਨ ਅਸਮ੍ਮਿਸ੍ਸਂ ਦੀਪੇਨ੍ਤਿ, ਤਾਨਿ ਇਧ ਗਹਿਤਾਨਿ। ਪਰਿਯੋਸਾਨੇ ਚ –
171. Idāni saṅgahitena asaṅgahitapadaṃ bhājetuṃ cakkhāyatanenātiādi āraddhaṃ. Tatridaṃ lakkhaṇaṃ – imasmiñhi vāre yaṃ khandhapadena saṅgahitaṃ hutvā āyatanadhātupadehi asaṅgahitaṃ, khandhāyatanapadehi vā saṅgahitaṃ hutvā dhātupadena asaṅgahitaṃ, tassa khandhādīhi asaṅgahaṃ pucchitvā vissajjanaṃ kataṃ. Taṃ pana rūpakkhandhādīsu na yujjati. Rūpakkhandhena hi rūpakkhandhova saṅgahito. So ca aḍḍhekādasahi āyatanadhātūhi asaṅgahito nāma natthi. Vedanākkhandhena ca vedanākkhandhova saṅgahito. Sopi dhammāyatanadhammadhātūhi asaṅgahito nāma natthi. Evaṃ asaṅgahitatāya abhāvato etāni aññāni ca evarūpāni manāyatanadhammāyatanādīni padāni imasmiṃ vāre na gahitāni. Yāni pana padāni rūpekadesaṃ arūpena asammissaṃ, viññāṇekadesañca aññena asammissaṃ dīpenti, tāni idha gahitāni. Pariyosāne ca –
‘‘ਦਸਾਯਤਨਾ ਸਤ੍ਤਰਸ ਧਾਤੁਯੋ,
‘‘Dasāyatanā sattarasa dhātuyo,
ਸਤ੍ਤਿਨ੍ਦ੍ਰਿਯਾ ਅਸਞ੍ਞਾਭવੋ ਏਕવੋਕਾਰਭવੋ।
Sattindriyā asaññābhavo ekavokārabhavo;
ਪਰਿਦੇવੋ ਸਨਿਦਸ੍ਸਨਸਪ੍ਪਟਿਘਂ,
Paridevo sanidassanasappaṭighaṃ,
ਅਨਿਦਸ੍ਸਨਂ ਪੁਨਦੇવ ਸਪ੍ਪਟਿਘਂ ਉਪਾਦਾ’’ਤਿ॥
Anidassanaṃ punadeva sappaṭighaṃ upādā’’ti.
ਏવਂ ਉਦ੍ਦਾਨਗਾਥਾਯ ਦਸ੍ਸਿਤਾਨੇવ। ਤਸ੍ਮਾ ਤੇਸਂ વਸੇਨੇવ ਸਙ੍ਗਹਾਸਙ੍ਗਹੋ વੇਦਿਤਬ੍ਬੋ। ਪਞ੍ਹવਸੇਨ ਹਿ ਇਮਸ੍ਮਿਂ વਾਰੇ ਆਯਤਨਧਾਤੁવਸੇਨੇવ ਸਦਿਸવਿਸ੍ਸਜ੍ਜਨੇ વੀਸਤਿ ਧਮ੍ਮੇ ਸਮੋਧਾਨੇਤ੍વਾ ਏਕੋ ਪਞ੍ਹੋ ਕਤੋ, ਸਤ੍ਤ વਿਞ੍ਞਾਣਧਾਤੁਯੋ ਸਮੋਧਾਨੇਤ੍વਾ ਏਕੋ, ਸਤ੍ਤਿਨ੍ਦ੍ਰਿਯਾਨਿ ਸਮੋਧਾਨੇਤ੍વਾ ਏਕੋ, ਦ੍વੇ ਭવੇ ਸਮੋਧਾਨੇਤ੍વਾ ਏਕੋ, ਪਰਿਦੇવੇਨ ਚ ਸਨਿਦਸ੍ਸਨਸਪ੍ਪਟਿਘੇਹਿ ਚ ਏਕੋ, ਅਨਿਦਸ੍ਸਨਸਪ੍ਪਟਿਘੇਹਿ ਏਕੋ, ਸਨਿਦਸ੍ਸਨੇਹਿ ਏਕੋ, ਸਪ੍ਪਟਿਘੇਹਿ ਚ ਉਪਾਦਾਧਮ੍ਮੇਹਿ ਚ ਏਕੋਤਿ ਅਟ੍ਠ ਪਞ੍ਹਾ ਕਤਾ। ਤੇਸੁ ਖਨ੍ਧਾਦਿવਿਭਾਗੋ ਏવਂ વੇਦਿਤਬ੍ਬੋ ਸੇਯ੍ਯਥਿਦਂ – ਪਠਮਪਞ੍ਹੇ ਤਾવ ਚਤੂਹਿ ਖਨ੍ਧੇਹੀਤਿ ਅਰੂਪਕ੍ਖਨ੍ਧੇਹਿ, ਦ੍વੀਹਾਯਤਨੇਹੀਤਿ ਚਕ੍ਖਾਯਤਨਾਦੀਸੁ ਏਕੇਕੇਨ ਸਦ੍ਧਿਂ ਮਨਾਯਤਨੇਨ, ਅਟ੍ਠਹਿ ਧਾਤੂਹੀਤਿ ਚਕ੍ਖੁਧਾਤੁਆਦੀਸੁ ਏਕੇਕਾਯ ਸਦ੍ਧਿਂ ਸਤ੍ਤਹਿ વਿਞ੍ਞਾਣਧਾਤੂਹਿ।
Evaṃ uddānagāthāya dassitāneva. Tasmā tesaṃ vaseneva saṅgahāsaṅgaho veditabbo. Pañhavasena hi imasmiṃ vāre āyatanadhātuvaseneva sadisavissajjane vīsati dhamme samodhānetvā eko pañho kato, satta viññāṇadhātuyo samodhānetvā eko, sattindriyāni samodhānetvā eko, dve bhave samodhānetvā eko, paridevena ca sanidassanasappaṭighehi ca eko, anidassanasappaṭighehi eko, sanidassanehi eko, sappaṭighehi ca upādādhammehi ca ekoti aṭṭha pañhā katā. Tesu khandhādivibhāgo evaṃ veditabbo seyyathidaṃ – paṭhamapañhe tāva catūhi khandhehīti arūpakkhandhehi, dvīhāyatanehīti cakkhāyatanādīsu ekekena saddhiṃ manāyatanena, aṭṭhahi dhātūhīti cakkhudhātuādīsu ekekāya saddhiṃ sattahi viññāṇadhātūhi.
ਤਤ੍ਰਾਯਂ ਨਯੋ – ਚਕ੍ਖਾਯਤਨੇਨ ਹਿ ਖਨ੍ਧਸਙ੍ਗਹੇਨ ਰੂਪਕ੍ਖਨ੍ਧੋ ਸਙ੍ਗਹਿਤੋ। ਤਸ੍ਮਿਂ ਸਙ੍ਗਹਿਤੇ ਰੂਪਕ੍ਖਨ੍ਧੇ ਆਯਤਨਸਙ੍ਗਹੇਨ ਚਕ੍ਖਾਯਤਨਮੇવੇਕਂ ਸਙ੍ਗਹਿਤਂ। ਸੇਸਾਨਿ ਦਸ ਆਯਤਨਾਨਿ ਅਸਙ੍ਗਹਿਤਾਨਿ। ਧਾਤੁਸਙ੍ਗਹੇਨਪਿ ਤੇਨ ਚਕ੍ਖੁਧਾਤੁਯੇવੇਕਾ ਸਙ੍ਗਹਿਤਾ। ਸੇਸਾ ਦਸ ਧਾਤੁਯੋ ਅਸਙ੍ਗਹਿਤਾ। ਇਤਿ ਯਾਨਿ ਤੇਨ ਅਸਙ੍ਗਹਿਤਾਨਿ ਦਸਾਯਤਨਾਨਿ, ਤਾਨਿ ਚਕ੍ਖਾਯਤਨਮਨਾਯਤਨੇਹਿ ਦ੍વੀਹਿ ਅਸਙ੍ਗਹਿਤਾਨਿ। ਯਾਪਿ ਤੇਨ ਅਸਙ੍ਗਹਿਤਾ ਦਸ ਧਾਤੁਯੋ, ਤਾ ਚਕ੍ਖੁਧਾਤੁਯਾ ਚੇવ ਸਤ੍ਤਹਿ ਚ વਿਞ੍ਞਾਣਧਾਤੂਹਿ ਅਸਙ੍ਗਹਿਤਾਤਿ। ਰੂਪਾਯਤਨਾਦੀਸੁਪਿ ਏਸੇવ ਨਯੋ।
Tatrāyaṃ nayo – cakkhāyatanena hi khandhasaṅgahena rūpakkhandho saṅgahito. Tasmiṃ saṅgahite rūpakkhandhe āyatanasaṅgahena cakkhāyatanamevekaṃ saṅgahitaṃ. Sesāni dasa āyatanāni asaṅgahitāni. Dhātusaṅgahenapi tena cakkhudhātuyevekā saṅgahitā. Sesā dasa dhātuyo asaṅgahitā. Iti yāni tena asaṅgahitāni dasāyatanāni, tāni cakkhāyatanamanāyatanehi dvīhi asaṅgahitāni. Yāpi tena asaṅgahitā dasa dhātuyo, tā cakkhudhātuyā ceva sattahi ca viññāṇadhātūhi asaṅgahitāti. Rūpāyatanādīsupi eseva nayo.
੧੭੨. ਦੁਤਿਯਪਞ੍ਹੇ – ਯਸ੍ਮਾ ਯਾਯ ਕਾਯਚਿ વਿਞ੍ਞਾਣਧਾਤੁਯਾ ਸਙ੍ਗਹਿਤੋ વਿਞ੍ਞਾਣਕ੍ਖਨ੍ਧੋ ਮਨਾਯਤਨੇਨ ਅਸਙ੍ਗਹਿਤੋ ਨਾਮ ਨਤ੍ਥਿ, ਤਸ੍ਮਾ ਆਯਤਨਸਙ੍ਗਹੇਨ ਸਙ੍ਗਹਿਤਾਤਿ વੁਤ੍ਤਂ। ਏਤ੍ਥ ਪਨ ਚਤੂਹਿ ਖਨ੍ਧੇਹੀਤਿ ਰੂਪਾਦੀਹਿ ਚਤੂਹਿ। ਏਕਾਦਸਹਾਯਤਨੇਹੀਤਿ ਮਨਾਯਤਨવਜ੍ਜੇਹਿ। ਦ੍વਾਦਸਹਿ ਧਾਤੂਹੀਤਿ ਯਥਾਨੁਰੂਪਾ ਛ વਿਞ੍ਞਾਣਧਾਤੁਯੋ ਅਪਨੇਤ੍વਾ ਸੇਸਾਹਿ ਦ੍વਾਦਸਹਿ। ਚਕ੍ਖੁવਿਞ੍ਞਾਣਧਾਤੁਯਾ ਹਿ ਚਕ੍ਖੁવਿਞ੍ਞਾਣਧਾਤੁਯੇવ ਸਙ੍ਗਹਿਤਾ, ਇਤਰਾ ਅਸਙ੍ਗਹਿਤਾ। ਸੋਤવਿਞ੍ਞਾਣਧਾਤੁਆਦੀਸੁਪਿ ਏਸੇવ ਨਯੋ।
172. Dutiyapañhe – yasmā yāya kāyaci viññāṇadhātuyā saṅgahito viññāṇakkhandho manāyatanena asaṅgahito nāma natthi, tasmā āyatanasaṅgahena saṅgahitāti vuttaṃ. Ettha pana catūhi khandhehīti rūpādīhi catūhi. Ekādasahāyatanehīti manāyatanavajjehi. Dvādasahi dhātūhīti yathānurūpā cha viññāṇadhātuyo apanetvā sesāhi dvādasahi. Cakkhuviññāṇadhātuyā hi cakkhuviññāṇadhātuyeva saṅgahitā, itarā asaṅgahitā. Sotaviññāṇadhātuādīsupi eseva nayo.
੧੭੩. ਤਤਿਯਪਞ੍ਹੇ – ਚਕ੍ਖੁਨ੍ਦ੍ਰਿਯਾਦੀਨਂ વਿਸ੍ਸਜ੍ਜਨਂ ਚਕ੍ਖਾਯਤਨਾਦਿਸਦਿਸਮੇવ। ਇਤ੍ਥਿਨ੍ਦ੍ਰਿਯਪੁਰਿਸਿਨ੍ਦ੍ਰਿਯੇਸੁ ਪਨ ਧਮ੍ਮਾਯਤਨੇਨ ਸਦ੍ਧਿਂ ਦ੍વੇ ਆਯਤਨਾਨਿ, ਧਮ੍ਮਧਾਤੁਯਾ ਚ ਸਦ੍ਧਿਂ ਅਟ੍ਠ ਧਾਤੁਯੋ વੇਦਿਤਬ੍ਬਾ।
173. Tatiyapañhe – cakkhundriyādīnaṃ vissajjanaṃ cakkhāyatanādisadisameva. Itthindriyapurisindriyesu pana dhammāyatanena saddhiṃ dve āyatanāni, dhammadhātuyā ca saddhiṃ aṭṭha dhātuyo veditabbā.
੧੭੪. ਚਤੁਤ੍ਥਪਞ੍ਹੇ – ਤੀਹਾਯਤਨੇਹੀਤਿ ਰੂਪਾਯਤਨਧਮ੍ਮਾਯਤਨਮਨਾਯਤਨੇਹਿ। ਤੇਸੁ ਹਿ ਭવੇਸੁ ਰੂਪਾਯਤਨਧਮ੍ਮਾਯਤਨવਸੇਨ ਦ੍વੇવ ਆਯਤਨਾਨਿ ਤੇਹਿ ਸਙ੍ਗਹਿਤਾਨਿ । ਸੇਸਾਨਿ ਨવ ਰੂਪਾਯਤਨਾਨਿ ਤੇਹੇવ ਚ ਦ੍વੀਹਿ, ਮਨਾਯਤਨੇਨ ਚਾਤਿ ਤੀਹਿ ਅਸਙ੍ਗਹਿਤਾਨਿ ਨਾਮ ਹੋਨ੍ਤਿ। ਨવਹਿ ਧਾਤੂਹੀਤਿ ਰੂਪਧਾਤੁਧਮ੍ਮਧਾਤੂਹਿ ਸਦ੍ਧਿਂ ਸਤ੍ਤਹਿ વਿਞ੍ਞਾਣਧਾਤੂਹਿ।
174. Catutthapañhe – tīhāyatanehīti rūpāyatanadhammāyatanamanāyatanehi. Tesu hi bhavesu rūpāyatanadhammāyatanavasena dveva āyatanāni tehi saṅgahitāni . Sesāni nava rūpāyatanāni teheva ca dvīhi, manāyatanena cāti tīhi asaṅgahitāni nāma honti. Navahi dhātūhīti rūpadhātudhammadhātūhi saddhiṃ sattahi viññāṇadhātūhi.
੧੭੫. ਪਞ੍ਚਮਪਞ੍ਹੇ – ਦ੍વੀਹਾਯਤਨੇਹੀਤਿ ਪਠਮਪਦਂ ਸਨ੍ਧਾਯ ਸਦ੍ਦਾਯਤਨਮਨਾਯਤਨੇਹਿ। ਦੁਤਿਯਪਦਂ ਸਨ੍ਧਾਯ ਰੂਪਾਯਤਨਮਨਾਯਤਨੇਹਿ। ਧਾਤੁਯੋਪਿ ਤੇਸਂਯੇવ ਏਕੇਕੇਨ ਸਦ੍ਧਿਂ ਸਤ੍ਤ વਿਞ੍ਞਾਣਧਾਤੁਯੋ વੇਦਿਤਬ੍ਬਾ।
175. Pañcamapañhe – dvīhāyatanehīti paṭhamapadaṃ sandhāya saddāyatanamanāyatanehi. Dutiyapadaṃ sandhāya rūpāyatanamanāyatanehi. Dhātuyopi tesaṃyeva ekekena saddhiṃ satta viññāṇadhātuyo veditabbā.
੧੭੬. ਛਟ੍ਠਪਞ੍ਹੇ – ਦਸਹਾਯਤਨੇਹੀਤਿ ਰੂਪਾਯਤਨਧਮ੍ਮਾਯਤਨવਜ੍ਜੇਹਿ। ਸੋਲ਼ਸਹਿ ਧਾਤੂਹੀਤਿ ਰੂਪਧਾਤੁਧਮ੍ਮਧਾਤੁવਜ੍ਜੇਹੇવ। ਕਥਂ? ਅਨਿਦਸ੍ਸਨਸਪ੍ਪਟਿਘਾ ਹਿ ਧਮ੍ਮਾ ਨਾਮ ਨવ ਓਲ਼ਾਰਿਕਾਯਤਨਾਨਿ। ਤੇਹਿ ਖਨ੍ਧਸਙ੍ਗਹੇਨ ਸਙ੍ਗਹਿਤੇ ਰੂਪਕ੍ਖਨ੍ਧੇ, ਆਯਤਨਸਙ੍ਗਹੇਨ ਤਾਨੇવ ਨવਾਯਤਨਾਨਿ ਸਙ੍ਗਹਿਤਾਨਿ। ਰੂਪਾਯਤਨਧਮ੍ਮਾਯਤਨਾਨਿ ਅਸਙ੍ਗਹਿਤਾਨਿ। ਧਾਤੁਸਙ੍ਗਹੇਨਪਿ ਤਾ ਏવ ਨવ ਧਾਤੁਯੋ ਸਙ੍ਗਹਿਤਾ। ਰੂਪਧਾਤੁਧਮ੍ਮਧਾਤੁਯੋ ਅਸਙ੍ਗਹਿਤਾ। ਇਤਿ ਯਾਨਿ ਤੇਹਿ ਅਸਙ੍ਗਹਿਤਾਨਿ ਦ੍વੇ ਆਯਤਨਾਨਿ , ਤਾਨਿ ਰੂਪਾਯਤਨવਜ੍ਜੇਹਿ ਨવਹਿ ਓਲ਼ਾਰਿਕਾਯਤਨੇਹਿ, ਮਨਾਯਤਨੇਨ ਚਾਤਿ ਦਸਹਿ ਅਸਙ੍ਗਹਿਤਾਨਿ। ਯਾਪਿ ਤੇਹਿ ਅਸਙ੍ਗਹਿਤਾ ਦ੍વੇ ਧਾਤੁਯੋ, ਤਾ ਰੂਪਧਾਤੁવਜ੍ਜਾਹਿ ਨવਹਿ ਓਲ਼ਾਰਿਕਧਾਤੂਹਿ, ਸਤ੍ਤਹਿ ਚ વਿਞ੍ਞਾਣਧਾਤੂਹੀਤਿ ਸੋਲ਼ਸਹਿ ਅਸਙ੍ਗਹਿਤਾਤਿ વੇਦਿਤਬ੍ਬਾ।
176. Chaṭṭhapañhe – dasahāyatanehīti rūpāyatanadhammāyatanavajjehi. Soḷasahi dhātūhīti rūpadhātudhammadhātuvajjeheva. Kathaṃ? Anidassanasappaṭighā hi dhammā nāma nava oḷārikāyatanāni. Tehi khandhasaṅgahena saṅgahite rūpakkhandhe, āyatanasaṅgahena tāneva navāyatanāni saṅgahitāni. Rūpāyatanadhammāyatanāni asaṅgahitāni. Dhātusaṅgahenapi tā eva nava dhātuyo saṅgahitā. Rūpadhātudhammadhātuyo asaṅgahitā. Iti yāni tehi asaṅgahitāni dve āyatanāni , tāni rūpāyatanavajjehi navahi oḷārikāyatanehi, manāyatanena cāti dasahi asaṅgahitāni. Yāpi tehi asaṅgahitā dve dhātuyo, tā rūpadhātuvajjāhi navahi oḷārikadhātūhi, sattahi ca viññāṇadhātūhīti soḷasahi asaṅgahitāti veditabbā.
੧੭੭. ਸਤ੍ਤਮਪਞ੍ਹੇ – ਦ੍વੀਹਾਯਤਨੇਹੀਤਿ ਰੂਪਾਯਤਨਮਨਾਯਤਨੇਹਿ। ਅਟ੍ਠਹਿ ਧਾਤੂਹੀਤਿ ਰੂਪਧਾਤੁਯਾ ਸਦ੍ਧਿਂ ਸਤ੍ਤਹਿ વਿਞ੍ਞਾਣਧਾਤੂਹਿ।
177. Sattamapañhe – dvīhāyatanehīti rūpāyatanamanāyatanehi. Aṭṭhahi dhātūhīti rūpadhātuyā saddhiṃ sattahi viññāṇadhātūhi.
੧੭੮. ਅਟ੍ਠਮਪਞ੍ਹੇ – ਏਕਾਦਸਹਾਯਤਨੇਹੀਤਿ ਸਪ੍ਪਟਿਘਧਮ੍ਮੇ ਸਨ੍ਧਾਯ ਧਮ੍ਮਾਯਤਨવਜ੍ਜੇਹਿ, ਉਪਾਦਾਧਮ੍ਮੇ ਸਨ੍ਧਾਯ ਫੋਟ੍ਠਬ੍ਬਾਯਤਨવਜ੍ਜੇਹਿ। ਧਾਤੂਸੁਪਿ ਏਸੇવ ਨਯੋ। ਅਤ੍ਥਯੋਜਨਾ ਪਨੇਤ੍ਥ ਹੇਟ੍ਠਾ વੁਤ੍ਤਨਯੇਨੇવ વੇਦਿਤਬ੍ਬਾਤਿ।
178. Aṭṭhamapañhe – ekādasahāyatanehīti sappaṭighadhamme sandhāya dhammāyatanavajjehi, upādādhamme sandhāya phoṭṭhabbāyatanavajjehi. Dhātūsupi eseva nayo. Atthayojanā panettha heṭṭhā vuttanayeneva veditabbāti.
ਸਙ੍ਗਹਿਤੇਨਅਸਙ੍ਗਹਿਤਪਦવਣ੍ਣਨਾ।
Saṅgahitenaasaṅgahitapadavaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਧਾਤੁਕਥਾਪਾਲ਼ਿ • Dhātukathāpāḷi / ੨. ਸਙ੍ਗਹਿਤੇਨਅਸਙ੍ਗਹਿਤਪਦਨਿਦ੍ਦੇਸੋ • 2. Saṅgahitenaasaṅgahitapadaniddeso
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਮੂਲਟੀਕਾ • Pañcapakaraṇa-mūlaṭīkā / ੨. ਦੁਤਿਯਨਯੋ ਸਙ੍ਗਹਿਤੇਨਅਸਙ੍ਗਹਿਤਪਦવਣ੍ਣਨਾ • 2. Dutiyanayo saṅgahitenaasaṅgahitapadavaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਅਨੁਟੀਕਾ • Pañcapakaraṇa-anuṭīkā / ੨. ਦੁਤਿਯਨਯੋ ਸਙ੍ਗਹਿਤੇਨਅਸਙ੍ਗਹਿਤਪਦવਣ੍ਣਨਾ • 2. Dutiyanayo saṅgahitenaasaṅgahitapadavaṇṇanā
