| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. দুতিযপমাদাদিৰগ্গো
10. Dutiyapamādādivaggo
৯৮. ‘‘অজ্ঝত্তিকং , ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং মহতো অনত্থায সংৰত্ততি যথযিদং, ভিক্খৰে, পমাদো। পমাদো, ভিক্খৰে, মহতো অনত্থায সংৰত্ততী’’তি। পঠমং।
98. ‘‘Ajjhattikaṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, pamādo. Pamādo, bhikkhave, mahato anatthāya saṃvattatī’’ti. Paṭhamaṃ.
৯৯. ‘‘অজ্ঝত্তিকং, ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং মহতো অত্থায সংৰত্ততি যথযিদং, ভিক্খৰে, অপ্পমাদো। অপ্পমাদো , ভিক্খৰে, মহতো অত্থায সংৰত্ততী’’তি। দুতিযং।
99. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, appamādo. Appamādo , bhikkhave, mahato atthāya saṃvattatī’’ti. Dutiyaṃ.
১০০. ‘‘অজ্ঝত্তিকং, ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং মহতো অনত্থায সংৰত্ততি যথযিদং, ভিক্খৰে, কোসজ্জং। কোসজ্জং, ভিক্খৰে, মহতো অনত্থায সংৰত্ততী’’তি। ততিযং।
100. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, kosajjaṃ. Kosajjaṃ, bhikkhave, mahato anatthāya saṃvattatī’’ti. Tatiyaṃ.
১০১. ‘‘অজ্ঝত্তিকং, ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং মহতো অত্থায সংৰত্ততি যথযিদং, ভিক্খৰে, ৰীরিযারম্ভো। ৰীরিযারম্ভো, ভিক্খৰে, মহতো অত্থায সংৰত্ততী’’তি। চতুত্থং।
101. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, vīriyārambho. Vīriyārambho, bhikkhave, mahato atthāya saṃvattatī’’ti. Catutthaṃ.
১০২-১০৯. ‘‘অজ্ঝত্তিকং , ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং মহতো অনত্থায সংৰত্ততি যথযিদং, ভিক্খৰে, মহিচ্ছতা…পে॰… অপ্পিচ্ছতা… অসন্তুট্ঠিতা… সন্তুট্ঠিতা… অযোনিসোমনসিকারো… যোনিসোমনসিকারো… অসম্পজঞ্ঞং… সম্পজঞ্ঞং… দ্ৰাদসমং।
102-109. ‘‘Ajjhattikaṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, mahicchatā…pe… appicchatā… asantuṭṭhitā… santuṭṭhitā… ayonisomanasikāro… yonisomanasikāro… asampajaññaṃ… sampajaññaṃ… dvādasamaṃ.
১১০. ‘‘বাহিরং , ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং মহতো অনত্থায সংৰত্ততি যথযিদং, ভিক্খৰে, পাপমিত্ততা। পাপমিত্ততা, ভিক্খৰে, মহতো অনত্থায সংৰত্ততী’’তি। তেরসমং।
110. ‘‘Bāhiraṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, pāpamittatā. Pāpamittatā, bhikkhave, mahato anatthāya saṃvattatī’’ti. Terasamaṃ.
১১১. ‘‘বাহিরং, ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং মহতো অত্থায সংৰত্ততি যথযিদং, ভিক্খৰে, কল্যাণমিত্ততা। কল্যাণমিত্ততা, ভিক্খৰে, মহতো অত্থায সংৰত্ততী’’তি। চুদ্দসমং।
111. ‘‘Bāhiraṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, kalyāṇamittatā. Kalyāṇamittatā, bhikkhave, mahato atthāya saṃvattatī’’ti. Cuddasamaṃ.
১১২. ‘‘অজ্ঝত্তিকং , ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং মহতো অনত্থায সংৰত্ততি যথযিদং, ভিক্খৰে, অনুযোগো অকুসলানং ধম্মানং, অননুযোগো কুসলানং ধম্মানং। অনুযোগো, ভিক্খৰে, অকুসলানং ধম্মানং, অননুযোগো কুসলানং ধম্মানং মহতো অনত্থায সংৰত্ততী’’তি। পন্নরসমং।
112. ‘‘Ajjhattikaṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, anuyogo akusalānaṃ dhammānaṃ, ananuyogo kusalānaṃ dhammānaṃ. Anuyogo, bhikkhave, akusalānaṃ dhammānaṃ, ananuyogo kusalānaṃ dhammānaṃ mahato anatthāya saṃvattatī’’ti. Pannarasamaṃ.
১১৩. ‘‘অজ্ঝত্তিকং, ভিক্খৰে, অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং মহতো অত্থায সংৰত্ততি যথযিদং, ভিক্খৰে, অনুযোগো কুসলানং ধম্মানং, অননুযোগো অকুসলানং ধম্মানং। অনুযোগো, ভিক্খৰে, কুসলানং ধম্মানং, অননুযোগো অকুসলানং ধম্মানং মহতো অত্থায সংৰত্ততী’’তি। সোল়সমং।
113. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, anuyogo kusalānaṃ dhammānaṃ, ananuyogo akusalānaṃ dhammānaṃ. Anuyogo, bhikkhave, kusalānaṃ dhammānaṃ, ananuyogo akusalānaṃ dhammānaṃ mahato atthāya saṃvattatī’’ti. Soḷasamaṃ.
১১৪. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যো এৰং সদ্ধম্মস্স সম্মোসায অন্তরধানায সংৰত্ততি যথযিদং, ভিক্খৰে, পমাদো। পমাদো, ভিক্খৰে, সদ্ধম্মস্স সম্মোসায অন্তরধানায সংৰত্ততী’’তি। সত্তরসমং।
114. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa sammosāya antaradhānāya saṃvattati yathayidaṃ, bhikkhave, pamādo. Pamādo, bhikkhave, saddhammassa sammosāya antaradhānāya saṃvattatī’’ti. Sattarasamaṃ.
১১৫. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যো এৰং সদ্ধম্মস্স ঠিতিযা অসম্মোসায অনন্তরধানায সংৰত্ততি যথযিদং, ভিক্খৰে, অপ্পমাদো। অপ্পমাদো , ভিক্খৰে, সদ্ধম্মস্স ঠিতিযা অসম্মোসায অনন্তরধানায সংৰত্ততী’’তি। অট্ঠারসমং।
115. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ, bhikkhave, appamādo. Appamādo , bhikkhave, saddhammassa ṭhitiyā asammosāya anantaradhānāya saṃvattatī’’ti. Aṭṭhārasamaṃ.
১১৬. ‘‘নাহং , ভিক্খৰে, অঞ্ঞং একধম্মম্পি সমনুপস্সামি যো এৰং সদ্ধম্মস্স সম্মোসায অন্তরধানায সংৰত্ততি যথযিদং, ভিক্খৰে, কোসজ্জং। কোসজ্জং, ভিক্খৰে, সদ্ধম্মস্স সম্মোসায অন্তরধানায সংৰত্ততী’’তি। একূনৰীসতিমং।
116. ‘‘Nāhaṃ , bhikkhave, aññaṃ ekadhammampi samanupassāmi yo evaṃ saddhammassa sammosāya antaradhānāya saṃvattati yathayidaṃ, bhikkhave, kosajjaṃ. Kosajjaṃ, bhikkhave, saddhammassa sammosāya antaradhānāya saṃvattatī’’ti. Ekūnavīsatimaṃ.
১১৭. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যো এৰং সদ্ধম্মস্স ঠিতিযা অসম্মোসায অনন্তরধানায সংৰত্ততি যথযিদং, ভিক্খৰে, ৰীরিযারম্ভো। ৰীরিযারম্ভো, ভিক্খৰে, সদ্ধম্মস্স ঠিতিযা অসম্মোসায অনন্তরধানায সংৰত্ততী’’তি। ৰীসতিমং।
117. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ, bhikkhave, vīriyārambho. Vīriyārambho, bhikkhave, saddhammassa ṭhitiyā asammosāya anantaradhānāya saṃvattatī’’ti. Vīsatimaṃ.
১১৮-১২৮. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যো এৰং সদ্ধম্মস্স সম্মোসায অন্তরধানায সংৰত্ততি যথযিদং, ভিক্খৰে, মহিচ্ছতা…পে॰… অপ্পিচ্ছতা… অসন্তুট্ঠিতা… সন্তুট্ঠিতা… অযোনিসোমনসিকারো… যোনিসোমনসিকারো… অসম্পজঞ্ঞং… সম্পজঞ্ঞং … পাপমিত্ততা… কল্যাণমিত্ততা… অনুযোগো অকুসলানং ধম্মানং, অননুযোগো কুসলানং ধম্মানং। অনুযোগো, ভিক্খৰে, অকুসলানং ধম্মানং, অননুযোগো কুসলানং ধম্মানং সদ্ধম্মস্স সম্মোসায অন্তরধানায সংৰত্ততী’’তি। একত্তিংসতিমং।
118-128. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa sammosāya antaradhānāya saṃvattati yathayidaṃ, bhikkhave, mahicchatā…pe… appicchatā… asantuṭṭhitā… santuṭṭhitā… ayonisomanasikāro… yonisomanasikāro… asampajaññaṃ… sampajaññaṃ … pāpamittatā… kalyāṇamittatā… anuyogo akusalānaṃ dhammānaṃ, ananuyogo kusalānaṃ dhammānaṃ. Anuyogo, bhikkhave, akusalānaṃ dhammānaṃ, ananuyogo kusalānaṃ dhammānaṃ saddhammassa sammosāya antaradhānāya saṃvattatī’’ti. Ekattiṃsatimaṃ.
১২৯. ‘‘নাহং, ভিক্খৰে, অঞ্ঞং একধম্মম্পি সমনুপস্সামি যো এৰং সদ্ধম্মস্স ঠিতিযা অসম্মোসায অনন্তরধানায সংৰত্ততি যথযিদং, ভিক্খৰে, অনুযোগো কুসলানং ধম্মানং, অননুযোগো অকুসলানং ধম্মানং। অনুযোগো, ভিক্খৰে, কুসলানং ধম্মানং, অননুযোগো অকুসলানং ধম্মানং সদ্ধম্মস্স ঠিতিযা অসম্মোসায অনন্তরধানায সংৰত্ততী’’তি। চতুক্কোটিকং নিট্ঠিতং। বাত্তিংসতিমং।
129. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ, bhikkhave, anuyogo kusalānaṃ dhammānaṃ, ananuyogo akusalānaṃ dhammānaṃ. Anuyogo, bhikkhave, kusalānaṃ dhammānaṃ, ananuyogo akusalānaṃ dhammānaṃ saddhammassa ṭhitiyā asammosāya anantaradhānāya saṃvattatī’’ti. Catukkoṭikaṃ niṭṭhitaṃ. Bāttiṃsatimaṃ.
১৩০. ‘‘যে তে, ভিক্খৰে, ভিক্খূ অধম্মং ধম্মোতি দীপেন্তি তে, ভিক্খৰে, ভিক্খূ বহুজনঅহিতায পটিপন্না বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং । বহুঞ্চ তে, ভিক্খৰে, ভিক্খূ অপুঞ্ঞং পসৰন্তি, তে চিমং 1 সদ্ধম্মং অন্তরধাপেন্তী’’তি। তেত্তিংসতিমং।
130. ‘‘Ye te, bhikkhave, bhikkhū adhammaṃ dhammoti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṃ . Bahuñca te, bhikkhave, bhikkhū apuññaṃ pasavanti, te cimaṃ 2 saddhammaṃ antaradhāpentī’’ti. Tettiṃsatimaṃ.
১৩১. ‘‘যে তে, ভিক্খৰে, ভিক্খূ ধম্মং অধম্মোতি দীপেন্তি তে, ভিক্খৰে, ভিক্খূ বহুজনঅহিতায পটিপন্না বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং। বহুঞ্চ তে, ভিক্খৰে, ভিক্খূ অপুঞ্ঞং পসৰন্তি, তে চিমং সদ্ধম্মং অন্তরধাপেন্তী’’তি। চতুত্তিংসতিমং।
131. ‘‘Ye te, bhikkhave, bhikkhū dhammaṃ adhammoti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṃ. Bahuñca te, bhikkhave, bhikkhū apuññaṃ pasavanti, te cimaṃ saddhammaṃ antaradhāpentī’’ti. Catuttiṃsatimaṃ.
১৩২-১৩৯. ‘‘যে তে, ভিক্খৰে, ভিক্খূ অৰিনযং ৰিনযোতি দীপেন্তি…পে॰… ৰিনযং অৰিনযোতি দীপেন্তি…পে॰… অভাসিতং অলপিতং তথাগতেন ভাসিতং লপিতং তথাগতেনাতি দীপেন্তি…পে॰… ভাসিতং লপিতং তথাগতেন অভাসিতং অলপিতং তথাগতেনাতি দীপেন্তি…পে॰… অনাচিণ্ণং তথাগতেন আচিণ্ণং তথাগতেনাতি দীপেন্তি…পে॰… আচিণ্ণং তথাগতেন অনাচিণ্ণং তথাগতেনাতি দীপেন্তি…পে॰… অপঞ্ঞত্তং তথাগতেন পঞ্ঞত্তং তথাগতেনাতি দীপেন্তি…পে॰… পঞ্ঞত্তং তথাগতেন অপঞ্ঞত্তং তথাগতেনাতি দীপেন্তি তে, ভিক্খৰে, ভিক্খূ বহুজনঅহিতায পটিপন্না বহুজনঅসুখায, বহুনো জনস্স অনত্থায অহিতায দুক্খায দেৰমনুস্সানং। বহুঞ্চ তে, ভিক্খৰে, ভিক্খূ অপুঞ্ঞং পসৰন্তি, তে চিমং সদ্ধম্মং অন্তরধাপেন্তী’’তি। দ্ৰাচত্তালীসতিমং।
132-139. ‘‘Ye te, bhikkhave, bhikkhū avinayaṃ vinayoti dīpenti…pe… vinayaṃ avinayoti dīpenti…pe… abhāsitaṃ alapitaṃ tathāgatena bhāsitaṃ lapitaṃ tathāgatenāti dīpenti…pe… bhāsitaṃ lapitaṃ tathāgatena abhāsitaṃ alapitaṃ tathāgatenāti dīpenti…pe… anāciṇṇaṃ tathāgatena āciṇṇaṃ tathāgatenāti dīpenti…pe… āciṇṇaṃ tathāgatena anāciṇṇaṃ tathāgatenāti dīpenti…pe… apaññattaṃ tathāgatena paññattaṃ tathāgatenāti dīpenti…pe… paññattaṃ tathāgatena apaññattaṃ tathāgatenāti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṃ. Bahuñca te, bhikkhave, bhikkhū apuññaṃ pasavanti, te cimaṃ saddhammaṃ antaradhāpentī’’ti. Dvācattālīsatimaṃ.
দুতিযপমাদাদিৰগ্গো দসমো।
Dutiyapamādādivaggo dasamo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. দুতিযপমাদাদিৰগ্গৰণ্ণনা • 10. Dutiyapamādādivaggavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. দুতিযপমাদাদিৰগ্গৰণ্ণনা • 10. Dutiyapamādādivaggavaṇṇanā
