| Library / Tipiṭaka / တိပိဋက • Tipiṭaka / ကင္ခာဝိတရဏီ-ပုရာဏ-ဋီကာ • Kaṅkhāvitaraṇī-purāṇa-ṭīkā |
၂. ဒုတိယာနိယတသိက္ခာပဒဝဏ္ဏနာ
2. Dutiyāniyatasikkhāpadavaṇṇanā
သင္ဃာဒိသေသေန ဝာတိ ကာယသံသဂ္ဂဒုဋ္ဌုလ္လောဘာသနေန။ တသ္မာ ဧဝံ ကာယသံသဂ္ဂဝာရော ပာဠိယမ္ပိ ဝုတ္တော။ အနန္ဓော အဗဓိရောတိ အနန္ဓော ကာယသံသဂ္ဂံ ပသ္သတိ, အဗဓိရော ဒုဋ္ဌုလ္လံ သုဏာတိ, တသ္မာ ဧဝ အဒိန္နာဒာနသဒိသာနေဝာတိ ဝုတ္တ’’န္တိ လိခိတံ။ ဧတ္ထ စ ကာယဝာစာစိတ္တတော သမုဋ္ဌာနံ ကထန္တိ စေ? ကာယသံသဂ္ဂဉ္ဟိ သမာပဇ္ဇန္တော ဒုဋ္ဌုလ္လမ္ပိ ဘဏတိ, ဒုဋ္ဌုလ္လံ ဘဏန္တော နိသီဒတိ စာတိ သမ္ဘဝတိ, ဒုဋ္ဌုလ္လမေဝ ဝာ သန္ဓာယ ဝုတ္တံ။ တဉ္ဟိ အဒိန္နာဒာနသမုဋ္ဌာနန္တိ။
Saṅghādisesenavāti kāyasaṃsaggaduṭṭhullobhāsanena. Tasmā evaṃ kāyasaṃsaggavāro pāḷiyampi vutto. Anandho abadhiroti anandho kāyasaṃsaggaṃ passati, abadhiro duṭṭhullaṃ suṇāti, tasmā eva adinnādānasadisānevāti vutta’’nti likhitaṃ. Ettha ca kāyavācācittato samuṭṭhānaṃ kathanti ce? Kāyasaṃsaggañhi samāpajjanto duṭṭhullampi bhaṇati, duṭṭhullaṃ bhaṇanto nisīdati cāti sambhavati, duṭṭhullameva vā sandhāya vuttaṃ. Tañhi adinnādānasamuṭṭhānanti.
ယော ဒေသနံ သဗ္ဗဝိဒူပမောဝ။
Yo desanaṃ sabbavidūpamova;
နာနာနယာကာရဝိစိတ္တဘေဒံ။
Nānānayākāravicittabhedaṃ;
ဉာတုံ ဥပာယာန မနော သတိမာ။
Ñātuṃ upāyāna mano satimā;
တံ လာဘဟေတုံ န ကရောတိ ပုညန္တိ။
Taṃ lābhahetuṃ na karoti puññanti.
ဒုတိယာနိယတသိက္ခာပဒဝဏ္ဏနာ နိဋ္ဌိတာ။
Dutiyāniyatasikkhāpadavaṇṇanā niṭṭhitā.
အနိယတဝဏ္ဏနာ နိဋ္ဌိတာ။
Aniyatavaṇṇanā niṭṭhitā.
