| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. து³தியபாபணிகஸுத்தவண்ணனா
10. Dutiyapāpaṇikasuttavaṇṇanā
20. த³ஸமே சக்கு²மாதி பஞ்ஞாசக்கு²னா சக்கு²மா ஹோதி. விது⁴ரோதி விஸிட்ட²து⁴ரோ உத்தமது⁴ரோ ஞாணஸம்பயுத்தேன வீரியேன ஸமன்னாக³தோ. நிஸ்ஸயஸம்பன்னோதி அவஸ்ஸயஸம்பன்னோ பதிட்டா²னஸம்பன்னோ. பணியந்தி விக்காயிகப⁴ண்ட³ங். எத்தகங் மூலங் ப⁴விஸ்ஸதி எத்தகோ உத³யோதி தஸ்மிங் ‘‘ஏவங் கீதங் ஏவங் விக்காயமான’’ந்தி வுத்தபணியே யேன கயேன தங் கீதங், தங் கயஸங்கா²தங் மூலங் எத்தகங் ப⁴விஸ்ஸதி. யோ ச தஸ்மிங் விக்கயமானே விக்கயோ, தஸ்மிங் விக்கயே எத்தகோ உத³யோ ப⁴விஸ்ஸதி, எத்திகா வட்³டீ⁴தி அத்தோ².
20. Dasame cakkhumāti paññācakkhunā cakkhumā hoti. Vidhuroti visiṭṭhadhuro uttamadhuro ñāṇasampayuttena vīriyena samannāgato. Nissayasampannoti avassayasampanno patiṭṭhānasampanno. Paṇiyanti vikkāyikabhaṇḍaṃ. Ettakaṃ mūlaṃ bhavissati ettako udayoti tasmiṃ ‘‘evaṃ kītaṃ evaṃ vikkāyamāna’’nti vuttapaṇiye yena kayena taṃ kītaṃ, taṃ kayasaṅkhātaṃ mūlaṃ ettakaṃ bhavissati. Yo ca tasmiṃ vikkayamāne vikkayo, tasmiṃ vikkaye ettako udayo bhavissati, ettikā vaḍḍhīti attho.
குஸலோ ஹோதி பணியங் கேதுஞ்ச விக்கேதுஞ்சாதி ஸுலப⁴ட்டா²னங் க³ந்த்வா கிணந்தோ து³ல்லப⁴ட்டா²னங் க³ந்த்வா விக்கிணந்தோ ச எத்த² குஸலோ நாம ஹோதி, த³ஸகு³ணம்பி வீஸதிகு³ணம்பி லாப⁴ங் லப⁴தி.
Kusalo hoti paṇiyaṃ ketuñca vikketuñcāti sulabhaṭṭhānaṃ gantvā kiṇanto dullabhaṭṭhānaṃ gantvā vikkiṇanto ca ettha kusalo nāma hoti, dasaguṇampi vīsatiguṇampi lābhaṃ labhati.
அட்³டா⁴தி இஸ்ஸரா ப³ஹுனா நிக்கி²த்தத⁴னேன ஸமன்னாக³தா. மஹத்³த⁴னாதி வளஞ்ஜனகவஸேன மஹத்³த⁴னா . மஹாபோ⁴கா³தி உபபோ⁴க³பரிபோ⁴க³ப⁴ண்டே³ன மஹாபோ⁴கா³. படிப³லோதி காயப³லேன சேவ ஞாணப³லேன ச ஸமன்னாக³தத்தா ஸமத்தோ². அம்ஹாகஞ்ச காலேன காலங் அனுப்பதா³துந்தி அம்ஹாகஞ்ச க³ஹிதத⁴னமூலிகங் வட்³டி⁴ங் காலேன காலங் அனுப்பதா³துங். நிபதந்தீதி நிமந்தெந்தி. நிபாதெந்தீதிபி பாடோ², அயமேவ அத்தோ².
Aḍḍhāti issarā bahunā nikkhittadhanena samannāgatā. Mahaddhanāti vaḷañjanakavasena mahaddhanā . Mahābhogāti upabhogaparibhogabhaṇḍena mahābhogā. Paṭibaloti kāyabalena ceva ñāṇabalena ca samannāgatattā samattho. Amhākañca kālena kālaṃ anuppadātunti amhākañca gahitadhanamūlikaṃ vaḍḍhiṃ kālena kālaṃ anuppadātuṃ. Nipatantīti nimantenti. Nipātentītipi pāṭho, ayameva attho.
குஸலானங் த⁴ம்மானங் உபஸம்பதா³யாதி குஸலத⁴ம்மானங் ஸம்பாத³னத்தா²ய படிலாப⁴த்தா²ய. தா²மவாதி ஞாணதா²மேன ஸமன்னாக³தோ. த³ள்ஹபரக்கமோதி தி²ரேன ஞாணபரக்கமேன ஸமன்னாக³தோ. அனிக்கி²த்தது⁴ரோதி ‘‘அக்³க³மக்³க³ங் அபாபுணித்வா இமங் வீரியது⁴ரங் ந ட²பெஸ்ஸாமீ’’தி ஏவங் அட்ட²பிதது⁴ரோ.
Kusalānaṃ dhammānaṃ upasampadāyāti kusaladhammānaṃ sampādanatthāya paṭilābhatthāya. Thāmavāti ñāṇathāmena samannāgato. Daḷhaparakkamoti thirena ñāṇaparakkamena samannāgato. Anikkhittadhuroti ‘‘aggamaggaṃ apāpuṇitvā imaṃ vīriyadhuraṃ na ṭhapessāmī’’ti evaṃ aṭṭhapitadhuro.
ப³ஹுஸ்ஸுதாதி ஏகனிகாயாதி³வஸேன ப³ஹு பு³த்³த⁴வசனங் ஸுதங் ஏதேஸந்தி ப³ஹுஸ்ஸுதா. ஆக³தாக³மாதி ஏகோ நிகாயோ ஏகோ ஆக³மோ நாம, த்³வே நிகாயா த்³வே ஆக³மா நாம, பஞ்ச நிகாயா பஞ்ச ஆக³மா நாம, ஏதேஸு ஆக³மேஸு யேஸங் ஏகோபி ஆக³மோ ஆக³தோ பகு³ணோ பவத்திதோ, தே ஆக³தாக³மா நாம. த⁴ம்மத⁴ராதி ஸுத்தந்தபிடகத⁴ரா. வினயத⁴ராதி வினயபிடகத⁴ரா. மாதிகாத⁴ராதி த்³வேமாதிகாத⁴ரா. பரிபுச்ச²தீதி அத்தா²னத்த²ங் காரணாகாரணங் புச்ச²தி. பரிபஞ்ஹதீதி ‘‘இமங் நாம புச்சி²ஸ்ஸாமீ’’தி அஞ்ஞாதி துலேதி பரிக்³க³ண்ஹாதி. ஸேஸமெத்த² உத்தானத்த²மேவ.
Bahussutāti ekanikāyādivasena bahu buddhavacanaṃ sutaṃ etesanti bahussutā. Āgatāgamāti eko nikāyo eko āgamo nāma, dve nikāyā dve āgamā nāma, pañca nikāyā pañca āgamā nāma, etesu āgamesu yesaṃ ekopi āgamo āgato paguṇo pavattito, te āgatāgamā nāma. Dhammadharāti suttantapiṭakadharā. Vinayadharāti vinayapiṭakadharā. Mātikādharāti dvemātikādharā. Paripucchatīti atthānatthaṃ kāraṇākāraṇaṃ pucchati. Paripañhatīti ‘‘imaṃ nāma pucchissāmī’’ti aññāti tuleti pariggaṇhāti. Sesamettha uttānatthameva.
இமஸ்மிங் பன ஸுத்தே பட²மங் பஞ்ஞா ஆக³தா, பச்சா² வீரியஞ்ச கல்யாணமித்தஸேவனா ச. தத்த² பட²மங் அரஹத்தங் பத்வா பச்சா² வீரியங் கத்வா கல்யாணமித்தா ஸேவிதப்³பா³தி ந ஏவங் அத்தோ² த³ட்ட²ப்³போ³, தே³ஸனாய நாம ஹெட்டி²மேன வா பரிச்சே²தோ³ ஹோதி உபரிமேன வா த்³வீஹிபி வா கோடீஹி. இத⁴ பன உபரிமேன பரிச்சே²தோ³ வேதி³தப்³போ³. தஸ்மா கதெ²ந்தேன பட²மங் கல்யாணமித்தஉபனிஸ்ஸயங் த³ஸ்ஸெத்வா மஜ்ஜே² வீரியங் த³ஸ்ஸெத்வா பச்சா² அரஹத்தங் கதே²தப்³ப³ந்தி.
Imasmiṃ pana sutte paṭhamaṃ paññā āgatā, pacchā vīriyañca kalyāṇamittasevanā ca. Tattha paṭhamaṃ arahattaṃ patvā pacchā vīriyaṃ katvā kalyāṇamittā sevitabbāti na evaṃ attho daṭṭhabbo, desanāya nāma heṭṭhimena vā paricchedo hoti uparimena vā dvīhipi vā koṭīhi. Idha pana uparimena paricchedo veditabbo. Tasmā kathentena paṭhamaṃ kalyāṇamittaupanissayaṃ dassetvā majjhe vīriyaṃ dassetvā pacchā arahattaṃ kathetabbanti.
ரத²காரவக்³கோ³ து³தியோ.
Rathakāravaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. து³தியபாபணிகஸுத்தங் • 10. Dutiyapāpaṇikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. து³தியபாபணிகஸுத்தவண்ணனா • 10. Dutiyapāpaṇikasuttavaṇṇanā
