| Library / Tipiṭaka / തിപിടക • Tipiṭaka / സംയുത്തനികായ (ടീകാ) • Saṃyuttanikāya (ṭīkā) |
൧൦. ദുതിയപജ്ജുന്നധീതുസുത്തവണ്ണനാ
10. Dutiyapajjunnadhītusuttavaṇṇanā
൪൦. ബുദ്ധഞ്ച ധമ്മഞ്ച നമസ്സമാനാതി ബുദ്ധസുബുദ്ധതം ധമ്മസുധമ്മതഞ്ച ഞത്വാ തദുഭയം നമസ്സമാനാ. യസ്മാ ബുദ്ധേ ച ധമ്മേ ച പസന്നോ സങ്ഘേ ച പസന്നോ ഏവ ഹോതി തസ്സ സുപ്പടിപത്തിയാ വിജാനനതോ, തസ്മാ സോ അത്ഥോ ഗാഥായ ച-സദ്ദസങ്ഗഹിതോതി ദസ്സേന്തോ ‘‘ച-സദ്ദേന സങ്ഘഞ്ചാ’’തി ആഹ അത്ഥവതിയോതി ലോകിയലോകുത്തരഅത്ഥസങ്ഗഹിതാ ലോകിയകുസലലോകുത്തരമഗ്ഗസങ്ഗണ്ഹനതോ. യം ധമ്മം സാ അഭാസീതി യം തുമ്ഹാകം ധമ്മം പടിവിജ്ഝിത്വാ ഠിതാ, സാ മഹാകോകനദാ അത്തനോ ബലാനുരൂപം അഭാസി. ബഹുനാതി നാനപ്പകാരേന. പരിയായേനാതി കാരണേന. താദിസോതി തഥാരൂപോ തഥാപടിവിദ്ധസച്ചോ അത്ഥധമ്മാദീസു കുസലോ ഏകേകം പദമ്പി ഉദാഹരണഹേതുനിഗമനാനി നീഹരന്തോ ആചിക്ഖതി ദേസേതി പഞ്ഞപേതി പഠപേതി വിവരതി വിഭജതി ഉത്താനീകരോതി. തേനാഹ ‘‘അയം ഭഗവാ’’തിആദി. ഏതേന അതിവിയ വിത്ഥാരക്ഖമോ സുഗതധമ്മോതി ദസ്സേതി. പരിയാപുടന്തി പരിവത്തിതം. ഏവം വിത്ഥാരക്ഖമം ധമ്മം യസ്മാ ദേവധീതാ ‘‘സംഖിത്തമത്ഥം ലപയിസ്സാമീ’’തി അവോച, തസ്മാ വുത്തം ‘‘തസ്സത്ഥ’’ന്തിആദി.
40.Buddhañcadhammañca namassamānāti buddhasubuddhataṃ dhammasudhammatañca ñatvā tadubhayaṃ namassamānā. Yasmā buddhe ca dhamme ca pasanno saṅghe ca pasanno eva hoti tassa suppaṭipattiyā vijānanato, tasmā so attho gāthāya ca-saddasaṅgahitoti dassento ‘‘ca-saddena saṅghañcā’’ti āha atthavatiyoti lokiyalokuttaraatthasaṅgahitā lokiyakusalalokuttaramaggasaṅgaṇhanato. Yaṃ dhammaṃ sā abhāsīti yaṃ tumhākaṃ dhammaṃ paṭivijjhitvā ṭhitā, sā mahākokanadā attano balānurūpaṃ abhāsi. Bahunāti nānappakārena. Pariyāyenāti kāraṇena. Tādisoti tathārūpo tathāpaṭividdhasacco atthadhammādīsu kusalo ekekaṃ padampi udāharaṇahetunigamanāni nīharanto ācikkhati deseti paññapeti paṭhapeti vivarati vibhajati uttānīkaroti. Tenāha ‘‘ayaṃ bhagavā’’tiādi. Etena ativiya vitthārakkhamo sugatadhammoti dasseti. Pariyāpuṭanti parivattitaṃ. Evaṃ vitthārakkhamaṃ dhammaṃ yasmā devadhītā ‘‘saṃkhittamatthaṃ lapayissāmī’’ti avoca, tasmā vuttaṃ ‘‘tassattha’’ntiādi.
ദുതിയപജ്ജുന്നധീതുസുത്തവണ്ണനാ നിട്ഠിതാ.
Dutiyapajjunnadhītusuttavaṇṇanā niṭṭhitā.
സതുല്ലപകായികവഗ്ഗവണ്ണനാ നിട്ഠിതാ.
Satullapakāyikavaggavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൧൦. ദുതിയപജ്ജുന്നധീതുസുത്തം • 10. Dutiyapajjunnadhītusuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൧൦. ദുതിയപജ്ജുന്നധീതുസുത്തവണ്ണനാ • 10. Dutiyapajjunnadhītusuttavaṇṇanā
