| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೧೦. ದುತಿಯಪಾಪಣಿಕಸುತ್ತವಣ್ಣನಾ
10. Dutiyapāpaṇikasuttavaṇṇanā
೨೦. ದಸಮೇ ಚಕ್ಖುಮಾತಿ ಪಞ್ಞಾಚಕ್ಖುನಾ ಚಕ್ಖುಮಾ ಹೋತಿ। ವಿಧುರೋತಿ ವಿಸಿಟ್ಠಧುರೋ ಉತ್ತಮಧುರೋ ಞಾಣಸಮ್ಪಯುತ್ತೇನ ವೀರಿಯೇನ ಸಮನ್ನಾಗತೋ। ನಿಸ್ಸಯಸಮ್ಪನ್ನೋತಿ ಅವಸ್ಸಯಸಮ್ಪನ್ನೋ ಪತಿಟ್ಠಾನಸಮ್ಪನ್ನೋ। ಪಣಿಯನ್ತಿ ವಿಕ್ಕಾಯಿಕಭಣ್ಡಂ। ಏತ್ತಕಂ ಮೂಲಂ ಭವಿಸ್ಸತಿ ಏತ್ತಕೋ ಉದಯೋತಿ ತಸ್ಮಿಂ ‘‘ಏವಂ ಕೀತಂ ಏವಂ ವಿಕ್ಕಾಯಮಾನ’’ನ್ತಿ ವುತ್ತಪಣಿಯೇ ಯೇನ ಕಯೇನ ತಂ ಕೀತಂ, ತಂ ಕಯಸಙ್ಖಾತಂ ಮೂಲಂ ಏತ್ತಕಂ ಭವಿಸ್ಸತಿ। ಯೋ ಚ ತಸ್ಮಿಂ ವಿಕ್ಕಯಮಾನೇ ವಿಕ್ಕಯೋ, ತಸ್ಮಿಂ ವಿಕ್ಕಯೇ ಏತ್ತಕೋ ಉದಯೋ ಭವಿಸ್ಸತಿ, ಏತ್ತಿಕಾ ವಡ್ಢೀತಿ ಅತ್ಥೋ।
20. Dasame cakkhumāti paññācakkhunā cakkhumā hoti. Vidhuroti visiṭṭhadhuro uttamadhuro ñāṇasampayuttena vīriyena samannāgato. Nissayasampannoti avassayasampanno patiṭṭhānasampanno. Paṇiyanti vikkāyikabhaṇḍaṃ. Ettakaṃ mūlaṃ bhavissati ettako udayoti tasmiṃ ‘‘evaṃ kītaṃ evaṃ vikkāyamāna’’nti vuttapaṇiye yena kayena taṃ kītaṃ, taṃ kayasaṅkhātaṃ mūlaṃ ettakaṃ bhavissati. Yo ca tasmiṃ vikkayamāne vikkayo, tasmiṃ vikkaye ettako udayo bhavissati, ettikā vaḍḍhīti attho.
ಕುಸಲೋ ಹೋತಿ ಪಣಿಯಂ ಕೇತುಞ್ಚ ವಿಕ್ಕೇತುಞ್ಚಾತಿ ಸುಲಭಟ್ಠಾನಂ ಗನ್ತ್ವಾ ಕಿಣನ್ತೋ ದುಲ್ಲಭಟ್ಠಾನಂ ಗನ್ತ್ವಾ ವಿಕ್ಕಿಣನ್ತೋ ಚ ಏತ್ಥ ಕುಸಲೋ ನಾಮ ಹೋತಿ, ದಸಗುಣಮ್ಪಿ ವೀಸತಿಗುಣಮ್ಪಿ ಲಾಭಂ ಲಭತಿ।
Kusalo hoti paṇiyaṃ ketuñca vikketuñcāti sulabhaṭṭhānaṃ gantvā kiṇanto dullabhaṭṭhānaṃ gantvā vikkiṇanto ca ettha kusalo nāma hoti, dasaguṇampi vīsatiguṇampi lābhaṃ labhati.
ಅಡ್ಢಾತಿ ಇಸ್ಸರಾ ಬಹುನಾ ನಿಕ್ಖಿತ್ತಧನೇನ ಸಮನ್ನಾಗತಾ। ಮಹದ್ಧನಾತಿ ವಳಞ್ಜನಕವಸೇನ ಮಹದ್ಧನಾ । ಮಹಾಭೋಗಾತಿ ಉಪಭೋಗಪರಿಭೋಗಭಣ್ಡೇನ ಮಹಾಭೋಗಾ। ಪಟಿಬಲೋತಿ ಕಾಯಬಲೇನ ಚೇವ ಞಾಣಬಲೇನ ಚ ಸಮನ್ನಾಗತತ್ತಾ ಸಮತ್ಥೋ। ಅಮ್ಹಾಕಞ್ಚ ಕಾಲೇನ ಕಾಲಂ ಅನುಪ್ಪದಾತುನ್ತಿ ಅಮ್ಹಾಕಞ್ಚ ಗಹಿತಧನಮೂಲಿಕಂ ವಡ್ಢಿಂ ಕಾಲೇನ ಕಾಲಂ ಅನುಪ್ಪದಾತುಂ। ನಿಪತನ್ತೀತಿ ನಿಮನ್ತೇನ್ತಿ। ನಿಪಾತೇನ್ತೀತಿಪಿ ಪಾಠೋ, ಅಯಮೇವ ಅತ್ಥೋ।
Aḍḍhāti issarā bahunā nikkhittadhanena samannāgatā. Mahaddhanāti vaḷañjanakavasena mahaddhanā . Mahābhogāti upabhogaparibhogabhaṇḍena mahābhogā. Paṭibaloti kāyabalena ceva ñāṇabalena ca samannāgatattā samattho. Amhākañca kālena kālaṃ anuppadātunti amhākañca gahitadhanamūlikaṃ vaḍḍhiṃ kālena kālaṃ anuppadātuṃ. Nipatantīti nimantenti. Nipātentītipi pāṭho, ayameva attho.
ಕುಸಲಾನಂ ಧಮ್ಮಾನಂ ಉಪಸಮ್ಪದಾಯಾತಿ ಕುಸಲಧಮ್ಮಾನಂ ಸಮ್ಪಾದನತ್ಥಾಯ ಪಟಿಲಾಭತ್ಥಾಯ। ಥಾಮವಾತಿ ಞಾಣಥಾಮೇನ ಸಮನ್ನಾಗತೋ। ದಳ್ಹಪರಕ್ಕಮೋತಿ ಥಿರೇನ ಞಾಣಪರಕ್ಕಮೇನ ಸಮನ್ನಾಗತೋ। ಅನಿಕ್ಖಿತ್ತಧುರೋತಿ ‘‘ಅಗ್ಗಮಗ್ಗಂ ಅಪಾಪುಣಿತ್ವಾ ಇಮಂ ವೀರಿಯಧುರಂ ನ ಠಪೇಸ್ಸಾಮೀ’’ತಿ ಏವಂ ಅಟ್ಠಪಿತಧುರೋ।
Kusalānaṃ dhammānaṃ upasampadāyāti kusaladhammānaṃ sampādanatthāya paṭilābhatthāya. Thāmavāti ñāṇathāmena samannāgato. Daḷhaparakkamoti thirena ñāṇaparakkamena samannāgato. Anikkhittadhuroti ‘‘aggamaggaṃ apāpuṇitvā imaṃ vīriyadhuraṃ na ṭhapessāmī’’ti evaṃ aṭṭhapitadhuro.
ಬಹುಸ್ಸುತಾತಿ ಏಕನಿಕಾಯಾದಿವಸೇನ ಬಹು ಬುದ್ಧವಚನಂ ಸುತಂ ಏತೇಸನ್ತಿ ಬಹುಸ್ಸುತಾ। ಆಗತಾಗಮಾತಿ ಏಕೋ ನಿಕಾಯೋ ಏಕೋ ಆಗಮೋ ನಾಮ, ದ್ವೇ ನಿಕಾಯಾ ದ್ವೇ ಆಗಮಾ ನಾಮ, ಪಞ್ಚ ನಿಕಾಯಾ ಪಞ್ಚ ಆಗಮಾ ನಾಮ, ಏತೇಸು ಆಗಮೇಸು ಯೇಸಂ ಏಕೋಪಿ ಆಗಮೋ ಆಗತೋ ಪಗುಣೋ ಪವತ್ತಿತೋ, ತೇ ಆಗತಾಗಮಾ ನಾಮ। ಧಮ್ಮಧರಾತಿ ಸುತ್ತನ್ತಪಿಟಕಧರಾ। ವಿನಯಧರಾತಿ ವಿನಯಪಿಟಕಧರಾ। ಮಾತಿಕಾಧರಾತಿ ದ್ವೇಮಾತಿಕಾಧರಾ। ಪರಿಪುಚ್ಛತೀತಿ ಅತ್ಥಾನತ್ಥಂ ಕಾರಣಾಕಾರಣಂ ಪುಚ್ಛತಿ। ಪರಿಪಞ್ಹತೀತಿ ‘‘ಇಮಂ ನಾಮ ಪುಚ್ಛಿಸ್ಸಾಮೀ’’ತಿ ಅಞ್ಞಾತಿ ತುಲೇತಿ ಪರಿಗ್ಗಣ್ಹಾತಿ। ಸೇಸಮೇತ್ಥ ಉತ್ತಾನತ್ಥಮೇವ।
Bahussutāti ekanikāyādivasena bahu buddhavacanaṃ sutaṃ etesanti bahussutā. Āgatāgamāti eko nikāyo eko āgamo nāma, dve nikāyā dve āgamā nāma, pañca nikāyā pañca āgamā nāma, etesu āgamesu yesaṃ ekopi āgamo āgato paguṇo pavattito, te āgatāgamā nāma. Dhammadharāti suttantapiṭakadharā. Vinayadharāti vinayapiṭakadharā. Mātikādharāti dvemātikādharā. Paripucchatīti atthānatthaṃ kāraṇākāraṇaṃ pucchati. Paripañhatīti ‘‘imaṃ nāma pucchissāmī’’ti aññāti tuleti pariggaṇhāti. Sesamettha uttānatthameva.
ಇಮಸ್ಮಿಂ ಪನ ಸುತ್ತೇ ಪಠಮಂ ಪಞ್ಞಾ ಆಗತಾ, ಪಚ್ಛಾ ವೀರಿಯಞ್ಚ ಕಲ್ಯಾಣಮಿತ್ತಸೇವನಾ ಚ। ತತ್ಥ ಪಠಮಂ ಅರಹತ್ತಂ ಪತ್ವಾ ಪಚ್ಛಾ ವೀರಿಯಂ ಕತ್ವಾ ಕಲ್ಯಾಣಮಿತ್ತಾ ಸೇವಿತಬ್ಬಾತಿ ನ ಏವಂ ಅತ್ಥೋ ದಟ್ಠಬ್ಬೋ, ದೇಸನಾಯ ನಾಮ ಹೇಟ್ಠಿಮೇನ ವಾ ಪರಿಚ್ಛೇದೋ ಹೋತಿ ಉಪರಿಮೇನ ವಾ ದ್ವೀಹಿಪಿ ವಾ ಕೋಟೀಹಿ। ಇಧ ಪನ ಉಪರಿಮೇನ ಪರಿಚ್ಛೇದೋ ವೇದಿತಬ್ಬೋ। ತಸ್ಮಾ ಕಥೇನ್ತೇನ ಪಠಮಂ ಕಲ್ಯಾಣಮಿತ್ತಉಪನಿಸ್ಸಯಂ ದಸ್ಸೇತ್ವಾ ಮಜ್ಝೇ ವೀರಿಯಂ ದಸ್ಸೇತ್ವಾ ಪಚ್ಛಾ ಅರಹತ್ತಂ ಕಥೇತಬ್ಬನ್ತಿ।
Imasmiṃ pana sutte paṭhamaṃ paññā āgatā, pacchā vīriyañca kalyāṇamittasevanā ca. Tattha paṭhamaṃ arahattaṃ patvā pacchā vīriyaṃ katvā kalyāṇamittā sevitabbāti na evaṃ attho daṭṭhabbo, desanāya nāma heṭṭhimena vā paricchedo hoti uparimena vā dvīhipi vā koṭīhi. Idha pana uparimena paricchedo veditabbo. Tasmā kathentena paṭhamaṃ kalyāṇamittaupanissayaṃ dassetvā majjhe vīriyaṃ dassetvā pacchā arahattaṃ kathetabbanti.
ರಥಕಾರವಗ್ಗೋ ದುತಿಯೋ।
Rathakāravaggo dutiyo.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧೦. ದುತಿಯಪಾಪಣಿಕಸುತ್ತಂ • 10. Dutiyapāpaṇikasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೦. ದುತಿಯಪಾಪಣಿಕಸುತ್ತವಣ್ಣನಾ • 10. Dutiyapāpaṇikasuttavaṇṇanā
