| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. දුතියපබ්‌බතසුත්‌තං
10. Dutiyapabbatasuttaṃ
83. සාවත්‌ථියං විහරති…පෙ.… ‘‘සෙය්‍යථාපි, භික්‌ඛවෙ, හිමවා පබ්‌බතරාජා පරික්‌ඛයං පරියාදානං ගච්‌ඡෙය්‍ය, ඨපෙත්‌වා සත්‌ත සාසපමත්‌තියො පාසාණසක්‌ඛරා. තං කිං මඤ්‌ඤථ, භික්‌ඛවෙ, කතමං නු ඛො බහුතරං, යං වා හිමවතො පබ්‌බතරාජස්‌ස පරික්‌ඛීණං පරියාදිණ්‌ණං යා වා සත්‌ත සාසපමත්‌තියො පාසාණසක්‌ඛරා අවසිට්‌ඨා’’ති?
83. Sāvatthiyaṃ viharati…pe… ‘‘seyyathāpi, bhikkhave, himavā pabbatarājā parikkhayaṃ pariyādānaṃ gaccheyya, ṭhapetvā satta sāsapamattiyo pāsāṇasakkharā. Taṃ kiṃ maññatha, bhikkhave, katamaṃ nu kho bahutaraṃ, yaṃ vā himavato pabbatarājassa parikkhīṇaṃ pariyādiṇṇaṃ yā vā satta sāsapamattiyo pāsāṇasakkharā avasiṭṭhā’’ti?
‘‘එතදෙව, භන්‌තෙ, බහුතරං හිමවතො පබ්‌බතරාජස්‌ස යදිදං පරික්‌ඛීණං පරියාදිණ්‌ණං; අප්‌පමත්‌තිකා සත්‌ත සාසපමත්‌තියො පාසාණසක්‌ඛරා අවසිට්‌ඨා. නෙව සතිමං කලං උපෙන්‌ති න සහස්‌සිමං කලං උපෙන්‌ති න සතසහස්‌සිමං කලං උපෙන්‌ති හිමවතො පබ්‌බතරාජස්‌ස පරික්‌ඛීණං පරියාදිණ්‌ණං උපනිධාය සත්‌ත සාසපමත්‌තියො පාසාණසක්‌ඛරා අවසිට්‌ඨා’’ති.
‘‘Etadeva, bhante, bahutaraṃ himavato pabbatarājassa yadidaṃ parikkhīṇaṃ pariyādiṇṇaṃ; appamattikā satta sāsapamattiyo pāsāṇasakkharā avasiṭṭhā. Neva satimaṃ kalaṃ upenti na sahassimaṃ kalaṃ upenti na satasahassimaṃ kalaṃ upenti himavato pabbatarājassa parikkhīṇaṃ pariyādiṇṇaṃ upanidhāya satta sāsapamattiyo pāsāṇasakkharā avasiṭṭhā’’ti.
‘‘එවමෙව ඛො, භික්‌ඛවෙ, අරියසාවකස්‌ස දිට්‌ඨිසම්‌පන්‌නස්‌ස පුග්‌ගලස්‌ස අභිසමෙතාවිනො එතදෙව බහුතරං දුක්‌ඛං යදිදං පරික්‌ඛීණං පරියාදිණ්‌ණං; අප්‌පමත්‌තකං අවසිට්‌ඨං. නෙව සතිමං කලං උපෙති න සහස්‌සිමං කලං උපෙති න සතසහස්‌සිමං කලං උපෙති පුරිමං දුක්‌ඛක්‌ඛන්‌ධං පරික්‌ඛීණං පරියාදිණ්‌ණං උපනිධාය යදිදං සත්‌තක්‌ඛත්‌තුංපරමතා. එවං මහත්‌ථියො ඛො, භික්‌ඛවෙ, ධම්‌මාභිසමයො, එවං මහත්‌ථියො ධම්‌මචක්‌ඛුපටිලාභො’’ති. දසමං.
‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādiṇṇaṃ; appamattakaṃ avasiṭṭhaṃ. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti purimaṃ dukkhakkhandhaṃ parikkhīṇaṃ pariyādiṇṇaṃ upanidhāya yadidaṃ sattakkhattuṃparamatā. Evaṃ mahatthiyo kho, bhikkhave, dhammābhisamayo, evaṃ mahatthiyo dhammacakkhupaṭilābho’’ti. Dasamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. පථවීසුත්‌තාදිවණ්‌ණනා • 5. Pathavīsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4. පථවීසුත්‌තාදිවණ්‌ණනා • 4. Pathavīsuttādivaṇṇanā
