| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၁၀. ဒုတိယပာပဏိကသုတ္တဝဏ္ဏနာ
10. Dutiyapāpaṇikasuttavaṇṇanā
၂၀. ဒသမေ ဝိသိဋ္ဌဓုရောတိ ဝိသိဋ္ဌဓုရသမ္ပဂ္ဂာဟော ဝီရိယသမ္ပန္နော။ ဉာဏဝီရိယာယတ္တာ ဟိ အတ္ထသိဒ္ဓိယော။ တေနာဟ ‘‘ဥတ္တမဓုရော’’တိအာဒိ။ ဝိက္ကာယိကဘဏ္ဍန္တိ ဝိက္ကယေတဗ္ဗဘဏ္ဍံ။ နိက္ခိတ္တဓနေနာတိ နိဒဟိတ္ဝာ ဌပိတဓနဝသေန။ ဝဠဉ္ဇနကဝသေနာတိ ဒိဝသေ ဒိဝသေ ဒာနူပဘောဂဝသေန ဝဠဉ္ဇိတဗ္ဗဓနဝသေန။ ဥပဘောဂပရိဘောဂဘဏ္ဍေနာတိ ဥပဘောဂပရိဘောဂူပကရဏေန။ နိပတန္တီတိ နိပာတေန္တိ, အတ္တနော ဓနဂ္ဂဟေန နိပာတဝုတ္တိကေ ကရောန္တိ။ တေနာဟ ‘‘နိမန္တေန္တီ’’တိ။
20. Dasame visiṭṭhadhuroti visiṭṭhadhurasampaggāho vīriyasampanno. Ñāṇavīriyāyattā hi atthasiddhiyo. Tenāha ‘‘uttamadhuro’’tiādi. Vikkāyikabhaṇḍanti vikkayetabbabhaṇḍaṃ. Nikkhittadhanenāti nidahitvā ṭhapitadhanavasena. Vaḷañjanakavasenāti divase divase dānūpabhogavasena vaḷañjitabbadhanavasena. Upabhogaparibhogabhaṇḍenāti upabhogaparibhogūpakaraṇena. Nipatantīti nipātenti, attano dhanaggahena nipātavuttike karonti. Tenāha ‘‘nimantentī’’ti.
ဉာဏထာမေနာတိ ဉာဏသ္သ ထိရဘာဝေန။ ဉာဏပရက္ကမေနာတိ ဉာဏသဟိတေန ဝီရိယေန။ ဒိဋ္ဌဓမ္မိကသမ္ပရာယိကပရမတ္ထဘေဒဉ္ဟိ ယေန သုတေန ဣဇ္ဈတိ, တံ သုတံ နာမ။ ဥက္ကဋ္ဌနိဒ္ဒေသေန ဒသ္သေန္တော ‘‘ဧကနိကာယ။ပေ.။ ဗဟုသ္သုတာ’’တိ အာဟ။ အာဂတောတိ သုပ္ပဝတ္တိဘာဝေန သ္ဝာဂတော။ တေနာဟ ‘‘ပဂုဏော ပဝတ္တိတော’’တိ။ အဘိဓမ္မေ အာဂတာ ကုသလာဒိက္ခန္ဓာဒိဘေဒဘိန္နာ ဓမ္မာ သုတ္တန္တပိဋကေပိ ဩတရန္တီတိ ‘‘ဓမ္မဓရာတိ သုတ္တန္တပိဋကဓရာ’’ဣစ္စေဝ ဝုတ္တံ။ န ဟိ အာဘိဓမ္မိကဘာဝေန ဝိနာ နိပ္ပရိယာယတော သုတ္တန္တပိဋကညုတာ သမ္ဘဝတိ။ ဒ္ဝေမာတိကာဓရာတိ ဘိက္ခုဘိက္ခုနိမာတိကာဝသေန ဒ္ဝေမာတိကာဓရာတိ ဝဒန္တိ, ‘‘ဝိနယာဘိဓမ္မမာတိကာဓရာ’’တိ ယုတ္တံ။ ပရိပုစ္ဆတီတိ သဗ္ဗဘာဂေန ပုစ္ဆိတဗ္ဗံ ပုစ္ဆတိ။ တေနာဟ ‘‘အတ္ထာနတ္ထံ ကာရဏာကာရဏံ ပုစ္ဆတီ’’တိ။ ပရိဂ္ဂဏ္ဟာတီတိ ဝိစာရေတိ။
Ñāṇathāmenāti ñāṇassa thirabhāvena. Ñāṇaparakkamenāti ñāṇasahitena vīriyena. Diṭṭhadhammikasamparāyikaparamatthabhedañhi yena sutena ijjhati, taṃ sutaṃ nāma. Ukkaṭṭhaniddesena dassento ‘‘ekanikāya…pe… bahussutā’’ti āha. Āgatoti suppavattibhāvena svāgato. Tenāha ‘‘paguṇo pavattito’’ti. Abhidhamme āgatā kusalādikkhandhādibhedabhinnā dhammā suttantapiṭakepi otarantīti ‘‘dhammadharāti suttantapiṭakadharā’’icceva vuttaṃ. Na hi ābhidhammikabhāvena vinā nippariyāyato suttantapiṭakaññutā sambhavati. Dvemātikādharāti bhikkhubhikkhunimātikāvasena dvemātikādharāti vadanti, ‘‘vinayābhidhammamātikādharā’’ti yuttaṃ. Paripucchatīti sabbabhāgena pucchitabbaṃ pucchati. Tenāha ‘‘atthānatthaṃ kāraṇākāraṇaṃ pucchatī’’ti. Pariggaṇhātīti vicāreti.
န ဧဝံ အတ္ထော ဒဋ္ဌဗ္ဗောတိ ဧဝံ ဒေသနာနုက္ကမေန အတ္ထော န ဂဟေတဗ္ဗော။ အညော ဟိ ဒေသနာက္ကမော ဝေနေယ္ယဇ္ဈာသယဝသေန ပဝတ္တနတော, အညော ပဋိပတ္တိက္ကမော။ ဟေဋ္ဌိမေန ဝာ ပရိစ္ဆေဒောတိ သီလသမာဓိပညာသင္ခာတေသု တီသု ဘာဂေသု ကတ္ထစိ ဟေဋ္ဌိမနယေန ဒေသနာယ ပရိစ္ဆေဒံ ဝေဒိတဗ္ဗံ သီလေန, ကတ္ထစိ ဥပရိမေန ဘာဂေန ပညာယ, ကတ္ထစိ ဒ္ဝီဟိပိ ဘာဂေဟိ သီလပညာဝသေန။ ဣဓ ပန သုတ္တေ ဥပရိမေန ဘာဂေန ပရိစ္ဆေဒော ဝေဒိတဗ္ဗောတိ ဝတ္ဝာ တံ ဒသ္သေန္တော ‘‘တသ္မာ’’တိအာဒိမာဟ။ ယသ္မာ ဝာ ဘဂဝာ ဝေနေယ္ယဇ္ဈာသယဝသေန ပဌမံ ကလ္ယာဏမိတ္တံ ဒသ္သေန္တော အရဟတ္တံ ပဝေဒေတ္ဝာ ‘‘တယိဒံ အရဟတ္တံ ဣမာယ အာရဒ္ဓဝီရိယတာယ ဟောတီ’’တိ ဒသ္သေန္တော ဝီရိယာရမ္ဘံ ပဝေဒေတ္ဝာ ‘‘သ္ဝာယံ ဝီရိယာရမ္ဘော ဣမိနာ ကလ္ယာဏမိတ္တသန္နိသ္သယေန ဘဝတီ’’တိ ဒသ္သေန္တော နိသ္သယသမ္ပတ္တိံ ပဝေဒေတိ ဟေဋ္ဌာ ဒသ္သိတနိဒသ္သနာနုရူပန္တိ ဒဋ္ဌဗ္ဗံ။
Na evaṃ attho daṭṭhabboti evaṃ desanānukkamena attho na gahetabbo. Añño hi desanākkamo veneyyajjhāsayavasena pavattanato, añño paṭipattikkamo. Heṭṭhimena vā paricchedoti sīlasamādhipaññāsaṅkhātesu tīsu bhāgesu katthaci heṭṭhimanayena desanāya paricchedaṃ veditabbaṃ sīlena, katthaci uparimena bhāgena paññāya, katthaci dvīhipi bhāgehi sīlapaññāvasena. Idha pana sutte uparimena bhāgena paricchedo veditabboti vatvā taṃ dassento ‘‘tasmā’’tiādimāha. Yasmā vā bhagavā veneyyajjhāsayavasena paṭhamaṃ kalyāṇamittaṃ dassento arahattaṃ pavedetvā ‘‘tayidaṃ arahattaṃ imāya āraddhavīriyatāya hotī’’ti dassento vīriyārambhaṃ pavedetvā ‘‘svāyaṃ vīriyārambho iminā kalyāṇamittasannissayena bhavatī’’ti dassento nissayasampattiṃ pavedeti heṭṭhā dassitanidassanānurūpanti daṭṭhabbaṃ.
ဒုတိယပာပဏိကသုတ္တဝဏ္ဏနာ နိဋ္ဌိတာ။
Dutiyapāpaṇikasuttavaṇṇanā niṭṭhitā.
ရထကာရဝဂ္ဂဝဏ္ဏနာ နိဋ္ဌိတာ။
Rathakāravaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. ဒုတိယပာပဏိကသုတ္တံ • 10. Dutiyapāpaṇikasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. ဒုတိယပာပဏိကသုတ္တဝဏ္ဏနာ • 10. Dutiyapāpaṇikasuttavaṇṇanā
