| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๑๐. ทุติยปชฺชุนฺนธีตุสุตฺตวณฺณนา
10. Dutiyapajjunnadhītusuttavaṇṇanā
๔๐. พุทฺธญฺจ ธมฺมญฺจ นมสฺสมานาติ พุทฺธสุพุทฺธตํ ธมฺมสุธมฺมตญฺจ ญตฺวา ตทุภยํ นมสฺสมานาฯ ยสฺมา พุเทฺธ จ ธเมฺม จ ปสโนฺน สเงฺฆ จ ปสโนฺน เอว โหติ ตสฺส สุปฺปฎิปตฺติยา วิชานนโต, ตสฺมา โส อโตฺถ คาถาย จ-สทฺทสงฺคหิโตติ ทเสฺสโนฺต ‘‘จ-สเทฺทน สงฺฆญฺจา’’ติ อาห อตฺถวติโยติ โลกิยโลกุตฺตรอตฺถสงฺคหิตา โลกิยกุสลโลกุตฺตรมคฺคสงฺคณฺหนโตฯ ยํ ธมฺมํ สา อภาสีติ ยํ ตุมฺหากํ ธมฺมํ ปฎิวิชฺฌิตฺวา ฐิตา, สา มหาโกกนทา อตฺตโน พลานุรูปํ อภาสิฯ พหุนาติ นานปฺปกาเรนฯ ปริยาเยนาติ การเณนฯ ตาทิโสติ ตถารูโป ตถาปฎิวิทฺธสโจฺจ อตฺถธมฺมาทีสุ กุสโล เอเกกํ ปทมฺปิ อุทาหรณเหตุนิคมนานิ นีหรโนฺต อาจิกฺขติ เทเสติ ปญฺญเปติ ปฐเปติ วิวรติ วิภชติ อุตฺตานีกโรติฯ เตนาห ‘‘อยํ ภควา’’ติอาทิฯ เอเตน อติวิย วิตฺถารกฺขโม สุคตธโมฺมติ ทเสฺสติฯ ปริยาปุฎนฺติ ปริวตฺติตํฯ เอวํ วิตฺถารกฺขมํ ธมฺมํ ยสฺมา เทวธีตา ‘‘สํขิตฺตมตฺถํ ลปยิสฺสามี’’ติ อโวจ, ตสฺมา วุตฺตํ ‘‘ตสฺสตฺถ’’นฺติอาทิฯ
40.Buddhañcadhammañca namassamānāti buddhasubuddhataṃ dhammasudhammatañca ñatvā tadubhayaṃ namassamānā. Yasmā buddhe ca dhamme ca pasanno saṅghe ca pasanno eva hoti tassa suppaṭipattiyā vijānanato, tasmā so attho gāthāya ca-saddasaṅgahitoti dassento ‘‘ca-saddena saṅghañcā’’ti āha atthavatiyoti lokiyalokuttaraatthasaṅgahitā lokiyakusalalokuttaramaggasaṅgaṇhanato. Yaṃ dhammaṃ sā abhāsīti yaṃ tumhākaṃ dhammaṃ paṭivijjhitvā ṭhitā, sā mahākokanadā attano balānurūpaṃ abhāsi. Bahunāti nānappakārena. Pariyāyenāti kāraṇena. Tādisoti tathārūpo tathāpaṭividdhasacco atthadhammādīsu kusalo ekekaṃ padampi udāharaṇahetunigamanāni nīharanto ācikkhati deseti paññapeti paṭhapeti vivarati vibhajati uttānīkaroti. Tenāha ‘‘ayaṃ bhagavā’’tiādi. Etena ativiya vitthārakkhamo sugatadhammoti dasseti. Pariyāpuṭanti parivattitaṃ. Evaṃ vitthārakkhamaṃ dhammaṃ yasmā devadhītā ‘‘saṃkhittamatthaṃ lapayissāmī’’ti avoca, tasmā vuttaṃ ‘‘tassattha’’ntiādi.
ทุติยปชฺชุนฺนธีตุสุตฺตวณฺณนา นิฎฺฐิตาฯ
Dutiyapajjunnadhītusuttavaṇṇanā niṭṭhitā.
สตุลฺลปกายิกวคฺควณฺณนา นิฎฺฐิตาฯ
Satullapakāyikavaggavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑๐. ทุติยปชฺชุนฺนธีตุสุตฺตํ • 10. Dutiyapajjunnadhītusuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑๐. ทุติยปชฺชุนฺนธีตุสุตฺตวณฺณนา • 10. Dutiyapajjunnadhītusuttavaṇṇanā
