| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੧੦. ਦੁਤਿਯਪਾਪਣਿਕਸੁਤ੍ਤવਣ੍ਣਨਾ
10. Dutiyapāpaṇikasuttavaṇṇanā
੨੦. ਦਸਮੇ ਚਕ੍ਖੁਮਾਤਿ ਪਞ੍ਞਾਚਕ੍ਖੁਨਾ ਚਕ੍ਖੁਮਾ ਹੋਤਿ। વਿਧੁਰੋਤਿ વਿਸਿਟ੍ਠਧੁਰੋ ਉਤ੍ਤਮਧੁਰੋ ਞਾਣਸਮ੍ਪਯੁਤ੍ਤੇਨ વੀਰਿਯੇਨ ਸਮਨ੍ਨਾਗਤੋ। ਨਿਸ੍ਸਯਸਮ੍ਪਨ੍ਨੋਤਿ ਅવਸ੍ਸਯਸਮ੍ਪਨ੍ਨੋ ਪਤਿਟ੍ਠਾਨਸਮ੍ਪਨ੍ਨੋ। ਪਣਿਯਨ੍ਤਿ વਿਕ੍ਕਾਯਿਕਭਣ੍ਡਂ। ਏਤ੍ਤਕਂ ਮੂਲਂ ਭવਿਸ੍ਸਤਿ ਏਤ੍ਤਕੋ ਉਦਯੋਤਿ ਤਸ੍ਮਿਂ ‘‘ਏવਂ ਕੀਤਂ ਏવਂ વਿਕ੍ਕਾਯਮਾਨ’’ਨ੍ਤਿ વੁਤ੍ਤਪਣਿਯੇ ਯੇਨ ਕਯੇਨ ਤਂ ਕੀਤਂ, ਤਂ ਕਯਸਙ੍ਖਾਤਂ ਮੂਲਂ ਏਤ੍ਤਕਂ ਭવਿਸ੍ਸਤਿ। ਯੋ ਚ ਤਸ੍ਮਿਂ વਿਕ੍ਕਯਮਾਨੇ વਿਕ੍ਕਯੋ, ਤਸ੍ਮਿਂ વਿਕ੍ਕਯੇ ਏਤ੍ਤਕੋ ਉਦਯੋ ਭવਿਸ੍ਸਤਿ, ਏਤ੍ਤਿਕਾ વਡ੍ਢੀਤਿ ਅਤ੍ਥੋ।
20. Dasame cakkhumāti paññācakkhunā cakkhumā hoti. Vidhuroti visiṭṭhadhuro uttamadhuro ñāṇasampayuttena vīriyena samannāgato. Nissayasampannoti avassayasampanno patiṭṭhānasampanno. Paṇiyanti vikkāyikabhaṇḍaṃ. Ettakaṃ mūlaṃ bhavissati ettako udayoti tasmiṃ ‘‘evaṃ kītaṃ evaṃ vikkāyamāna’’nti vuttapaṇiye yena kayena taṃ kītaṃ, taṃ kayasaṅkhātaṃ mūlaṃ ettakaṃ bhavissati. Yo ca tasmiṃ vikkayamāne vikkayo, tasmiṃ vikkaye ettako udayo bhavissati, ettikā vaḍḍhīti attho.
ਕੁਸਲੋ ਹੋਤਿ ਪਣਿਯਂ ਕੇਤੁਞ੍ਚ વਿਕ੍ਕੇਤੁਞ੍ਚਾਤਿ ਸੁਲਭਟ੍ਠਾਨਂ ਗਨ੍ਤ੍વਾ ਕਿਣਨ੍ਤੋ ਦੁਲ੍ਲਭਟ੍ਠਾਨਂ ਗਨ੍ਤ੍વਾ વਿਕ੍ਕਿਣਨ੍ਤੋ ਚ ਏਤ੍ਥ ਕੁਸਲੋ ਨਾਮ ਹੋਤਿ, ਦਸਗੁਣਮ੍ਪਿ વੀਸਤਿਗੁਣਮ੍ਪਿ ਲਾਭਂ ਲਭਤਿ।
Kusalo hoti paṇiyaṃ ketuñca vikketuñcāti sulabhaṭṭhānaṃ gantvā kiṇanto dullabhaṭṭhānaṃ gantvā vikkiṇanto ca ettha kusalo nāma hoti, dasaguṇampi vīsatiguṇampi lābhaṃ labhati.
ਅਡ੍ਢਾਤਿ ਇਸ੍ਸਰਾ ਬਹੁਨਾ ਨਿਕ੍ਖਿਤ੍ਤਧਨੇਨ ਸਮਨ੍ਨਾਗਤਾ। ਮਹਦ੍ਧਨਾਤਿ વਲ਼ਞ੍ਜਨਕવਸੇਨ ਮਹਦ੍ਧਨਾ । ਮਹਾਭੋਗਾਤਿ ਉਪਭੋਗਪਰਿਭੋਗਭਣ੍ਡੇਨ ਮਹਾਭੋਗਾ। ਪਟਿਬਲੋਤਿ ਕਾਯਬਲੇਨ ਚੇવ ਞਾਣਬਲੇਨ ਚ ਸਮਨ੍ਨਾਗਤਤ੍ਤਾ ਸਮਤ੍ਥੋ। ਅਮ੍ਹਾਕਞ੍ਚ ਕਾਲੇਨ ਕਾਲਂ ਅਨੁਪ੍ਪਦਾਤੁਨ੍ਤਿ ਅਮ੍ਹਾਕਞ੍ਚ ਗਹਿਤਧਨਮੂਲਿਕਂ વਡ੍ਢਿਂ ਕਾਲੇਨ ਕਾਲਂ ਅਨੁਪ੍ਪਦਾਤੁਂ। ਨਿਪਤਨ੍ਤੀਤਿ ਨਿਮਨ੍ਤੇਨ੍ਤਿ। ਨਿਪਾਤੇਨ੍ਤੀਤਿਪਿ ਪਾਠੋ, ਅਯਮੇવ ਅਤ੍ਥੋ।
Aḍḍhāti issarā bahunā nikkhittadhanena samannāgatā. Mahaddhanāti vaḷañjanakavasena mahaddhanā . Mahābhogāti upabhogaparibhogabhaṇḍena mahābhogā. Paṭibaloti kāyabalena ceva ñāṇabalena ca samannāgatattā samattho. Amhākañca kālena kālaṃ anuppadātunti amhākañca gahitadhanamūlikaṃ vaḍḍhiṃ kālena kālaṃ anuppadātuṃ. Nipatantīti nimantenti. Nipātentītipi pāṭho, ayameva attho.
ਕੁਸਲਾਨਂ ਧਮ੍ਮਾਨਂ ਉਪਸਮ੍ਪਦਾਯਾਤਿ ਕੁਸਲਧਮ੍ਮਾਨਂ ਸਮ੍ਪਾਦਨਤ੍ਥਾਯ ਪਟਿਲਾਭਤ੍ਥਾਯ। ਥਾਮવਾਤਿ ਞਾਣਥਾਮੇਨ ਸਮਨ੍ਨਾਗਤੋ। ਦਲ਼੍ਹਪਰਕ੍ਕਮੋਤਿ ਥਿਰੇਨ ਞਾਣਪਰਕ੍ਕਮੇਨ ਸਮਨ੍ਨਾਗਤੋ। ਅਨਿਕ੍ਖਿਤ੍ਤਧੁਰੋਤਿ ‘‘ਅਗ੍ਗਮਗ੍ਗਂ ਅਪਾਪੁਣਿਤ੍વਾ ਇਮਂ વੀਰਿਯਧੁਰਂ ਨ ਠਪੇਸ੍ਸਾਮੀ’’ਤਿ ਏવਂ ਅਟ੍ਠਪਿਤਧੁਰੋ।
Kusalānaṃ dhammānaṃ upasampadāyāti kusaladhammānaṃ sampādanatthāya paṭilābhatthāya. Thāmavāti ñāṇathāmena samannāgato. Daḷhaparakkamoti thirena ñāṇaparakkamena samannāgato. Anikkhittadhuroti ‘‘aggamaggaṃ apāpuṇitvā imaṃ vīriyadhuraṃ na ṭhapessāmī’’ti evaṃ aṭṭhapitadhuro.
ਬਹੁਸ੍ਸੁਤਾਤਿ ਏਕਨਿਕਾਯਾਦਿવਸੇਨ ਬਹੁ ਬੁਦ੍ਧવਚਨਂ ਸੁਤਂ ਏਤੇਸਨ੍ਤਿ ਬਹੁਸ੍ਸੁਤਾ। ਆਗਤਾਗਮਾਤਿ ਏਕੋ ਨਿਕਾਯੋ ਏਕੋ ਆਗਮੋ ਨਾਮ, ਦ੍વੇ ਨਿਕਾਯਾ ਦ੍વੇ ਆਗਮਾ ਨਾਮ, ਪਞ੍ਚ ਨਿਕਾਯਾ ਪਞ੍ਚ ਆਗਮਾ ਨਾਮ, ਏਤੇਸੁ ਆਗਮੇਸੁ ਯੇਸਂ ਏਕੋਪਿ ਆਗਮੋ ਆਗਤੋ ਪਗੁਣੋ ਪવਤ੍ਤਿਤੋ, ਤੇ ਆਗਤਾਗਮਾ ਨਾਮ। ਧਮ੍ਮਧਰਾਤਿ ਸੁਤ੍ਤਨ੍ਤਪਿਟਕਧਰਾ। વਿਨਯਧਰਾਤਿ વਿਨਯਪਿਟਕਧਰਾ। ਮਾਤਿਕਾਧਰਾਤਿ ਦ੍વੇਮਾਤਿਕਾਧਰਾ। ਪਰਿਪੁਚ੍ਛਤੀਤਿ ਅਤ੍ਥਾਨਤ੍ਥਂ ਕਾਰਣਾਕਾਰਣਂ ਪੁਚ੍ਛਤਿ। ਪਰਿਪਞ੍ਹਤੀਤਿ ‘‘ਇਮਂ ਨਾਮ ਪੁਚ੍ਛਿਸ੍ਸਾਮੀ’’ਤਿ ਅਞ੍ਞਾਤਿ ਤੁਲੇਤਿ ਪਰਿਗ੍ਗਣ੍ਹਾਤਿ। ਸੇਸਮੇਤ੍ਥ ਉਤ੍ਤਾਨਤ੍ਥਮੇવ।
Bahussutāti ekanikāyādivasena bahu buddhavacanaṃ sutaṃ etesanti bahussutā. Āgatāgamāti eko nikāyo eko āgamo nāma, dve nikāyā dve āgamā nāma, pañca nikāyā pañca āgamā nāma, etesu āgamesu yesaṃ ekopi āgamo āgato paguṇo pavattito, te āgatāgamā nāma. Dhammadharāti suttantapiṭakadharā. Vinayadharāti vinayapiṭakadharā. Mātikādharāti dvemātikādharā. Paripucchatīti atthānatthaṃ kāraṇākāraṇaṃ pucchati. Paripañhatīti ‘‘imaṃ nāma pucchissāmī’’ti aññāti tuleti pariggaṇhāti. Sesamettha uttānatthameva.
ਇਮਸ੍ਮਿਂ ਪਨ ਸੁਤ੍ਤੇ ਪਠਮਂ ਪਞ੍ਞਾ ਆਗਤਾ, ਪਚ੍ਛਾ વੀਰਿਯਞ੍ਚ ਕਲ੍ਯਾਣਮਿਤ੍ਤਸੇવਨਾ ਚ। ਤਤ੍ਥ ਪਠਮਂ ਅਰਹਤ੍ਤਂ ਪਤ੍વਾ ਪਚ੍ਛਾ વੀਰਿਯਂ ਕਤ੍વਾ ਕਲ੍ਯਾਣਮਿਤ੍ਤਾ ਸੇવਿਤਬ੍ਬਾਤਿ ਨ ਏવਂ ਅਤ੍ਥੋ ਦਟ੍ਠਬ੍ਬੋ, ਦੇਸਨਾਯ ਨਾਮ ਹੇਟ੍ਠਿਮੇਨ વਾ ਪਰਿਚ੍ਛੇਦੋ ਹੋਤਿ ਉਪਰਿਮੇਨ વਾ ਦ੍વੀਹਿਪਿ વਾ ਕੋਟੀਹਿ। ਇਧ ਪਨ ਉਪਰਿਮੇਨ ਪਰਿਚ੍ਛੇਦੋ વੇਦਿਤਬ੍ਬੋ। ਤਸ੍ਮਾ ਕਥੇਨ੍ਤੇਨ ਪਠਮਂ ਕਲ੍ਯਾਣਮਿਤ੍ਤਉਪਨਿਸ੍ਸਯਂ ਦਸ੍ਸੇਤ੍વਾ ਮਜ੍ਝੇ વੀਰਿਯਂ ਦਸ੍ਸੇਤ੍વਾ ਪਚ੍ਛਾ ਅਰਹਤ੍ਤਂ ਕਥੇਤਬ੍ਬਨ੍ਤਿ।
Imasmiṃ pana sutte paṭhamaṃ paññā āgatā, pacchā vīriyañca kalyāṇamittasevanā ca. Tattha paṭhamaṃ arahattaṃ patvā pacchā vīriyaṃ katvā kalyāṇamittā sevitabbāti na evaṃ attho daṭṭhabbo, desanāya nāma heṭṭhimena vā paricchedo hoti uparimena vā dvīhipi vā koṭīhi. Idha pana uparimena paricchedo veditabbo. Tasmā kathentena paṭhamaṃ kalyāṇamittaupanissayaṃ dassetvā majjhe vīriyaṃ dassetvā pacchā arahattaṃ kathetabbanti.
ਰਥਕਾਰવਗ੍ਗੋ ਦੁਤਿਯੋ।
Rathakāravaggo dutiyo.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧੦. ਦੁਤਿਯਪਾਪਣਿਕਸੁਤ੍ਤਂ • 10. Dutiyapāpaṇikasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧੦. ਦੁਤਿਯਪਾਪਣਿਕਸੁਤ੍ਤવਣ੍ਣਨਾ • 10. Dutiyapāpaṇikasuttavaṇṇanā
