| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. து³தியபப்³ப³தூபமஸுத்தங்
10. Dutiyapabbatūpamasuttaṃ
1130. ‘‘ஸெய்யதா²பி, பி⁴க்க²வே, ஹிமவா பப்³ப³தராஜா பரிக்க²யங் பரியாதா³னங் க³ச்செ²ய்ய, ட²பெத்வா ஸத்த ஸாஸபமத்தியோ பாஸாணஸக்க²ரா. தங் கிங் மஞ்ஞத², பி⁴க்க²வே, கதமங் நு கோ² ப³ஹுதரங் – யங் வா ஹிமவதோ பப்³ப³தராஜஸ்ஸ பரிக்கீ²ணங் பரியாதி³ன்னங், யா வா ஸத்த ஸாஸபமத்தியோ பாஸாணஸக்க²ரா அவஸிட்டா²’’தி? ‘‘ஏததே³வ, ப⁴ந்தே, ப³ஹுதரங் ஹிமவதோ பப்³ப³தராஜஸ்ஸ யதி³த³ங் பரிக்கீ²ணங் பரியாதி³ன்னங்; அப்பமத்திகா ஸத்த ஸாஸபமத்தியோ பாஸாணஸக்க²ரா அவஸிட்டா². ஸங்க²ம்பி ந உபெந்தி, உபனித⁴ம்பி ந உபெந்தி, கலபா⁴க³ம்பி ந உபெந்தி ஹிமவதோ பப்³ப³தராஜஸ்ஸ பரிக்கீ²ணங் பரியாதி³ன்னங் உபனிதா⁴ய ஸத்த ஸாஸபமத்தியோ பாஸாணஸக்க²ரா அவஸிட்டா²’’தி. ‘‘ஏவமேவ கோ², பி⁴க்க²வே, அரியஸாவகஸ்ஸ தி³ட்டி²ஸம்பன்னஸ்ஸ புக்³க³லஸ்ஸ அபி⁴ஸமேதாவினோ ஏததே³வ ப³ஹுதரங் து³க்க²ங் யதி³த³ங் பரிக்கீ²ணங் பரியாதி³ன்னங்; அப்பமத்தகங் அவஸிட்ட²ங். ஸங்க²ம்பி ந உபேதி, உபனித⁴ம்பி ந உபேதி, கலபா⁴க³ம்பி ந உபேதி புரிமங் து³க்க²க்க²ந்த⁴ங் பரிக்கீ²ணங் பரியாதி³ன்னங் உபனிதா⁴ய யதி³த³ங் ஸத்தக்க²த்துபரமதா; யோ ‘இத³ங் து³க்க²’ந்தி யதா²பூ⁴தங் பஜானாதி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி’’.
1130. ‘‘Seyyathāpi, bhikkhave, himavā pabbatarājā parikkhayaṃ pariyādānaṃ gaccheyya, ṭhapetvā satta sāsapamattiyo pāsāṇasakkharā. Taṃ kiṃ maññatha, bhikkhave, katamaṃ nu kho bahutaraṃ – yaṃ vā himavato pabbatarājassa parikkhīṇaṃ pariyādinnaṃ, yā vā satta sāsapamattiyo pāsāṇasakkharā avasiṭṭhā’’ti? ‘‘Etadeva, bhante, bahutaraṃ himavato pabbatarājassa yadidaṃ parikkhīṇaṃ pariyādinnaṃ; appamattikā satta sāsapamattiyo pāsāṇasakkharā avasiṭṭhā. Saṅkhampi na upenti, upanidhampi na upenti, kalabhāgampi na upenti himavato pabbatarājassa parikkhīṇaṃ pariyādinnaṃ upanidhāya satta sāsapamattiyo pāsāṇasakkharā avasiṭṭhā’’ti. ‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ; appamattakaṃ avasiṭṭhaṃ. Saṅkhampi na upeti, upanidhampi na upeti, kalabhāgampi na upeti purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattuparamatā; yo ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti’’.
‘‘தஸ்மாதிஹ , பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. த³ஸமங்.
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dasamaṃ.
அபி⁴ஸமயவக்³கோ³ ச²ட்டோ².
Abhisamayavaggo chaṭṭho.
தஸ்ஸுத்³தா³னங் –
Tassuddānaṃ –
நக²ஸிகா² பொக்க²ரணீ, ஸங்பே⁴ஜ்ஜ அபரே து³வே;
Nakhasikhā pokkharaṇī, saṃbhejja apare duve;
பத²வீ த்³வே ஸமுத்³தா³ த்³வே, த்³வேமா ச பப்³ப³தூபமாதி.
Pathavī dve samuddā dve, dvemā ca pabbatūpamāti.
