| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. දුතියපමාදාදිවග්‌ගො
10. Dutiyapamādādivaggo
98. ‘‘අජ්‌ඣත්‌තිකං , භික්‌ඛවෙ, අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං මහතො අනත්‌ථාය සංවත්‌තති යථයිදං, භික්‌ඛවෙ, පමාදො. පමාදො, භික්‌ඛවෙ, මහතො අනත්‌ථාය සංවත්‌තතී’’ති. පඨමං.
98. ‘‘Ajjhattikaṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, pamādo. Pamādo, bhikkhave, mahato anatthāya saṃvattatī’’ti. Paṭhamaṃ.
99. ‘‘අජ්‌ඣත්‌තිකං, භික්‌ඛවෙ, අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං මහතො අත්‌ථාය සංවත්‌තති යථයිදං, භික්‌ඛවෙ, අප්‌පමාදො. අප්‌පමාදො , භික්‌ඛවෙ, මහතො අත්‌ථාය සංවත්‌තතී’’ති. දුතියං.
99. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, appamādo. Appamādo , bhikkhave, mahato atthāya saṃvattatī’’ti. Dutiyaṃ.
100. ‘‘අජ්‌ඣත්‌තිකං, භික්‌ඛවෙ, අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං මහතො අනත්‌ථාය සංවත්‌තති යථයිදං, භික්‌ඛවෙ, කොසජ්‌ජං. කොසජ්‌ජං, භික්‌ඛවෙ, මහතො අනත්‌ථාය සංවත්‌තතී’’ති. තතියං.
100. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, kosajjaṃ. Kosajjaṃ, bhikkhave, mahato anatthāya saṃvattatī’’ti. Tatiyaṃ.
101. ‘‘අජ්‌ඣත්‌තිකං, භික්‌ඛවෙ, අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං මහතො අත්‌ථාය සංවත්‌තති යථයිදං, භික්‌ඛවෙ, වීරියාරම්‌භො. වීරියාරම්‌භො, භික්‌ඛවෙ, මහතො අත්‌ථාය සංවත්‌තතී’’ති. චතුත්‌ථං.
101. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, vīriyārambho. Vīriyārambho, bhikkhave, mahato atthāya saṃvattatī’’ti. Catutthaṃ.
102-109. ‘‘අජ්‌ඣත්‌තිකං , භික්‌ඛවෙ, අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං මහතො අනත්‌ථාය සංවත්‌තති යථයිදං, භික්‌ඛවෙ, මහිච්‌ඡතා…පෙ.… අප්‌පිච්‌ඡතා… අසන්‌තුට්‌ඨිතා… සන්‌තුට්‌ඨිතා… අයොනිසොමනසිකාරො… යොනිසොමනසිකාරො… අසම්‌පජඤ්‌ඤං… සම්‌පජඤ්‌ඤං… ද්‌වාදසමං.
102-109. ‘‘Ajjhattikaṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, mahicchatā…pe… appicchatā… asantuṭṭhitā… santuṭṭhitā… ayonisomanasikāro… yonisomanasikāro… asampajaññaṃ… sampajaññaṃ… dvādasamaṃ.
110. ‘‘බාහිරං , භික්‌ඛවෙ, අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං මහතො අනත්‌ථාය සංවත්‌තති යථයිදං, භික්‌ඛවෙ, පාපමිත්‌තතා. පාපමිත්‌තතා, භික්‌ඛවෙ, මහතො අනත්‌ථාය සංවත්‌තතී’’ති. තෙරසමං.
110. ‘‘Bāhiraṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, pāpamittatā. Pāpamittatā, bhikkhave, mahato anatthāya saṃvattatī’’ti. Terasamaṃ.
111. ‘‘බාහිරං, භික්‌ඛවෙ, අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං මහතො අත්‌ථාය සංවත්‌තති යථයිදං, භික්‌ඛවෙ, කල්‍යාණමිත්‌තතා. කල්‍යාණමිත්‌තතා, භික්‌ඛවෙ, මහතො අත්‌ථාය සංවත්‌තතී’’ති. චුද්‌දසමං.
111. ‘‘Bāhiraṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, kalyāṇamittatā. Kalyāṇamittatā, bhikkhave, mahato atthāya saṃvattatī’’ti. Cuddasamaṃ.
112. ‘‘අජ්‌ඣත්‌තිකං , භික්‌ඛවෙ, අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං මහතො අනත්‌ථාය සංවත්‌තති යථයිදං, භික්‌ඛවෙ, අනුයොගො අකුසලානං ධම්‌මානං, අනනුයොගො කුසලානං ධම්‌මානං. අනුයොගො, භික්‌ඛවෙ, අකුසලානං ධම්‌මානං, අනනුයොගො කුසලානං ධම්‌මානං මහතො අනත්‌ථාය සංවත්‌තතී’’ති. පන්‌නරසමං.
112. ‘‘Ajjhattikaṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, anuyogo akusalānaṃ dhammānaṃ, ananuyogo kusalānaṃ dhammānaṃ. Anuyogo, bhikkhave, akusalānaṃ dhammānaṃ, ananuyogo kusalānaṃ dhammānaṃ mahato anatthāya saṃvattatī’’ti. Pannarasamaṃ.
113. ‘‘අජ්‌ඣත්‌තිකං, භික්‌ඛවෙ, අඞ්‌ගන්‌ති කරිත්‌වා නාඤ්‌ඤං එකඞ්‌ගම්‌පි සමනුපස්‌සාමි යං එවං මහතො අත්‌ථාය සංවත්‌තති යථයිදං, භික්‌ඛවෙ, අනුයොගො කුසලානං ධම්‌මානං, අනනුයොගො අකුසලානං ධම්‌මානං. අනුයොගො, භික්‌ඛවෙ, කුසලානං ධම්‌මානං, අනනුයොගො අකුසලානං ධම්‌මානං මහතො අත්‌ථාය සංවත්‌තතී’’ති. සොළසමං.
113. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, anuyogo kusalānaṃ dhammānaṃ, ananuyogo akusalānaṃ dhammānaṃ. Anuyogo, bhikkhave, kusalānaṃ dhammānaṃ, ananuyogo akusalānaṃ dhammānaṃ mahato atthāya saṃvattatī’’ti. Soḷasamaṃ.
114. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං සද්‌ධම්‌මස්‌ස සම්‌මොසාය අන්‌තරධානාය සංවත්‌තති යථයිදං, භික්‌ඛවෙ, පමාදො. පමාදො, භික්‌ඛවෙ, සද්‌ධම්‌මස්‌ස සම්‌මොසාය අන්‌තරධානාය සංවත්‌තතී’’ති. සත්‌තරසමං.
114. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa sammosāya antaradhānāya saṃvattati yathayidaṃ, bhikkhave, pamādo. Pamādo, bhikkhave, saddhammassa sammosāya antaradhānāya saṃvattatī’’ti. Sattarasamaṃ.
115. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං සද්‌ධම්‌මස්‌ස ඨිතියා අසම්‌මොසාය අනන්‌තරධානාය සංවත්‌තති යථයිදං, භික්‌ඛවෙ, අප්‌පමාදො. අප්‌පමාදො , භික්‌ඛවෙ, සද්‌ධම්‌මස්‌ස ඨිතියා අසම්‌මොසාය අනන්‌තරධානාය සංවත්‌තතී’’ති. අට්‌ඨාරසමං.
115. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ, bhikkhave, appamādo. Appamādo , bhikkhave, saddhammassa ṭhitiyā asammosāya anantaradhānāya saṃvattatī’’ti. Aṭṭhārasamaṃ.
116. ‘‘නාහං , භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං සද්‌ධම්‌මස්‌ස සම්‌මොසාය අන්‌තරධානාය සංවත්‌තති යථයිදං, භික්‌ඛවෙ, කොසජ්‌ජං. කොසජ්‌ජං, භික්‌ඛවෙ, සද්‌ධම්‌මස්‌ස සම්‌මොසාය අන්‌තරධානාය සංවත්‌තතී’’ති. එකූනවීසතිමං.
116. ‘‘Nāhaṃ , bhikkhave, aññaṃ ekadhammampi samanupassāmi yo evaṃ saddhammassa sammosāya antaradhānāya saṃvattati yathayidaṃ, bhikkhave, kosajjaṃ. Kosajjaṃ, bhikkhave, saddhammassa sammosāya antaradhānāya saṃvattatī’’ti. Ekūnavīsatimaṃ.
117. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං සද්‌ධම්‌මස්‌ස ඨිතියා අසම්‌මොසාය අනන්‌තරධානාය සංවත්‌තති යථයිදං, භික්‌ඛවෙ, වීරියාරම්‌භො. වීරියාරම්‌භො, භික්‌ඛවෙ, සද්‌ධම්‌මස්‌ස ඨිතියා අසම්‌මොසාය අනන්‌තරධානාය සංවත්‌තතී’’ති. වීසතිමං.
117. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ, bhikkhave, vīriyārambho. Vīriyārambho, bhikkhave, saddhammassa ṭhitiyā asammosāya anantaradhānāya saṃvattatī’’ti. Vīsatimaṃ.
118-128. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං සද්‌ධම්‌මස්‌ස සම්‌මොසාය අන්‌තරධානාය සංවත්‌තති යථයිදං, භික්‌ඛවෙ, මහිච්‌ඡතා…පෙ.… අප්‌පිච්‌ඡතා… අසන්‌තුට්‌ඨිතා… සන්‌තුට්‌ඨිතා… අයොනිසොමනසිකාරො… යොනිසොමනසිකාරො… අසම්‌පජඤ්‌ඤං… සම්‌පජඤ්‌ඤං … පාපමිත්‌තතා… කල්‍යාණමිත්‌තතා… අනුයොගො අකුසලානං ධම්‌මානං, අනනුයොගො කුසලානං ධම්‌මානං. අනුයොගො, භික්‌ඛවෙ, අකුසලානං ධම්‌මානං, අනනුයොගො කුසලානං ධම්‌මානං සද්‌ධම්‌මස්‌ස සම්‌මොසාය අන්‌තරධානාය සංවත්‌තතී’’ති. එකත්‌තිංසතිමං.
118-128. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa sammosāya antaradhānāya saṃvattati yathayidaṃ, bhikkhave, mahicchatā…pe… appicchatā… asantuṭṭhitā… santuṭṭhitā… ayonisomanasikāro… yonisomanasikāro… asampajaññaṃ… sampajaññaṃ … pāpamittatā… kalyāṇamittatā… anuyogo akusalānaṃ dhammānaṃ, ananuyogo kusalānaṃ dhammānaṃ. Anuyogo, bhikkhave, akusalānaṃ dhammānaṃ, ananuyogo kusalānaṃ dhammānaṃ saddhammassa sammosāya antaradhānāya saṃvattatī’’ti. Ekattiṃsatimaṃ.
129. ‘‘නාහං, භික්‌ඛවෙ, අඤ්‌ඤං එකධම්‌මම්‌පි සමනුපස්‌සාමි යො එවං සද්‌ධම්‌මස්‌ස ඨිතියා අසම්‌මොසාය අනන්‌තරධානාය සංවත්‌තති යථයිදං, භික්‌ඛවෙ, අනුයොගො කුසලානං ධම්‌මානං, අනනුයොගො අකුසලානං ධම්‌මානං. අනුයොගො, භික්‌ඛවෙ, කුසලානං ධම්‌මානං, අනනුයොගො අකුසලානං ධම්‌මානං සද්‌ධම්‌මස්‌ස ඨිතියා අසම්‌මොසාය අනන්‌තරධානාය සංවත්‌තතී’’ති. චතුක්‌කොටිකං නිට්‌ඨිතං. බාත්‌තිංසතිමං.
129. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ, bhikkhave, anuyogo kusalānaṃ dhammānaṃ, ananuyogo akusalānaṃ dhammānaṃ. Anuyogo, bhikkhave, kusalānaṃ dhammānaṃ, ananuyogo akusalānaṃ dhammānaṃ saddhammassa ṭhitiyā asammosāya anantaradhānāya saṃvattatī’’ti. Catukkoṭikaṃ niṭṭhitaṃ. Bāttiṃsatimaṃ.
130. ‘‘යෙ තෙ, භික්‌ඛවෙ, භික්‌ඛූ අධම්‌මං ධම්‌මොති දීපෙන්‌ති තෙ, භික්‌ඛවෙ, භික්‌ඛූ බහුජනඅහිතාය පටිපන්‌නා බහුජනඅසුඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං . බහුඤ්‌ච තෙ, භික්‌ඛවෙ, භික්‌ඛූ අපුඤ්‌ඤං පසවන්‌ති, තෙ චිමං 1 සද්‌ධම්‌මං අන්‌තරධාපෙන්‌තී’’ති. තෙත්‌තිංසතිමං.
130. ‘‘Ye te, bhikkhave, bhikkhū adhammaṃ dhammoti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṃ . Bahuñca te, bhikkhave, bhikkhū apuññaṃ pasavanti, te cimaṃ 2 saddhammaṃ antaradhāpentī’’ti. Tettiṃsatimaṃ.
131. ‘‘යෙ තෙ, භික්‌ඛවෙ, භික්‌ඛූ ධම්‌මං අධම්‌මොති දීපෙන්‌ති තෙ, භික්‌ඛවෙ, භික්‌ඛූ බහුජනඅහිතාය පටිපන්‌නා බහුජනඅසුඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. බහුඤ්‌ච තෙ, භික්‌ඛවෙ, භික්‌ඛූ අපුඤ්‌ඤං පසවන්‌ති, තෙ චිමං සද්‌ධම්‌මං අන්‌තරධාපෙන්‌තී’’ති. චතුත්‌තිංසතිමං.
131. ‘‘Ye te, bhikkhave, bhikkhū dhammaṃ adhammoti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṃ. Bahuñca te, bhikkhave, bhikkhū apuññaṃ pasavanti, te cimaṃ saddhammaṃ antaradhāpentī’’ti. Catuttiṃsatimaṃ.
132-139. ‘‘යෙ තෙ, භික්‌ඛවෙ, භික්‌ඛූ අවිනයං විනයොති දීපෙන්‌ති…පෙ.… විනයං අවිනයොති දීපෙන්‌ති…පෙ.… අභාසිතං අලපිතං තථාගතෙන භාසිතං ලපිතං තථාගතෙනාති දීපෙන්‌ති…පෙ.… භාසිතං ලපිතං තථාගතෙන අභාසිතං අලපිතං තථාගතෙනාති දීපෙන්‌ති…පෙ.… අනාචිණ්‌ණං තථාගතෙන ආචිණ්‌ණං තථාගතෙනාති දීපෙන්‌ති…පෙ.… ආචිණ්‌ණං තථාගතෙන අනාචිණ්‌ණං තථාගතෙනාති දීපෙන්‌ති…පෙ.… අපඤ්‌ඤත්‌තං තථාගතෙන පඤ්‌ඤත්‌තං තථාගතෙනාති දීපෙන්‌ති…පෙ.… පඤ්‌ඤත්‌තං තථාගතෙන අපඤ්‌ඤත්‌තං තථාගතෙනාති දීපෙන්‌ති තෙ, භික්‌ඛවෙ, භික්‌ඛූ බහුජනඅහිතාය පටිපන්‌නා බහුජනඅසුඛාය, බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. බහුඤ්‌ච තෙ, භික්‌ඛවෙ, භික්‌ඛූ අපුඤ්‌ඤං පසවන්‌ති, තෙ චිමං සද්‌ධම්‌මං අන්‌තරධාපෙන්‌තී’’ති. ද්‌වාචත්‌තාලීසතිමං.
132-139. ‘‘Ye te, bhikkhave, bhikkhū avinayaṃ vinayoti dīpenti…pe… vinayaṃ avinayoti dīpenti…pe… abhāsitaṃ alapitaṃ tathāgatena bhāsitaṃ lapitaṃ tathāgatenāti dīpenti…pe… bhāsitaṃ lapitaṃ tathāgatena abhāsitaṃ alapitaṃ tathāgatenāti dīpenti…pe… anāciṇṇaṃ tathāgatena āciṇṇaṃ tathāgatenāti dīpenti…pe… āciṇṇaṃ tathāgatena anāciṇṇaṃ tathāgatenāti dīpenti…pe… apaññattaṃ tathāgatena paññattaṃ tathāgatenāti dīpenti…pe… paññattaṃ tathāgatena apaññattaṃ tathāgatenāti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṃ. Bahuñca te, bhikkhave, bhikkhū apuññaṃ pasavanti, te cimaṃ saddhammaṃ antaradhāpentī’’ti. Dvācattālīsatimaṃ.
දුතියපමාදාදිවග්‌ගො දසමො.
Dutiyapamādādivaggo dasamo.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. දුතියපමාදාදිවග්‌ගවණ්‌ණනා • 10. Dutiyapamādādivaggavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. දුතියපමාදාදිවග්‌ගවණ්‌ණනා • 10. Dutiyapamādādivaggavaṇṇanā
