| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੧੦. ਦੁਤਿਯਪਮਾਦਾਦਿવਗ੍ਗવਣ੍ਣਨਾ
10. Dutiyapamādādivaggavaṇṇanā
੯੮-੧੧੫. ਦਸਮੇ વਗ੍ਗੇ ਅਜ੍ਝਤ੍ਤਸਨ੍ਤਾਨੇ ਭવਂ ਅਜ੍ਝਤ੍ਤਿਕਂ। ਅਜ੍ਝਤ੍ਤਸਨ੍ਤਾਨਤੋ ਬਹਿਦ੍ਧਾ ਭવਂ ਬਾਹਿਰਂ। વੁਤ੍ਤਪਟਿਪਕ੍ਖਨਯੇਨਾਤਿ ‘‘ਅવਿਨਾਸਾਯਾ’’ਤਿ ਏવਮਾਦਿਨਾ ਅਤ੍ਥੋ ਗਹੇਤਬ੍ਬੋ। ਚਤੁਕ੍ਕੋਟਿਕੇਤਿ ‘‘ਅਨੁਯੋਗੋ ਅਕੁਸਲਾਨਂ , ਅਨਨੁਯੋਗੋ ਕੁਸਲਾਨਂ, ਅਨੁਯੋਗੋ ਕੁਸਲਾਨਂ, ਅਨਨੁਯੋਗੋ ਅਕੁਸਲਾਨ’’ਨ੍ਤਿ (ਅ॰ ਨਿ॰ ੧.੯੬) ਏવਂ ਪਰਿਯੋਸਾਨਸੁਤ੍ਤੇ ਆਗਤਨਯਂ ਗਹੇਤ੍વਾ ‘‘ਨਾਹਂ, ਭਿਕ੍ਖવੇ, ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮੀ’’ਤਿਆਦਿਨਾ (ਅ॰ ਨਿ॰ ੧.੧੧) ਆਗਤਸੁਤ੍ਤਾਨਂ ਸਮਞ੍ਞਾ ਜਾਤਾ।
98-115. Dasame vagge ajjhattasantāne bhavaṃ ajjhattikaṃ. Ajjhattasantānato bahiddhā bhavaṃ bāhiraṃ. Vuttapaṭipakkhanayenāti ‘‘avināsāyā’’ti evamādinā attho gahetabbo. Catukkoṭiketi ‘‘anuyogo akusalānaṃ , ananuyogo kusalānaṃ, anuyogo kusalānaṃ, ananuyogo akusalāna’’nti (a. ni. 1.96) evaṃ pariyosānasutte āgatanayaṃ gahetvā ‘‘nāhaṃ, bhikkhave, aññaṃ ekadhammampi samanupassāmī’’tiādinā (a. ni. 1.11) āgatasuttānaṃ samaññā jātā.
੧੩੦. ਸੁਤ੍ਤਨ੍ਤਨਯੇ ਯਥਾਚੋਦਨਾ ਸਂਕਿਲੇਸਧਮ੍ਮਾਨਂ વਿਪਰਿਯੇਸਨਂ, ਤਂਤਂਧਮ੍ਮਕੋਟ੍ਠਾਸਾਨਞ੍ਚ ਊਨਤੋ ਅਧਿਕਤੋ ਚ ਪવੇਦਨਂ ਅਧਮ੍ਮਂ ਧਮ੍ਮੋਤਿ ਦੀਪਨਂ। ਤੇਸਂਯੇવ ਪਨ ਅવਿਪਰੀਤਤੋ ਅਨੂਨਾਧਿਕਤੋ ਚ ਪવੇਦਨਂ ਧਮ੍ਮਂ ਧਮ੍ਮੋਤਿ ਦੀਪਨਂ। ਏવਂ વਿਨਯਪ੍ਪਟਿਪਤ੍ਤਿਯਾ ਅਯਥਾવਿਧਿਪ੍ਪવੇਦਨਂ ਅਧਮ੍ਮਂ ਧਮ੍ਮੋਤਿ ਦੀਪਨਂ। ਯਥਾવਿਧਿਪ੍ਪવੇਦਨਂ ਧਮ੍ਮਂ ਧਮ੍ਮੋਤਿ ਦੀਪਨਂ। ਸੁਤ੍ਤਨ੍ਤਨਯੇਨ ਪਞ੍ਚવਿਧੋ ਸਂવਰવਿਨਯੋ ਪਹਾਨવਿਨਯੋ ਚ વਿਨਯੋ, ਤਪ੍ਪਟਿਪਕ੍ਖੇਨ ਅવਿਨਯੋ। વਿਨਯਨਯੇਨ વਤ੍ਥੁਸਮ੍ਪਦਾਦਿਨਾ ਯਥਾવਿਧਿਪ੍ਪਟਿਪਤ੍ਤਿ ਏવ વਿਨਯੋ, ਤਬ੍ਬਿਪਰਿਯਾਯੇਨ ਅવਿਨਯੋ વੇਦਿਤਬ੍ਬੋ। ਤਿਂਸ ਨਿਸ੍ਸਗ੍ਗਿਯਾ ਪਾਚਿਤ੍ਤਿਯਾਤਿ ਏਤ੍ਥ ਇਤਿ-ਸਦ੍ਦੋ ਆਦ੍ਯਤ੍ਥੋ। ਤੇਨ ਦ੍વੇਨવੁਤਿ ਪਾਚਿਤ੍ਤਿਯਾ, ਚਤ੍ਤਾਰੋ ਪਾਟਿਦੇਸਨਿਯਾ, ਸਤ੍ਤ ਅਧਿਕਰਣਸਮਥਾਤਿ ਇਮੇਸਂ ਸਙ੍ਗਹੋ। ਏਕਤਿਂਸ ਨਿਸ੍ਸਗ੍ਗਿਯਾਤਿ ਏਤ੍ਥ ‘‘ਤੇਨવੁਤਿ ਪਾਚਿਤ੍ਤਿਯਾ’’ਤਿਆਦਿਨਾ વਤ੍ਤਬ੍ਬਂ। ਸੇਸਮੇਤ੍ਥ ਸੁવਿਞ੍ਞੇਯ੍ਯਮੇવ।
130. Suttantanaye yathācodanā saṃkilesadhammānaṃ vipariyesanaṃ, taṃtaṃdhammakoṭṭhāsānañca ūnato adhikato ca pavedanaṃ adhammaṃ dhammoti dīpanaṃ. Tesaṃyeva pana aviparītato anūnādhikato ca pavedanaṃ dhammaṃ dhammoti dīpanaṃ. Evaṃ vinayappaṭipattiyā ayathāvidhippavedanaṃ adhammaṃ dhammoti dīpanaṃ. Yathāvidhippavedanaṃ dhammaṃ dhammoti dīpanaṃ. Suttantanayena pañcavidho saṃvaravinayo pahānavinayo ca vinayo, tappaṭipakkhena avinayo. Vinayanayena vatthusampadādinā yathāvidhippaṭipatti eva vinayo, tabbipariyāyena avinayo veditabbo. Tiṃsa nissaggiyā pācittiyāti ettha iti-saddo ādyattho. Tena dvenavuti pācittiyā, cattāro pāṭidesaniyā, satta adhikaraṇasamathāti imesaṃ saṅgaho. Ekatiṃsa nissaggiyāti ettha ‘‘tenavuti pācittiyā’’tiādinā vattabbaṃ. Sesamettha suviññeyyameva.
ਅਧਿਗਨ੍ਤਬ੍ਬਤੋ ਅਧਿਗਮੋ, ਮਗ੍ਗਫਲਾਨਿ। ਨਿਬ੍ਬਾਨਂ ਪਨ ਅਨ੍ਤਰਧਾਨਾਭਾવਤੋ ਇਧ ਨ ਗਯ੍ਹਤਿ। ਪਟਿਪਜ੍ਜਨਂ ਪਟਿਪਤ੍ਤਿ, ਸਿਕ੍ਖਤ੍ਤਯਸਮਾਯੋਗੋ। ਪਟਿਪਜ੍ਜਿਤਬ੍ਬਤੋ વਾ ਪਟਿਪਤ੍ਤਿ। ਪਰਿਯਾਪੁਣਿਤਬ੍ਬਤੋ ਪਰਿਯਤ੍ਤਿ, ਪਿਟਕਤ੍ਤਯਂ। ਮਗ੍ਗਗ੍ਗਹਣੇਨ ਗਹਿਤਾਪਿ ਤਤਿਯવਿਜ੍ਜਾਛਟ੍ਠਾਭਿਞ੍ਞਾ વਿਜ੍ਜਾਭਿਞ੍ਞਾਸਾਮਞ੍ਞਤੋ ‘‘ਤਿਸ੍ਸੋ વਿਜ੍ਜਾ ਛ ਅਭਿਞ੍ਞਾ’’ਤਿ ਪੁਨਪਿ ਗਹਿਤਾ। ਤਤੋ ਪਰਂ ਛ ਅਭਿਞ੍ਞਾਤਿ વਸ੍ਸਸਹਸ੍ਸਤੋ ਪਰਂ ਛ ਅਭਿਞ੍ਞਾ ਨਿਬ੍ਬਤ੍ਤੇਤੁਂ ਸਕ੍ਕੋਨ੍ਤਿ, ਨ ਪਟਿਸਮ੍ਭਿਦਾਤਿ ਅਧਿਪ੍ਪਾਯੋ। ਤਤੋਤਿ ਅਭਿਞ੍ਞਾਕਾਲਤੋ ਪਚ੍ਛਾ। ਤਾਤਿ ਅਭਿਞ੍ਞਾਯੋ। ਪੁਬ੍ਬਭਾਗੇ ਝਾਨਸਿਨੇਹਾਭਾવੇਨ ਕੇવਲਾਯ વਿਪਸ੍ਸਨਾਯ ਠਤ੍વਾ ਅਗ੍ਗਫਲਪ੍ਪਤ੍ਤਾ ਸੁਕ੍ਖવਿਪਸ੍ਸਕਾ ਨਾਮ, ਮਗ੍ਗਕ੍ਖਣੇ ਪਨ ‘‘ਝਾਨਸਿਨੇਹੋ ਨਤ੍ਥੀ’’ਤਿ ਨ વਤ੍ਤਬ੍ਬੋ ‘‘ਸਮਥવਿਪਸ੍ਸਨਂ ਯੁਗਨਦ੍ਧਂ ਭਾવੇਤੀ’’ਤਿ (ਅ॰ ਨਿ॰ ੪.੧੭੦) વਚਨਤੋ। ਪਚ੍ਛਿਮਕਸ੍ਸਾਤਿ ਸਬ੍ਬਪਚ੍ਛਿਮਸ੍ਸ। ਕਿਞ੍ਚਾਪਿ ਅਰਿਯੋ ਅਪਰਿਹਾਨਧਮ੍ਮੋ , ਸੋਤਾਪਨ੍ਨਸ੍ਸ ਪਨ ਉਦ੍ਧਂ ਜੀવਿਤਪਰਿਯਾਦਾਨਾ ਅਧਿਗਤਧਮ੍ਮੋ ਉਪ੍ਪਨ੍ਨੋ ਨਾਮ ਨਤ੍ਥਿ, ਪਚ੍ਚਯਸਾਮਗ੍ਗਿਯਾ ਅਸਤਿ ਯਾવ ਉਪਰਿવਿਸੇਸਂ ਨਿਬ੍ਬਤ੍ਤੇਤੁਂ ਨ ਸਕ੍ਕੋਨ੍ਤਿ, ਤਾવ ਅਧਿਗਮਸ੍ਸ ਅਸਮ੍ਭવੋ ਏવਾਤਿ ਆਹ – ‘‘ਸੋਤਾਪਨ੍ਨਸ੍ਸ…ਪੇ॰… ਨਾਮ ਹੋਤੀ’’ਤਿ। ਤਸ੍ਸਿਦਂ ਮਨੁਸ੍ਸਲੋਕવਸੇਨ વੁਤ੍ਤਨ੍ਤਿ ਦਟ੍ਠਬ੍ਬਂ।
Adhigantabbato adhigamo, maggaphalāni. Nibbānaṃ pana antaradhānābhāvato idha na gayhati. Paṭipajjanaṃ paṭipatti, sikkhattayasamāyogo. Paṭipajjitabbato vā paṭipatti. Pariyāpuṇitabbato pariyatti, piṭakattayaṃ. Maggaggahaṇena gahitāpi tatiyavijjāchaṭṭhābhiññā vijjābhiññāsāmaññato ‘‘tisso vijjā cha abhiññā’’ti punapi gahitā. Tato paraṃ cha abhiññāti vassasahassato paraṃ cha abhiññā nibbattetuṃ sakkonti, na paṭisambhidāti adhippāyo. Tatoti abhiññākālato pacchā. Tāti abhiññāyo. Pubbabhāge jhānasinehābhāvena kevalāya vipassanāya ṭhatvā aggaphalappattā sukkhavipassakā nāma, maggakkhaṇe pana ‘‘jhānasineho natthī’’ti na vattabbo ‘‘samathavipassanaṃ yuganaddhaṃ bhāvetī’’ti (a. ni. 4.170) vacanato. Pacchimakassāti sabbapacchimassa. Kiñcāpi ariyo aparihānadhammo , sotāpannassa pana uddhaṃ jīvitapariyādānā adhigatadhammo uppanno nāma natthi, paccayasāmaggiyā asati yāva uparivisesaṃ nibbattetuṃ na sakkonti, tāva adhigamassa asambhavo evāti āha – ‘‘sotāpannassa…pe… nāma hotī’’ti. Tassidaṃ manussalokavasena vuttanti daṭṭhabbaṃ.
ਨ ਚੋਦੇਨ੍ਤੀਤਿ ਅਞ੍ਞਮਞ੍ਞਸ੍ਮਿਂ વਿਜ੍ਜਮਾਨਂ ਦੋਸਂ ਜਾਨਨ੍ਤਾਪਿ ਨ ਚੋਦੇਨ੍ਤਿ ਨ ਸਾਰੇਨ੍ਤਿ। ਅਕੁਕ੍ਕੁਚ੍ਚਕਾ ਹੋਨ੍ਤੀਤਿ ਕੁਕ੍ਕੁਚ੍ਚਂ ਨ ਉਪ੍ਪਾਦੇਨ੍ਤਿ। ‘‘ਅਸਕ੍ਕਚ੍ਚਕਾਰਿਨੋ ਹੋਨ੍ਤੀ’’ਤਿ ਚ ਪਠਨ੍ਤਿ, ਸਾਥਲਿਕਤਾਯ ਸਿਕ੍ਖਾਸੁ ਅਸਕ੍ਕਚ੍ਚਕਾਰਿਨੋ ਹੋਨ੍ਤੀਤਿ ਅਤ੍ਥੋ। ਭਿਕ੍ਖੂਨਂ ਸਤੇਪਿ ਸਹਸ੍ਸੇਪਿ ਧਰਮਾਨੇਤਿ ਇਦਂ ਬਾਹੁਲ੍ਲવਸੇਨ વੁਤ੍ਤਂ। ਅਨ੍ਤਿਮવਤ੍ਥੁਅਨਜ੍ਝਾਪਨ੍ਨੇਸੁ ਕਤਿਪਯਮਤ੍ਤੇਸੁਪਿ ਭਿਕ੍ਖੂਸੁ ਧਰਨ੍ਤੇਸੁ, ਏਕਸ੍ਮਿਂ વਾ ਧਰਨ੍ਤੇ ਪਟਿਪਤ੍ਤਿ ਅਨਨ੍ਤਰਹਿਤਾ ਏવ ਨਾਮ ਹੋਤਿ। ਤੇਨੇવਾਹ – ‘‘ਪਚ੍ਛਿਮਕਸ੍ਸ…ਪੇ॰… ਅਨ੍ਤਰਹਿਤਾ ਹੋਤੀ’’ਤਿ।
Na codentīti aññamaññasmiṃ vijjamānaṃ dosaṃ jānantāpi na codenti na sārenti. Akukkuccakā hontīti kukkuccaṃ na uppādenti. ‘‘Asakkaccakārino hontī’’ti ca paṭhanti, sāthalikatāya sikkhāsu asakkaccakārino hontīti attho. Bhikkhūnaṃ satepi sahassepi dharamāneti idaṃ bāhullavasena vuttaṃ. Antimavatthuanajjhāpannesu katipayamattesupi bhikkhūsu dharantesu, ekasmiṃ vā dharante paṭipatti anantarahitā eva nāma hoti. Tenevāha – ‘‘pacchimakassa…pe… antarahitā hotī’’ti.
ਅਨ੍ਤੇવਾਸਿਕੇ ਗਹੇਤੁਨ੍ਤਿ ਅਨ੍ਤੇવਾਸਿਕੇ ਸਙ੍ਗਹੇਤੁਂ। ਅਤ੍ਥવਸੇਨਾਤਿ ਅਟ੍ਠਕਥਾવਸੇਨ। ਮਤ੍ਥਕਤੋ ਪਟ੍ਠਾਯਾਤਿ ਉਪਰਿਤੋ ਪਟ੍ਠਾਯ। ਉਪੋਸਥਕ੍ਖਨ੍ਧਕਮਤ੍ਤਨ੍ਤਿ વਿਨਯਮਾਤਿਕਾਪਾਲ਼ਿਮਾਹ। ਆਲ਼વਕਪਞ੍ਹਾਦੀਨਂ વਿਯ ਦੇવੇਸੁ ਪਰਿਯਤ੍ਤਿਯਾ ਪવਤ੍ਤਿ ਅਪ੍ਪਮਾਣਨ੍ਤਿ ਆਹ – ‘‘ਮਨੁਸ੍ਸੇਸੂ’’ਤਿ।
Antevāsike gahetunti antevāsike saṅgahetuṃ. Atthavasenāti aṭṭhakathāvasena. Matthakato paṭṭhāyāti uparito paṭṭhāya. Uposathakkhandhakamattanti vinayamātikāpāḷimāha. Āḷavakapañhādīnaṃ viya devesu pariyattiyā pavatti appamāṇanti āha – ‘‘manussesū’’ti.
ਓਟ੍ਠਟ੍ਠਿવਣ੍ਣਨ੍ਤਿ ਓਟ੍ਠਾਨਂ ਅਟ੍ਠਿવਣ੍ਣਂ, ਦਨ੍ਤਕਸਾવਂ ਏਕਂ વਾ ਦ੍વੇ વਾ વਾਰੇ ਰਜਿਤ੍વਾ ਦਨ੍ਤવਣ੍ਣਂ ਕਤ੍વਾ ਧਾਰੇਨ੍ਤੀਤਿ વੁਤ੍ਤਂ ਹੋਤਿ। ਕੇਸੇਸੁ વਾ ਅਲ੍ਲੀਯਾਪੇਨ੍ਤੀਤਿ ਤੇਨ ਕਾਸਾવਖਣ੍ਡੇਨ ਕੇਸੇ ਬਨ੍ਧਨ੍ਤਾ ਅਲ੍ਲੀਯਾਪੇਨ੍ਤਿ। ਭਿਕ੍ਖੁਗੋਤ੍ਤਸ੍ਸ ਅਭਿਭવਨਤੋ વਿਨਾਸਨਤੋ ਗੋਤ੍ਰਭੁਨੋ। ਅਥ વਾ ਗੋਤ੍ਤਂ વੁਚ੍ਚਤਿ ਸਾਧਾਰਣਂ ਨਾਮਂ, ਮਤ੍ਤਸਦ੍ਦੋ ਲੁਤ੍ਤਨਿਦ੍ਦਿਟ੍ਠੋ, ਤਸ੍ਮਾ ‘‘ਸਮਣਾ’’ਤਿ ਗੋਤ੍ਤਮਤ੍ਤਂ ਅਨੁਭવਨ੍ਤਿ ਧਾਰੇਨ੍ਤੀਤਿ ਗੋਤ੍ਰਭੁਨੋ, ਨਾਮਮਤ੍ਤਸਮਣਾਤਿ ਅਤ੍ਥੋ। ਕਾਸਾવਗਤਕਣ੍ਠਤਾਯ, ਕਾਸਾવਗ੍ਗਹਣਹੇਤੁਉਪ੍ਪਜ੍ਜਨਕਸੋਕਤਾਯ વਾ ਕਾਸਾવਕਣ੍ਠਾ। ਸਙ੍ਘਗਤਨ੍ਤਿ ਸਙ੍ਘਂ ਉਦ੍ਦਿਸ੍ਸ ਦਿਨ੍ਨਤ੍ਤਾ ਸਙ੍ਘਗਤਂ। ਤਂ ਸਰੀਰਨ੍ਤਿ ਤਂ ਧਾਤੁਸਰੀਰਂ।
Oṭṭhaṭṭhivaṇṇanti oṭṭhānaṃ aṭṭhivaṇṇaṃ, dantakasāvaṃ ekaṃ vā dve vā vāre rajitvā dantavaṇṇaṃ katvā dhārentīti vuttaṃ hoti. Kesesu vā allīyāpentīti tena kāsāvakhaṇḍena kese bandhantā allīyāpenti. Bhikkhugottassa abhibhavanato vināsanato gotrabhuno. Atha vā gottaṃ vuccati sādhāraṇaṃ nāmaṃ, mattasaddo luttaniddiṭṭho, tasmā ‘‘samaṇā’’ti gottamattaṃ anubhavanti dhārentīti gotrabhuno, nāmamattasamaṇāti attho. Kāsāvagatakaṇṭhatāya, kāsāvaggahaṇahetuuppajjanakasokatāya vā kāsāvakaṇṭhā. Saṅghagatanti saṅghaṃ uddissa dinnattā saṅghagataṃ. Taṃ sarīranti taṃ dhātusarīraṃ.
ਤੇਨੇવਾਤਿ ਪਰਿਯਤ੍ਤਿਅਨ੍ਤਰਧਾਨਮੂਲਕਤ੍ਤਾ ਏવ ਇਤਰਅਨ੍ਤਰਧਾਨਸ੍ਸ। ਸਕ੍ਕੋ ਦੇવਰਾਜਾ ਛਾਤਕਭਯੇ ਪਰਤੀਰਗਮਨਾਯ ਭਿਕ੍ਖੂ ਉਸ੍ਸੁਕ੍ਕਮਕਾਸੀਤਿ ਅਧਿਪ੍ਪਾਯੋ। ਨੇਤਿ ਉਭਯੇਪਿ ਪਂਸੁਕੂਲਿਕਤ੍ਥੇਰੇ ਧਮ੍ਮਕਥਿਕਤ੍ਥੇਰੇ ਚ। ਥੇਰਾਤਿ ਤਤ੍ਥ ਠਿਤਾ ਸਕ੍ਖਿਭੂਤਾ ਥੇਰਾ। ਧਮ੍ਮਕਥਿਕਤ੍ਥੇਰਾ ‘‘ਯਾવ ਤਿਟ੍ਠਨ੍ਤਿ ਸੁਤ੍ਤਨ੍ਤਾ…ਪੇ॰… ਯੋਗਕ੍ਖੇਮਾ ਨ ਧਂਸਤੀ’’ਤਿ ਇਦਂ ਸੁਤ੍ਤਂ ਆਹਰਿਤ੍વਾ ‘‘ਸੁਤ੍ਤਨ੍ਤੇ ਰਕ੍ਖਿਤੇ ਸਨ੍ਤੇ, ਪਟਿਪਤ੍ਤਿ ਹੋਤਿ ਰਕ੍ਖਿਤਾ’’ਤਿ ਇਮਿਨਾ વਚਨੇਨ ਪਂਸੁਕੂਲਿਕਤ੍ਥੇਰੇ ਅਪ੍ਪਟਿਭਾਨੇ ਅਕਂਸੁ । ਇਦਾਨਿ ਪਰਿਯਤ੍ਤਿਯਾ ਅਨਨ੍ਤਰਧਾਨਮੇવ ਇਤਰੇਸਂ ਅਨਨ੍ਤਰਧਾਨਹੇਤੂਤਿ ਇਮਮਤ੍ਥਂ ਬ੍ਯਤਿਰੇਕਤੋ ਅਨ੍વਯਤੋ ਚ ਉਪਮਾਹਿ વਿਭਾવੇਤੁਂ ‘‘ਯਥਾ ਹੀ’’ਤਿਆਦਿ વੁਤ੍ਤਂ। ਤਂ ਸੁવਿਞ੍ਞੇਯ੍ਯਮੇવ।
Tenevāti pariyattiantaradhānamūlakattā eva itaraantaradhānassa. Sakko devarājā chātakabhaye paratīragamanāya bhikkhū ussukkamakāsīti adhippāyo. Neti ubhayepi paṃsukūlikatthere dhammakathikatthere ca. Therāti tattha ṭhitā sakkhibhūtā therā. Dhammakathikattherā ‘‘yāva tiṭṭhantisuttantā…pe… yogakkhemā na dhaṃsatī’’ti idaṃ suttaṃ āharitvā ‘‘suttante rakkhite sante, paṭipatti hoti rakkhitā’’ti iminā vacanena paṃsukūlikatthere appaṭibhāne akaṃsu . Idāni pariyattiyā anantaradhānameva itaresaṃ anantaradhānahetūti imamatthaṃ byatirekato anvayato ca upamāhi vibhāvetuṃ ‘‘yathā hī’’tiādi vuttaṃ. Taṃ suviññeyyameva.
ਦੁਤਿਯਪਮਾਦਾਦਿવਗ੍ਗવਣ੍ਣਨਾ ਨਿਟ੍ਠਿਤਾ।
Dutiyapamādādivaggavaṇṇanā niṭṭhitā.
੧੪੦-੧੫੦. ਏਕਾਦਸਮਦ੍વਾਦਸਮવਗ੍ਗਾ ਸੁવਿਞ੍ਞੇਯ੍ਯਾ ਏવ।
140-150. Ekādasamadvādasamavaggā suviññeyyā eva.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya
੧੦. ਦੁਤਿਯਪਮਾਦਾਦਿવਗ੍ਗੋ • 10. Dutiyapamādādivaggo
੧੧. ਅਧਮ੍ਮવਗ੍ਗੋ • 11. Adhammavaggo
੧੨. ਅਨਾਪਤ੍ਤਿવਗ੍ਗੋ • 12. Anāpattivaggo
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā)
੧੦. ਦੁਤਿਯਪਮਾਦਾਦਿવਗ੍ਗવਣ੍ਣਨਾ • 10. Dutiyapamādādivaggavaṇṇanā
੧੧. ਅਧਮ੍ਮવਗ੍ਗવਣ੍ਣਨਾ • 11. Adhammavaggavaṇṇanā
੧੨. ਅਨਾਪਤ੍ਤਿવਗ੍ਗવਣ੍ਣਨਾ • 12. Anāpattivaggavaṇṇanā
