| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
2. து³தியபாராஜிகங்
2. Dutiyapārājikaṃ
664. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸுந்த³ரீனந்தா³ பி⁴க்கு²னீ ஸாள்ஹேன மிகா³ரனத்துனா க³ப்³பி⁴னீ ஹோதி . யாவ க³ப்³போ⁴ தருணோ அஹோஸி தாவ சா²தே³ஸி. பரிபக்கே க³ப்³பே⁴ விப்³ப⁴மித்வா விஜாயி. பி⁴க்கு²னியோ து²ல்லனந்த³ங் பி⁴க்கு²னிங் ஏதத³வோசுங் – ‘‘ஸுந்த³ரீனந்தா³ கோ², அய்யே, அசிரவிப்³ப⁴ந்தா விஜாதா. கச்சி நோ ஸா பி⁴க்கு²னீயேவ ஸமானா க³ப்³பி⁴னீ’’தி? ‘‘ஏவங், அய்யே’’தி. ‘‘கிஸ்ஸ பன த்வங், அய்யே, ஜானங் பாராஜிகங் த⁴ம்மங் அஜ்ஜா²பன்னங் பி⁴க்கு²னிங் நேவத்தனா படிசோதே³ஸி ந க³ணஸ்ஸ ஆரோசேஸீ’’தி? ‘‘யோ ஏதிஸ்ஸா அவண்ணோ மய்ஹேஸோ அவண்ணோ, யா ஏதிஸ்ஸா அகித்தி மய்ஹேஸா அகித்தி, யோ ஏதிஸ்ஸா அயஸோ மய்ஹேஸோ அயஸோ, யோ ஏதிஸ்ஸா அலாபோ⁴ மய்ஹேஸோ அலாபோ⁴. க்யாஹங், அய்யே, அத்தனோ அவண்ணங் அத்தனோ அகித்திங் அத்தனோ அயஸங் அத்தனோ அலாப⁴ங் பரேஸங் ஆரோசெஸ்ஸாமீ’’தி? யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ ஜானங் பாராஜிகங் த⁴ம்மங் அஜ்ஜா²பன்னங் பி⁴க்கு²னிங் நேவத்தனா படிசோதெ³ஸ்ஸதி ந க³ணஸ்ஸ ஆரோசெஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங். பி⁴க்கூ² 1 ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ஜானங் பாராஜிகங் த⁴ம்மங் அஜ்ஜா²பன்னங் பி⁴க்கு²னிங் நேவத்தனா படிசோதே³தி 2 ந க³ணஸ்ஸ ஆரோசேதீ’’தி 3? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஜானங் பாராஜிகங் த⁴ம்மங் அஜ்ஜா²பன்னங் பி⁴க்கு²னிங் நேவத்தனா படிசோதெ³ஸ்ஸதி ந க³ணஸ்ஸ ஆரோசெஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
664. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sundarīnandā bhikkhunī sāḷhena migāranattunā gabbhinī hoti . Yāva gabbho taruṇo ahosi tāva chādesi. Paripakke gabbhe vibbhamitvā vijāyi. Bhikkhuniyo thullanandaṃ bhikkhuniṃ etadavocuṃ – ‘‘sundarīnandā kho, ayye, aciravibbhantā vijātā. Kacci no sā bhikkhunīyeva samānā gabbhinī’’ti? ‘‘Evaṃ, ayye’’ti. ‘‘Kissa pana tvaṃ, ayye, jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodesi na gaṇassa ārocesī’’ti? ‘‘Yo etissā avaṇṇo mayheso avaṇṇo, yā etissā akitti mayhesā akitti, yo etissā ayaso mayheso ayaso, yo etissā alābho mayheso alābho. Kyāhaṃ, ayye, attano avaṇṇaṃ attano akittiṃ attano ayasaṃ attano alābhaṃ paresaṃ ārocessāmī’’ti? Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodessati na gaṇassa ārocessatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū 4 bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, thullanandā bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodeti 5 na gaṇassa ārocetī’’ti 6? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodessati na gaṇassa ārocessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
665. ‘‘யா பன பி⁴க்கு²னீ ஜானங் பாராஜிகங் த⁴ம்மங் அஜ்ஜா²பன்னங் பி⁴க்கு²னிங் நேவத்தனா படிசோதெ³ய்ய ந க³ணஸ்ஸ ஆரோசெய்ய, யதா³ ச ஸா டி²தா வா அஸ்ஸ சுதா வா நாஸிதா வா அவஸ்ஸடா வா, ஸா பச்சா² ஏவங் வதெ³ய்ய – ‘புப்³பே³வாஹங், அய்யே, அஞ்ஞாஸிங் ஏதங் பி⁴க்கு²னிங் ஏவரூபா ச ஏவரூபா ச ஸா ப⁴கி³னீதி , நோ ச கோ² அத்தனா படிசோதெ³ஸ்ஸங் ந க³ணஸ்ஸ ஆரோசெஸ்ஸ’ந்தி, அயம்பி பாராஜிகா ஹோதி அஸங்வாஸா வஜ்ஜப்படிச்சா²தி³கா’’தி.
665.‘‘Yā pana bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodeyya na gaṇassa āroceyya, yadā ca sā ṭhitā vā assa cutā vā nāsitā vā avassaṭā vā, sā pacchā evaṃ vadeyya – ‘pubbevāhaṃ, ayye, aññāsiṃ etaṃ bhikkhuniṃ evarūpā ca evarūpā ca sā bhaginīti, no ca kho attanā paṭicodessaṃ na gaṇassa ārocessa’nti, ayampi pārājikā hoti asaṃvāsā vajjappaṭicchādikā’’ti.
666. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
666.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஜானாதி நாம ஸாமங் வா ஜானாதி, அஞ்ஞே வா தஸ்ஸா ஆரோசெந்தி, ஸா வா ஆரோசேதி.
Jānāti nāma sāmaṃ vā jānāti, aññe vā tassā ārocenti, sā vā āroceti.
பாராஜிகங் த⁴ம்மங் அஜ்ஜா²பன்னந்தி அட்ட²ன்னங் பாராஜிகானங் அஞ்ஞதரங் பாராஜிகங் அஜ்ஜா²பன்னங்.
Pārājikaṃ dhammaṃ ajjhāpannanti aṭṭhannaṃ pārājikānaṃ aññataraṃ pārājikaṃ ajjhāpannaṃ.
நேவத்தனா படிசோதெ³ய்யாதி ந ஸயங் சோதெ³ய்ய.
Nevattanāpaṭicodeyyāti na sayaṃ codeyya.
ந க³ணஸ்ஸ ஆரோசெய்யாதி ந அஞ்ஞாஸங் பி⁴க்கு²னீனங் ஆரோசெய்ய.
Na gaṇassa āroceyyāti na aññāsaṃ bhikkhunīnaṃ āroceyya.
யதா³ ச ஸா டி²தா வா அஸ்ஸ சுதா வாதி டி²தா நாம ஸலிங்கே³ டி²தா வுச்சதி. சுதா நாம காலங்கதா வுச்சதி. நாஸிதா நாம ஸயங் வா விப்³ப⁴ந்தா ஹோதி அஞ்ஞேஹி வா நாஸிதா. அவஸ்ஸடா நாம தித்தா²யதனங் ஸங்கந்தா வுச்சதி. ஸா பச்சா² ஏவங் வதெ³ய்ய – ‘‘புப்³பே³வாஹங், அய்யே, அஞ்ஞாஸிங் ஏதங் பி⁴க்கு²னிங் ஏவரூபா ச ஏவரூபா ச ஸா ப⁴கி³னீ’’தி.
Yadāca sā ṭhitā vā assa cutā vāti ṭhitā nāma saliṅge ṭhitā vuccati. Cutā nāma kālaṅkatā vuccati. Nāsitā nāma sayaṃ vā vibbhantā hoti aññehi vā nāsitā. Avassaṭā nāma titthāyatanaṃ saṅkantā vuccati. Sā pacchā evaṃ vadeyya – ‘‘pubbevāhaṃ, ayye, aññāsiṃ etaṃ bhikkhuniṃ evarūpā ca evarūpā ca sā bhaginī’’ti.
நோ ச கோ² அத்தனா படிசோதெ³ஸ்ஸந்தி ஸயங் வா ந சோதெ³ஸ்ஸங்.
No ca kho attanā paṭicodessanti sayaṃ vā na codessaṃ.
ந க³ணஸ்ஸ ஆரோசெஸ்ஸந்தி ந அஞ்ஞாஸங் பி⁴க்கு²னீனங் ஆரோசெஸ்ஸங்.
Na gaṇassa ārocessanti na aññāsaṃ bhikkhunīnaṃ ārocessaṃ.
அயம்பீதி புரிமாயோ உபாதா³ய வுச்சதி.
Ayampīti purimāyo upādāya vuccati.
பாராஜிகா ஹோதீதி ஸெய்யதா²பி நாம பண்டு³பலாஸோ ப³ந்த⁴னா பமுத்தோ அப⁴ப்³போ³ ஹரிதத்தா²ய, ஏவமேவ பி⁴க்கு²னீ ஜானங் பாராஜிகங் த⁴ம்மங் அஜ்ஜா²பன்னங் பி⁴க்கு²னிங் நேவத்தனா படிசோதெ³ஸ்ஸாமி ந க³ணஸ்ஸ ஆரோசெஸ்ஸாமீதி து⁴ரங் நிக்கி²த்தமத்தே அஸ்ஸமணீ ஹோதி அஸக்யதீ⁴தா. தேன வுச்சதி பாராஜிகா ஹோதீதி.
Pārājikā hotīti seyyathāpi nāma paṇḍupalāso bandhanā pamutto abhabbo haritatthāya, evameva bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodessāmi na gaṇassa ārocessāmīti dhuraṃ nikkhittamatte assamaṇī hoti asakyadhītā. Tena vuccati pārājikā hotīti.
அஸங்வாஸாதி ஸங்வாஸோ நாம ஏககம்மங் ஏகுத்³தே³ஸோ ஸமஸிக்க²தா. ஏஸோ ஸங்வாஸோ நாம. ஸோ தாய ஸத்³தி⁴ங் நத்தி². தேன வுச்சதி அஸங்வாஸாதி.
Asaṃvāsāti saṃvāso nāma ekakammaṃ ekuddeso samasikkhatā. Eso saṃvāso nāma. So tāya saddhiṃ natthi. Tena vuccati asaṃvāsāti.
667. அனாபத்தி ‘‘ஸங்க⁴ஸ்ஸ ப⁴ண்ட³னங் வா கலஹோ வா விக்³க³ஹோ வா விவாதோ³ வா ப⁴விஸ்ஸதீ’’தி நாரோசேதி, ‘‘ஸங்க⁴பே⁴தோ³ வா ஸங்க⁴ராஜி வா ப⁴விஸ்ஸதீ’’தி நாரோசேதி, ‘‘அயங் கக்க²ளா ப²ருஸா ஜீவிதந்தராயங் வா ப்³ரஹ்மசரியந்தராயங் வா கரிஸ்ஸதீ’’தி நாரோசேதி, அஞ்ஞா பதிரூபா பி⁴க்கு²னியோ அபஸ்ஸந்தீ நாரோசேதி, நச்சா²தே³துகாமா நாரோசேதி, பஞ்ஞாயிஸ்ஸதி ஸகேன கம்மேனாதி நாரோசேதி, உம்மத்திகாய…பே॰… ஆதி³கம்மிகாயாதி.
667. Anāpatti ‘‘saṅghassa bhaṇḍanaṃ vā kalaho vā viggaho vā vivādo vā bhavissatī’’ti nāroceti, ‘‘saṅghabhedo vā saṅgharāji vā bhavissatī’’ti nāroceti, ‘‘ayaṃ kakkhaḷā pharusā jīvitantarāyaṃ vā brahmacariyantarāyaṃ vā karissatī’’ti nāroceti, aññā patirūpā bhikkhuniyo apassantī nāroceti, nacchādetukāmā nāroceti, paññāyissati sakena kammenāti nāroceti, ummattikāya…pe… ādikammikāyāti.
து³தியபாராஜிகங் ஸமத்தங்.
Dutiyapārājikaṃ samattaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 2. து³தியபாராஜிகஸிக்கா²பத³வண்ணனா • 2. Dutiyapārājikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. து³தியபாராஜிகஸிக்கா²பத³வண்ணனா • 2. Dutiyapārājikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியபாராஜிகஸிக்கா²பத³வண்ணனா • 2. Dutiyapārājikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. வஜ்ஜபடிச்சா²தி³கஸிக்கா²பத³வண்ணனா • 2. Vajjapaṭicchādikasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. து³தியபாராஜிகஸிக்கா²பத³ங் • 2. Dutiyapārājikasikkhāpadaṃ
