| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. து³தியபமாதா³தி³வக்³க³வண்ணனா
10. Dutiyapamādādivaggavaṇṇanā
98-115. த³ஸமே வக்³கே³ அஜ்ஜ²த்தஸந்தானே ப⁴வங் அஜ்ஜ²த்திகங். அஜ்ஜ²த்தஸந்தானதோ ப³ஹித்³தா⁴ ப⁴வங் பா³ஹிரங். வுத்தபடிபக்க²னயேனாதி ‘‘அவினாஸாயா’’தி ஏவமாதி³னா அத்தோ² க³ஹேதப்³போ³. சதுக்கோடிகேதி ‘‘அனுயோகோ³ அகுஸலானங் , அனநுயோகோ³ குஸலானங், அனுயோகோ³ குஸலானங், அனநுயோகோ³ அகுஸலான’’ந்தி (அ॰ நி॰ 1.96) ஏவங் பரியோஸானஸுத்தே ஆக³தனயங் க³ஹெத்வா ‘‘நாஹங், பி⁴க்க²வே, அஞ்ஞங் ஏகத⁴ம்மம்பி ஸமனுபஸ்ஸாமீ’’திஆதி³னா (அ॰ நி॰ 1.11) ஆக³தஸுத்தானங் ஸமஞ்ஞா ஜாதா.
98-115. Dasame vagge ajjhattasantāne bhavaṃ ajjhattikaṃ. Ajjhattasantānato bahiddhā bhavaṃ bāhiraṃ. Vuttapaṭipakkhanayenāti ‘‘avināsāyā’’ti evamādinā attho gahetabbo. Catukkoṭiketi ‘‘anuyogo akusalānaṃ , ananuyogo kusalānaṃ, anuyogo kusalānaṃ, ananuyogo akusalāna’’nti (a. ni. 1.96) evaṃ pariyosānasutte āgatanayaṃ gahetvā ‘‘nāhaṃ, bhikkhave, aññaṃ ekadhammampi samanupassāmī’’tiādinā (a. ni. 1.11) āgatasuttānaṃ samaññā jātā.
130. ஸுத்தந்தனயே யதா²சோத³னா ஸங்கிலேஸத⁴ம்மானங் விபரியேஸனங், தங்தங்த⁴ம்மகொட்டா²ஸானஞ்ச ஊனதோ அதி⁴கதோ ச பவேத³னங் அத⁴ம்மங் த⁴ம்மோதி தீ³பனங். தேஸங்யேவ பன அவிபரீததோ அனூனாதி⁴கதோ ச பவேத³னங் த⁴ம்மங் த⁴ம்மோதி தீ³பனங். ஏவங் வினயப்படிபத்தியா அயதா²விதி⁴ப்பவேத³னங் அத⁴ம்மங் த⁴ம்மோதி தீ³பனங். யதா²விதி⁴ப்பவேத³னங் த⁴ம்மங் த⁴ம்மோதி தீ³பனங். ஸுத்தந்தனயேன பஞ்சவிதோ⁴ ஸங்வரவினயோ பஹானவினயோ ச வினயோ, தப்படிபக்கே²ன அவினயோ. வினயனயேன வத்து²ஸம்பதா³தி³னா யதா²விதி⁴ப்படிபத்தி ஏவ வினயோ, தப்³பி³பரியாயேன அவினயோ வேதி³தப்³போ³. திங்ஸ நிஸ்ஸக்³கி³யா பாசித்தியாதி எத்த² இதி-ஸத்³தோ³ ஆத்³யத்தோ². தேன த்³வேனவுதி பாசித்தியா, சத்தாரோ பாடிதே³ஸனியா, ஸத்த அதி⁴கரணஸமதா²தி இமேஸங் ஸங்க³ஹோ. ஏகதிங்ஸ நிஸ்ஸக்³கி³யாதி எத்த² ‘‘தேனவுதி பாசித்தியா’’திஆதி³னா வத்தப்³ப³ங். ஸேஸமெத்த² ஸுவிஞ்ஞெய்யமேவ.
130. Suttantanaye yathācodanā saṃkilesadhammānaṃ vipariyesanaṃ, taṃtaṃdhammakoṭṭhāsānañca ūnato adhikato ca pavedanaṃ adhammaṃ dhammoti dīpanaṃ. Tesaṃyeva pana aviparītato anūnādhikato ca pavedanaṃ dhammaṃ dhammoti dīpanaṃ. Evaṃ vinayappaṭipattiyā ayathāvidhippavedanaṃ adhammaṃ dhammoti dīpanaṃ. Yathāvidhippavedanaṃ dhammaṃ dhammoti dīpanaṃ. Suttantanayena pañcavidho saṃvaravinayo pahānavinayo ca vinayo, tappaṭipakkhena avinayo. Vinayanayena vatthusampadādinā yathāvidhippaṭipatti eva vinayo, tabbipariyāyena avinayo veditabbo. Tiṃsa nissaggiyā pācittiyāti ettha iti-saddo ādyattho. Tena dvenavuti pācittiyā, cattāro pāṭidesaniyā, satta adhikaraṇasamathāti imesaṃ saṅgaho. Ekatiṃsa nissaggiyāti ettha ‘‘tenavuti pācittiyā’’tiādinā vattabbaṃ. Sesamettha suviññeyyameva.
அதி⁴க³ந்தப்³ப³தோ அதி⁴க³மோ, மக்³க³ப²லானி. நிப்³பா³னங் பன அந்தரதா⁴னாபா⁴வதோ இத⁴ ந க³ய்ஹதி. படிபஜ்ஜனங் படிபத்தி, ஸிக்க²த்தயஸமாயோகோ³. படிபஜ்ஜிதப்³ப³தோ வா படிபத்தி. பரியாபுணிதப்³ப³தோ பரியத்தி, பிடகத்தயங். மக்³க³க்³க³ஹணேன க³ஹிதாபி ததியவிஜ்ஜாச²ட்டா²பி⁴ஞ்ஞா விஜ்ஜாபி⁴ஞ்ஞாஸாமஞ்ஞதோ ‘‘திஸ்ஸோ விஜ்ஜா ச² அபி⁴ஞ்ஞா’’தி புனபி க³ஹிதா. ததோ பரங் ச² அபி⁴ஞ்ஞாதி வஸ்ஸஸஹஸ்ஸதோ பரங் ச² அபி⁴ஞ்ஞா நிப்³ப³த்தேதுங் ஸக்கொந்தி, ந படிஸம்பி⁴தா³தி அதி⁴ப்பாயோ. ததோதி அபி⁴ஞ்ஞாகாலதோ பச்சா². தாதி அபி⁴ஞ்ஞாயோ. புப்³ப³பா⁴கே³ ஜா²னஸினேஹாபா⁴வேன கேவலாய விபஸ்ஸனாய ட²த்வா அக்³க³ப²லப்பத்தா ஸுக்க²விபஸ்ஸகா நாம, மக்³க³க்க²ணே பன ‘‘ஜா²னஸினேஹோ நத்தீ²’’தி ந வத்தப்³போ³ ‘‘ஸமத²விபஸ்ஸனங் யுக³னத்³த⁴ங் பா⁴வேதீ’’தி (அ॰ நி॰ 4.170) வசனதோ. பச்சி²மகஸ்ஸாதி ஸப்³ப³பச்சி²மஸ்ஸ. கிஞ்சாபி அரியோ அபரிஹானத⁴ம்மோ , ஸோதாபன்னஸ்ஸ பன உத்³த⁴ங் ஜீவிதபரியாதா³னா அதி⁴க³தத⁴ம்மோ உப்பன்னோ நாம நத்தி², பச்சயஸாமக்³கி³யா அஸதி யாவ உபரிவிஸேஸங் நிப்³ப³த்தேதுங் ந ஸக்கொந்தி, தாவ அதி⁴க³மஸ்ஸ அஸம்ப⁴வோ ஏவாதி ஆஹ – ‘‘ஸோதாபன்னஸ்ஸ…பே॰… நாம ஹோதீ’’தி. தஸ்ஸித³ங் மனுஸ்ஸலோகவஸேன வுத்தந்தி த³ட்ட²ப்³ப³ங்.
Adhigantabbato adhigamo, maggaphalāni. Nibbānaṃ pana antaradhānābhāvato idha na gayhati. Paṭipajjanaṃ paṭipatti, sikkhattayasamāyogo. Paṭipajjitabbato vā paṭipatti. Pariyāpuṇitabbato pariyatti, piṭakattayaṃ. Maggaggahaṇena gahitāpi tatiyavijjāchaṭṭhābhiññā vijjābhiññāsāmaññato ‘‘tisso vijjā cha abhiññā’’ti punapi gahitā. Tato paraṃ cha abhiññāti vassasahassato paraṃ cha abhiññā nibbattetuṃ sakkonti, na paṭisambhidāti adhippāyo. Tatoti abhiññākālato pacchā. Tāti abhiññāyo. Pubbabhāge jhānasinehābhāvena kevalāya vipassanāya ṭhatvā aggaphalappattā sukkhavipassakā nāma, maggakkhaṇe pana ‘‘jhānasineho natthī’’ti na vattabbo ‘‘samathavipassanaṃ yuganaddhaṃ bhāvetī’’ti (a. ni. 4.170) vacanato. Pacchimakassāti sabbapacchimassa. Kiñcāpi ariyo aparihānadhammo , sotāpannassa pana uddhaṃ jīvitapariyādānā adhigatadhammo uppanno nāma natthi, paccayasāmaggiyā asati yāva uparivisesaṃ nibbattetuṃ na sakkonti, tāva adhigamassa asambhavo evāti āha – ‘‘sotāpannassa…pe… nāma hotī’’ti. Tassidaṃ manussalokavasena vuttanti daṭṭhabbaṃ.
ந சோதெ³ந்தீதி அஞ்ஞமஞ்ஞஸ்மிங் விஜ்ஜமானங் தோ³ஸங் ஜானந்தாபி ந சோதெ³ந்தி ந ஸாரெந்தி. அகுக்குச்சகா ஹொந்தீதி குக்குச்சங் ந உப்பாதெ³ந்தி. ‘‘அஸக்கச்சகாரினோ ஹொந்தீ’’தி ச பட²ந்தி, ஸாத²லிகதாய ஸிக்கா²ஸு அஸக்கச்சகாரினோ ஹொந்தீதி அத்தோ². பி⁴க்கூ²னங் ஸதேபி ஸஹஸ்ஸேபி த⁴ரமானேதி இத³ங் பா³ஹுல்லவஸேன வுத்தங். அந்திமவத்து²அனஜ்ஜா²பன்னேஸு கதிபயமத்தேஸுபி பி⁴க்கூ²ஸு த⁴ரந்தேஸு, ஏகஸ்மிங் வா த⁴ரந்தே படிபத்தி அனந்தரஹிதா ஏவ நாம ஹோதி. தேனேவாஹ – ‘‘பச்சி²மகஸ்ஸ…பே॰… அந்தரஹிதா ஹோதீ’’தி.
Na codentīti aññamaññasmiṃ vijjamānaṃ dosaṃ jānantāpi na codenti na sārenti. Akukkuccakā hontīti kukkuccaṃ na uppādenti. ‘‘Asakkaccakārino hontī’’ti ca paṭhanti, sāthalikatāya sikkhāsu asakkaccakārino hontīti attho. Bhikkhūnaṃ satepi sahassepi dharamāneti idaṃ bāhullavasena vuttaṃ. Antimavatthuanajjhāpannesu katipayamattesupi bhikkhūsu dharantesu, ekasmiṃ vā dharante paṭipatti anantarahitā eva nāma hoti. Tenevāha – ‘‘pacchimakassa…pe… antarahitā hotī’’ti.
அந்தேவாஸிகே க³ஹேதுந்தி அந்தேவாஸிகே ஸங்க³ஹேதுங். அத்த²வஸேனாதி அட்ட²கதா²வஸேன. மத்த²கதோ பட்டா²யாதி உபரிதோ பட்டா²ய. உபோஸத²க்க²ந்த⁴கமத்தந்தி வினயமாதிகாபாளிமாஹ. ஆளவகபஞ்ஹாதீ³னங் விய தே³வேஸு பரியத்தியா பவத்தி அப்பமாணந்தி ஆஹ – ‘‘மனுஸ்ஸேஸூ’’தி.
Antevāsike gahetunti antevāsike saṅgahetuṃ. Atthavasenāti aṭṭhakathāvasena. Matthakato paṭṭhāyāti uparito paṭṭhāya. Uposathakkhandhakamattanti vinayamātikāpāḷimāha. Āḷavakapañhādīnaṃ viya devesu pariyattiyā pavatti appamāṇanti āha – ‘‘manussesū’’ti.
ஒட்ட²ட்டி²வண்ணந்தி ஒட்டா²னங் அட்டி²வண்ணங், த³ந்தகஸாவங் ஏகங் வா த்³வே வா வாரே ரஜித்வா த³ந்தவண்ணங் கத்வா தா⁴ரெந்தீதி வுத்தங் ஹோதி. கேஸேஸு வா அல்லீயாபெந்தீதி தேன காஸாவக²ண்டே³ன கேஸே ப³ந்த⁴ந்தா அல்லீயாபெந்தி. பி⁴க்கு²கொ³த்தஸ்ஸ அபி⁴ப⁴வனதோ வினாஸனதோ கொ³த்ரபு⁴னோ. அத² வா கொ³த்தங் வுச்சதி ஸாதா⁴ரணங் நாமங், மத்தஸத்³தோ³ லுத்தனித்³தி³ட்டோ², தஸ்மா ‘‘ஸமணா’’தி கொ³த்தமத்தங் அனுப⁴வந்தி தா⁴ரெந்தீதி கொ³த்ரபு⁴னோ, நாமமத்தஸமணாதி அத்தோ². காஸாவக³தகண்ட²தாய, காஸாவக்³க³ஹணஹேதுஉப்பஜ்ஜனகஸோகதாய வா காஸாவகண்டா². ஸங்க⁴க³தந்தி ஸங்க⁴ங் உத்³தி³ஸ்ஸ தி³ன்னத்தா ஸங்க⁴க³தங். தங் ஸரீரந்தி தங் தா⁴துஸரீரங்.
Oṭṭhaṭṭhivaṇṇanti oṭṭhānaṃ aṭṭhivaṇṇaṃ, dantakasāvaṃ ekaṃ vā dve vā vāre rajitvā dantavaṇṇaṃ katvā dhārentīti vuttaṃ hoti. Kesesu vā allīyāpentīti tena kāsāvakhaṇḍena kese bandhantā allīyāpenti. Bhikkhugottassa abhibhavanato vināsanato gotrabhuno. Atha vā gottaṃ vuccati sādhāraṇaṃ nāmaṃ, mattasaddo luttaniddiṭṭho, tasmā ‘‘samaṇā’’ti gottamattaṃ anubhavanti dhārentīti gotrabhuno, nāmamattasamaṇāti attho. Kāsāvagatakaṇṭhatāya, kāsāvaggahaṇahetuuppajjanakasokatāya vā kāsāvakaṇṭhā. Saṅghagatanti saṅghaṃ uddissa dinnattā saṅghagataṃ. Taṃ sarīranti taṃ dhātusarīraṃ.
தேனேவாதி பரியத்திஅந்தரதா⁴னமூலகத்தா ஏவ இதரஅந்தரதா⁴னஸ்ஸ. ஸக்கோ தே³வராஜா சா²தகப⁴யே பரதீரக³மனாய பி⁴க்கூ² உஸ்ஸுக்கமகாஸீதி அதி⁴ப்பாயோ. நேதி உப⁴யேபி பங்ஸுகூலிகத்தே²ரே த⁴ம்மகதி²கத்தே²ரே ச. தே²ராதி தத்த² டி²தா ஸக்கி²பூ⁴தா தே²ரா. த⁴ம்மகதி²கத்தே²ரா ‘‘யாவ திட்ட²ந்தி ஸுத்தந்தா…பே॰… யோக³க்கே²மா ந த⁴ங்ஸதீ’’தி இத³ங் ஸுத்தங் ஆஹரித்வா ‘‘ஸுத்தந்தே ரக்கி²தே ஸந்தே, படிபத்தி ஹோதி ரக்கி²தா’’தி இமினா வசனேன பங்ஸுகூலிகத்தே²ரே அப்படிபா⁴னே அகங்ஸு . இதா³னி பரியத்தியா அனந்தரதா⁴னமேவ இதரேஸங் அனந்தரதா⁴னஹேதூதி இமமத்த²ங் ப்³யதிரேகதோ அன்வயதோ ச உபமாஹி விபா⁴வேதுங் ‘‘யதா² ஹீ’’திஆதி³ வுத்தங். தங் ஸுவிஞ்ஞெய்யமேவ.
Tenevāti pariyattiantaradhānamūlakattā eva itaraantaradhānassa. Sakko devarājā chātakabhaye paratīragamanāya bhikkhū ussukkamakāsīti adhippāyo. Neti ubhayepi paṃsukūlikatthere dhammakathikatthere ca. Therāti tattha ṭhitā sakkhibhūtā therā. Dhammakathikattherā ‘‘yāva tiṭṭhantisuttantā…pe… yogakkhemā na dhaṃsatī’’ti idaṃ suttaṃ āharitvā ‘‘suttante rakkhite sante, paṭipatti hoti rakkhitā’’ti iminā vacanena paṃsukūlikatthere appaṭibhāne akaṃsu . Idāni pariyattiyā anantaradhānameva itaresaṃ anantaradhānahetūti imamatthaṃ byatirekato anvayato ca upamāhi vibhāvetuṃ ‘‘yathā hī’’tiādi vuttaṃ. Taṃ suviññeyyameva.
து³தியபமாதா³தி³வக்³க³வண்ணனா நிட்டி²தா.
Dutiyapamādādivaggavaṇṇanā niṭṭhitā.
140-150. ஏகாத³ஸமத்³வாத³ஸமவக்³கா³ ஸுவிஞ்ஞெய்யா ஏவ.
140-150. Ekādasamadvādasamavaggā suviññeyyā eva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
10. து³தியபமாதா³தி³வக்³கோ³ • 10. Dutiyapamādādivaggo
11. அத⁴ம்மவக்³கோ³ • 11. Adhammavaggo
12. அனாபத்திவக்³கோ³ • 12. Anāpattivaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
10. து³தியபமாதா³தி³வக்³க³வண்ணனா • 10. Dutiyapamādādivaggavaṇṇanā
11. அத⁴ம்மவக்³க³வண்ணனா • 11. Adhammavaggavaṇṇanā
12. அனாபத்திவக்³க³வண்ணனா • 12. Anāpattivaggavaṇṇanā
