| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༠. དུཏིཡཔབྦཏཱུཔམསུཏྟཾ
10. Dutiyapabbatūpamasuttaṃ
༡༡༣༠. ‘‘སེཡྻཐཱཔི, བྷིཀྑཝེ, ཧིམཝཱ པབྦཏརཱཛཱ པརིཀྑཡཾ པརིཡཱདཱནཾ གཙྪེཡྻ, ཋཔེཏྭཱ སཏྟ སཱསཔམཏྟིཡོ པཱསཱཎསཀྑརཱ། ཏཾ ཀིཾ མཉྙཐ, བྷིཀྑཝེ, ཀཏམཾ ནུ ཁོ བཧུཏརཾ – ཡཾ ཝཱ ཧིམཝཏོ པབྦཏརཱཛསྶ པརིཀྑཱིཎཾ པརིཡཱདིནྣཾ, ཡཱ ཝཱ སཏྟ སཱསཔམཏྟིཡོ པཱསཱཎསཀྑརཱ ཨཝསིཊྛཱ’’ཏི? ‘‘ཨེཏདེཝ, བྷནྟེ, བཧུཏརཾ ཧིམཝཏོ པབྦཏརཱཛསྶ ཡདིདཾ པརིཀྑཱིཎཾ པརིཡཱདིནྣཾ; ཨཔྤམཏྟིཀཱ སཏྟ སཱསཔམཏྟིཡོ པཱསཱཎསཀྑརཱ ཨཝསིཊྛཱ། སངྑམྤི ན ཨུཔེནྟི, ཨུཔནིདྷམྤི ན ཨུཔེནྟི, ཀལབྷཱགམྤི ན ཨུཔེནྟི ཧིམཝཏོ པབྦཏརཱཛསྶ པརིཀྑཱིཎཾ པརིཡཱདིནྣཾ ཨུཔནིདྷཱཡ སཏྟ སཱསཔམཏྟིཡོ པཱསཱཎསཀྑརཱ ཨཝསིཊྛཱ’’ཏི། ‘‘ཨེཝམེཝ ཁོ, བྷིཀྑཝེ, ཨརིཡསཱཝཀསྶ དིཊྛིསམྤནྣསྶ པུགྒལསྶ ཨབྷིསམེཏཱཝིནོ ཨེཏདེཝ བཧུཏརཾ དུཀྑཾ ཡདིདཾ པརིཀྑཱིཎཾ པརིཡཱདིནྣཾ; ཨཔྤམཏྟཀཾ ཨཝསིཊྛཾ། སངྑམྤི ན ཨུཔེཏི, ཨུཔནིདྷམྤི ན ཨུཔེཏི, ཀལབྷཱགམྤི ན ཨུཔེཏི པུརིམཾ དུཀྑཀྑནྡྷཾ པརིཀྑཱིཎཾ པརིཡཱདིནྣཾ ཨུཔནིདྷཱཡ ཡདིདཾ སཏྟཀྑཏྟུཔརམཏཱ; ཡོ ‘ཨིདཾ དུཀྑ’ནྟི ཡཐཱབྷཱུཏཾ པཛཱནཱཏི…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡཐཱབྷཱུཏཾ པཛཱནཱཏི’’།
1130. ‘‘Seyyathāpi, bhikkhave, himavā pabbatarājā parikkhayaṃ pariyādānaṃ gaccheyya, ṭhapetvā satta sāsapamattiyo pāsāṇasakkharā. Taṃ kiṃ maññatha, bhikkhave, katamaṃ nu kho bahutaraṃ – yaṃ vā himavato pabbatarājassa parikkhīṇaṃ pariyādinnaṃ, yā vā satta sāsapamattiyo pāsāṇasakkharā avasiṭṭhā’’ti? ‘‘Etadeva, bhante, bahutaraṃ himavato pabbatarājassa yadidaṃ parikkhīṇaṃ pariyādinnaṃ; appamattikā satta sāsapamattiyo pāsāṇasakkharā avasiṭṭhā. Saṅkhampi na upenti, upanidhampi na upenti, kalabhāgampi na upenti himavato pabbatarājassa parikkhīṇaṃ pariyādinnaṃ upanidhāya satta sāsapamattiyo pāsāṇasakkharā avasiṭṭhā’’ti. ‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādinnaṃ; appamattakaṃ avasiṭṭhaṃ. Saṅkhampi na upeti, upanidhampi na upeti, kalabhāgampi na upeti purimaṃ dukkhakkhandhaṃ parikkhīṇaṃ pariyādinnaṃ upanidhāya yadidaṃ sattakkhattuparamatā; yo ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti’’.
‘‘ཏསྨཱཏིཧ , བྷིཀྑཝེ, ‘ཨིདཾ དུཀྑ’ནྟི ཡོགོ ཀརཎཱིཡོ…པེ॰… ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡོགོ ཀརཎཱིཡོ’’ཏི། དསམཾ།
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dasamaṃ.
ཨབྷིསམཡཝགྒོ ཚཊྛོ།
Abhisamayavaggo chaṭṭho.
ཏསྶུདྡཱནཾ –
Tassuddānaṃ –
ནཁསིཁཱ པོཀྑརཎཱི, སཾབྷེཛྫ ཨཔརེ དུཝེ།
Nakhasikhā pokkharaṇī, saṃbhejja apare duve;
པཐཝཱི དྭེ སམུདྡཱ དྭེ, དྭེམཱ ཙ པབྦཏཱུཔམཱཏི༎
Pathavī dve samuddā dve, dvemā ca pabbatūpamāti.
