| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
১০. দুতিযপমাদাদিৰগ্গৰণ্ণনা
10. Dutiyapamādādivaggavaṇṇanā
৯৮-১১৫. দসমে ৰগ্গে অজ্ঝত্তসন্তানে ভৰং অজ্ঝত্তিকং। অজ্ঝত্তসন্তানতো বহিদ্ধা ভৰং বাহিরং। ৰুত্তপটিপক্খনযেনাতি ‘‘অৰিনাসাযা’’তি এৰমাদিনা অত্থো গহেতব্বো। চতুক্কোটিকেতি ‘‘অনুযোগো অকুসলানং , অননুযোগো কুসলানং, অনুযোগো কুসলানং, অননুযোগো অকুসলান’’ন্তি (অ॰ নি॰ ১.৯৬) এৰং পরিযোসানসুত্তে আগতনযং গহেত্ৰা ‘‘নাহং, ভিক্খৰে, অঞ্ঞং একধম্মম্পি সমনুপস্সামী’’তিআদিনা (অ॰ নি॰ ১.১১) আগতসুত্তানং সমঞ্ঞা জাতা।
98-115. Dasame vagge ajjhattasantāne bhavaṃ ajjhattikaṃ. Ajjhattasantānato bahiddhā bhavaṃ bāhiraṃ. Vuttapaṭipakkhanayenāti ‘‘avināsāyā’’ti evamādinā attho gahetabbo. Catukkoṭiketi ‘‘anuyogo akusalānaṃ , ananuyogo kusalānaṃ, anuyogo kusalānaṃ, ananuyogo akusalāna’’nti (a. ni. 1.96) evaṃ pariyosānasutte āgatanayaṃ gahetvā ‘‘nāhaṃ, bhikkhave, aññaṃ ekadhammampi samanupassāmī’’tiādinā (a. ni. 1.11) āgatasuttānaṃ samaññā jātā.
১৩০. সুত্তন্তনযে যথাচোদনা সংকিলেসধম্মানং ৰিপরিযেসনং, তংতংধম্মকোট্ঠাসানঞ্চ ঊনতো অধিকতো চ পৰেদনং অধম্মং ধম্মোতি দীপনং। তেসংযেৰ পন অৰিপরীততো অনূনাধিকতো চ পৰেদনং ধম্মং ধম্মোতি দীপনং। এৰং ৰিনযপ্পটিপত্তিযা অযথাৰিধিপ্পৰেদনং অধম্মং ধম্মোতি দীপনং। যথাৰিধিপ্পৰেদনং ধম্মং ধম্মোতি দীপনং। সুত্তন্তনযেন পঞ্চৰিধো সংৰরৰিনযো পহানৰিনযো চ ৰিনযো, তপ্পটিপক্খেন অৰিনযো। ৰিনযনযেন ৰত্থুসম্পদাদিনা যথাৰিধিপ্পটিপত্তি এৰ ৰিনযো, তব্বিপরিযাযেন অৰিনযো ৰেদিতব্বো। তিংস নিস্সগ্গিযা পাচিত্তিযাতি এত্থ ইতি-সদ্দো আদ্যত্থো। তেন দ্ৰেনৰুতি পাচিত্তিযা, চত্তারো পাটিদেসনিযা, সত্ত অধিকরণসমথাতি ইমেসং সঙ্গহো। একতিংস নিস্সগ্গিযাতি এত্থ ‘‘তেনৰুতি পাচিত্তিযা’’তিআদিনা ৰত্তব্বং। সেসমেত্থ সুৰিঞ্ঞেয্যমেৰ।
130. Suttantanaye yathācodanā saṃkilesadhammānaṃ vipariyesanaṃ, taṃtaṃdhammakoṭṭhāsānañca ūnato adhikato ca pavedanaṃ adhammaṃ dhammoti dīpanaṃ. Tesaṃyeva pana aviparītato anūnādhikato ca pavedanaṃ dhammaṃ dhammoti dīpanaṃ. Evaṃ vinayappaṭipattiyā ayathāvidhippavedanaṃ adhammaṃ dhammoti dīpanaṃ. Yathāvidhippavedanaṃ dhammaṃ dhammoti dīpanaṃ. Suttantanayena pañcavidho saṃvaravinayo pahānavinayo ca vinayo, tappaṭipakkhena avinayo. Vinayanayena vatthusampadādinā yathāvidhippaṭipatti eva vinayo, tabbipariyāyena avinayo veditabbo. Tiṃsa nissaggiyā pācittiyāti ettha iti-saddo ādyattho. Tena dvenavuti pācittiyā, cattāro pāṭidesaniyā, satta adhikaraṇasamathāti imesaṃ saṅgaho. Ekatiṃsa nissaggiyāti ettha ‘‘tenavuti pācittiyā’’tiādinā vattabbaṃ. Sesamettha suviññeyyameva.
অধিগন্তব্বতো অধিগমো, মগ্গফলানি। নিব্বানং পন অন্তরধানাভাৰতো ইধ ন গয্হতি। পটিপজ্জনং পটিপত্তি, সিক্খত্তযসমাযোগো। পটিপজ্জিতব্বতো ৰা পটিপত্তি। পরিযাপুণিতব্বতো পরিযত্তি, পিটকত্তযং। মগ্গগ্গহণেন গহিতাপি ততিযৰিজ্জাছট্ঠাভিঞ্ঞা ৰিজ্জাভিঞ্ঞাসামঞ্ঞতো ‘‘তিস্সো ৰিজ্জা ছ অভিঞ্ঞা’’তি পুনপি গহিতা। ততো পরং ছ অভিঞ্ঞাতি ৰস্সসহস্সতো পরং ছ অভিঞ্ঞা নিব্বত্তেতুং সক্কোন্তি, ন পটিসম্ভিদাতি অধিপ্পাযো। ততোতি অভিঞ্ঞাকালতো পচ্ছা। তাতি অভিঞ্ঞাযো। পুব্বভাগে ঝানসিনেহাভাৰেন কেৰলায ৰিপস্সনায ঠত্ৰা অগ্গফলপ্পত্তা সুক্খৰিপস্সকা নাম, মগ্গক্খণে পন ‘‘ঝানসিনেহো নত্থী’’তি ন ৰত্তব্বো ‘‘সমথৰিপস্সনং যুগনদ্ধং ভাৰেতী’’তি (অ॰ নি॰ ৪.১৭০) ৰচনতো। পচ্ছিমকস্সাতি সব্বপচ্ছিমস্স। কিঞ্চাপি অরিযো অপরিহানধম্মো , সোতাপন্নস্স পন উদ্ধং জীৰিতপরিযাদানা অধিগতধম্মো উপ্পন্নো নাম নত্থি, পচ্চযসামগ্গিযা অসতি যাৰ উপরিৰিসেসং নিব্বত্তেতুং ন সক্কোন্তি, তাৰ অধিগমস্স অসম্ভৰো এৰাতি আহ – ‘‘সোতাপন্নস্স…পে॰… নাম হোতী’’তি। তস্সিদং মনুস্সলোকৰসেন ৰুত্তন্তি দট্ঠব্বং।
Adhigantabbato adhigamo, maggaphalāni. Nibbānaṃ pana antaradhānābhāvato idha na gayhati. Paṭipajjanaṃ paṭipatti, sikkhattayasamāyogo. Paṭipajjitabbato vā paṭipatti. Pariyāpuṇitabbato pariyatti, piṭakattayaṃ. Maggaggahaṇena gahitāpi tatiyavijjāchaṭṭhābhiññā vijjābhiññāsāmaññato ‘‘tisso vijjā cha abhiññā’’ti punapi gahitā. Tato paraṃ cha abhiññāti vassasahassato paraṃ cha abhiññā nibbattetuṃ sakkonti, na paṭisambhidāti adhippāyo. Tatoti abhiññākālato pacchā. Tāti abhiññāyo. Pubbabhāge jhānasinehābhāvena kevalāya vipassanāya ṭhatvā aggaphalappattā sukkhavipassakā nāma, maggakkhaṇe pana ‘‘jhānasineho natthī’’ti na vattabbo ‘‘samathavipassanaṃ yuganaddhaṃ bhāvetī’’ti (a. ni. 4.170) vacanato. Pacchimakassāti sabbapacchimassa. Kiñcāpi ariyo aparihānadhammo , sotāpannassa pana uddhaṃ jīvitapariyādānā adhigatadhammo uppanno nāma natthi, paccayasāmaggiyā asati yāva uparivisesaṃ nibbattetuṃ na sakkonti, tāva adhigamassa asambhavo evāti āha – ‘‘sotāpannassa…pe… nāma hotī’’ti. Tassidaṃ manussalokavasena vuttanti daṭṭhabbaṃ.
ন চোদেন্তীতি অঞ্ঞমঞ্ঞস্মিং ৰিজ্জমানং দোসং জানন্তাপি ন চোদেন্তি ন সারেন্তি। অকুক্কুচ্চকা হোন্তীতি কুক্কুচ্চং ন উপ্পাদেন্তি। ‘‘অসক্কচ্চকারিনো হোন্তী’’তি চ পঠন্তি, সাথলিকতায সিক্খাসু অসক্কচ্চকারিনো হোন্তীতি অত্থো। ভিক্খূনং সতেপি সহস্সেপি ধরমানেতি ইদং বাহুল্লৰসেন ৰুত্তং। অন্তিমৰত্থুঅনজ্ঝাপন্নেসু কতিপযমত্তেসুপি ভিক্খূসু ধরন্তেসু, একস্মিং ৰা ধরন্তে পটিপত্তি অনন্তরহিতা এৰ নাম হোতি। তেনেৰাহ – ‘‘পচ্ছিমকস্স…পে॰… অন্তরহিতা হোতী’’তি।
Na codentīti aññamaññasmiṃ vijjamānaṃ dosaṃ jānantāpi na codenti na sārenti. Akukkuccakā hontīti kukkuccaṃ na uppādenti. ‘‘Asakkaccakārino hontī’’ti ca paṭhanti, sāthalikatāya sikkhāsu asakkaccakārino hontīti attho. Bhikkhūnaṃ satepi sahassepi dharamāneti idaṃ bāhullavasena vuttaṃ. Antimavatthuanajjhāpannesu katipayamattesupi bhikkhūsu dharantesu, ekasmiṃ vā dharante paṭipatti anantarahitā eva nāma hoti. Tenevāha – ‘‘pacchimakassa…pe… antarahitā hotī’’ti.
অন্তেৰাসিকে গহেতুন্তি অন্তেৰাসিকে সঙ্গহেতুং। অত্থৰসেনাতি অট্ঠকথাৰসেন। মত্থকতো পট্ঠাযাতি উপরিতো পট্ঠায। উপোসথক্খন্ধকমত্তন্তি ৰিনযমাতিকাপাল়িমাহ। আল়ৰকপঞ্হাদীনং ৰিয দেৰেসু পরিযত্তিযা পৰত্তি অপ্পমাণন্তি আহ – ‘‘মনুস্সেসূ’’তি।
Antevāsike gahetunti antevāsike saṅgahetuṃ. Atthavasenāti aṭṭhakathāvasena. Matthakato paṭṭhāyāti uparito paṭṭhāya. Uposathakkhandhakamattanti vinayamātikāpāḷimāha. Āḷavakapañhādīnaṃ viya devesu pariyattiyā pavatti appamāṇanti āha – ‘‘manussesū’’ti.
ওট্ঠট্ঠিৰণ্ণন্তি ওট্ঠানং অট্ঠিৰণ্ণং, দন্তকসাৰং একং ৰা দ্ৰে ৰা ৰারে রজিত্ৰা দন্তৰণ্ণং কত্ৰা ধারেন্তীতি ৰুত্তং হোতি। কেসেসু ৰা অল্লীযাপেন্তীতি তেন কাসাৰখণ্ডেন কেসে বন্ধন্তা অল্লীযাপেন্তি। ভিক্খুগোত্তস্স অভিভৰনতো ৰিনাসনতো গোত্রভুনো। অথ ৰা গোত্তং ৰুচ্চতি সাধারণং নামং, মত্তসদ্দো লুত্তনিদ্দিট্ঠো, তস্মা ‘‘সমণা’’তি গোত্তমত্তং অনুভৰন্তি ধারেন্তীতি গোত্রভুনো, নামমত্তসমণাতি অত্থো। কাসাৰগতকণ্ঠতায, কাসাৰগ্গহণহেতুউপ্পজ্জনকসোকতায ৰা কাসাৰকণ্ঠা। সঙ্ঘগতন্তি সঙ্ঘং উদ্দিস্স দিন্নত্তা সঙ্ঘগতং। তং সরীরন্তি তং ধাতুসরীরং।
Oṭṭhaṭṭhivaṇṇanti oṭṭhānaṃ aṭṭhivaṇṇaṃ, dantakasāvaṃ ekaṃ vā dve vā vāre rajitvā dantavaṇṇaṃ katvā dhārentīti vuttaṃ hoti. Kesesu vā allīyāpentīti tena kāsāvakhaṇḍena kese bandhantā allīyāpenti. Bhikkhugottassa abhibhavanato vināsanato gotrabhuno. Atha vā gottaṃ vuccati sādhāraṇaṃ nāmaṃ, mattasaddo luttaniddiṭṭho, tasmā ‘‘samaṇā’’ti gottamattaṃ anubhavanti dhārentīti gotrabhuno, nāmamattasamaṇāti attho. Kāsāvagatakaṇṭhatāya, kāsāvaggahaṇahetuuppajjanakasokatāya vā kāsāvakaṇṭhā. Saṅghagatanti saṅghaṃ uddissa dinnattā saṅghagataṃ. Taṃ sarīranti taṃ dhātusarīraṃ.
তেনেৰাতি পরিযত্তিঅন্তরধানমূলকত্তা এৰ ইতরঅন্তরধানস্স। সক্কো দেৰরাজা ছাতকভযে পরতীরগমনায ভিক্খূ উস্সুক্কমকাসীতি অধিপ্পাযো। নেতি উভযেপি পংসুকূলিকত্থেরে ধম্মকথিকত্থেরে চ। থেরাতি তত্থ ঠিতা সক্খিভূতা থেরা। ধম্মকথিকত্থেরা ‘‘যাৰ তিট্ঠন্তি সুত্তন্তা…পে॰… যোগক্খেমা ন ধংসতী’’তি ইদং সুত্তং আহরিত্ৰা ‘‘সুত্তন্তে রক্খিতে সন্তে, পটিপত্তি হোতি রক্খিতা’’তি ইমিনা ৰচনেন পংসুকূলিকত্থেরে অপ্পটিভানে অকংসু । ইদানি পরিযত্তিযা অনন্তরধানমেৰ ইতরেসং অনন্তরধানহেতূতি ইমমত্থং ব্যতিরেকতো অন্ৰযতো চ উপমাহি ৰিভাৰেতুং ‘‘যথা হী’’তিআদি ৰুত্তং। তং সুৰিঞ্ঞেয্যমেৰ।
Tenevāti pariyattiantaradhānamūlakattā eva itaraantaradhānassa. Sakko devarājā chātakabhaye paratīragamanāya bhikkhū ussukkamakāsīti adhippāyo. Neti ubhayepi paṃsukūlikatthere dhammakathikatthere ca. Therāti tattha ṭhitā sakkhibhūtā therā. Dhammakathikattherā ‘‘yāva tiṭṭhantisuttantā…pe… yogakkhemā na dhaṃsatī’’ti idaṃ suttaṃ āharitvā ‘‘suttante rakkhite sante, paṭipatti hoti rakkhitā’’ti iminā vacanena paṃsukūlikatthere appaṭibhāne akaṃsu . Idāni pariyattiyā anantaradhānameva itaresaṃ anantaradhānahetūti imamatthaṃ byatirekato anvayato ca upamāhi vibhāvetuṃ ‘‘yathā hī’’tiādi vuttaṃ. Taṃ suviññeyyameva.
দুতিযপমাদাদিৰগ্গৰণ্ণনা নিট্ঠিতা।
Dutiyapamādādivaggavaṇṇanā niṭṭhitā.
১৪০-১৫০. একাদসমদ্ৰাদসমৰগ্গা সুৰিঞ্ঞেয্যা এৰ।
140-150. Ekādasamadvādasamavaggā suviññeyyā eva.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
১০. দুতিযপমাদাদিৰগ্গো • 10. Dutiyapamādādivaggo
১১. অধম্মৰগ্গো • 11. Adhammavaggo
১২. অনাপত্তিৰগ্গো • 12. Anāpattivaggo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
১০. দুতিযপমাদাদিৰগ্গৰণ্ণনা • 10. Dutiyapamādādivaggavaṇṇanā
১১. অধম্মৰগ্গৰণ্ণনা • 11. Adhammavaggavaṇṇanā
১২. অনাপত্তিৰগ্গৰণ্ণনা • 12. Anāpattivaggavaṇṇanā
