| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. দুতিযপাপধম্মসুত্তং
8. Dutiyapāpadhammasuttaṃ
২০৮. ‘‘পাপঞ্চ ৰো, ভিক্খৰে, দেসেস্সামি, পাপেন পাপতরঞ্চ; কল্যাণঞ্চ, কল্যাণেন কল্যাণতরঞ্চ। তং সুণাথ, সাধুকং মনসিকরোথ; ভাসিস্সামী’’তি। এৰং…পে॰… এতদৰোচ –
208. ‘‘Pāpañca vo, bhikkhave, desessāmi, pāpena pāpatarañca; kalyāṇañca, kalyāṇena kalyāṇatarañca. Taṃ suṇātha, sādhukaṃ manasikarotha; bhāsissāmī’’ti. Evaṃ…pe… etadavoca –
‘‘কতমো চ, ভিক্খৰে, পাপো? ইধ, ভিক্খৰে, একচ্চো মিচ্ছাদিট্ঠিকো হোতি…পে॰… মিচ্ছাঞাণী হোতি, মিচ্ছাৰিমুত্তি হোতি। অযং ৰুচ্চতি, ভিক্খৰে, পাপো।
‘‘Katamo ca, bhikkhave, pāpo? Idha, bhikkhave, ekacco micchādiṭṭhiko hoti…pe… micchāñāṇī hoti, micchāvimutti hoti. Ayaṃ vuccati, bhikkhave, pāpo.
‘‘কতমো চ, ভিক্খৰে, পাপেন পাপতরো? ইধ, ভিক্খৰে, একচ্চো অত্তনা চ মিচ্ছাদিট্ঠিকো হোতি, পরঞ্চ মিচ্ছাদিট্ঠিযা সমাদপেতি…পে॰… অত্তনা চ মিচ্ছাঞাণী হোতি, পরঞ্চ মিচ্ছাঞাণে সমাদপেতি; অত্তনা চ মিচ্ছাৰিমুত্তি হোতি, পরঞ্চ মিচ্ছাৰিমুত্তিযা সমাদপেতি। অযং ৰুচ্চতি, ভিক্খৰে, পাপেন পাপতরো।
‘‘Katamo ca, bhikkhave, pāpena pāpataro? Idha, bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti…pe… attanā ca micchāñāṇī hoti, parañca micchāñāṇe samādapeti; attanā ca micchāvimutti hoti, parañca micchāvimuttiyā samādapeti. Ayaṃ vuccati, bhikkhave, pāpena pāpataro.
‘‘কতমো চ, ভিক্খৰে, কল্যাণো? ইধ, ভিক্খৰে, একচ্চো সম্মাদিট্ঠিকো হোতি …পে॰… সম্মাঞাণী হোতি, সম্মাৰিমুত্তি হোতি। অযং ৰুচ্চতি, ভিক্খৰে, কল্যাণো।
‘‘Katamo ca, bhikkhave, kalyāṇo? Idha, bhikkhave, ekacco sammādiṭṭhiko hoti …pe… sammāñāṇī hoti, sammāvimutti hoti. Ayaṃ vuccati, bhikkhave, kalyāṇo.
‘‘কতমো চ, ভিক্খৰে, কল্যাণেন কল্যাণতরো? ইধ, ভিক্খৰে, একচ্চো অত্তনা চ সম্মাদিট্ঠিকো হোতি, পরঞ্চ সম্মাদিট্ঠিযা সমাদপেতি…পে॰… অত্তনা চ সম্মাঞাণী হোতি , পরঞ্চ সম্মাঞাণে সমাদপেতি; অত্তনা চ সম্মাৰিমুত্তি হোতি, পরঞ্চ সম্মাৰিমুত্তিযা সমাদপেতি। অযং ৰুচ্চতি, ভিক্খৰে, কল্যাণেন কল্যাণতরো’’তি। অট্ঠমং।
‘‘Katamo ca, bhikkhave, kalyāṇena kalyāṇataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti…pe… attanā ca sammāñāṇī hoti , parañca sammāñāṇe samādapeti; attanā ca sammāvimutti hoti, parañca sammāvimuttiyā samādapeti. Ayaṃ vuccati, bhikkhave, kalyāṇena kalyāṇataro’’ti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭-১০. পাপধম্মসুত্তচতুক্কৰণ্ণনা • 7-10. Pāpadhammasuttacatukkavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. সিক্খাপদসুত্তাদিৰণ্ণনা • 1-10. Sikkhāpadasuttādivaṇṇanā
