| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. දුතියපාපධම්‌මසුත්‌තං
8. Dutiyapāpadhammasuttaṃ
208. ‘‘පාපඤ්‌ච වො, භික්‌ඛවෙ, දෙසෙස්‌සාමි, පාපෙන පාපතරඤ්‌ච; කල්‍යාණඤ්‌ච, කල්‍යාණෙන කල්‍යාණතරඤ්‌ච. තං සුණාථ, සාධුකං මනසිකරොථ; භාසිස්‌සාමී’’ති. එවං…පෙ.… එතදවොච –
208. ‘‘Pāpañca vo, bhikkhave, desessāmi, pāpena pāpatarañca; kalyāṇañca, kalyāṇena kalyāṇatarañca. Taṃ suṇātha, sādhukaṃ manasikarotha; bhāsissāmī’’ti. Evaṃ…pe… etadavoca –
‘‘කතමො ච, භික්‌ඛවෙ, පාපො? ඉධ, භික්‌ඛවෙ, එකච්‌චො මිච්‌ඡාදිට්‌ඨිකො හොති…පෙ.… මිච්‌ඡාඤාණී හොති, මිච්‌ඡාවිමුත්‌ති හොති. අයං වුච්‌චති, භික්‌ඛවෙ, පාපො.
‘‘Katamo ca, bhikkhave, pāpo? Idha, bhikkhave, ekacco micchādiṭṭhiko hoti…pe… micchāñāṇī hoti, micchāvimutti hoti. Ayaṃ vuccati, bhikkhave, pāpo.
‘‘කතමො ච, භික්‌ඛවෙ, පාපෙන පාපතරො? ඉධ, භික්‌ඛවෙ, එකච්‌චො අත්‌තනා ච මිච්‌ඡාදිට්‌ඨිකො හොති, පරඤ්‌ච මිච්‌ඡාදිට්‌ඨියා සමාදපෙති…පෙ.… අත්‌තනා ච මිච්‌ඡාඤාණී හොති, පරඤ්‌ච මිච්‌ඡාඤාණෙ සමාදපෙති; අත්‌තනා ච මිච්‌ඡාවිමුත්‌ති හොති, පරඤ්‌ච මිච්‌ඡාවිමුත්‌තියා සමාදපෙති. අයං වුච්‌චති, භික්‌ඛවෙ, පාපෙන පාපතරො.
‘‘Katamo ca, bhikkhave, pāpena pāpataro? Idha, bhikkhave, ekacco attanā ca micchādiṭṭhiko hoti, parañca micchādiṭṭhiyā samādapeti…pe… attanā ca micchāñāṇī hoti, parañca micchāñāṇe samādapeti; attanā ca micchāvimutti hoti, parañca micchāvimuttiyā samādapeti. Ayaṃ vuccati, bhikkhave, pāpena pāpataro.
‘‘කතමො ච, භික්‌ඛවෙ, කල්‍යාණො? ඉධ, භික්‌ඛවෙ, එකච්‌චො සම්‌මාදිට්‌ඨිකො හොති …පෙ.… සම්‌මාඤාණී හොති, සම්‌මාවිමුත්‌ති හොති. අයං වුච්‌චති, භික්‌ඛවෙ, කල්‍යාණො.
‘‘Katamo ca, bhikkhave, kalyāṇo? Idha, bhikkhave, ekacco sammādiṭṭhiko hoti …pe… sammāñāṇī hoti, sammāvimutti hoti. Ayaṃ vuccati, bhikkhave, kalyāṇo.
‘‘කතමො ච, භික්‌ඛවෙ, කල්‍යාණෙන කල්‍යාණතරො? ඉධ, භික්‌ඛවෙ, එකච්‌චො අත්‌තනා ච සම්‌මාදිට්‌ඨිකො හොති, පරඤ්‌ච සම්‌මාදිට්‌ඨියා සමාදපෙති…පෙ.… අත්‌තනා ච සම්‌මාඤාණී හොති , පරඤ්‌ච සම්‌මාඤාණෙ සමාදපෙති; අත්‌තනා ච සම්‌මාවිමුත්‌ති හොති, පරඤ්‌ච සම්‌මාවිමුත්‌තියා සමාදපෙති. අයං වුච්‌චති, භික්‌ඛවෙ, කල්‍යාණෙන කල්‍යාණතරො’’ති. අට්‌ඨමං.
‘‘Katamo ca, bhikkhave, kalyāṇena kalyāṇataro? Idha, bhikkhave, ekacco attanā ca sammādiṭṭhiko hoti, parañca sammādiṭṭhiyā samādapeti…pe… attanā ca sammāñāṇī hoti , parañca sammāñāṇe samādapeti; attanā ca sammāvimutti hoti, parañca sammāvimuttiyā samādapeti. Ayaṃ vuccati, bhikkhave, kalyāṇena kalyāṇataro’’ti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7-10. පාපධම්‌මසුත්‌තචතුක්‌කවණ්‌ණනා • 7-10. Pāpadhammasuttacatukkavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. සික්‌ඛාපදසුත්‌තාදිවණ්‌ණනා • 1-10. Sikkhāpadasuttādivaṇṇanā
