| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. து³தியனோசேஅஸ்ஸாத³ஸுத்தங்
6. Dutiyanoceassādasuttaṃ
18. ‘‘நோ சேத³ங், பி⁴க்க²வே, ரூபானங் அஸ்ஸாதோ³ அப⁴விஸ்ஸ, நயித³ங் ஸத்தா ரூபேஸு ஸாரஜ்ஜெய்யுங். யஸ்மா ச கோ², பி⁴க்க²வே, அத்தி² ரூபானங் அஸ்ஸாதோ³, தஸ்மா ஸத்தா ரூபேஸு ஸாரஜ்ஜந்தி. நோ சேத³ங், பி⁴க்க²வே, ரூபானங் ஆதீ³னவோ அப⁴விஸ்ஸ, நயித³ங் ஸத்தா ரூபேஸு நிப்³பி³ந்தெ³ய்யுங். யஸ்மா ச கோ², பி⁴க்க²வே, அத்தி² ரூபானங் ஆதீ³னவோ, தஸ்மா ஸத்தா ரூபேஸு நிப்³பி³ந்த³ந்தி. நோ சேத³ங், பி⁴க்க²வே, ரூபானங் நிஸ்ஸரணங் அப⁴விஸ்ஸ, நயித³ங் ஸத்தா ரூபேஹி நிஸ்ஸரெய்யுங். யஸ்மா ச கோ², பி⁴க்க²வே, அத்தி² ரூபானங் நிஸ்ஸரணங், தஸ்மா ஸத்தா ரூபேஹி நிஸ்ஸரந்தி. நோ சேத³ங், பி⁴க்க²வே, ஸத்³தா³னங்… க³ந்தா⁴னங்… ரஸானங்… பொ²ட்ட²ப்³பா³னங்… த⁴ம்மானங் அஸ்ஸாதோ³ அப⁴விஸ்ஸ, நயித³ங் ஸத்தா த⁴ம்மேஸு ஸாரஜ்ஜெய்யுங். யஸ்மா ச கோ², பி⁴க்க²வே, அத்தி² த⁴ம்மானங் அஸ்ஸாதோ³, தஸ்மா ஸத்தா த⁴ம்மேஸு ஸாரஜ்ஜந்தி. நோ சேத³ங், பி⁴க்க²வே, த⁴ம்மானங் ஆதீ³னவோ அப⁴விஸ்ஸ, நயித³ங் ஸத்தா த⁴ம்மேஸு நிப்³பி³ந்தெ³ய்யுங். யஸ்மா ச கோ², பி⁴க்க²வே, அத்தி² த⁴ம்மானங் ஆதீ³னவோ, தஸ்மா ஸத்தா த⁴ம்மேஸு நிப்³பி³ந்த³ந்தி. நோ சேத³ங், பி⁴க்க²வே, த⁴ம்மானங் நிஸ்ஸரணங் அப⁴விஸ்ஸ, நயித³ங் ஸத்தா த⁴ம்மேஹி நிஸ்ஸரெய்யுங். யஸ்மா ச கோ², பி⁴க்க²வே, அத்தி² த⁴ம்மானங் நிஸ்ஸரணங், தஸ்மா ஸத்தா த⁴ம்மேஹி நிஸ்ஸரந்தி.
18. ‘‘No cedaṃ, bhikkhave, rūpānaṃ assādo abhavissa, nayidaṃ sattā rūpesu sārajjeyyuṃ. Yasmā ca kho, bhikkhave, atthi rūpānaṃ assādo, tasmā sattā rūpesu sārajjanti. No cedaṃ, bhikkhave, rūpānaṃ ādīnavo abhavissa, nayidaṃ sattā rūpesu nibbindeyyuṃ. Yasmā ca kho, bhikkhave, atthi rūpānaṃ ādīnavo, tasmā sattā rūpesu nibbindanti. No cedaṃ, bhikkhave, rūpānaṃ nissaraṇaṃ abhavissa, nayidaṃ sattā rūpehi nissareyyuṃ. Yasmā ca kho, bhikkhave, atthi rūpānaṃ nissaraṇaṃ, tasmā sattā rūpehi nissaranti. No cedaṃ, bhikkhave, saddānaṃ… gandhānaṃ… rasānaṃ… phoṭṭhabbānaṃ… dhammānaṃ assādo abhavissa, nayidaṃ sattā dhammesu sārajjeyyuṃ. Yasmā ca kho, bhikkhave, atthi dhammānaṃ assādo, tasmā sattā dhammesu sārajjanti. No cedaṃ, bhikkhave, dhammānaṃ ādīnavo abhavissa, nayidaṃ sattā dhammesu nibbindeyyuṃ. Yasmā ca kho, bhikkhave, atthi dhammānaṃ ādīnavo, tasmā sattā dhammesu nibbindanti. No cedaṃ, bhikkhave, dhammānaṃ nissaraṇaṃ abhavissa, nayidaṃ sattā dhammehi nissareyyuṃ. Yasmā ca kho, bhikkhave, atthi dhammānaṃ nissaraṇaṃ, tasmā sattā dhammehi nissaranti.
‘‘யாவகீவஞ்ச, பி⁴க்க²வே, ஸத்தா இமேஸங் ச²ன்னங் பா³ஹிரானங் ஆயதனானங் அஸ்ஸாத³ஞ்ச அஸ்ஸாத³தோ, ஆதீ³னவஞ்ச ஆதீ³னவதோ, நிஸ்ஸரணஞ்ச நிஸ்ஸரணதோ யதா²பூ⁴தங் நாப்³ப⁴ஞ்ஞங்ஸு , நேவ தாவ, பி⁴க்க²வே, ஸத்தா ஸதே³வகா லோகா ஸமாரகா ஸப்³ரஹ்மகா ஸஸ்ஸமணப்³ராஹ்மணியா பஜாய ஸதே³வமனுஸ்ஸாய நிஸ்ஸடா விஸஞ்ஞுத்தா விப்பமுத்தா விமரியாதீ³கதேன சேதஸா விஹரிங்ஸு. யதோ ச கோ², பி⁴க்க²வே, ஸத்தா இமேஸங் ச²ன்னங் பா³ஹிரானங் ஆயதனானங் அஸ்ஸாத³ஞ்ச அஸ்ஸாத³தோ, ஆதீ³னவஞ்ச ஆதீ³னவதோ, நிஸ்ஸரணஞ்ச நிஸ்ஸரணதோ யதா²பூ⁴தங் அப்³ப⁴ஞ்ஞங்ஸு, அத², பி⁴க்க²வே , ஸத்தா ஸதே³வகா லோகா ஸமாரகா ஸப்³ரஹ்மகா ஸஸ்ஸமணப்³ராஹ்மணியா பஜாய ஸதே³வமனுஸ்ஸாய நிஸ்ஸடா விஸஞ்ஞுத்தா விப்பமுத்தா விமரியாதீ³கதேன சேதஸா விஹரந்தீ’’தி. ச²ட்ட²ங்.
‘‘Yāvakīvañca, bhikkhave, sattā imesaṃ channaṃ bāhirānaṃ āyatanānaṃ assādañca assādato, ādīnavañca ādīnavato, nissaraṇañca nissaraṇato yathābhūtaṃ nābbhaññaṃsu , neva tāva, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaññuttā vippamuttā vimariyādīkatena cetasā vihariṃsu. Yato ca kho, bhikkhave, sattā imesaṃ channaṃ bāhirānaṃ āyatanānaṃ assādañca assādato, ādīnavañca ādīnavato, nissaraṇañca nissaraṇato yathābhūtaṃ abbhaññaṃsu, atha, bhikkhave , sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaññuttā vippamuttā vimariyādīkatena cetasā viharantī’’ti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5-6. பட²மனோசேஅஸ்ஸாத³ஸுத்தாதி³வண்ணனா • 5-6. Paṭhamanoceassādasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5-6. பட²மனோசேஅஸ்ஸாத³ஸுத்தாதி³வண்ணனா • 5-6. Paṭhamanoceassādasuttādivaṇṇanā
