| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১০. দুতিযপাপণিকসুত্তৰণ্ণনা
10. Dutiyapāpaṇikasuttavaṇṇanā
২০. দসমে চক্খুমাতি পঞ্ঞাচক্খুনা চক্খুমা হোতি। ৰিধুরোতি ৰিসিট্ঠধুরো উত্তমধুরো ঞাণসম্পযুত্তেন ৰীরিযেন সমন্নাগতো। নিস্সযসম্পন্নোতি অৰস্সযসম্পন্নো পতিট্ঠানসম্পন্নো। পণিযন্তি ৰিক্কাযিকভণ্ডং। এত্তকং মূলং ভৰিস্সতি এত্তকো উদযোতি তস্মিং ‘‘এৰং কীতং এৰং ৰিক্কাযমান’’ন্তি ৰুত্তপণিযে যেন কযেন তং কীতং, তং কযসঙ্খাতং মূলং এত্তকং ভৰিস্সতি। যো চ তস্মিং ৰিক্কযমানে ৰিক্কযো, তস্মিং ৰিক্কযে এত্তকো উদযো ভৰিস্সতি, এত্তিকা ৰড্ঢীতি অত্থো।
20. Dasame cakkhumāti paññācakkhunā cakkhumā hoti. Vidhuroti visiṭṭhadhuro uttamadhuro ñāṇasampayuttena vīriyena samannāgato. Nissayasampannoti avassayasampanno patiṭṭhānasampanno. Paṇiyanti vikkāyikabhaṇḍaṃ. Ettakaṃ mūlaṃ bhavissati ettako udayoti tasmiṃ ‘‘evaṃ kītaṃ evaṃ vikkāyamāna’’nti vuttapaṇiye yena kayena taṃ kītaṃ, taṃ kayasaṅkhātaṃ mūlaṃ ettakaṃ bhavissati. Yo ca tasmiṃ vikkayamāne vikkayo, tasmiṃ vikkaye ettako udayo bhavissati, ettikā vaḍḍhīti attho.
কুসলো হোতি পণিযং কেতুঞ্চ ৰিক্কেতুঞ্চাতি সুলভট্ঠানং গন্ত্ৰা কিণন্তো দুল্লভট্ঠানং গন্ত্ৰা ৰিক্কিণন্তো চ এত্থ কুসলো নাম হোতি, দসগুণম্পি ৰীসতিগুণম্পি লাভং লভতি।
Kusalo hoti paṇiyaṃ ketuñca vikketuñcāti sulabhaṭṭhānaṃ gantvā kiṇanto dullabhaṭṭhānaṃ gantvā vikkiṇanto ca ettha kusalo nāma hoti, dasaguṇampi vīsatiguṇampi lābhaṃ labhati.
অড্ঢাতি ইস্সরা বহুনা নিক্খিত্তধনেন সমন্নাগতা। মহদ্ধনাতি ৰল়ঞ্জনকৰসেন মহদ্ধনা । মহাভোগাতি উপভোগপরিভোগভণ্ডেন মহাভোগা। পটিবলোতি কাযবলেন চেৰ ঞাণবলেন চ সমন্নাগতত্তা সমত্থো। অম্হাকঞ্চ কালেন কালং অনুপ্পদাতুন্তি অম্হাকঞ্চ গহিতধনমূলিকং ৰড্ঢিং কালেন কালং অনুপ্পদাতুং। নিপতন্তীতি নিমন্তেন্তি। নিপাতেন্তীতিপি পাঠো, অযমেৰ অত্থো।
Aḍḍhāti issarā bahunā nikkhittadhanena samannāgatā. Mahaddhanāti vaḷañjanakavasena mahaddhanā . Mahābhogāti upabhogaparibhogabhaṇḍena mahābhogā. Paṭibaloti kāyabalena ceva ñāṇabalena ca samannāgatattā samattho. Amhākañca kālena kālaṃ anuppadātunti amhākañca gahitadhanamūlikaṃ vaḍḍhiṃ kālena kālaṃ anuppadātuṃ. Nipatantīti nimantenti. Nipātentītipi pāṭho, ayameva attho.
কুসলানং ধম্মানং উপসম্পদাযাতি কুসলধম্মানং সম্পাদনত্থায পটিলাভত্থায। থামৰাতি ঞাণথামেন সমন্নাগতো। দল়্হপরক্কমোতি থিরেন ঞাণপরক্কমেন সমন্নাগতো। অনিক্খিত্তধুরোতি ‘‘অগ্গমগ্গং অপাপুণিত্ৰা ইমং ৰীরিযধুরং ন ঠপেস্সামী’’তি এৰং অট্ঠপিতধুরো।
Kusalānaṃ dhammānaṃ upasampadāyāti kusaladhammānaṃ sampādanatthāya paṭilābhatthāya. Thāmavāti ñāṇathāmena samannāgato. Daḷhaparakkamoti thirena ñāṇaparakkamena samannāgato. Anikkhittadhuroti ‘‘aggamaggaṃ apāpuṇitvā imaṃ vīriyadhuraṃ na ṭhapessāmī’’ti evaṃ aṭṭhapitadhuro.
বহুস্সুতাতি একনিকাযাদিৰসেন বহু বুদ্ধৰচনং সুতং এতেসন্তি বহুস্সুতা। আগতাগমাতি একো নিকাযো একো আগমো নাম, দ্ৰে নিকাযা দ্ৰে আগমা নাম, পঞ্চ নিকাযা পঞ্চ আগমা নাম, এতেসু আগমেসু যেসং একোপি আগমো আগতো পগুণো পৰত্তিতো, তে আগতাগমা নাম। ধম্মধরাতি সুত্তন্তপিটকধরা। ৰিনযধরাতি ৰিনযপিটকধরা। মাতিকাধরাতি দ্ৰেমাতিকাধরা। পরিপুচ্ছতীতি অত্থানত্থং কারণাকারণং পুচ্ছতি। পরিপঞ্হতীতি ‘‘ইমং নাম পুচ্ছিস্সামী’’তি অঞ্ঞাতি তুলেতি পরিগ্গণ্হাতি। সেসমেত্থ উত্তানত্থমেৰ।
Bahussutāti ekanikāyādivasena bahu buddhavacanaṃ sutaṃ etesanti bahussutā. Āgatāgamāti eko nikāyo eko āgamo nāma, dve nikāyā dve āgamā nāma, pañca nikāyā pañca āgamā nāma, etesu āgamesu yesaṃ ekopi āgamo āgato paguṇo pavattito, te āgatāgamā nāma. Dhammadharāti suttantapiṭakadharā. Vinayadharāti vinayapiṭakadharā. Mātikādharāti dvemātikādharā. Paripucchatīti atthānatthaṃ kāraṇākāraṇaṃ pucchati. Paripañhatīti ‘‘imaṃ nāma pucchissāmī’’ti aññāti tuleti pariggaṇhāti. Sesamettha uttānatthameva.
ইমস্মিং পন সুত্তে পঠমং পঞ্ঞা আগতা, পচ্ছা ৰীরিযঞ্চ কল্যাণমিত্তসেৰনা চ। তত্থ পঠমং অরহত্তং পত্ৰা পচ্ছা ৰীরিযং কত্ৰা কল্যাণমিত্তা সেৰিতব্বাতি ন এৰং অত্থো দট্ঠব্বো, দেসনায নাম হেট্ঠিমেন ৰা পরিচ্ছেদো হোতি উপরিমেন ৰা দ্ৰীহিপি ৰা কোটীহি। ইধ পন উপরিমেন পরিচ্ছেদো ৰেদিতব্বো। তস্মা কথেন্তেন পঠমং কল্যাণমিত্তউপনিস্সযং দস্সেত্ৰা মজ্ঝে ৰীরিযং দস্সেত্ৰা পচ্ছা অরহত্তং কথেতব্বন্তি।
Imasmiṃ pana sutte paṭhamaṃ paññā āgatā, pacchā vīriyañca kalyāṇamittasevanā ca. Tattha paṭhamaṃ arahattaṃ patvā pacchā vīriyaṃ katvā kalyāṇamittā sevitabbāti na evaṃ attho daṭṭhabbo, desanāya nāma heṭṭhimena vā paricchedo hoti uparimena vā dvīhipi vā koṭīhi. Idha pana uparimena paricchedo veditabbo. Tasmā kathentena paṭhamaṃ kalyāṇamittaupanissayaṃ dassetvā majjhe vīriyaṃ dassetvā pacchā arahattaṃ kathetabbanti.
রথকারৰগ্গো দুতিযো।
Rathakāravaggo dutiyo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. দুতিযপাপণিকসুত্তং • 10. Dutiyapāpaṇikasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. দুতিযপাপণিকসুত্তৰণ্ণনা • 10. Dutiyapāpaṇikasuttavaṇṇanā
