| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༠. དུཏིཡཔམཱདཱདིཝགྒོ
10. Dutiyapamādādivaggo
༩༨. ‘‘ཨཛ྄ཛྷཏྟིཀཾ , བྷིཀྑཝེ, ཨངྒནྟི ཀརིཏྭཱ ནཱཉྙཾ ཨེཀངྒམྤི སམནུཔསྶཱམི ཡཾ ཨེཝཾ མཧཏོ ཨནཏྠཱཡ སཾཝཏྟཏི ཡཐཡིདཾ, བྷིཀྑཝེ, པམཱདོ། པམཱདོ, བྷིཀྑཝེ, མཧཏོ ཨནཏྠཱཡ སཾཝཏྟཏཱི’’ཏི། པཋམཾ།
98. ‘‘Ajjhattikaṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, pamādo. Pamādo, bhikkhave, mahato anatthāya saṃvattatī’’ti. Paṭhamaṃ.
༩༩. ‘‘ཨཛ྄ཛྷཏྟིཀཾ, བྷིཀྑཝེ, ཨངྒནྟི ཀརིཏྭཱ ནཱཉྙཾ ཨེཀངྒམྤི སམནུཔསྶཱམི ཡཾ ཨེཝཾ མཧཏོ ཨཏྠཱཡ སཾཝཏྟཏི ཡཐཡིདཾ, བྷིཀྑཝེ, ཨཔྤམཱདོ། ཨཔྤམཱདོ , བྷིཀྑཝེ, མཧཏོ ཨཏྠཱཡ སཾཝཏྟཏཱི’’ཏི། དུཏིཡཾ།
99. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, appamādo. Appamādo , bhikkhave, mahato atthāya saṃvattatī’’ti. Dutiyaṃ.
༡༠༠. ‘‘ཨཛ྄ཛྷཏྟིཀཾ, བྷིཀྑཝེ, ཨངྒནྟི ཀརིཏྭཱ ནཱཉྙཾ ཨེཀངྒམྤི སམནུཔསྶཱམི ཡཾ ཨེཝཾ མཧཏོ ཨནཏྠཱཡ སཾཝཏྟཏི ཡཐཡིདཾ, བྷིཀྑཝེ, ཀོསཛྫཾ། ཀོསཛྫཾ, བྷིཀྑཝེ, མཧཏོ ཨནཏྠཱཡ སཾཝཏྟཏཱི’’ཏི། ཏཏིཡཾ།
100. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, kosajjaṃ. Kosajjaṃ, bhikkhave, mahato anatthāya saṃvattatī’’ti. Tatiyaṃ.
༡༠༡. ‘‘ཨཛ྄ཛྷཏྟིཀཾ, བྷིཀྑཝེ, ཨངྒནྟི ཀརིཏྭཱ ནཱཉྙཾ ཨེཀངྒམྤི སམནུཔསྶཱམི ཡཾ ཨེཝཾ མཧཏོ ཨཏྠཱཡ སཾཝཏྟཏི ཡཐཡིདཾ, བྷིཀྑཝེ, ཝཱིརིཡཱརམྦྷོ། ཝཱིརིཡཱརམྦྷོ, བྷིཀྑཝེ, མཧཏོ ཨཏྠཱཡ སཾཝཏྟཏཱི’’ཏི། ཙཏུཏྠཾ།
101. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, vīriyārambho. Vīriyārambho, bhikkhave, mahato atthāya saṃvattatī’’ti. Catutthaṃ.
༡༠༢-༡༠༩. ‘‘ཨཛ྄ཛྷཏྟིཀཾ , བྷིཀྑཝེ, ཨངྒནྟི ཀརིཏྭཱ ནཱཉྙཾ ཨེཀངྒམྤི སམནུཔསྶཱམི ཡཾ ཨེཝཾ མཧཏོ ཨནཏྠཱཡ སཾཝཏྟཏི ཡཐཡིདཾ, བྷིཀྑཝེ, མཧིཙྪཏཱ…པེ॰… ཨཔྤིཙྪཏཱ… ཨསནྟུཊྛིཏཱ… སནྟུཊྛིཏཱ… ཨཡོནིསོམནསིཀཱརོ… ཡོནིསོམནསིཀཱརོ… ཨསམྤཛཉྙཾ… སམྤཛཉྙཾ… དྭཱདསམཾ།
102-109. ‘‘Ajjhattikaṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, mahicchatā…pe… appicchatā… asantuṭṭhitā… santuṭṭhitā… ayonisomanasikāro… yonisomanasikāro… asampajaññaṃ… sampajaññaṃ… dvādasamaṃ.
༡༡༠. ‘‘བཱཧིརཾ , བྷིཀྑཝེ, ཨངྒནྟི ཀརིཏྭཱ ནཱཉྙཾ ཨེཀངྒམྤི སམནུཔསྶཱམི ཡཾ ཨེཝཾ མཧཏོ ཨནཏྠཱཡ སཾཝཏྟཏི ཡཐཡིདཾ, བྷིཀྑཝེ, པཱཔམིཏྟཏཱ། པཱཔམིཏྟཏཱ, བྷིཀྑཝེ, མཧཏོ ཨནཏྠཱཡ སཾཝཏྟཏཱི’’ཏི། ཏེརསམཾ།
110. ‘‘Bāhiraṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, pāpamittatā. Pāpamittatā, bhikkhave, mahato anatthāya saṃvattatī’’ti. Terasamaṃ.
༡༡༡. ‘‘བཱཧིརཾ, བྷིཀྑཝེ, ཨངྒནྟི ཀརིཏྭཱ ནཱཉྙཾ ཨེཀངྒམྤི སམནུཔསྶཱམི ཡཾ ཨེཝཾ མཧཏོ ཨཏྠཱཡ སཾཝཏྟཏི ཡཐཡིདཾ, བྷིཀྑཝེ, ཀལྱཱཎམིཏྟཏཱ། ཀལྱཱཎམིཏྟཏཱ, བྷིཀྑཝེ, མཧཏོ ཨཏྠཱཡ སཾཝཏྟཏཱི’’ཏི། ཙུདྡསམཾ།
111. ‘‘Bāhiraṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, kalyāṇamittatā. Kalyāṇamittatā, bhikkhave, mahato atthāya saṃvattatī’’ti. Cuddasamaṃ.
༡༡༢. ‘‘ཨཛ྄ཛྷཏྟིཀཾ , བྷིཀྑཝེ, ཨངྒནྟི ཀརིཏྭཱ ནཱཉྙཾ ཨེཀངྒམྤི སམནུཔསྶཱམི ཡཾ ཨེཝཾ མཧཏོ ཨནཏྠཱཡ སཾཝཏྟཏི ཡཐཡིདཾ, བྷིཀྑཝེ, ཨནུཡོགོ ཨཀུསལཱནཾ དྷམྨཱནཾ, ཨནནུཡོགོ ཀུསལཱནཾ དྷམྨཱནཾ། ཨནུཡོགོ, བྷིཀྑཝེ, ཨཀུསལཱནཾ དྷམྨཱནཾ, ཨནནུཡོགོ ཀུསལཱནཾ དྷམྨཱནཾ མཧཏོ ཨནཏྠཱཡ སཾཝཏྟཏཱི’’ཏི། པནྣརསམཾ།
112. ‘‘Ajjhattikaṃ , bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato anatthāya saṃvattati yathayidaṃ, bhikkhave, anuyogo akusalānaṃ dhammānaṃ, ananuyogo kusalānaṃ dhammānaṃ. Anuyogo, bhikkhave, akusalānaṃ dhammānaṃ, ananuyogo kusalānaṃ dhammānaṃ mahato anatthāya saṃvattatī’’ti. Pannarasamaṃ.
༡༡༣. ‘‘ཨཛ྄ཛྷཏྟིཀཾ, བྷིཀྑཝེ, ཨངྒནྟི ཀརིཏྭཱ ནཱཉྙཾ ཨེཀངྒམྤི སམནུཔསྶཱམི ཡཾ ཨེཝཾ མཧཏོ ཨཏྠཱཡ སཾཝཏྟཏི ཡཐཡིདཾ, བྷིཀྑཝེ, ཨནུཡོགོ ཀུསལཱནཾ དྷམྨཱནཾ, ཨནནུཡོགོ ཨཀུསལཱནཾ དྷམྨཱནཾ། ཨནུཡོགོ, བྷིཀྑཝེ, ཀུསལཱནཾ དྷམྨཱནཾ, ཨནནུཡོགོ ཨཀུསལཱནཾ དྷམྨཱནཾ མཧཏོ ཨཏྠཱཡ སཾཝཏྟཏཱི’’ཏི། སོལ༹སམཾ།
113. ‘‘Ajjhattikaṃ, bhikkhave, aṅganti karitvā nāññaṃ ekaṅgampi samanupassāmi yaṃ evaṃ mahato atthāya saṃvattati yathayidaṃ, bhikkhave, anuyogo kusalānaṃ dhammānaṃ, ananuyogo akusalānaṃ dhammānaṃ. Anuyogo, bhikkhave, kusalānaṃ dhammānaṃ, ananuyogo akusalānaṃ dhammānaṃ mahato atthāya saṃvattatī’’ti. Soḷasamaṃ.
༡༡༤. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡོ ཨེཝཾ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏི ཡཐཡིདཾ, བྷིཀྑཝེ, པམཱདོ། པམཱདོ, བྷིཀྑཝེ, སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏཱི’’ཏི། སཏྟརསམཾ།
114. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa sammosāya antaradhānāya saṃvattati yathayidaṃ, bhikkhave, pamādo. Pamādo, bhikkhave, saddhammassa sammosāya antaradhānāya saṃvattatī’’ti. Sattarasamaṃ.
༡༡༥. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡོ ཨེཝཾ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏི ཡཐཡིདཾ, བྷིཀྑཝེ, ཨཔྤམཱདོ། ཨཔྤམཱདོ , བྷིཀྑཝེ, སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏཱི’’ཏི། ཨཊྛཱརསམཾ།
115. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ, bhikkhave, appamādo. Appamādo , bhikkhave, saddhammassa ṭhitiyā asammosāya anantaradhānāya saṃvattatī’’ti. Aṭṭhārasamaṃ.
༡༡༦. ‘‘ནཱཧཾ , བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡོ ཨེཝཾ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏི ཡཐཡིདཾ, བྷིཀྑཝེ, ཀོསཛྫཾ། ཀོསཛྫཾ, བྷིཀྑཝེ, སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏཱི’’ཏི། ཨེཀཱུནཝཱིསཏིམཾ།
116. ‘‘Nāhaṃ , bhikkhave, aññaṃ ekadhammampi samanupassāmi yo evaṃ saddhammassa sammosāya antaradhānāya saṃvattati yathayidaṃ, bhikkhave, kosajjaṃ. Kosajjaṃ, bhikkhave, saddhammassa sammosāya antaradhānāya saṃvattatī’’ti. Ekūnavīsatimaṃ.
༡༡༧. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡོ ཨེཝཾ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏི ཡཐཡིདཾ, བྷིཀྑཝེ, ཝཱིརིཡཱརམྦྷོ། ཝཱིརིཡཱརམྦྷོ, བྷིཀྑཝེ, སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏཱི’’ཏི། ཝཱིསཏིམཾ།
117. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ, bhikkhave, vīriyārambho. Vīriyārambho, bhikkhave, saddhammassa ṭhitiyā asammosāya anantaradhānāya saṃvattatī’’ti. Vīsatimaṃ.
༡༡༨-༡༢༨. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡོ ཨེཝཾ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏི ཡཐཡིདཾ, བྷིཀྑཝེ, མཧིཙྪཏཱ…པེ॰… ཨཔྤིཙྪཏཱ… ཨསནྟུཊྛིཏཱ… སནྟུཊྛིཏཱ… ཨཡོནིསོམནསིཀཱརོ… ཡོནིསོམནསིཀཱརོ… ཨསམྤཛཉྙཾ… སམྤཛཉྙཾ … པཱཔམིཏྟཏཱ… ཀལྱཱཎམིཏྟཏཱ… ཨནུཡོགོ ཨཀུསལཱནཾ དྷམྨཱནཾ, ཨནནུཡོགོ ཀུསལཱནཾ དྷམྨཱནཾ། ཨནུཡོགོ, བྷིཀྑཝེ, ཨཀུསལཱནཾ དྷམྨཱནཾ, ཨནནུཡོགོ ཀུསལཱནཾ དྷམྨཱནཾ སདྡྷམྨསྶ སམྨོསཱཡ ཨནྟརདྷཱནཱཡ སཾཝཏྟཏཱི’’ཏི། ཨེཀཏྟིཾསཏིམཾ།
118-128. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa sammosāya antaradhānāya saṃvattati yathayidaṃ, bhikkhave, mahicchatā…pe… appicchatā… asantuṭṭhitā… santuṭṭhitā… ayonisomanasikāro… yonisomanasikāro… asampajaññaṃ… sampajaññaṃ … pāpamittatā… kalyāṇamittatā… anuyogo akusalānaṃ dhammānaṃ, ananuyogo kusalānaṃ dhammānaṃ. Anuyogo, bhikkhave, akusalānaṃ dhammānaṃ, ananuyogo kusalānaṃ dhammānaṃ saddhammassa sammosāya antaradhānāya saṃvattatī’’ti. Ekattiṃsatimaṃ.
༡༢༩. ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཡོ ཨེཝཾ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏི ཡཐཡིདཾ, བྷིཀྑཝེ, ཨནུཡོགོ ཀུསལཱནཾ དྷམྨཱནཾ, ཨནནུཡོགོ ཨཀུསལཱནཾ དྷམྨཱནཾ། ཨནུཡོགོ, བྷིཀྑཝེ, ཀུསལཱནཾ དྷམྨཱནཾ, ཨནནུཡོགོ ཨཀུསལཱནཾ དྷམྨཱནཾ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟཏཱི’’ཏི། ཙཏུཀྐོཊིཀཾ ནིཊྛིཏཾ། བཱཏྟིཾསཏིམཾ།
129. ‘‘Nāhaṃ, bhikkhave, aññaṃ ekadhammampi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ, bhikkhave, anuyogo kusalānaṃ dhammānaṃ, ananuyogo akusalānaṃ dhammānaṃ. Anuyogo, bhikkhave, kusalānaṃ dhammānaṃ, ananuyogo akusalānaṃ dhammānaṃ saddhammassa ṭhitiyā asammosāya anantaradhānāya saṃvattatī’’ti. Catukkoṭikaṃ niṭṭhitaṃ. Bāttiṃsatimaṃ.
༡༣༠. ‘‘ཡེ ཏེ, བྷིཀྑཝེ, བྷིཀྑཱུ ཨདྷམྨཾ དྷམྨོཏི དཱིཔེནྟི ཏེ, བྷིཀྑཝེ, བྷིཀྑཱུ བཧུཛནཨཧིཏཱཡ པཊིཔནྣཱ བཧུཛནཨསུཁཱཡ, བཧུནོ ཛནསྶ ཨནཏྠཱཡ ཨཧིཏཱཡ དུཀྑཱཡ དེཝམནུསྶཱནཾ ། བཧུཉྩ ཏེ, བྷིཀྑཝེ, བྷིཀྑཱུ ཨཔུཉྙཾ པསཝནྟི, ཏེ ཙིམཾ 1 སདྡྷམྨཾ ཨནྟརདྷཱཔེནྟཱི’’ཏི། ཏེཏྟིཾསཏིམཾ།
130. ‘‘Ye te, bhikkhave, bhikkhū adhammaṃ dhammoti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṃ . Bahuñca te, bhikkhave, bhikkhū apuññaṃ pasavanti, te cimaṃ 2 saddhammaṃ antaradhāpentī’’ti. Tettiṃsatimaṃ.
༡༣༡. ‘‘ཡེ ཏེ, བྷིཀྑཝེ, བྷིཀྑཱུ དྷམྨཾ ཨདྷམྨོཏི དཱིཔེནྟི ཏེ, བྷིཀྑཝེ, བྷིཀྑཱུ བཧུཛནཨཧིཏཱཡ པཊིཔནྣཱ བཧུཛནཨསུཁཱཡ, བཧུནོ ཛནསྶ ཨནཏྠཱཡ ཨཧིཏཱཡ དུཀྑཱཡ དེཝམནུསྶཱནཾ། བཧུཉྩ ཏེ, བྷིཀྑཝེ, བྷིཀྑཱུ ཨཔུཉྙཾ པསཝནྟི, ཏེ ཙིམཾ སདྡྷམྨཾ ཨནྟརདྷཱཔེནྟཱི’’ཏི། ཙཏུཏྟིཾསཏིམཾ།
131. ‘‘Ye te, bhikkhave, bhikkhū dhammaṃ adhammoti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṃ. Bahuñca te, bhikkhave, bhikkhū apuññaṃ pasavanti, te cimaṃ saddhammaṃ antaradhāpentī’’ti. Catuttiṃsatimaṃ.
༡༣༢-༡༣༩. ‘‘ཡེ ཏེ, བྷིཀྑཝེ, བྷིཀྑཱུ ཨཝིནཡཾ ཝིནཡོཏི དཱིཔེནྟི…པེ॰… ཝིནཡཾ ཨཝིནཡོཏི དཱིཔེནྟི…པེ॰… ཨབྷཱསིཏཾ ཨལཔིཏཾ ཏཐཱགཏེན བྷཱསིཏཾ ལཔིཏཾ ཏཐཱགཏེནཱཏི དཱིཔེནྟི…པེ॰… བྷཱསིཏཾ ལཔིཏཾ ཏཐཱགཏེན ཨབྷཱསིཏཾ ཨལཔིཏཾ ཏཐཱགཏེནཱཏི དཱིཔེནྟི…པེ॰… ཨནཱཙིཎྞཾ ཏཐཱགཏེན ཨཱཙིཎྞཾ ཏཐཱགཏེནཱཏི དཱིཔེནྟི…པེ॰… ཨཱཙིཎྞཾ ཏཐཱགཏེན ཨནཱཙིཎྞཾ ཏཐཱགཏེནཱཏི དཱིཔེནྟི…པེ॰… ཨཔཉྙཏྟཾ ཏཐཱགཏེན པཉྙཏྟཾ ཏཐཱགཏེནཱཏི དཱིཔེནྟི…པེ॰… པཉྙཏྟཾ ཏཐཱགཏེན ཨཔཉྙཏྟཾ ཏཐཱགཏེནཱཏི དཱིཔེནྟི ཏེ, བྷིཀྑཝེ, བྷིཀྑཱུ བཧུཛནཨཧིཏཱཡ པཊིཔནྣཱ བཧུཛནཨསུཁཱཡ, བཧུནོ ཛནསྶ ཨནཏྠཱཡ ཨཧིཏཱཡ དུཀྑཱཡ དེཝམནུསྶཱནཾ། བཧུཉྩ ཏེ, བྷིཀྑཝེ, བྷིཀྑཱུ ཨཔུཉྙཾ པསཝནྟི, ཏེ ཙིམཾ སདྡྷམྨཾ ཨནྟརདྷཱཔེནྟཱི’’ཏི། དྭཱཙཏྟཱལཱིསཏིམཾ།
132-139. ‘‘Ye te, bhikkhave, bhikkhū avinayaṃ vinayoti dīpenti…pe… vinayaṃ avinayoti dīpenti…pe… abhāsitaṃ alapitaṃ tathāgatena bhāsitaṃ lapitaṃ tathāgatenāti dīpenti…pe… bhāsitaṃ lapitaṃ tathāgatena abhāsitaṃ alapitaṃ tathāgatenāti dīpenti…pe… anāciṇṇaṃ tathāgatena āciṇṇaṃ tathāgatenāti dīpenti…pe… āciṇṇaṃ tathāgatena anāciṇṇaṃ tathāgatenāti dīpenti…pe… apaññattaṃ tathāgatena paññattaṃ tathāgatenāti dīpenti…pe… paññattaṃ tathāgatena apaññattaṃ tathāgatenāti dīpenti te, bhikkhave, bhikkhū bahujanaahitāya paṭipannā bahujanaasukhāya, bahuno janassa anatthāya ahitāya dukkhāya devamanussānaṃ. Bahuñca te, bhikkhave, bhikkhū apuññaṃ pasavanti, te cimaṃ saddhammaṃ antaradhāpentī’’ti. Dvācattālīsatimaṃ.
དུཏིཡཔམཱདཱདིཝགྒོ དསམོ།
Dutiyapamādādivaggo dasamo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༠. དུཏིཡཔམཱདཱདིཝགྒཝཎྞནཱ • 10. Dutiyapamādādivaggavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡༠. དུཏིཡཔམཱདཱདིཝགྒཝཎྞནཱ • 10. Dutiyapamādādivaggavaṇṇanā
