| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༡༠. དུཏིཡཔཱཔཎིཀསུཏྟཝཎྞནཱ
10. Dutiyapāpaṇikasuttavaṇṇanā
༢༠. དསམེ ཝིསིཊྛདྷུརོཏི ཝིསིཊྛདྷུརསམྤགྒཱཧོ ཝཱིརིཡསམྤནྣོ། ཉཱཎཝཱིརིཡཱཡཏྟཱ ཧི ཨཏྠསིདྡྷིཡོ། ཏེནཱཧ ‘‘ཨུཏྟམདྷུརོ’’ཏིཨཱདི། ཝིཀྐཱཡིཀབྷཎྜནྟི ཝིཀྐཡེཏབྦབྷཎྜཾ། ནིཀྑིཏྟདྷནེནཱཏི ནིདཧིཏྭཱ ཋཔིཏདྷནཝསེན། ཝལ༹ཉྫནཀཝསེནཱཏི དིཝསེ དིཝསེ དཱནཱུཔབྷོགཝསེན ཝལ༹ཉྫིཏབྦདྷནཝསེན། ཨུཔབྷོགཔརིབྷོགབྷཎྜེནཱཏི ཨུཔབྷོགཔརིབྷོགཱུཔཀརཎེན། ནིཔཏནྟཱིཏི ནིཔཱཏེནྟི, ཨཏྟནོ དྷནགྒཧེན ནིཔཱཏཝུཏྟིཀེ ཀརོནྟི། ཏེནཱཧ ‘‘ནིམནྟེནྟཱི’’ཏི།
20. Dasame visiṭṭhadhuroti visiṭṭhadhurasampaggāho vīriyasampanno. Ñāṇavīriyāyattā hi atthasiddhiyo. Tenāha ‘‘uttamadhuro’’tiādi. Vikkāyikabhaṇḍanti vikkayetabbabhaṇḍaṃ. Nikkhittadhanenāti nidahitvā ṭhapitadhanavasena. Vaḷañjanakavasenāti divase divase dānūpabhogavasena vaḷañjitabbadhanavasena. Upabhogaparibhogabhaṇḍenāti upabhogaparibhogūpakaraṇena. Nipatantīti nipātenti, attano dhanaggahena nipātavuttike karonti. Tenāha ‘‘nimantentī’’ti.
ཉཱཎཐཱམེནཱཏི ཉཱཎསྶ ཐིརབྷཱཝེན། ཉཱཎཔརཀྐམེནཱཏི ཉཱཎསཧིཏེན ཝཱིརིཡེན། དིཊྛདྷམྨིཀསམྤརཱཡིཀཔརམཏྠབྷེདཉྷི ཡེན སུཏེན ཨིཛ྄ཛྷཏི, ཏཾ སུཏཾ ནཱམ། ཨུཀྐཊྛནིདྡེསེན དསྶེནྟོ ‘‘ཨེཀནིཀཱཡ…པེ॰… བཧུསྶུཏཱ’’ཏི ཨཱཧ། ཨཱགཏོཏི སུཔྤཝཏྟིབྷཱཝེན སྭཱགཏོ། ཏེནཱཧ ‘‘པགུཎོ པཝཏྟིཏོ’’ཏི། ཨབྷིདྷམྨེ ཨཱགཏཱ ཀུསལཱདིཀྑནྡྷཱདིབྷེདབྷིནྣཱ དྷམྨཱ སུཏྟནྟཔིཊཀེཔི ཨོཏརནྟཱིཏི ‘‘དྷམྨདྷརཱཏི སུཏྟནྟཔིཊཀདྷརཱ’’ཨིཙྩེཝ ཝུཏྟཾ། ན ཧི ཨཱབྷིདྷམྨིཀབྷཱཝེན ཝིནཱ ནིཔྤརིཡཱཡཏོ སུཏྟནྟཔིཊཀཉྙུཏཱ སམྦྷཝཏི། དྭེམཱཏིཀཱདྷརཱཏི བྷིཀྑུབྷིཀྑུནིམཱཏིཀཱཝསེན དྭེམཱཏིཀཱདྷརཱཏི ཝདནྟི, ‘‘ཝིནཡཱབྷིདྷམྨམཱཏིཀཱདྷརཱ’’ཏི ཡུཏྟཾ། པརིཔུཙྪཏཱིཏི སབྦབྷཱགེན པུཙྪིཏབྦཾ པུཙྪཏི། ཏེནཱཧ ‘‘ཨཏྠཱནཏྠཾ ཀཱརཎཱཀཱརཎཾ པུཙྪཏཱི’’ཏི། པརིགྒཎྷཱཏཱིཏི ཝིཙཱརེཏི།
Ñāṇathāmenāti ñāṇassa thirabhāvena. Ñāṇaparakkamenāti ñāṇasahitena vīriyena. Diṭṭhadhammikasamparāyikaparamatthabhedañhi yena sutena ijjhati, taṃ sutaṃ nāma. Ukkaṭṭhaniddesena dassento ‘‘ekanikāya…pe… bahussutā’’ti āha. Āgatoti suppavattibhāvena svāgato. Tenāha ‘‘paguṇo pavattito’’ti. Abhidhamme āgatā kusalādikkhandhādibhedabhinnā dhammā suttantapiṭakepi otarantīti ‘‘dhammadharāti suttantapiṭakadharā’’icceva vuttaṃ. Na hi ābhidhammikabhāvena vinā nippariyāyato suttantapiṭakaññutā sambhavati. Dvemātikādharāti bhikkhubhikkhunimātikāvasena dvemātikādharāti vadanti, ‘‘vinayābhidhammamātikādharā’’ti yuttaṃ. Paripucchatīti sabbabhāgena pucchitabbaṃ pucchati. Tenāha ‘‘atthānatthaṃ kāraṇākāraṇaṃ pucchatī’’ti. Pariggaṇhātīti vicāreti.
ན ཨེཝཾ ཨཏྠོ དཊྛབྦོཏི ཨེཝཾ དེསནཱནུཀྐམེན ཨཏྠོ ན གཧེཏབྦོ། ཨཉྙོ ཧི དེསནཱཀྐམོ ཝེནེཡྻཛ྄ཛྷཱསཡཝསེན པཝཏྟནཏོ, ཨཉྙོ པཊིཔཏྟིཀྐམོ། ཧེཊྛིམེན ཝཱ པརིཙྪེདོཏི སཱིལསམཱདྷིཔཉྙཱསངྑཱཏེསུ ཏཱིསུ བྷཱགེསུ ཀཏྠཙི ཧེཊྛིམནཡེན དེསནཱཡ པརིཙྪེདཾ ཝེདིཏབྦཾ སཱིལེན, ཀཏྠཙི ཨུཔརིམེན བྷཱགེན པཉྙཱཡ, ཀཏྠཙི དྭཱིཧིཔི བྷཱགེཧི སཱིལཔཉྙཱཝསེན། ཨིདྷ པན སུཏྟེ ཨུཔརིམེན བྷཱགེན པརིཙྪེདོ ཝེདིཏབྦོཏི ཝཏྭཱ ཏཾ དསྶེནྟོ ‘‘ཏསྨཱ’’ཏིཨཱདིམཱཧ། ཡསྨཱ ཝཱ བྷགཝཱ ཝེནེཡྻཛ྄ཛྷཱསཡཝསེན པཋམཾ ཀལྱཱཎམིཏྟཾ དསྶེནྟོ ཨརཧཏྟཾ པཝེདེཏྭཱ ‘‘ཏཡིདཾ ཨརཧཏྟཾ ཨིམཱཡ ཨཱརདྡྷཝཱིརིཡཏཱཡ ཧོཏཱི’’ཏི དསྶེནྟོ ཝཱིརིཡཱརམྦྷཾ པཝེདེཏྭཱ ‘‘སྭཱཡཾ ཝཱིརིཡཱརམྦྷོ ཨིམིནཱ ཀལྱཱཎམིཏྟསནྣིསྶཡེན བྷཝཏཱི’’ཏི དསྶེནྟོ ནིསྶཡསམྤཏྟིཾ པཝེདེཏི ཧེཊྛཱ དསྶིཏནིདསྶནཱནུརཱུཔནྟི དཊྛབྦཾ།
Na evaṃ attho daṭṭhabboti evaṃ desanānukkamena attho na gahetabbo. Añño hi desanākkamo veneyyajjhāsayavasena pavattanato, añño paṭipattikkamo. Heṭṭhimena vā paricchedoti sīlasamādhipaññāsaṅkhātesu tīsu bhāgesu katthaci heṭṭhimanayena desanāya paricchedaṃ veditabbaṃ sīlena, katthaci uparimena bhāgena paññāya, katthaci dvīhipi bhāgehi sīlapaññāvasena. Idha pana sutte uparimena bhāgena paricchedo veditabboti vatvā taṃ dassento ‘‘tasmā’’tiādimāha. Yasmā vā bhagavā veneyyajjhāsayavasena paṭhamaṃ kalyāṇamittaṃ dassento arahattaṃ pavedetvā ‘‘tayidaṃ arahattaṃ imāya āraddhavīriyatāya hotī’’ti dassento vīriyārambhaṃ pavedetvā ‘‘svāyaṃ vīriyārambho iminā kalyāṇamittasannissayena bhavatī’’ti dassento nissayasampattiṃ pavedeti heṭṭhā dassitanidassanānurūpanti daṭṭhabbaṃ.
དུཏིཡཔཱཔཎིཀསུཏྟཝཎྞནཱ ནིཊྛིཏཱ།
Dutiyapāpaṇikasuttavaṇṇanā niṭṭhitā.
རཐཀཱརཝགྒཝཎྞནཱ ནིཊྛིཏཱ།
Rathakāravaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡༠. དུཏིཡཔཱཔཎིཀསུཏྟཾ • 10. Dutiyapāpaṇikasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༠. དུཏིཡཔཱཔཎིཀསུཏྟཝཎྞནཱ • 10. Dutiyapāpaṇikasuttavaṇṇanā
