| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. து³தியபமாதா³தி³வக்³க³வண்ணனா
10. Dutiyapamādādivaggavaṇṇanā
98. த³ஸமே அஜ்ஜ²த்திகந்தி நியகஜ்ஜ²த்தவஸேன அஜ்ஜ²த்திகங். அங்க³ந்தி காரணங். இதி கரித்வாதி ஏவங் கத்வா. இத³ங் வுத்தங் ஹோதி – பி⁴க்க²வே, அஜ்ஜ²த்தங் பச்சத்தங் அத்தனோ ஸந்தானே ஸமுட்டி²தங் காரணந்தி கத்வா ந அஞ்ஞங் ஏகங் காரணம்பி ஸமனுபஸ்ஸாமீதி.
98. Dasame ajjhattikanti niyakajjhattavasena ajjhattikaṃ. Aṅganti kāraṇaṃ. Iti karitvāti evaṃ katvā. Idaṃ vuttaṃ hoti – bhikkhave, ajjhattaṃ paccattaṃ attano santāne samuṭṭhitaṃ kāraṇanti katvā na aññaṃ ekaṃ kāraṇampi samanupassāmīti.
110-114. பா³ஹிரந்தி அஜ்ஜ²த்தஸந்தானதோ ப³ஹி ப⁴வங். ஸத்³த⁴ம்மஸ்ஸாதி ஸுத்³த⁴ம்மஸ்ஸ, ஸாஸனஸ்ஸாதி அத்தோ². ஸம்மோஸாயாதி வினாஸாய. அந்தரதா⁴னாயாதி அபஞ்ஞாணத்தா²ய.
110-114.Bāhiranti ajjhattasantānato bahi bhavaṃ. Saddhammassāti suddhammassa, sāsanassāti attho. Sammosāyāti vināsāya. Antaradhānāyāti apaññāṇatthāya.
115. டி²தியாதி சிரட்டி²தத்த²ங். அஸம்மோஸாய அனந்தரதா⁴னாயாதி வுத்தபடிபக்க²னயேனேவ வேதி³தப்³ப³ங். ஸேஸமெத்த² சதுக்கோடிகே வுத்தனயமேவ.
115.Ṭhitiyāti ciraṭṭhitatthaṃ. Asammosāya anantaradhānāyāti vuttapaṭipakkhanayeneva veditabbaṃ. Sesamettha catukkoṭike vuttanayameva.
130. இதோ பரேஸு அத⁴ம்மங் த⁴ம்மோதி தீ³பெந்தீதிஆதீ³ஸு ஸுத்தந்தபரியாயேன தாவ த³ஸ குஸலகம்மபதா² த⁴ம்மோ, த³ஸ அகுஸலகம்மபதா² அத⁴ம்மோ. ததா² சத்தாரோ ஸதிபட்டா²னா சத்தாரோ ஸம்மப்பதா⁴னா சத்தாரோ இத்³தி⁴பாதா³ பஞ்சிந்த்³ரியானி பஞ்ச ப³லானி ஸத்த பொ³ஜ்ஜ²ங்கா³ அரியோ அட்ட²ங்கி³கோ மக்³கோ³தி ஸத்ததிங்ஸ போ³தி⁴பக்கி²யத⁴ம்மா த⁴ம்மோ நாம; தயோ ஸதிபட்டா²னா தயோ ஸம்மப்பதா⁴னா தயோ இத்³தி⁴பாதா³ ச² இந்த்³ரியானி ச² ப³லானி அட்ட² பொ³ஜ்ஜ²ங்கா³ நவங்கி³கோ மக்³கோ³தி ச சத்தாரோ உபாதா³னா பஞ்ச நீவரணானி ஸத்த அனுஸயா அட்ட² மிச்ச²த்தானி ச அயங் அத⁴ம்மோ.
130. Ito paresu adhammaṃ dhammoti dīpentītiādīsu suttantapariyāyena tāva dasa kusalakammapathā dhammo, dasa akusalakammapathā adhammo. Tathā cattāro satipaṭṭhānā cattāro sammappadhānā cattāro iddhipādā pañcindriyāni pañca balāni satta bojjhaṅgā ariyo aṭṭhaṅgiko maggoti sattatiṃsa bodhipakkhiyadhammā dhammo nāma; tayo satipaṭṭhānā tayo sammappadhānā tayo iddhipādā cha indriyāni cha balāni aṭṭha bojjhaṅgā navaṅgiko maggoti ca cattāro upādānā pañca nīvaraṇāni satta anusayā aṭṭha micchattāni ca ayaṃ adhammo.
தத்த² யங்கிஞ்சி ஏகங் அத⁴ம்மகொட்டா²ஸங் க³ஹெத்வா ‘‘இமங் அத⁴ம்மங் த⁴ம்மோதி கரிஸ்ஸாம, ஏவங் அம்ஹாகங் ஆசரியகுலங் நிய்யானிகங் ப⁴விஸ்ஸதி, மயங் ச லோகே பாகடா ப⁴விஸ்ஸாமா’’தி தங் அத⁴ம்மங் ‘‘த⁴ம்மோ அய’’ந்தி கத²யந்தா அத⁴ம்மங் த⁴ம்மோதி தீ³பெந்தி நாம. ததே²வ த⁴ம்மகொட்டா²ஸேஸு ஏகங் க³ஹெத்வா ‘‘அயங் அத⁴ம்மோ’’தி கதெ²ந்தா த⁴ம்மங் அத⁴ம்மோதி தீ³பெந்தி நாம. வினயபரியாயேன பன பூ⁴தேன வத்து²னா சோதெ³த்வா ஸாரெத்வா யதா²படிஞ்ஞாய கத்தப்³ப³ங் கம்மங் த⁴ம்மோ நாம, அபூ⁴தேன வத்து²னா அசோதெ³த்வா அஸாரெத்வா அபடிஞ்ஞாய கத்தப்³ப³ங் கம்மங் அத⁴ம்மோ நாம.
Tattha yaṃkiñci ekaṃ adhammakoṭṭhāsaṃ gahetvā ‘‘imaṃ adhammaṃ dhammoti karissāma, evaṃ amhākaṃ ācariyakulaṃ niyyānikaṃ bhavissati, mayaṃ ca loke pākaṭā bhavissāmā’’ti taṃ adhammaṃ ‘‘dhammo aya’’nti kathayantā adhammaṃ dhammoti dīpenti nāma. Tatheva dhammakoṭṭhāsesu ekaṃ gahetvā ‘‘ayaṃ adhammo’’ti kathentā dhammaṃ adhammoti dīpenti nāma. Vinayapariyāyena pana bhūtena vatthunā codetvā sāretvā yathāpaṭiññāya kattabbaṃ kammaṃ dhammo nāma, abhūtena vatthunā acodetvā asāretvā apaṭiññāya kattabbaṃ kammaṃ adhammo nāma.
ஸுத்தந்தபரியாயேன ராக³வினயோ தோ³ஸவினயோ மோஹவினயோ ஸங்வரோ பஹானங் படிஸங்கா²தி அயங் வினயோ நாம, ராகா³தீ³னங் அவினயோ அஸங்வரோ அப்பஹானங் அபடிஸங்கா²தி அயங் அவினயோ நாம. வினயபரியாயேன வத்து²ஸம்பத்தி, ஞத்திஸம்பத்தி, அனுஸ்ஸாவனஸம்பத்தி, ஸீமாஸம்பத்தி, பரிஸஸம்பத்தீதி அயங் வினயோ நாம. வத்து²விபத்தி, ஞத்திவிபத்தி, அனுஸ்ஸாவனவிபத்தி, ஸீமாவிபத்தி பரிஸவிபத்தீதி அயங் அவினயோ நாம.
Suttantapariyāyena rāgavinayo dosavinayo mohavinayo saṃvaro pahānaṃ paṭisaṅkhāti ayaṃ vinayo nāma, rāgādīnaṃ avinayo asaṃvaro appahānaṃ apaṭisaṅkhāti ayaṃ avinayo nāma. Vinayapariyāyena vatthusampatti, ñattisampatti, anussāvanasampatti, sīmāsampatti, parisasampattīti ayaṃ vinayo nāma. Vatthuvipatti, ñattivipatti, anussāvanavipatti, sīmāvipatti parisavipattīti ayaṃ avinayo nāma.
ஸுத்தந்தபரியாயேன சத்தாரோ ஸதிபட்டா²னா சத்தாரோ ஸம்மப்பதா⁴னா…பே॰… அரியோ அட்ட²ங்கி³கோ மக்³கோ³தி இத³ங் பா⁴ஸிதங் லபிதங் ததா²க³தேன; தயோ ஸதிபட்டா²னா தயோ ஸம்மப்பதா⁴னா தயோ இத்³தி⁴பாதா³ ச² இந்த்³ரியானி ச² ப³லானி அட்ட² பொ³ஜ்ஜ²ங்கா³ நவங்கி³கோ மக்³கோ³தி இத³ங் அபா⁴ஸிதங் அலபிதங் ததா²க³தேன. வினயபரியாயேன சத்தாரோ பாராஜிகா தேரஸ ஸங்கா⁴தி³ஸேஸா த்³வே அனியதா திங்ஸ நிஸ்ஸக்³கி³யா பாசித்தியாதி இத³ங் பா⁴ஸிதங் லபிதங் ததா²க³தேன; தயோ பாராஜிகா சுத்³த³ஸ ஸங்கா⁴தி³ஸேஸா தயோ அனியதா ஏகதிங்ஸ நிஸ்ஸக்³கி³யா பாசித்தியாதி இத³ங் அபா⁴ஸிதங் அலபிதங் ததா²க³தேன.
Suttantapariyāyena cattāro satipaṭṭhānā cattāro sammappadhānā…pe… ariyo aṭṭhaṅgiko maggoti idaṃ bhāsitaṃ lapitaṃ tathāgatena; tayo satipaṭṭhānā tayo sammappadhānā tayo iddhipādā cha indriyāni cha balāni aṭṭha bojjhaṅgā navaṅgiko maggoti idaṃ abhāsitaṃ alapitaṃ tathāgatena. Vinayapariyāyena cattāro pārājikā terasa saṅghādisesā dve aniyatā tiṃsa nissaggiyā pācittiyāti idaṃ bhāsitaṃ lapitaṃ tathāgatena; tayo pārājikā cuddasa saṅghādisesā tayo aniyatā ekatiṃsa nissaggiyā pācittiyāti idaṃ abhāsitaṃ alapitaṃ tathāgatena.
ஸுத்தந்தபரியாயேன தே³வஸிகங் ப²லஸமாபத்திஸமாபஜ்ஜனங் மஹாகருணாஸமாபத்திஸமாபஜ்ஜனங் பு³த்³த⁴சக்கு²னா லோகவோலோகனங் அட்டு²ப்பத்திவஸேன ஸுத்தந்ததே³ஸனா ஜாதககதா²தி இத³ங் ஆசிண்ணங், ந தே³வஸிகங் ப²லஸமாபத்திஸமாபஜ்ஜனங்…பே॰… ந ஜாதககதா²தி இத³ங் அனாசிண்ணங். வினயபரியாயேன நிமந்திதஸ்ஸ வஸ்ஸாவாஸங் வஸித்வா அபலோகெத்வா சாரிகாபக்கமனங் பவாரெத்வா சாரிகாபக்கமனங், ஆக³ந்துகேஹி ஸத்³தி⁴ங் பட²மங் படிஸந்தா²ரகரணந்தி இத³ங் ஆசிண்ணங், தஸ்ஸேவ ஆசிண்ணஸ்ஸ அகரணங் அனாசிண்ணங் நாம.
Suttantapariyāyena devasikaṃ phalasamāpattisamāpajjanaṃ mahākaruṇāsamāpattisamāpajjanaṃ buddhacakkhunā lokavolokanaṃ aṭṭhuppattivasena suttantadesanā jātakakathāti idaṃ āciṇṇaṃ, na devasikaṃ phalasamāpattisamāpajjanaṃ…pe… na jātakakathāti idaṃ anāciṇṇaṃ. Vinayapariyāyena nimantitassa vassāvāsaṃ vasitvā apaloketvā cārikāpakkamanaṃ pavāretvā cārikāpakkamanaṃ, āgantukehi saddhiṃ paṭhamaṃ paṭisanthārakaraṇanti idaṃ āciṇṇaṃ, tasseva āciṇṇassa akaraṇaṃ anāciṇṇaṃ nāma.
ஸுத்தந்தபரியாயேன சத்தாரோ ஸதிபட்டா²னா…பே॰… அட்ட²ங்கி³கோ மக்³கோ³தி இத³ங் பஞ்ஞத்தங் நாம; தயோ ஸதிபட்டா²னா…பே॰… நவங்கி³கோ மக்³கோ³தி இத³ங் அபஞ்ஞத்தங் நாம. வினயபரியாயேன சத்தாரோ பாராஜிகா…பே॰… திங்ஸனிஸ்ஸக்³கி³யா பாசித்தியாதி இத³ங் பஞ்ஞத்தங் நாம; தயோ பாராஜிகா…பே॰… ஏகதிங்ஸ நிஸ்ஸக்³கி³யா பாசித்தியாதி இத³ங் அபஞ்ஞத்தங் நாம.
Suttantapariyāyena cattāro satipaṭṭhānā…pe… aṭṭhaṅgiko maggoti idaṃ paññattaṃ nāma; tayo satipaṭṭhānā…pe… navaṅgiko maggoti idaṃ apaññattaṃ nāma. Vinayapariyāyena cattāro pārājikā…pe… tiṃsanissaggiyā pācittiyāti idaṃ paññattaṃ nāma; tayo pārājikā…pe… ekatiṃsa nissaggiyā pācittiyāti idaṃ apaññattaṃ nāma.
யங் பனேதங் ஸப்³ப³ஸுத்தானங் பரியோஸானே தேசிமங் ஸத்³த⁴ம்மங் அந்தரதா⁴பெந்தீதி வுத்தங், தத்த² பஞ்ச அந்தரதா⁴னானி நாம அதி⁴க³மஅந்தரதா⁴னங், படிபத்திஅந்தரதா⁴னங், பரியத்திஅந்தரதா⁴னங், லிங்க³அந்தரதா⁴னங், தா⁴துஅந்தரதா⁴னந்தி . தத்த² அதி⁴க³மோதி சத்தாரோ மக்³கா³, சத்தாரி ப²லானி, சதஸ்ஸோ படிஸம்பி⁴தா³, திஸ்ஸோ விஜ்ஜா, ச² அபி⁴ஞ்ஞாதி. ஸோ பரிஹாயமானோ படிஸம்பி⁴தா³தோ பட்டா²ய பரிஹாயதி. பு³த்³தா⁴னங் ஹி பரினிப்³பா³னதோ வஸ்ஸஸஹஸ்ஸமேவ படிஸம்பி⁴தா³ நிப்³ப³த்தேதுங் ஸக்கொந்தி, ததோ பரங் ச² அபி⁴ஞ்ஞா, ததோ தாபி நிப்³ப³த்தேதுங் அஸக்கொந்தா திஸ்ஸோ விஜ்ஜா நிப்³ப³த்தெந்தி. க³ச்ச²ந்தே க³ச்ச²ந்தே காலே தாபி நிப்³ப³த்தேதுங் அஸக்கொந்தா ஸுக்க²விபஸ்ஸகா ஹொந்தி. ஏதேனேவ உபாயேன அனாகா³மினோ ஸகதா³கா³மினோ ஸோதாபன்னாதி. தேஸு த⁴ரந்தேஸு அதி⁴க³மோ அனந்தரஹிதோ நாம ந ஹோதி. பச்சி²மகஸ்ஸ பன ஸோதாபன்னஸ்ஸ ஜீவிதக்க²யேன அதி⁴க³மோ அந்தரஹிதோ நாம ஹோதி. இத³ங் அதி⁴க³மஅந்தரதா⁴னங் நாம.
Yaṃ panetaṃ sabbasuttānaṃ pariyosāne tecimaṃ saddhammaṃ antaradhāpentīti vuttaṃ, tattha pañca antaradhānāni nāma adhigamaantaradhānaṃ, paṭipattiantaradhānaṃ, pariyattiantaradhānaṃ, liṅgaantaradhānaṃ, dhātuantaradhānanti . Tattha adhigamoti cattāro maggā, cattāri phalāni, catasso paṭisambhidā, tisso vijjā, cha abhiññāti. So parihāyamāno paṭisambhidāto paṭṭhāya parihāyati. Buddhānaṃ hi parinibbānato vassasahassameva paṭisambhidā nibbattetuṃ sakkonti, tato paraṃ cha abhiññā, tato tāpi nibbattetuṃ asakkontā tisso vijjā nibbattenti. Gacchante gacchante kāle tāpi nibbattetuṃ asakkontā sukkhavipassakā honti. Eteneva upāyena anāgāmino sakadāgāmino sotāpannāti. Tesu dharantesu adhigamo anantarahito nāma na hoti. Pacchimakassa pana sotāpannassa jīvitakkhayena adhigamo antarahito nāma hoti. Idaṃ adhigamaantaradhānaṃ nāma.
படிபத்திஅந்தரதா⁴னங் நாம ஜா²னவிபஸ்ஸனாமக்³க³ப²லானி நிப்³ப³த்தேதுங் அஸக்கொந்தா சதுபாரிஸுத்³தி⁴ஸீலமத்தங் ரக்க²ந்தி. க³ச்ச²ந்தே க³ச்ச²ந்தே காலே ‘‘ஸீலங் பரிபுண்ணங் கத்வா ரக்கா²ம, பதா⁴னஞ்ச அனுயுஞ்ஜாம, ந ச மக்³க³ங் வா ப²லங் வா ஸச்சி²காதுங் ஸக்கோம, நத்தி² இதா³னி அரியத⁴ம்மபடிவேதோ⁴’’தி வோஸானங் ஆபஜ்ஜித்வா கோஸஜ்ஜப³ஹுலா அஞ்ஞமஞ்ஞங் ந சோதெ³ந்தி ந ஸாரெந்தி அகுக்குச்சகா ஹொந்தி, ததோ பட்டா²ய கு²த்³தா³னுகு²த்³த³கானி மத்³த³ந்தி. க³ச்ச²ந்தே க³ச்ச²ந்தே காலே பாசித்தியது²ல்லச்சயானி ஆபஜ்ஜந்தி, ததோ க³ருகாபத்திங். பாராஜிகமத்தமேவ திட்ட²தி. சத்தாரி பாராஜிகானி ரக்க²ந்தானங் பி⁴க்கூ²னங் ஸதேபி ஸஹஸ்ஸேபி த⁴ரமானே படிபத்தி அனந்தரஹிதா நாம ந ஹோதி. பச்சி²மகஸ்ஸ பன பி⁴க்கு²னோ ஸீலபே⁴தே³ன வா ஜீவிதக்க²யேன வா அந்தரஹிதா ஹோதீதி இத³ங் படிபத்திஅந்தரதா⁴னங் நாம.
Paṭipattiantaradhānaṃ nāma jhānavipassanāmaggaphalāni nibbattetuṃ asakkontā catupārisuddhisīlamattaṃ rakkhanti. Gacchante gacchante kāle ‘‘sīlaṃ paripuṇṇaṃ katvā rakkhāma, padhānañca anuyuñjāma, na ca maggaṃ vā phalaṃ vā sacchikātuṃ sakkoma, natthi idāni ariyadhammapaṭivedho’’ti vosānaṃ āpajjitvā kosajjabahulā aññamaññaṃ na codenti na sārenti akukkuccakā honti, tato paṭṭhāya khuddānukhuddakāni maddanti. Gacchante gacchante kāle pācittiyathullaccayāni āpajjanti, tato garukāpattiṃ. Pārājikamattameva tiṭṭhati. Cattāri pārājikāni rakkhantānaṃ bhikkhūnaṃ satepi sahassepi dharamāne paṭipatti anantarahitā nāma na hoti. Pacchimakassa pana bhikkhuno sīlabhedena vā jīvitakkhayena vā antarahitā hotīti idaṃ paṭipattiantaradhānaṃ nāma.
பரியத்தீதி தேபிடகங் பு³த்³த⁴வசனங் ஸாட்ட²கதா² பாளி. யாவ ஸா திட்ட²தி, தாவ பரியத்தி பரிபுண்ணா நாம ஹோதி. க³ச்ச²ந்தே க³ச்ச²ந்தே காலே ராஜயுவராஜானோ அத⁴ம்மிகா ஹொந்தி, தேஸு அத⁴ம்மிகேஸு ராஜாமச்சாத³யோ அத⁴ம்மிகா ஹொந்தி, ததோ ரட்ட²ஜனபத³வாஸினோதி. ஏதேஸங் அத⁴ம்மிகதாய தே³வோ ந ஸம்மா வஸ்ஸதி, ததோ ஸஸ்ஸானி ந ஸம்பஜ்ஜந்தி. தேஸு அஸம்பஜ்ஜந்தேஸு பச்சயதா³யகா பி⁴க்கு²ஸங்க⁴ஸ்ஸ பச்சயே தா³துங் ந ஸக்கொந்தி, பி⁴க்கூ² பச்சயேஹி கிலமந்தா அந்தேவாஸிகே ஸங்க³ஹேதுங் ந ஸக்கொந்தி. க³ச்ச²ந்தே க³ச்ச²ந்தே காலே பரியத்தி பரிஹாயதி, அத்த²வஸேன தா⁴ரேதுங் ந ஸக்கொந்தி, பாளிவஸேனேவ தா⁴ரெந்தி. ததோ க³ச்ச²ந்தே க³ச்ச²ந்தே காலே பாளிம்பி ஸகலங் தா⁴ரேதுங் ந ஸக்கொந்தி, பட²மங் அபி⁴த⁴ம்மபிடகங் பரிஹாயதி. பரிஹாயமானங் மத்த²கதோ பட்டா²ய பரிஹாயதி . பட²மமேவ ஹி பட்டா²னமஹாபகரணங் பரிஹாயதி, தஸ்மிங் பரிஹீனே யமகங், கதா²வத்து², புக்³க³லபஞ்ஞத்தி, தா⁴துகதா², விப⁴ங்கோ³, த⁴ம்மஸங்க³ஹோதி.
Pariyattīti tepiṭakaṃ buddhavacanaṃ sāṭṭhakathā pāḷi. Yāva sā tiṭṭhati, tāva pariyatti paripuṇṇā nāma hoti. Gacchante gacchante kāle rājayuvarājāno adhammikā honti, tesu adhammikesu rājāmaccādayo adhammikā honti, tato raṭṭhajanapadavāsinoti. Etesaṃ adhammikatāya devo na sammā vassati, tato sassāni na sampajjanti. Tesu asampajjantesu paccayadāyakā bhikkhusaṅghassa paccaye dātuṃ na sakkonti, bhikkhū paccayehi kilamantā antevāsike saṅgahetuṃ na sakkonti. Gacchante gacchante kāle pariyatti parihāyati, atthavasena dhāretuṃ na sakkonti, pāḷivaseneva dhārenti. Tato gacchante gacchante kāle pāḷimpi sakalaṃ dhāretuṃ na sakkonti, paṭhamaṃ abhidhammapiṭakaṃ parihāyati. Parihāyamānaṃ matthakato paṭṭhāya parihāyati . Paṭhamameva hi paṭṭhānamahāpakaraṇaṃ parihāyati, tasmiṃ parihīne yamakaṃ, kathāvatthu, puggalapaññatti, dhātukathā, vibhaṅgo, dhammasaṅgahoti.
ஏவங் அபி⁴த⁴ம்மபிடகே பரிஹீனே மத்த²கதோ பட்டா²ய ஸுத்தந்தபிடகங் பரிஹாயதி. பட²மஞ்ஹி அங்கு³த்தரனிகாயோ பரிஹாயதி, தஸ்மிம்பி பட²மங் ஏகாத³ஸகனிபாதோ, ததோ த³ஸகனிபாதோ…பே॰… ததோ ஏககனிபாதோதி. ஏவங் அங்கு³த்தரே பரிஹீனே மத்த²கதோ பட்டா²ய ஸங்யுத்தனிகாயோ பரிஹாயதி. பட²மங் ஹி மஹாவக்³கோ³ பரிஹாயதி, ததோ ஸளாயதனவக்³கோ³, க²ந்த⁴வக்³கோ³, நிதா³னவக்³கோ³, ஸகா³தா²வக்³கோ³தி. ஏவங் ஸங்யுத்தனிகாயே பரிஹீனே மத்த²கதோ பட்டா²ய மஜ்ஜி²மனிகாயோ பரிஹாயதி. பட²மங் ஹி உபரிபண்ணாஸகோ பரிஹாயதி, ததோ மஜ்ஜி²மபண்ணாஸகோ, ததோ மூலபண்ணாஸகோதி. ஏவங் மஜ்ஜி²மனிகாயே பரிஹீனே மத்த²கதோ பட்டா²ய தீ³க⁴னிகாயோ பரிஹாயதி. பட²மஞ்ஹி பாதி²கவக்³கோ³ பரிஹாயதி, ததோ மஹாவக்³கோ³, ததோ ஸீலக்க²ந்த⁴வக்³கோ³தி. ஏவங் தீ³க⁴னிகாயே பரிஹீனே ஸுத்தந்தபிடகங் பரிஹீனங் நாம ஹோதி. வினயபிடகேன ஸத்³தி⁴ங் ஜாதகமேவ தா⁴ரெந்தி. வினயபிடகங் லஜ்ஜினோவ தா⁴ரெந்தி, லாப⁴காமா பன ‘‘ஸுத்தந்தே கதி²தேபி ஸல்லக்கெ²ந்தா நத்தீ²’’தி ஜாதகமேவ தா⁴ரெந்தி. க³ச்ச²ந்தே க³ச்ச²ந்தே காலே ஜாதகம்பி தா⁴ரேதுங் ந ஸக்கொந்தி. அத² தேஸங் பட²மங் வெஸ்ஸந்தரஜாதகங் பரிஹாயதி, ததோ படிலோமக்கமேன புண்ணகஜாதகங், மஹானாரத³ஜாதகந்தி பரியோஸானே அபண்ணகஜாதகங் பரிஹாயதி. ஏவங் ஜாதகே பரிஹீனே வினயபிடகமேவ தா⁴ரெந்தி.
Evaṃ abhidhammapiṭake parihīne matthakato paṭṭhāya suttantapiṭakaṃ parihāyati. Paṭhamañhi aṅguttaranikāyo parihāyati, tasmimpi paṭhamaṃ ekādasakanipāto, tato dasakanipāto…pe… tato ekakanipātoti. Evaṃ aṅguttare parihīne matthakato paṭṭhāya saṃyuttanikāyo parihāyati. Paṭhamaṃ hi mahāvaggo parihāyati, tato saḷāyatanavaggo, khandhavaggo, nidānavaggo, sagāthāvaggoti. Evaṃ saṃyuttanikāye parihīne matthakato paṭṭhāya majjhimanikāyo parihāyati. Paṭhamaṃ hi uparipaṇṇāsako parihāyati, tato majjhimapaṇṇāsako, tato mūlapaṇṇāsakoti. Evaṃ majjhimanikāye parihīne matthakato paṭṭhāya dīghanikāyo parihāyati. Paṭhamañhi pāthikavaggo parihāyati, tato mahāvaggo, tato sīlakkhandhavaggoti. Evaṃ dīghanikāye parihīne suttantapiṭakaṃ parihīnaṃ nāma hoti. Vinayapiṭakena saddhiṃ jātakameva dhārenti. Vinayapiṭakaṃ lajjinova dhārenti, lābhakāmā pana ‘‘suttante kathitepi sallakkhentā natthī’’ti jātakameva dhārenti. Gacchante gacchante kāle jātakampi dhāretuṃ na sakkonti. Atha tesaṃ paṭhamaṃ vessantarajātakaṃ parihāyati, tato paṭilomakkamena puṇṇakajātakaṃ, mahānāradajātakanti pariyosāne apaṇṇakajātakaṃ parihāyati. Evaṃ jātake parihīne vinayapiṭakameva dhārenti.
க³ச்ச²ந்தே க³ச்ச²ந்தே காலே வினயபிடகம்பி மத்த²கதோ பட்டா²ய பரிஹாயதி. பட²மஞ்ஹி பரிவாரோ பரிஹாயதி, ததோ க²ந்த⁴கோ, பி⁴க்கு²னீவிப⁴ங்கோ³, மஹாவிப⁴ங்கோ³தி அனுக்கமேன உபோஸத²க்க²ந்த⁴கமத்தமேவ தா⁴ரெந்தி. ததா³பி பரியத்தி அந்தரஹிதா ந ஹோதி. யாவ பன மனுஸ்ஸேஸு சாதுப்பதி³ககா³தா²பி பவத்ததி, தாவ பரியத்தி அனந்தரஹிதாவ ஹோதி. யதா³ ஸத்³தோ⁴ பஸன்னோ ராஜா ஹத்தி²க்க²ந்தே⁴ ஸுவண்ணசங்கோடகம்ஹி ஸஹஸ்ஸத்த²விகங் ட²பாபெத்வா ‘‘பு³த்³தே⁴ஹி கதி²தங் சாதுப்பதி³ககா³த²ங் ஜானந்தோ இமங் ஸஹஸ்ஸங் க³ண்ஹதூ’’தி நக³ரே பே⁴ரிங் சராபெத்வா க³ண்ஹனகங் அலபி⁴த்வா ‘‘ஏகவாரங் சராபிதே நாம ஸுணந்தாபி ஹொந்தி அஸ்ஸுணந்தாபீ’’தி யாவததியங் சராபெத்வா க³ண்ஹனகங் அலபி⁴த்வா ராஜபுரிஸா தங் ஸஹஸ்ஸத்த²விகங் புன ராஜகுலங் பவேஸெந்தி, ததா³ பரியத்தி அந்தரஹிதா நாம ஹோதி. இத³ங் பரியத்திஅந்தரதா⁴னங் நாம.
Gacchante gacchante kāle vinayapiṭakampi matthakato paṭṭhāya parihāyati. Paṭhamañhi parivāro parihāyati, tato khandhako, bhikkhunīvibhaṅgo, mahāvibhaṅgoti anukkamena uposathakkhandhakamattameva dhārenti. Tadāpi pariyatti antarahitā na hoti. Yāva pana manussesu cātuppadikagāthāpi pavattati, tāva pariyatti anantarahitāva hoti. Yadā saddho pasanno rājā hatthikkhandhe suvaṇṇacaṅkoṭakamhi sahassatthavikaṃ ṭhapāpetvā ‘‘buddhehi kathitaṃ cātuppadikagāthaṃ jānanto imaṃ sahassaṃ gaṇhatū’’ti nagare bheriṃ carāpetvā gaṇhanakaṃ alabhitvā ‘‘ekavāraṃ carāpite nāma suṇantāpi honti assuṇantāpī’’ti yāvatatiyaṃ carāpetvā gaṇhanakaṃ alabhitvā rājapurisā taṃ sahassatthavikaṃ puna rājakulaṃ pavesenti, tadā pariyatti antarahitā nāma hoti. Idaṃ pariyattiantaradhānaṃ nāma.
க³ச்ச²ந்தே க³ச்ச²ந்தே காலே சீவரக்³க³ஹணங் பத்தக்³க³ஹணங் ஸம்மிஞ்ஜனபஸாரணங் ஆலோகிதவிலோகிதங் ந பாஸாதி³கங் ஹோதி. நிக³ண்ட²ஸமணா விய அலாபு³பத்தங் பி⁴க்கூ² பத்தங் அக்³க³பா³ஹாய பக்கி²பித்வா ஆதா³ய விசரந்தி, எத்தாவதாபி லிங்க³ங் அனந்தரஹிதமேவ ஹோதி. க³ச்ச²ந்தே க³ச்ச²ந்தே பன காலே அக்³க³பா³ஹதோ ஓதாரெத்வா ஹத்தே²ன வா ஸிக்காய வா ஓலம்பி³த்வா விசரந்தி, சீவரம்பி ரஜனஸாருப்பங் அகத்வா ஒட்ட²ட்டி²வண்ணங் கத்வா விசரந்தி. க³ச்ச²ந்தே க³ச்ச²ந்தே காலே ரஜனம்பி ந ஹோதி த³ஸச்சி²ந்த³னம்பி ஓவட்டிகவிஜ்ஜ²னம்பி, கப்பமத்தங் கத்வா வளஞ்ஜெந்தி. புன ஓவட்டிகங் விஜ்ஜி²த்வா கப்பங் ந கரொந்தி. ததோ உப⁴யம்பி அகத்வா த³ஸா செ²த்வா பரிப்³பா³ஜகா விய சரந்தி. க³ச்ச²ந்தே க³ச்ச²ந்தே காலே ‘‘கோ இமினா அம்ஹாகங் அத்தோ²’’தி கு²த்³த³கங் காஸாவக²ண்ட³ங் ஹத்தே² வா கீ³வாய வா ப³ந்த⁴ந்தி, கேஸேஸு வா அல்லீயாபெந்தி, தா³ரப⁴ரணங் வா கரொந்தா கஸித்வா வபித்வா ஜீவிகங் கப்பெத்வா விசரந்தி. ததா³ த³க்கி²ணங் தெ³ந்தா ஸங்க⁴ங் உத்³தி³ஸ்ஸ ஏதேஸங் தெ³ந்தி. இத³ங் ஸந்தா⁴ய ப⁴க³வதா வுத்தங் – ‘‘ப⁴விஸ்ஸந்தி கோ², பனானந்த³, அனாக³தமத்³தா⁴னங் கொ³த்ரபு⁴னோ காஸாவகண்டா² து³ஸ்ஸீலா பாபத⁴ம்மா, தேஸு து³ஸ்ஸீலேஸு ஸங்க⁴ங் உத்³தி³ஸ்ஸ தா³னங் த³ஸ்ஸந்தி, ததா³பாஹங், ஆனந்த³, ஸங்க⁴க³தங் த³க்கி²ணங் அஸங்கெ²ய்யங் அப்பமெய்யங் வதா³மீ’’தி (ம॰ நி॰ 3.380). ததோ க³ச்ச²ந்தே காலே நானாவிதா⁴னி கம்மானி கரொந்தா ‘‘பபஞ்சோ ஏஸ, கிங் இமினா அம்ஹாக’’ந்தி காஸாவக²ண்ட³ங் சி²ந்தி³த்வா அரஞ்ஞே கி²பந்தி. ஏதஸ்மிங் காலே லிங்க³ங் அந்தரஹிதங் நாம ஹோதி. கஸ்ஸபத³ஸப³லஸ்ஸ கிர காலதோ பட்டா²ய யோனகானங் ஸேதவத்த²ங் பாருபித்வா சரணங் சாரித்தங் ஜாதந்தி. இத³ங் லிங்க³அந்தரதா⁴னங் நாம.
Gacchante gacchante kāle cīvaraggahaṇaṃ pattaggahaṇaṃ sammiñjanapasāraṇaṃ ālokitavilokitaṃ na pāsādikaṃ hoti. Nigaṇṭhasamaṇā viya alābupattaṃ bhikkhū pattaṃ aggabāhāya pakkhipitvā ādāya vicaranti, ettāvatāpi liṅgaṃ anantarahitameva hoti. Gacchante gacchante pana kāle aggabāhato otāretvā hatthena vā sikkāya vā olambitvā vicaranti, cīvarampi rajanasāruppaṃ akatvā oṭṭhaṭṭhivaṇṇaṃ katvā vicaranti. Gacchante gacchante kāle rajanampi na hoti dasacchindanampi ovaṭṭikavijjhanampi, kappamattaṃ katvā vaḷañjenti. Puna ovaṭṭikaṃ vijjhitvā kappaṃ na karonti. Tato ubhayampi akatvā dasā chetvā paribbājakā viya caranti. Gacchante gacchante kāle ‘‘ko iminā amhākaṃ attho’’ti khuddakaṃ kāsāvakhaṇḍaṃ hatthe vā gīvāya vā bandhanti, kesesu vā allīyāpenti, dārabharaṇaṃ vā karontā kasitvā vapitvā jīvikaṃ kappetvā vicaranti. Tadā dakkhiṇaṃ dentā saṅghaṃ uddissa etesaṃ denti. Idaṃ sandhāya bhagavatā vuttaṃ – ‘‘bhavissanti kho, panānanda, anāgatamaddhānaṃ gotrabhuno kāsāvakaṇṭhā dussīlā pāpadhammā, tesu dussīlesu saṅghaṃ uddissa dānaṃ dassanti, tadāpāhaṃ, ānanda, saṅghagataṃ dakkhiṇaṃ asaṅkheyyaṃ appameyyaṃ vadāmī’’ti (ma. ni. 3.380). Tato gacchante kāle nānāvidhāni kammāni karontā ‘‘papañco esa, kiṃ iminā amhāka’’nti kāsāvakhaṇḍaṃ chinditvā araññe khipanti. Etasmiṃ kāle liṅgaṃ antarahitaṃ nāma hoti. Kassapadasabalassa kira kālato paṭṭhāya yonakānaṃ setavatthaṃ pārupitvā caraṇaṃ cārittaṃ jātanti. Idaṃ liṅgaantaradhānaṃ nāma.
தா⁴துஅந்தரதா⁴னங் பன ஏவங் வேதி³தப்³ப³ங் – தீணி பரினிப்³பா³னானி, கிலேஸபரினிப்³பா³னங் – க²ந்த⁴பரினிப்³பா³னங், தா⁴துபரினிப்³பா³னந்தி. தத்த² கிலேஸபரினிப்³பா³னங் போ³தி⁴பல்லங்கே அஹோஸி, க²ந்த⁴பரினிப்³பா³னங் குஸினாராயங், தா⁴துபரினிப்³பா³னங் அனாக³தே ப⁴விஸ்ஸதி. கத²ங்? ததோ தத்த² தத்த² ஸக்காரஸம்மானங் அலப⁴மானா தா⁴துயோ பு³த்³தா⁴னங் அதி⁴ட்டா²னப³லேன ஸக்காரஸம்மானலப⁴னகட்டா²னங் க³ச்ச²ந்தி. க³ச்ச²ந்தே க³ச்ச²ந்தே காலே ஸப்³ப³ட்டா²னேஸு ஸக்காரஸம்மானோ ந ஹோதி. ஸாஸனஸ்ஸ ஹி ஓஸக்கனகாலே இமஸ்மிங் தம்ப³பண்ணிதீ³பே ஸப்³பா³ தா⁴துயோ ஸன்னிபதித்வா மஹாசேதியங், ததோ நாக³தீ³பே ராஜாயதனசேதியங், ததோ போ³தி⁴பல்லங்கங் க³மிஸ்ஸந்தி. நாக³ப⁴வனதோபி தே³வலோகதோபி ப்³ரஹ்மலோகதோபி தா⁴துயோ மஹாபோ³தி⁴பல்லங்கமேவ க³மிஸ்ஸந்தி. ஸாஸபமத்தாபி தா⁴து அந்தரா ந நஸ்ஸிஸ்ஸதி. ஸப்³பா³ தா⁴துயோ மஹாபோ³தி⁴மண்டே³ ஸன்னிபதித்வா பு³த்³த⁴ரூபங் க³ஹெத்வா போ³தி⁴மண்டே³ பல்லங்கேன நிஸின்னபு³த்³த⁴ஸரீரஸிரிங் த³ஸ்ஸெந்தி. த்³வத்திங்ஸ மஹாபுரிஸலக்க²ணானி அஸீதி அனுப்³யஞ்ஜனானி ப்³யாமப்பபா⁴தி ஸப்³ப³ங் பரிபுண்ணமேவ ஹோதி. ததோ யமகபாடிஹாரியதி³வஸே விய பாடிஹாரியங் கத்வா த³ஸ்ஸெந்தி. ததா³ மனுஸ்ஸபூ⁴தஸத்தோ நாம தத்த² க³தோ நத்தி², த³ஸஸஹஸ்ஸசக்கவாளே பன தே³வதா ஸப்³பா³வ ஸன்னிபதித்வா ‘‘அஜ்ஜ த³ஸப³லோ பரினிப்³பா³யதி, இதோதா³னி பட்டா²ய அந்த⁴காரங் ப⁴விஸ்ஸதீ’’தி பரிதே³வந்தி. அத² தா⁴துஸரீரதோ தேஜோ ஸமுட்டா²ய தங் ஸரீரங் அபண்ணத்திகபா⁴வங் க³மேதி. தா⁴துஸரீரதோ ஸமுட்டி²தா ஜாலா யாவ ப்³ரஹ்மலோகா உக்³க³ச்சி²ஸ்ஸதி, ஸாஸபமத்தாய ஸேஸாயபி தா⁴துயா ஸதி ஏகஜாலாவ ப⁴விஸ்ஸதி. தா⁴தூஸு பரியாதா³னங் க³தாஸு பச்சி²ஜ்ஜிஸ்ஸதி. ஏவங் மஹந்தங் ஆனுபா⁴வங் த³ஸ்ஸெத்வா தா⁴துயோ அந்தரதா⁴யந்தி. ததா³ ஸன்னிபதிதா தே³வஸங்கா⁴ பு³த்³தா⁴னங் பரினிப்³பு³ததி³வஸே விய தி³ப்³ப³க³ந்த⁴மாலாதூரியாதீ³ஹி ஸக்காரங் கத்வா திக்க²த்துங் பத³க்கி²ணங் கத்வா வந்தி³த்வா ‘‘அனாக³தே உப்பஜ்ஜனகங் பு³த்³த⁴ங் பஸ்ஸிதுங் லபி⁴ஸ்ஸாம ப⁴க³வா’’தி வத்வா ஸகஸகட்டா²னமேவ க³ச்ச²ந்தி. இத³ங் தா⁴துஅந்தரதா⁴னங் நாம.
Dhātuantaradhānaṃ pana evaṃ veditabbaṃ – tīṇi parinibbānāni, kilesaparinibbānaṃ – khandhaparinibbānaṃ, dhātuparinibbānanti. Tattha kilesaparinibbānaṃ bodhipallaṅke ahosi, khandhaparinibbānaṃ kusinārāyaṃ, dhātuparinibbānaṃ anāgate bhavissati. Kathaṃ? Tato tattha tattha sakkārasammānaṃ alabhamānā dhātuyo buddhānaṃ adhiṭṭhānabalena sakkārasammānalabhanakaṭṭhānaṃ gacchanti. Gacchante gacchante kāle sabbaṭṭhānesu sakkārasammāno na hoti. Sāsanassa hi osakkanakāle imasmiṃ tambapaṇṇidīpe sabbā dhātuyo sannipatitvā mahācetiyaṃ, tato nāgadīpe rājāyatanacetiyaṃ, tato bodhipallaṅkaṃ gamissanti. Nāgabhavanatopi devalokatopi brahmalokatopi dhātuyo mahābodhipallaṅkameva gamissanti. Sāsapamattāpi dhātu antarā na nassissati. Sabbā dhātuyo mahābodhimaṇḍe sannipatitvā buddharūpaṃ gahetvā bodhimaṇḍe pallaṅkena nisinnabuddhasarīrasiriṃ dassenti. Dvattiṃsa mahāpurisalakkhaṇāni asīti anubyañjanāni byāmappabhāti sabbaṃ paripuṇṇameva hoti. Tato yamakapāṭihāriyadivase viya pāṭihāriyaṃ katvā dassenti. Tadā manussabhūtasatto nāma tattha gato natthi, dasasahassacakkavāḷe pana devatā sabbāva sannipatitvā ‘‘ajja dasabalo parinibbāyati, itodāni paṭṭhāya andhakāraṃ bhavissatī’’ti paridevanti. Atha dhātusarīrato tejo samuṭṭhāya taṃ sarīraṃ apaṇṇattikabhāvaṃ gameti. Dhātusarīrato samuṭṭhitā jālā yāva brahmalokā uggacchissati, sāsapamattāya sesāyapi dhātuyā sati ekajālāva bhavissati. Dhātūsu pariyādānaṃ gatāsu pacchijjissati. Evaṃ mahantaṃ ānubhāvaṃ dassetvā dhātuyo antaradhāyanti. Tadā sannipatitā devasaṅghā buddhānaṃ parinibbutadivase viya dibbagandhamālātūriyādīhi sakkāraṃ katvā tikkhattuṃ padakkhiṇaṃ katvā vanditvā ‘‘anāgate uppajjanakaṃ buddhaṃ passituṃ labhissāma bhagavā’’ti vatvā sakasakaṭṭhānameva gacchanti. Idaṃ dhātuantaradhānaṃ nāma.
இமஸ்ஸ பஞ்சவித⁴ஸ்ஸ அந்தரதா⁴னஸ்ஸ பரியத்திஅந்தரதா⁴னமேவ மூலங். பரியத்தியா ஹி அந்தரஹிதாய படிபத்தி அந்தரதா⁴யதி, பரியத்தியா டி²தாய படிபத்தி பதிட்டா²தி. தேனேவ இமஸ்மிங் தீ³பே சண்டா³லதிஸ்ஸமஹாப⁴யே ஸக்கோ தே³வராஜா மஹாஉளும்பங் மாபெத்வா பி⁴க்கூ²னங் ஆரோசாபேஸி ‘‘மஹந்தங் ப⁴யங் ப⁴விஸ்ஸதி, ந ஸம்மா தே³வோ வஸ்ஸிஸ்ஸதி, பி⁴க்கூ² பச்சயேஹி கிலமந்தா பரியத்திங் ஸந்தா⁴ரேதுங் ந ஸக்கி²ஸ்ஸந்தி, பரதீரங் க³ந்த்வா அய்யேஹி ஜீவிதங் ரக்கி²துங் வட்டதி. இமங் மஹாஉளும்பங் ஆருய்ஹ க³ச்ச²த², ப⁴ந்தே. யேஸங் எத்த² நிஸஜ்ஜட்டா²னங் நப்பஹோதி, தே கட்ட²க²ண்டே³பி உரங் ட²பெத்வா க³ச்ச²ந்து, ஸப்³பே³ஸம்பி ப⁴யங் ந ப⁴விஸ்ஸதீ’’தி. ததா³ ஸமுத்³த³தீரங் பத்வா ஸட்டி² பி⁴க்கூ² கதிகங் கத்வா ‘‘அம்ஹாகங் எத்த² க³மனகிச்சங் நத்தி², மயங் இதே⁴வ ஹுத்வா தேபிடகங் ரக்கி²ஸ்ஸாமா’’தி ததோ நிவத்தித்வா த³க்கி²ணமலயஜனபத³ங் க³ந்த்வா கந்த³மூலபண்ணேஹி ஜீவிகங் கப்பெந்தா வஸிங்ஸு. காயே வஹந்தே நிஸீதி³த்வா ஸஜ்ஜா²யங் கரொந்தி, அவஹந்தே வாலிகங் உஸ்ஸாரெத்வா பரிவாரெத்வா ஸீஸானி ஏகட்டா²னே கத்வா பரியத்திங் ஸம்மஸந்தி. இமினா நியாமேன த்³வாத³ஸ ஸங்வச்ச²ரானி ஸாட்ட²கத²ங் தேபிடகங் பரிபுண்ணங் கத்வா தா⁴ரயிங்ஸு.
Imassa pañcavidhassa antaradhānassa pariyattiantaradhānameva mūlaṃ. Pariyattiyā hi antarahitāya paṭipatti antaradhāyati, pariyattiyā ṭhitāya paṭipatti patiṭṭhāti. Teneva imasmiṃ dīpe caṇḍālatissamahābhaye sakko devarājā mahāuḷumpaṃ māpetvā bhikkhūnaṃ ārocāpesi ‘‘mahantaṃ bhayaṃ bhavissati, na sammā devo vassissati, bhikkhū paccayehi kilamantā pariyattiṃ sandhāretuṃ na sakkhissanti, paratīraṃ gantvā ayyehi jīvitaṃ rakkhituṃ vaṭṭati. Imaṃ mahāuḷumpaṃ āruyha gacchatha, bhante. Yesaṃ ettha nisajjaṭṭhānaṃ nappahoti, te kaṭṭhakhaṇḍepi uraṃ ṭhapetvā gacchantu, sabbesampi bhayaṃ na bhavissatī’’ti. Tadā samuddatīraṃ patvā saṭṭhi bhikkhū katikaṃ katvā ‘‘amhākaṃ ettha gamanakiccaṃ natthi, mayaṃ idheva hutvā tepiṭakaṃ rakkhissāmā’’ti tato nivattitvā dakkhiṇamalayajanapadaṃ gantvā kandamūlapaṇṇehi jīvikaṃ kappentā vasiṃsu. Kāye vahante nisīditvā sajjhāyaṃ karonti, avahante vālikaṃ ussāretvā parivāretvā sīsāni ekaṭṭhāne katvā pariyattiṃ sammasanti. Iminā niyāmena dvādasa saṃvaccharāni sāṭṭhakathaṃ tepiṭakaṃ paripuṇṇaṃ katvā dhārayiṃsu.
ப⁴யே வூபஸந்தே ஸத்தஸதா பி⁴க்கூ² அத்தனோ க³தட்டா²னே ஸாட்ட²கதே² தேபிடகே ஏகக்க²ரம்பி ஏகப்³யஞ்ஜனம்பி அனாஸெத்வா இமமேவ தீ³பமாக³ம்ம கல்லகா³மஜனபதே³ மண்ட³லாராமவிஹாரங் பவிஸிங்ஸு. தே²ரானங் ஆக³மனப்பவத்திங் ஸுத்வா இமஸ்மிங் தீ³பே ஓஹீனா ஸட்டி² பி⁴க்கூ² ‘‘தே²ரே பஸ்ஸிஸ்ஸாமா’’தி க³ந்த்வா தே²ரேஹி ஸத்³தி⁴ங் தேபிடகங் ஸோதெ⁴ந்தா ஏகக்க²ரம்பி ஏகப்³யஞ்ஜனம்பி அஸமெந்தங் நாம ந பஸ்ஸிங்ஸு. தஸ்மிங் டா²னே தே²ரானங் அயங் கதா² உத³பாதி³ ‘‘பரியத்தி நு கோ² ஸாஸனஸ்ஸ மூலங் , உதா³ஹு படிபத்தீ’’தி. பங்ஸுகூலிகத்தே²ரா ‘‘படிபத்திமூல’’ந்தி ஆஹங்ஸு, த⁴ம்மகதி²கா ‘‘பரியத்தீ’’தி . அத² நே தே²ரா ‘‘தும்ஹாகங் த்³வின்னம்பி ஜனானங் வசனமத்தேனேவ ந கரோம, ஜினபா⁴ஸிதங் ஸுத்தங் ஆஹரதா²’’தி ஆஹங்ஸு. ஸுத்தங் ஆஹரிதுங் ந பா⁴ரோதி ‘‘இமே ச, ஸுப⁴த்³த³ , பி⁴க்கூ² ஸம்மா விஹரெய்யுங், அஸுஞ்ஞோ லோகோ அரஹந்தேஹி அஸ்ஸாதி (தீ³॰ நி॰ 2.214). படிபத்திமூலகங், மஹாராஜ, ஸத்து²ஸாஸனங் படிபத்திஸாரகங். படிபத்தியா த⁴ரந்தாய திட்ட²தீ’’தி (மி॰ ப॰ 4.1.7) ஸுத்தங் ஆஹரிங்ஸு. இமங் ஸுத்தங் ஸுத்வா த⁴ம்மகதி²கா அத்தனோ வாத³ட²பனத்தா²ய இமங் ஸுத்தங் ஆஹரிங்ஸு –
Bhaye vūpasante sattasatā bhikkhū attano gataṭṭhāne sāṭṭhakathe tepiṭake ekakkharampi ekabyañjanampi anāsetvā imameva dīpamāgamma kallagāmajanapade maṇḍalārāmavihāraṃ pavisiṃsu. Therānaṃ āgamanappavattiṃ sutvā imasmiṃ dīpe ohīnā saṭṭhi bhikkhū ‘‘there passissāmā’’ti gantvā therehi saddhiṃ tepiṭakaṃ sodhentā ekakkharampi ekabyañjanampi asamentaṃ nāma na passiṃsu. Tasmiṃ ṭhāne therānaṃ ayaṃ kathā udapādi ‘‘pariyatti nu kho sāsanassa mūlaṃ , udāhu paṭipattī’’ti. Paṃsukūlikattherā ‘‘paṭipattimūla’’nti āhaṃsu, dhammakathikā ‘‘pariyattī’’ti . Atha ne therā ‘‘tumhākaṃ dvinnampi janānaṃ vacanamatteneva na karoma, jinabhāsitaṃ suttaṃ āharathā’’ti āhaṃsu. Suttaṃ āharituṃ na bhāroti ‘‘ime ca, subhadda , bhikkhū sammā vihareyyuṃ, asuñño loko arahantehi assāti (dī. ni. 2.214). Paṭipattimūlakaṃ, mahārāja, satthusāsanaṃ paṭipattisārakaṃ. Paṭipattiyā dharantāya tiṭṭhatī’’ti (mi. pa. 4.1.7) suttaṃ āhariṃsu. Imaṃ suttaṃ sutvā dhammakathikā attano vādaṭhapanatthāya imaṃ suttaṃ āhariṃsu –
‘‘யாவ திட்ட²ந்தி ஸுத்தந்தா, வினயோ யாவ தி³ப்பதி;
‘‘Yāva tiṭṭhanti suttantā, vinayo yāva dippati;
தாவ த³க்க²ந்தி ஆலோகங், ஸூரியே அப்³பு⁴ட்டி²தே யதா².
Tāva dakkhanti ālokaṃ, sūriye abbhuṭṭhite yathā.
‘‘ஸுத்தந்தேஸு அஸந்தேஸு, பமுட்டே² வினயம்ஹி ச;
‘‘Suttantesu asantesu, pamuṭṭhe vinayamhi ca;
தமோ ப⁴விஸ்ஸதி லோகே, ஸூரியே அத்த²ங்க³தே யதா².
Tamo bhavissati loke, sūriye atthaṅgate yathā.
‘‘ஸுத்தந்தே ரக்கி²தே ஸந்தே, படிபத்தி ஹோதி ரக்கி²தா;
‘‘Suttante rakkhite sante, paṭipatti hoti rakkhitā;
படிபத்தியங் டி²தோ தீ⁴ரோ, யோக³க்கே²மா ந த⁴ங்ஸதீ’’தி.
Paṭipattiyaṃ ṭhito dhīro, yogakkhemā na dhaṃsatī’’ti.
இமஸ்மிங் ஸுத்தே ஆஹடே பங்ஸுகூலிகத்தே²ரா துண்ஹீ அஹேஸுங், த⁴ம்மகதி²கத்தே²ரானங்யேவ வசனங் புரதோ அஹோஸி. யதா² ஹி க³வஸதஸ்ஸ வா க³வஸஹஸ்ஸஸ்ஸ வா அந்தரே பவேணிபாலிகாய தே⁴னுயா அஸதி ஸோ வங்ஸோ ஸா பவேணி ந க⁴டீயதி, ஏவமேவங் ஆரத்³த⁴விபஸ்ஸகானங் பி⁴க்கூ²னங் ஸதேபி ஸஹஸ்ஸேபி ஸங்விஜ்ஜமானே பரியத்தியா அஸதி அரியமக்³க³படிவேதோ⁴ நாம ந ஹோதி. யதா² ச நிதி⁴கும்பி⁴யா ஜானநத்தா²ய பாஸாணபிட்டே² அக்க²ரேஸு ட²பிதேஸு யாவ அக்க²ரானி த⁴ரந்தி, தாவ நிதி⁴கும்பி⁴ நட்டா² நாம ந ஹோதி. ஏவமேவங் பரியத்தியா த⁴ரமானாய ஸாஸனங் அந்தரஹிதங் நாம ந ஹோதீதி.
Imasmiṃ sutte āhaṭe paṃsukūlikattherā tuṇhī ahesuṃ, dhammakathikattherānaṃyeva vacanaṃ purato ahosi. Yathā hi gavasatassa vā gavasahassassa vā antare paveṇipālikāya dhenuyā asati so vaṃso sā paveṇi na ghaṭīyati, evamevaṃ āraddhavipassakānaṃ bhikkhūnaṃ satepi sahassepi saṃvijjamāne pariyattiyā asati ariyamaggapaṭivedho nāma na hoti. Yathā ca nidhikumbhiyā jānanatthāya pāsāṇapiṭṭhe akkharesu ṭhapitesu yāva akkharāni dharanti, tāva nidhikumbhi naṭṭhā nāma na hoti. Evamevaṃ pariyattiyā dharamānāya sāsanaṃ antarahitaṃ nāma na hotīti.
து³தியபமாதா³தி³வக்³க³வண்ணனா.
Dutiyapamādādivaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. து³தியபமாதா³தி³வக்³கோ³ • 10. Dutiyapamādādivaggo
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. து³தியபமாதா³தி³வக்³க³வண்ணனா • 10. Dutiyapamādādivaggavaṇṇanā
