| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. දුතියපබ්‌බතූපමසුත්‌තං
10. Dutiyapabbatūpamasuttaṃ
1130. ‘‘සෙය්‍යථාපි, භික්‌ඛවෙ, හිමවා පබ්‌බතරාජා පරික්‌ඛයං පරියාදානං ගච්‌ඡෙය්‍ය, ඨපෙත්‌වා සත්‌ත සාසපමත්‌තියො පාසාණසක්‌ඛරා. තං කිං මඤ්‌ඤථ, භික්‌ඛවෙ, කතමං නු ඛො බහුතරං – යං වා හිමවතො පබ්‌බතරාජස්‌ස පරික්‌ඛීණං පරියාදින්‌නං, යා වා සත්‌ත සාසපමත්‌තියො පාසාණසක්‌ඛරා අවසිට්‌ඨා’’ති? ‘‘එතදෙව, භන්‌තෙ, බහුතරං හිමවතො පබ්‌බතරාජස්‌ස යදිදං පරික්‌ඛීණං පරියාදින්‌නං; අප්‌පමත්‌තිකා සත්‌ත සාසපමත්‌තියො පාසාණසක්‌ඛරා අවසිට්‌ඨා. සඞ්‌ඛම්‌පි න උපෙන්‌ති, උපනිධම්‌පි න උපෙන්‌ති, කලභාගම්‌පි න උපෙන්‌ති හිමවතො පබ්‌බතරාජස්‌ස පරික්‌ඛීණං පරියාදින්‌නං උපනිධාය සත්‌ත සාසපමත්‌තියො පාසාණසක්‌ඛරා අවසිට්‌ඨා’’ති. ‘‘එවමෙව ඛො, භික්‌ඛවෙ, අරියසාවකස්‌ස දිට්‌ඨිසම්‌පන්‌නස්‌ස පුග්‌ගලස්‌ස අභිසමෙතාවිනො එතදෙව බහුතරං දුක්‌ඛං යදිදං පරික්‌ඛීණං පරියාදින්‌නං; අප්‌පමත්‌තකං අවසිට්‌ඨං. සඞ්‌ඛම්‌පි න උපෙති, උපනිධම්‌පි න උපෙති, කලභාගම්‌පි න උපෙති පුරිමං දුක්‌ඛක්‌ඛන්‌ධං පරික්‌ඛීණං පරියාදින්‌නං උපනිධාය යදිදං සත්‌තක්‌ඛත්‌තුපරමතා; යො ‘ඉදං දුක්‌ඛ’න්‌ති යථාභූතං පජානාති…පෙ.… ‘අයං දුක්‌ඛනිරොධගාමිනී පටිපදා’ති යථාභූතං පජානාති’’.
1130. ‘‘Seyyathāpi, bhikkhave, himavā pabbatarājā parikkhayaṃ pariyādānaṃ gaccheyya, ṭhapetvā satta sāsapamattiyo pāsāṇasakkharā. Taṃ kiṃ maññatha, bhikkhave, katamaṃ nu kho bahutaraṃ – yaṃ vā himavato pabbatarājassa parikkhīṇaṃ pariyādinnaṃ, yā vā satta sāsapamattiyo pāsāṇasakkharā avasiṭṭhā’’ti? ‘‘Etadeva, bhante, bahutaraṃ himavato pabbatarājassa yadidaṃ parikkhīṇaṃ pariyādinnaṃ; appamattikā satta sāsapamattiyo pāsāṇasakkharā avasiṭṭhā. Saṅkhampi na upenti, upanidhampi na upenti, kalabhāgampi na upenti himavato pabbatarājassa parikkhīṇaṃ pariyādinnaṃ upanidhāya satta sāsapamattiyo pāsāṇasakkharā avasiṭṭhā’’ti. ‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ; appamattakaṃ avasiṭṭhaṃ. Saṅkhampi na upeti, upanidhampi na upeti, kalabhāgampi na upeti purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattuparamatā; yo ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti’’.
‘‘තස්‌මාතිහ , භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. දසමං.
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dasamaṃ.
අභිසමයවග්‌ගො ඡට්‌ඨො.
Abhisamayavaggo chaṭṭho.
තස්‌සුද්‌දානං –
Tassuddānaṃ –
නඛසිඛා පොක්‌ඛරණී, සංභෙජ්‌ජ අපරෙ දුවෙ;
Nakhasikhā pokkharaṇī, saṃbhejja apare duve;
පථවී ද්‌වෙ සමුද්‌දා ද්‌වෙ, ද්‌වෙමා ච පබ්‌බතූපමාති.
Pathavī dve samuddā dve, dvemā ca pabbatūpamāti.
