| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. து³தியபாபணிகஸுத்தவண்ணனா
10. Dutiyapāpaṇikasuttavaṇṇanā
20. த³ஸமே விஸிட்ட²து⁴ரோதி விஸிட்ட²து⁴ரஸம்பக்³கா³ஹோ வீரியஸம்பன்னோ. ஞாணவீரியாயத்தா ஹி அத்த²ஸித்³தி⁴யோ. தேனாஹ ‘‘உத்தமது⁴ரோ’’திஆதி³. விக்காயிகப⁴ண்ட³ந்தி விக்கயேதப்³ப³ப⁴ண்ட³ங். நிக்கி²த்தத⁴னேனாதி நித³ஹித்வா ட²பிதத⁴னவஸேன. வளஞ்ஜனகவஸேனாதி தி³வஸே தி³வஸே தா³னூபபோ⁴க³வஸேன வளஞ்ஜிதப்³ப³த⁴னவஸேன. உபபோ⁴க³பரிபோ⁴க³ப⁴ண்டே³னாதி உபபோ⁴க³பரிபோ⁴கூ³பகரணேன. நிபதந்தீதி நிபாதெந்தி, அத்தனோ த⁴னக்³க³ஹேன நிபாதவுத்திகே கரொந்தி. தேனாஹ ‘‘நிமந்தெந்தீ’’தி.
20. Dasame visiṭṭhadhuroti visiṭṭhadhurasampaggāho vīriyasampanno. Ñāṇavīriyāyattā hi atthasiddhiyo. Tenāha ‘‘uttamadhuro’’tiādi. Vikkāyikabhaṇḍanti vikkayetabbabhaṇḍaṃ. Nikkhittadhanenāti nidahitvā ṭhapitadhanavasena. Vaḷañjanakavasenāti divase divase dānūpabhogavasena vaḷañjitabbadhanavasena. Upabhogaparibhogabhaṇḍenāti upabhogaparibhogūpakaraṇena. Nipatantīti nipātenti, attano dhanaggahena nipātavuttike karonti. Tenāha ‘‘nimantentī’’ti.
ஞாணதா²மேனாதி ஞாணஸ்ஸ தி²ரபா⁴வேன. ஞாணபரக்கமேனாதி ஞாணஸஹிதேன வீரியேன. தி³ட்ட²த⁴ம்மிகஸம்பராயிகபரமத்த²பே⁴த³ஞ்ஹி யேன ஸுதேன இஜ்ஜ²தி, தங் ஸுதங் நாம. உக்கட்ட²னித்³தே³ஸேன த³ஸ்ஸெந்தோ ‘‘ஏகனிகாய…பே॰… ப³ஹுஸ்ஸுதா’’தி ஆஹ. ஆக³தோதி ஸுப்பவத்திபா⁴வேன ஸ்வாக³தோ. தேனாஹ ‘‘பகு³ணோ பவத்திதோ’’தி. அபி⁴த⁴ம்மே ஆக³தா குஸலாதி³க்க²ந்தா⁴தி³பே⁴த³பி⁴ன்னா த⁴ம்மா ஸுத்தந்தபிடகேபி ஓதரந்தீதி ‘‘த⁴ம்மத⁴ராதி ஸுத்தந்தபிடகத⁴ரா’’இச்சேவ வுத்தங். ந ஹி ஆபி⁴த⁴ம்மிகபா⁴வேன வினா நிப்பரியாயதோ ஸுத்தந்தபிடகஞ்ஞுதா ஸம்ப⁴வதி. த்³வேமாதிகாத⁴ராதி பி⁴க்கு²பி⁴க்கு²னிமாதிகாவஸேன த்³வேமாதிகாத⁴ராதி வத³ந்தி, ‘‘வினயாபி⁴த⁴ம்மமாதிகாத⁴ரா’’தி யுத்தங். பரிபுச்ச²தீதி ஸப்³ப³பா⁴கே³ன புச்சி²தப்³ப³ங் புச்ச²தி. தேனாஹ ‘‘அத்தா²னத்த²ங் காரணாகாரணங் புச்ச²தீ’’தி. பரிக்³க³ண்ஹாதீதி விசாரேதி.
Ñāṇathāmenāti ñāṇassa thirabhāvena. Ñāṇaparakkamenāti ñāṇasahitena vīriyena. Diṭṭhadhammikasamparāyikaparamatthabhedañhi yena sutena ijjhati, taṃ sutaṃ nāma. Ukkaṭṭhaniddesena dassento ‘‘ekanikāya…pe… bahussutā’’ti āha. Āgatoti suppavattibhāvena svāgato. Tenāha ‘‘paguṇo pavattito’’ti. Abhidhamme āgatā kusalādikkhandhādibhedabhinnā dhammā suttantapiṭakepi otarantīti ‘‘dhammadharāti suttantapiṭakadharā’’icceva vuttaṃ. Na hi ābhidhammikabhāvena vinā nippariyāyato suttantapiṭakaññutā sambhavati. Dvemātikādharāti bhikkhubhikkhunimātikāvasena dvemātikādharāti vadanti, ‘‘vinayābhidhammamātikādharā’’ti yuttaṃ. Paripucchatīti sabbabhāgena pucchitabbaṃ pucchati. Tenāha ‘‘atthānatthaṃ kāraṇākāraṇaṃ pucchatī’’ti. Pariggaṇhātīti vicāreti.
ந ஏவங் அத்தோ² த³ட்ட²ப்³போ³தி ஏவங் தே³ஸனானுக்கமேன அத்தோ² ந க³ஹேதப்³போ³. அஞ்ஞோ ஹி தே³ஸனாக்கமோ வேனெய்யஜ்ஜா²ஸயவஸேன பவத்தனதோ, அஞ்ஞோ படிபத்திக்கமோ. ஹெட்டி²மேன வா பரிச்சே²தோ³தி ஸீலஸமாதி⁴பஞ்ஞாஸங்கா²தேஸு தீஸு பா⁴கே³ஸு கத்த²சி ஹெட்டி²மனயேன தே³ஸனாய பரிச்சே²த³ங் வேதி³தப்³ப³ங் ஸீலேன, கத்த²சி உபரிமேன பா⁴கே³ன பஞ்ஞாய, கத்த²சி த்³வீஹிபி பா⁴கே³ஹி ஸீலபஞ்ஞாவஸேன. இத⁴ பன ஸுத்தே உபரிமேன பா⁴கே³ன பரிச்சே²தோ³ வேதி³தப்³போ³தி வத்வா தங் த³ஸ்ஸெந்தோ ‘‘தஸ்மா’’திஆதி³மாஹ. யஸ்மா வா ப⁴க³வா வேனெய்யஜ்ஜா²ஸயவஸேன பட²மங் கல்யாணமித்தங் த³ஸ்ஸெந்தோ அரஹத்தங் பவேதெ³த்வா ‘‘தயித³ங் அரஹத்தங் இமாய ஆரத்³த⁴வீரியதாய ஹோதீ’’தி த³ஸ்ஸெந்தோ வீரியாரம்ப⁴ங் பவேதெ³த்வா ‘‘ஸ்வாயங் வீரியாரம்போ⁴ இமினா கல்யாணமித்தஸன்னிஸ்ஸயேன ப⁴வதீ’’தி த³ஸ்ஸெந்தோ நிஸ்ஸயஸம்பத்திங் பவேதே³தி ஹெட்டா² த³ஸ்ஸிதனித³ஸ்ஸனானுரூபந்தி த³ட்ட²ப்³ப³ங்.
Na evaṃ attho daṭṭhabboti evaṃ desanānukkamena attho na gahetabbo. Añño hi desanākkamo veneyyajjhāsayavasena pavattanato, añño paṭipattikkamo. Heṭṭhimena vā paricchedoti sīlasamādhipaññāsaṅkhātesu tīsu bhāgesu katthaci heṭṭhimanayena desanāya paricchedaṃ veditabbaṃ sīlena, katthaci uparimena bhāgena paññāya, katthaci dvīhipi bhāgehi sīlapaññāvasena. Idha pana sutte uparimena bhāgena paricchedo veditabboti vatvā taṃ dassento ‘‘tasmā’’tiādimāha. Yasmā vā bhagavā veneyyajjhāsayavasena paṭhamaṃ kalyāṇamittaṃ dassento arahattaṃ pavedetvā ‘‘tayidaṃ arahattaṃ imāya āraddhavīriyatāya hotī’’ti dassento vīriyārambhaṃ pavedetvā ‘‘svāyaṃ vīriyārambho iminā kalyāṇamittasannissayena bhavatī’’ti dassento nissayasampattiṃ pavedeti heṭṭhā dassitanidassanānurūpanti daṭṭhabbaṃ.
து³தியபாபணிகஸுத்தவண்ணனா நிட்டி²தா.
Dutiyapāpaṇikasuttavaṇṇanā niṭṭhitā.
ரத²காரவக்³க³வண்ணனா நிட்டி²தா.
Rathakāravaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. து³தியபாபணிகஸுத்தங் • 10. Dutiyapāpaṇikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. து³தியபாபணிகஸுத்தவண்ணனா • 10. Dutiyapāpaṇikasuttavaṇṇanā
