| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. දුතියපජ්‌ජුන්‌නධීතුසුත්‌තං
10. Dutiyapajjunnadhītusuttaṃ
40. එවං මෙ සුතං – එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො චූළකොකනදා 1 පජ්‌ජුන්‌නස්‌ස ධීතා අභික්‌කන්‌තාය රත්‌තියා අභික්‌කන්‌තවණ්‌ණා කෙවලකප්‌පං මහාවනං ඔභාසෙත්‌වා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං අට්‌ඨාසි. එකමන්‌තං ඨිතා ඛො සා දෙවතා චූළකොකනදා පජ්‌ජුන්‌නස්‌ස ධීතා භගවතො සන්‌තිකෙ ඉමා ගාථායො අභාසි –
40. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho cūḷakokanadā 2 pajjunnassa dhītā abhikkantāya rattiyā abhikkantavaṇṇā kevalakappaṃ mahāvanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā cūḷakokanadā pajjunnassa dhītā bhagavato santike imā gāthāyo abhāsi –
‘‘ඉධාගමා විජ්‌ජුපභාසවණ්‌ණා, කොකනදා පජ්‌ජුන්‌නස්‌ස ධීතා;
‘‘Idhāgamā vijjupabhāsavaṇṇā, kokanadā pajjunnassa dhītā;
බුද්‌ධඤ්‌ච ධම්‌මඤ්‌ච නමස්‌සමානා, ගාථාචිමා අත්‌ථවතී අභාසි.
Buddhañca dhammañca namassamānā, gāthācimā atthavatī abhāsi.
‘‘බහුනාපි ඛො තං විභජෙය්‍යං, පරියායෙන තාදිසො ධම්‌මො;
‘‘Bahunāpi kho taṃ vibhajeyyaṃ, pariyāyena tādiso dhammo;
සංඛිත්‌තමත්‌ථං 3 ලපයිස්‌සාමි, යාවතා මෙ මනසා පරියත්‌තං.
Saṃkhittamatthaṃ 4 lapayissāmi, yāvatā me manasā pariyattaṃ.
‘‘පාපං න කයිරා වචසා මනසා,
‘‘Pāpaṃ na kayirā vacasā manasā,
කායෙන වා කිඤ්‌චන සබ්‌බලොකෙ;
Kāyena vā kiñcana sabbaloke;
කාමෙ පහාය සතිමා සම්‌පජානො,
Kāme pahāya satimā sampajāno,
දුක්‌ඛං න සෙවෙථ අනත්‌ථසංහිත’’න්‌ති.
Dukkhaṃ na sevetha anatthasaṃhita’’nti.
සතුල්‌ලපකායිකවග්‌ගො චතුත්‌ථො.
Satullapakāyikavaggo catuttho.
තස්‌සුද්‌දානං –
Tassuddānaṃ –
සබ්‌භිමච්‌ඡරිනා සාධු, න සන්‌තුජ්‌ඣානසඤ්‌ඤිනො;
Sabbhimaccharinā sādhu, na santujjhānasaññino;
සද්‌ධා සමයො සකලිකං, උභො පජ්‌ජුන්‌නධීතරොති.
Saddhā samayo sakalikaṃ, ubho pajjunnadhītaroti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. දුතියපජ්‌ජුන්‌නධීතුසුත්‌තවණ්‌ණනා • 10. Dutiyapajjunnadhītusuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. දුතියපජ්‌ජුන්‌නධීතුසුත්‌තවණ්‌ණනා • 10. Dutiyapajjunnadhītusuttavaṇṇanā
