| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. দুতিযপব্বতসুত্তং
10. Dutiyapabbatasuttaṃ
৮৩. সাৰত্থিযং ৰিহরতি…পে॰… ‘‘সেয্যথাপি, ভিক্খৰে, হিমৰা পব্বতরাজা পরিক্খযং পরিযাদানং গচ্ছেয্য, ঠপেত্ৰা সত্ত সাসপমত্তিযো পাসাণসক্খরা। তং কিং মঞ্ঞথ, ভিক্খৰে, কতমং নু খো বহুতরং, যং ৰা হিমৰতো পব্বতরাজস্স পরিক্খীণং পরিযাদিণ্ণং যা ৰা সত্ত সাসপমত্তিযো পাসাণসক্খরা অৰসিট্ঠা’’তি?
83. Sāvatthiyaṃ viharati…pe… ‘‘seyyathāpi, bhikkhave, himavā pabbatarājā parikkhayaṃ pariyādānaṃ gaccheyya, ṭhapetvā satta sāsapamattiyo pāsāṇasakkharā. Taṃ kiṃ maññatha, bhikkhave, katamaṃ nu kho bahutaraṃ, yaṃ vā himavato pabbatarājassa parikkhīṇaṃ pariyādiṇṇaṃ yā vā satta sāsapamattiyo pāsāṇasakkharā avasiṭṭhā’’ti?
‘‘এতদেৰ, ভন্তে, বহুতরং হিমৰতো পব্বতরাজস্স যদিদং পরিক্খীণং পরিযাদিণ্ণং; অপ্পমত্তিকা সত্ত সাসপমত্তিযো পাসাণসক্খরা অৰসিট্ঠা। নেৰ সতিমং কলং উপেন্তি ন সহস্সিমং কলং উপেন্তি ন সতসহস্সিমং কলং উপেন্তি হিমৰতো পব্বতরাজস্স পরিক্খীণং পরিযাদিণ্ণং উপনিধায সত্ত সাসপমত্তিযো পাসাণসক্খরা অৰসিট্ঠা’’তি।
‘‘Etadeva, bhante, bahutaraṃ himavato pabbatarājassa yadidaṃ parikkhīṇaṃ pariyādiṇṇaṃ; appamattikā satta sāsapamattiyo pāsāṇasakkharā avasiṭṭhā. Neva satimaṃ kalaṃ upenti na sahassimaṃ kalaṃ upenti na satasahassimaṃ kalaṃ upenti himavato pabbatarājassa parikkhīṇaṃ pariyādiṇṇaṃ upanidhāya satta sāsapamattiyo pāsāṇasakkharā avasiṭṭhā’’ti.
‘‘এৰমেৰ খো, ভিক্খৰে, অরিযসাৰকস্স দিট্ঠিসম্পন্নস্স পুগ্গলস্স অভিসমেতাৰিনো এতদেৰ বহুতরং দুক্খং যদিদং পরিক্খীণং পরিযাদিণ্ণং; অপ্পমত্তকং অৰসিট্ঠং। নেৰ সতিমং কলং উপেতি ন সহস্সিমং কলং উপেতি ন সতসহস্সিমং কলং উপেতি পুরিমং দুক্খক্খন্ধং পরিক্খীণং পরিযাদিণ্ণং উপনিধায যদিদং সত্তক্খত্তুংপরমতা। এৰং মহত্থিযো খো, ভিক্খৰে, ধম্মাভিসমযো, এৰং মহত্থিযো ধম্মচক্খুপটিলাভো’’তি। দসমং।
‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādiṇṇaṃ; appamattakaṃ avasiṭṭhaṃ. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti purimaṃ dukkhakkhandhaṃ parikkhīṇaṃ pariyādiṇṇaṃ upanidhāya yadidaṃ sattakkhattuṃparamatā. Evaṃ mahatthiyo kho, bhikkhave, dhammābhisamayo, evaṃ mahatthiyo dhammacakkhupaṭilābho’’ti. Dasamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. পথৰীসুত্তাদিৰণ্ণনা • 5. Pathavīsuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. পথৰীসুত্তাদিৰণ্ণনা • 4. Pathavīsuttādivaṇṇanā
