| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
១០. ទុតិយនិទានសុត្តវណ្ណនា
10. Dutiyanidānasuttavaṇṇanā
១១៣. ទសមេ កម្មានន្តិ វដ្ដគាមិកម្មានមេវ។ ឆន្ទរាគដ្ឋានិយេតិ ឆន្ទរាគស្ស ការណភូតេ។ អារព្ភាតិ អាគម្ម សន្ធាយ បដិច្ច។ ឆន្ទោតិ តណ្ហាឆន្ទោ។ យោ ចេតសោ សារាគោតិ យោ ចិត្តស្ស រាគោ រជ្ជនា រជ្ជិតត្តំ, ឯតមហំ សំយោជនំ វទាមិ, ពន្ធនំ វទាមីតិ អត្ថោ។ សុក្កបក្ខេ កម្មានន្តិ វិវដ្ដគាមិកម្មានំ។ តទភិនិវត្តេតីតិ តំ អភិនិវត្តេតិ។ យទា វា តេន វិបាកោ ញាតោ ហោតិ វិទិតោ, តទា តេ ចេវ ធម្មេ តញ្ច វិបាកំ អភិនិវត្តេតិ។ ឥមិនា ច បទេន វិបស្សនា កថិតា, តទភិនិវត្តេត្វាតិ ឥមិនា មគ្គោ។ ចេតសា អភិនិវិជ្ឈិត្វាតិ ឥមិនា ច មគ្គោវ។ បញ្ញាយ អតិវិជ្ឈ បស្សតីតិ សហ វិបស្សនាយ មគ្គបញ្ញាយ និព្ពិជ្ឈិត្វា បស្សតិ។ ឯវំ សព្ពត្ថ អត្ថោ វេទិតព្ពោ។ ឥមស្មិំ បន សុត្តេ វដ្ដវិវដ្ដំ កថិតន្តិ។
113. Dasame kammānanti vaṭṭagāmikammānameva. Chandarāgaṭṭhāniyeti chandarāgassa kāraṇabhūte. Ārabbhāti āgamma sandhāya paṭicca. Chandoti taṇhāchando. Yo cetaso sārāgoti yo cittassa rāgo rajjanā rajjitattaṃ, etamahaṃ saṃyojanaṃ vadāmi, bandhanaṃ vadāmīti attho. Sukkapakkhe kammānanti vivaṭṭagāmikammānaṃ. Tadabhinivattetīti taṃ abhinivatteti. Yadā vā tena vipāko ñāto hoti vidito, tadā te ceva dhamme tañca vipākaṃ abhinivatteti. Iminā ca padena vipassanā kathitā, tadabhinivattetvāti iminā maggo. Cetasā abhinivijjhitvāti iminā ca maggova. Paññāya ativijjha passatīti saha vipassanāya maggapaññāya nibbijjhitvā passati. Evaṃ sabbattha attho veditabbo. Imasmiṃ pana sutte vaṭṭavivaṭṭaṃ kathitanti.
សម្ពោធវគ្គោ បឋមោ។
Sambodhavaggo paṭhamo.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. ទុតិយនិទានសុត្តំ • 10. Dutiyanidānasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១០. ទុតិយនិទានសុត្តវណ្ណនា • 10. Dutiyanidānasuttavaṇṇanā
