| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༠. དུཏིཡཔབྦཏསུཏྟཾ
10. Dutiyapabbatasuttaṃ
༨༣. སཱཝཏྠིཡཾ ཝིཧརཏི…པེ॰… ‘‘སེཡྻཐཱཔི, བྷིཀྑཝེ, ཧིམཝཱ པབྦཏརཱཛཱ པརིཀྑཡཾ པརིཡཱདཱནཾ གཙྪེཡྻ, ཋཔེཏྭཱ སཏྟ སཱསཔམཏྟིཡོ པཱསཱཎསཀྑརཱ། ཏཾ ཀིཾ མཉྙཐ, བྷིཀྑཝེ, ཀཏམཾ ནུ ཁོ བཧུཏརཾ, ཡཾ ཝཱ ཧིམཝཏོ པབྦཏརཱཛསྶ པརིཀྑཱིཎཾ པརིཡཱདིཎྞཾ ཡཱ ཝཱ སཏྟ སཱསཔམཏྟིཡོ པཱསཱཎསཀྑརཱ ཨཝསིཊྛཱ’’ཏི?
83. Sāvatthiyaṃ viharati…pe… ‘‘seyyathāpi, bhikkhave, himavā pabbatarājā parikkhayaṃ pariyādānaṃ gaccheyya, ṭhapetvā satta sāsapamattiyo pāsāṇasakkharā. Taṃ kiṃ maññatha, bhikkhave, katamaṃ nu kho bahutaraṃ, yaṃ vā himavato pabbatarājassa parikkhīṇaṃ pariyādiṇṇaṃ yā vā satta sāsapamattiyo pāsāṇasakkharā avasiṭṭhā’’ti?
‘‘ཨེཏདེཝ, བྷནྟེ, བཧུཏརཾ ཧིམཝཏོ པབྦཏརཱཛསྶ ཡདིདཾ པརིཀྑཱིཎཾ པརིཡཱདིཎྞཾ; ཨཔྤམཏྟིཀཱ སཏྟ སཱསཔམཏྟིཡོ པཱསཱཎསཀྑརཱ ཨཝསིཊྛཱ། ནེཝ སཏིམཾ ཀལཾ ཨུཔེནྟི ན སཧསྶིམཾ ཀལཾ ཨུཔེནྟི ན སཏསཧསྶིམཾ ཀལཾ ཨུཔེནྟི ཧིམཝཏོ པབྦཏརཱཛསྶ པརིཀྑཱིཎཾ པརིཡཱདིཎྞཾ ཨུཔནིདྷཱཡ སཏྟ སཱསཔམཏྟིཡོ པཱསཱཎསཀྑརཱ ཨཝསིཊྛཱ’’ཏི།
‘‘Etadeva, bhante, bahutaraṃ himavato pabbatarājassa yadidaṃ parikkhīṇaṃ pariyādiṇṇaṃ; appamattikā satta sāsapamattiyo pāsāṇasakkharā avasiṭṭhā. Neva satimaṃ kalaṃ upenti na sahassimaṃ kalaṃ upenti na satasahassimaṃ kalaṃ upenti himavato pabbatarājassa parikkhīṇaṃ pariyādiṇṇaṃ upanidhāya satta sāsapamattiyo pāsāṇasakkharā avasiṭṭhā’’ti.
‘‘ཨེཝམེཝ ཁོ, བྷིཀྑཝེ, ཨརིཡསཱཝཀསྶ དིཊྛིསམྤནྣསྶ པུགྒལསྶ ཨབྷིསམེཏཱཝིནོ ཨེཏདེཝ བཧུཏརཾ དུཀྑཾ ཡདིདཾ པརིཀྑཱིཎཾ པརིཡཱདིཎྞཾ; ཨཔྤམཏྟཀཾ ཨཝསིཊྛཾ། ནེཝ སཏིམཾ ཀལཾ ཨུཔེཏི ན སཧསྶིམཾ ཀལཾ ཨུཔེཏི ན སཏསཧསྶིམཾ ཀལཾ ཨུཔེཏི པུརིམཾ དུཀྑཀྑནྡྷཾ པརིཀྑཱིཎཾ པརིཡཱདིཎྞཾ ཨུཔནིདྷཱཡ ཡདིདཾ སཏྟཀྑཏྟུཾཔརམཏཱ། ཨེཝཾ མཧཏྠིཡོ ཁོ, བྷིཀྑཝེ, དྷམྨཱབྷིསམཡོ, ཨེཝཾ མཧཏྠིཡོ དྷམྨཙཀྑུཔཊིལཱབྷོ’’ཏི། དསམཾ།
‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādiṇṇaṃ; appamattakaṃ avasiṭṭhaṃ. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti purimaṃ dukkhakkhandhaṃ parikkhīṇaṃ pariyādiṇṇaṃ upanidhāya yadidaṃ sattakkhattuṃparamatā. Evaṃ mahatthiyo kho, bhikkhave, dhammābhisamayo, evaṃ mahatthiyo dhammacakkhupaṭilābho’’ti. Dasamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༥. པཐཝཱིསུཏྟཱདིཝཎྞནཱ • 5. Pathavīsuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༤. པཐཝཱིསུཏྟཱདིཝཎྞནཱ • 4. Pathavīsuttādivaṇṇanā
