| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. து³தியபப்³ப³தஸுத்தங்
10. Dutiyapabbatasuttaṃ
83. ஸாவத்தி²யங் விஹரதி…பே॰… ‘‘ஸெய்யதா²பி, பி⁴க்க²வே, ஹிமவா பப்³ப³தராஜா பரிக்க²யங் பரியாதா³னங் க³ச்செ²ய்ய, ட²பெத்வா ஸத்த ஸாஸபமத்தியோ பாஸாணஸக்க²ரா. தங் கிங் மஞ்ஞத², பி⁴க்க²வே, கதமங் நு கோ² ப³ஹுதரங், யங் வா ஹிமவதோ பப்³ப³தராஜஸ்ஸ பரிக்கீ²ணங் பரியாதி³ண்ணங் யா வா ஸத்த ஸாஸபமத்தியோ பாஸாணஸக்க²ரா அவஸிட்டா²’’தி?
83. Sāvatthiyaṃ viharati…pe… ‘‘seyyathāpi, bhikkhave, himavā pabbatarājā parikkhayaṃ pariyādānaṃ gaccheyya, ṭhapetvā satta sāsapamattiyo pāsāṇasakkharā. Taṃ kiṃ maññatha, bhikkhave, katamaṃ nu kho bahutaraṃ, yaṃ vā himavato pabbatarājassa parikkhīṇaṃ pariyādiṇṇaṃ yā vā satta sāsapamattiyo pāsāṇasakkharā avasiṭṭhā’’ti?
‘‘ஏததே³வ, ப⁴ந்தே, ப³ஹுதரங் ஹிமவதோ பப்³ப³தராஜஸ்ஸ யதி³த³ங் பரிக்கீ²ணங் பரியாதி³ண்ணங்; அப்பமத்திகா ஸத்த ஸாஸபமத்தியோ பாஸாணஸக்க²ரா அவஸிட்டா². நேவ ஸதிமங் கலங் உபெந்தி ந ஸஹஸ்ஸிமங் கலங் உபெந்தி ந ஸதஸஹஸ்ஸிமங் கலங் உபெந்தி ஹிமவதோ பப்³ப³தராஜஸ்ஸ பரிக்கீ²ணங் பரியாதி³ண்ணங் உபனிதா⁴ய ஸத்த ஸாஸபமத்தியோ பாஸாணஸக்க²ரா அவஸிட்டா²’’தி.
‘‘Etadeva, bhante, bahutaraṃ himavato pabbatarājassa yadidaṃ parikkhīṇaṃ pariyādiṇṇaṃ; appamattikā satta sāsapamattiyo pāsāṇasakkharā avasiṭṭhā. Neva satimaṃ kalaṃ upenti na sahassimaṃ kalaṃ upenti na satasahassimaṃ kalaṃ upenti himavato pabbatarājassa parikkhīṇaṃ pariyādiṇṇaṃ upanidhāya satta sāsapamattiyo pāsāṇasakkharā avasiṭṭhā’’ti.
‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அபி⁴ஸமேதாவினோ ஏததே³வ ப³ஹுதரங் து³க்க²ங் யதி³த³ங் பரிக்கீ²ணங் பரியாதி³ண்ணங்; அப்பமத்தகங் அவஸிட்ட²ங். நேவ ஸதிமங் கலங் உபேதி ந ஸஹஸ்ஸிமங் கலங் உபேதி ந ஸதஸஹஸ்ஸிமங் கலங் உபேதி புரிமங் து³க்க²க்க²ந்த⁴ங் பரிக்கீ²ணங் பரியாதி³ண்ணங் உபனிதா⁴ய யதி³த³ங் ஸத்தக்க²த்துங்பரமதா. ஏவங் மஹத்தி²யோ கோ², பி⁴க்க²வே, த⁴ம்மாபி⁴ஸமயோ, ஏவங் மஹத்தி²யோ த⁴ம்மசக்கு²படிலாபோ⁴’’தி. த³ஸமங்.
‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādiṇṇaṃ; appamattakaṃ avasiṭṭhaṃ. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti purimaṃ dukkhakkhandhaṃ parikkhīṇaṃ pariyādiṇṇaṃ upanidhāya yadidaṃ sattakkhattuṃparamatā. Evaṃ mahatthiyo kho, bhikkhave, dhammābhisamayo, evaṃ mahatthiyo dhammacakkhupaṭilābho’’ti. Dasamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. பத²வீஸுத்தாதி³வண்ணனா • 5. Pathavīsuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. பத²வீஸுத்தாதி³வண்ணனா • 4. Pathavīsuttādivaṇṇanā
