องฺคุตฺตร นิกาย ๑๐ฯ๒๑๒

๒๑ฯ กรชกายวคฺค

ทุติยนิรยสคฺคสุตฺต

“ทสหิ, ภิกฺขเว, ธมฺเมหิ สมนฺนาคโต ยถาภตํ นิกฺขิตฺโต เอวํ นิรเยฯ กตเมหิ ทสหิ? อิธ, ภิกฺขเว, เอกจฺโจ ปาณาติปาตี โหติ ลุทฺโท โลหิตปาณิ หตปหเต นิวิฏฺโฐ อทยาปนฺโน สพฺพปาณภูเตสุฯ

อทินฺนาทายี โหติ … กาเมสุมิจฺฉาจารี โหติ … มุสาวาที โหติ … ปิสุณวาโจ โหติ … ผรุสวาโจ โหติ … สมฺผปฺปลาปี โหติ … อภิชฺฌาลุ โหติ … พฺยาปนฺนจิตฺโต โหติ … มิจฺฉาทิฏฺฐิโก โหติ วิปรีตทสฺสโน: ‘นตฺถิ ทินฺนํ …เป… สยํ อภิญฺญา สจฺฉิกตฺวา ปเวเทนฺตี'ติฯ อิเมหิ โข, ภิกฺขเว, ทสหิ ธมฺเมหิ สมนฺนาคโต ยถาภตํ นิกฺขิตฺโต เอวํ นิรเยฯ

ทสหิ, ภิกฺขเว, ธมฺเมหิ สมนฺนาคโต ยถาภตํ นิกฺขิตฺโต เอวํ สคฺเคฯ กตเมหิ ทสหิ? อิธ, ภิกฺขเว, เอกจฺโจ ปาณาติปาตํ ปหาย ปาณาติปาตา ปฏิวิรโต โหติ นิหิตทณฺโฑ นิหิตสตฺโถ ลชฺชี ทยาปนฺโน, สพฺพปาณภูตหิตานุกมฺปี วิหรติฯ

อทินฺนาทานํ ปหาย อทินฺนาทานา ปฏิวิรโต โหติ … กาเมสุมิจฺฉาจารํ ปหาย กาเมสุมิจฺฉาจารา ปฏิวิรโต โหติ … มุสาวาทํ ปหาย มุสาวาทา ปฏิวิรโต โหติ … ปิสุณํ วาจํ ปหาย ปิสุณาย วาจาย ปฏิวิรโต โหติ … ผรุสํ วาจํ ปหาย ผรุสาย วาจาย ปฏิวิรโต โหติ … สมฺผปฺปลาปํ ปหาย สมฺผปฺปลาปา ปฏิวิรโต โหติ … อนภิชฺฌาลุ โหติ … อพฺยาปนฺนจิตฺโต โหติ … สมฺมาทิฏฺฐิโก โหติ อวิปรีตทสฺสโน: ‘อตฺถิ ทินฺนํ …เป… เย อิมญฺจ โลกํ ปรญฺจ โลกํ สยํ อภิญฺญา สจฺฉิกตฺวา ปเวเทนฺตี'ติฯ อิเมหิ โข, ภิกฺขเว, ทสหิ ธมฺเมหิ สมนฺนาคโต ยถาภตํ นิกฺขิตฺโต เอวํ สคฺเค”ติฯ

ทุติยํฯ