Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga

২. দুতিযপারাজিকং

2. Dutiyapārājikaṃ

৮৪. তেন সমযেন বুদ্ধো ভগৰা রাজগহে ৰিহরতি গিজ্ঝকূটে পব্বতে। তেন খো পন সমযেন সম্বহুলা সন্দিট্ঠা সম্ভত্তা ভিক্খূ ইসিগিলিপস্সে তিণকুটিযো করিত্ৰা ৰস্সং উপগচ্ছিংসু। আযস্মাপি ধনিযো কুম্ভকারপুত্তো তিণকুটিকং করিত্ৰা ৰস্সং উপগচ্ছি। অথ খো তে ভিক্খূ ৰস্সংৰুট্ঠা তেমাসচ্চযেন তিণকুটিযো ভিন্দিত্ৰা তিণঞ্চ কট্ঠঞ্চ পটিসামেত্ৰা জনপদচারিকং পক্কমিংসু। আযস্মা পন ধনিযো কুম্ভকারপুত্তো তত্থেৰ ৰস্সং ৰসি, তত্থ হেমন্তং, তত্থ গিম্হং। অথ খো আযস্মতো ধনিযস্স কুম্ভকারপুত্তস্স গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু। দুতিযম্পি খো আযস্মা ধনিযো কুম্ভকারপুত্তো তিণঞ্চ কট্ঠঞ্চ সংকড্ঢিত্ৰা তিণকুটিকং অকাসি। দুতিযম্পি খো আযস্মতো ধনিযস্স কুম্ভকারপুত্তস্স গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু। ততিযম্পি খো আযস্মা ধনিযো কুম্ভকারপুত্তো তিণঞ্চ কট্ঠঞ্চ সংকড্ঢিত্ৰা তিণকুটিকং অকাসি। ততিযম্পি খো আযস্মতো ধনিযস্স কুম্ভকারপুত্তস্স গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু।

84. Tena samayena buddho bhagavā rājagahe viharati gijjhakūṭe pabbate. Tena kho pana samayena sambahulā sandiṭṭhā sambhattā bhikkhū isigilipasse tiṇakuṭiyo karitvā vassaṃ upagacchiṃsu. Āyasmāpi dhaniyo kumbhakāraputto tiṇakuṭikaṃ karitvā vassaṃ upagacchi. Atha kho te bhikkhū vassaṃvuṭṭhā temāsaccayena tiṇakuṭiyo bhinditvā tiṇañca kaṭṭhañca paṭisāmetvā janapadacārikaṃ pakkamiṃsu. Āyasmā pana dhaniyo kumbhakāraputto tattheva vassaṃ vasi, tattha hemantaṃ, tattha gimhaṃ. Atha kho āyasmato dhaniyassa kumbhakāraputtassa gāmaṃ piṇḍāya paviṭṭhassa tiṇahāriyo kaṭṭhahāriyo tiṇakuṭikaṃ bhinditvā tiṇañca kaṭṭhañca ādāya agamaṃsu. Dutiyampi kho āyasmā dhaniyo kumbhakāraputto tiṇañca kaṭṭhañca saṃkaḍḍhitvā tiṇakuṭikaṃ akāsi. Dutiyampi kho āyasmato dhaniyassa kumbhakāraputtassa gāmaṃ piṇḍāya paviṭṭhassa tiṇahāriyo kaṭṭhahāriyo tiṇakuṭikaṃ bhinditvā tiṇañca kaṭṭhañca ādāya agamaṃsu. Tatiyampi kho āyasmā dhaniyo kumbhakāraputto tiṇañca kaṭṭhañca saṃkaḍḍhitvā tiṇakuṭikaṃ akāsi. Tatiyampi kho āyasmato dhaniyassa kumbhakāraputtassa gāmaṃ piṇḍāya paviṭṭhassa tiṇahāriyo kaṭṭhahāriyo tiṇakuṭikaṃ bhinditvā tiṇañca kaṭṭhañca ādāya agamaṃsu.

অথ খো আযস্মতো ধনিযস্স কুম্ভকারপুত্তস্স এতদহোসি – ‘‘যাৰততিযকং খো মে গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু। অহং খো পন সুসিক্খিতো অনৰযো সকে আচরিযকে কুম্ভকারকম্মে পরিযোদাতসিপ্পো । যংনূনাহং সামং চিক্খল্লং মদ্দিত্ৰা সব্বমত্তিকামযং কুটিকং করেয্য’’ন্তি! অথ খো আযস্মা ধনিযো কুম্ভকারপুত্তো সামং চিক্খল্লং মদ্দিত্ৰা সব্বমত্তিকামযং কুটিকং করিত্ৰা তিণঞ্চ কট্ঠঞ্চ গোমযঞ্চ সংকড্ঢিত্ৰা তং কুটিকং পচি। সা অহোসি কুটিকা অভিরূপা দস্সনীযা পাসাদিকা লোহিতিকা ¹, সেয্যথাপি ইন্দগোপকো। সেয্যথাপি নাম কিঙ্কণিকসদ্দো ² এৰমেৰং তস্সা কুটিকায সদ্দো অহোসি।

Atha kho āyasmato dhaniyassa kumbhakāraputtassa etadahosi – ‘‘yāvatatiyakaṃ kho me gāmaṃ piṇḍāya paviṭṭhassa tiṇahāriyo kaṭṭhahāriyo tiṇakuṭikaṃ bhinditvā tiṇañca kaṭṭhañca ādāya agamaṃsu. Ahaṃ kho pana susikkhito anavayo sake ācariyake kumbhakārakamme pariyodātasippo . Yaṃnūnāhaṃ sāmaṃ cikkhallaṃ madditvā sabbamattikāmayaṃ kuṭikaṃ kareyya’’nti! Atha kho āyasmā dhaniyo kumbhakāraputto sāmaṃ cikkhallaṃ madditvā sabbamattikāmayaṃ kuṭikaṃ karitvā tiṇañca kaṭṭhañca gomayañca saṃkaḍḍhitvā taṃ kuṭikaṃ paci. Sā ahosi kuṭikā abhirūpā dassanīyā pāsādikā lohitikā ³, seyyathāpi indagopako. Seyyathāpi nāma kiṅkaṇikasaddo ⁴ evamevaṃ tassā kuṭikāya saddo ahosi.

৮৫. অথ খো ভগৰা সম্বহুলেহি ভিক্খূহি সদ্ধিং গিজ্ঝকূটা পব্বতা ওরোহন্তো অদ্দস তং কুটিকং অভিরূপং দস্সনীযং পাসাদিকং লোহিতিকং। দিস্ৰান ভিক্খূ আমন্তেসি – ‘‘কিং এতং, ভিক্খৰে, অভিরূপং দস্সনীযং পাসাদিকং লোহিতিকং, সেয্যথাপি ইন্দগোপকো’’তি? অথ খো তে ভিক্খূ ভগৰতো এতমত্থং আরোচেসুং। ৰিগরহি বুদ্ধো ভগৰা – ‘‘অননুচ্ছৰিকং, ভিক্খৰে, তস্স মোঘপুরিসস্স অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম সো, ভিক্খৰে, মোঘপুরিসো সব্বমত্তিকামযং কুটিকং করিস্সতি! ন হি নাম, ভিক্খৰে, তস্স মোঘপুরিসস্স পাণেসু অনুদ্দযা অনুকম্পা অৰিহেসা ভৰিস্সতি! গচ্ছথেতং, ভিক্খৰে, কুটিকং ভিন্দথ। মা পচ্ছিমা জনতা পাণেসু পাতব্যতং আপজ্জি। ন চ, ভিক্খৰে, সব্বমত্তিকামযা কুটিকা কাতব্বা। যো করেয্য, আপত্তি দুক্কটস্সা’’তি। ‘‘এৰং, ভন্তে’’তি, খো তে ভিক্খূ ভগৰতো পটিস্সুণিত্ৰা যেন সা কুটিকা তেনুপসঙ্কমিংসু; উপসঙ্কমিত্ৰা তং কুটিকং ভিন্দিংসু। অথ খো আযস্মা ধনিযো কুম্ভকারপুত্তো তে ভিক্খূ এতদৰোচ – ‘‘কিস্স মে তুম্হে, আৰুসো, কুটিকং ভিন্দথা’’তি? ‘‘ভগৰা, আৰুসো, ভেদাপেতী’’তি। ‘‘ভিন্দথাৰুসো, সচে ধম্মস্সামী ভেদাপেতী’’তি।

85. Atha kho bhagavā sambahulehi bhikkhūhi saddhiṃ gijjhakūṭā pabbatā orohanto addasa taṃ kuṭikaṃ abhirūpaṃ dassanīyaṃ pāsādikaṃ lohitikaṃ. Disvāna bhikkhū āmantesi – ‘‘kiṃ etaṃ, bhikkhave, abhirūpaṃ dassanīyaṃ pāsādikaṃ lohitikaṃ, seyyathāpi indagopako’’ti? Atha kho te bhikkhū bhagavato etamatthaṃ ārocesuṃ. Vigarahi buddho bhagavā – ‘‘ananucchavikaṃ, bhikkhave, tassa moghapurisassa ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma so, bhikkhave, moghapuriso sabbamattikāmayaṃ kuṭikaṃ karissati! Na hi nāma, bhikkhave, tassa moghapurisassa pāṇesu anuddayā anukampā avihesā bhavissati! Gacchathetaṃ, bhikkhave, kuṭikaṃ bhindatha. Mā pacchimā janatā pāṇesu pātabyataṃ āpajji. Na ca, bhikkhave, sabbamattikāmayā kuṭikā kātabbā. Yo kareyya, āpatti dukkaṭassā’’ti. ‘‘Evaṃ, bhante’’ti, kho te bhikkhū bhagavato paṭissuṇitvā yena sā kuṭikā tenupasaṅkamiṃsu; upasaṅkamitvā taṃ kuṭikaṃ bhindiṃsu. Atha kho āyasmā dhaniyo kumbhakāraputto te bhikkhū etadavoca – ‘‘kissa me tumhe, āvuso, kuṭikaṃ bhindathā’’ti? ‘‘Bhagavā, āvuso, bhedāpetī’’ti. ‘‘Bhindathāvuso, sace dhammassāmī bhedāpetī’’ti.

৮৬. অথ খো আযস্মতো ধনিযস্স কুম্ভকারপুত্তস্স এতদহোসি – ‘‘যাৰততিযকং খো মে গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু। যাপি মযা সব্বমত্তিকামযা কুটিকা কতা সাপি ভগৰতা ভেদাপিতা। অত্থি চ মে দারুগহে গণকো সন্দিট্ঠো। যংনূনাহং দারুগহে গণকং দারূনি যাচিত্ৰা দারুকুটিকং করেয্য’’ন্তি। অথ খো আযস্মা ধনিযো কুম্ভকারপুত্তো যেন দারুগহে গণকো তেনুপসঙ্কমি; উপসঙ্কমিত্ৰা দারুগহে গণকং এতদৰোচ – ‘‘যাৰততিযকং খো মে, আৰুসো, গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু। যাপি মযা সব্বমত্তিকামযা কুটিকা কতা সাপি ভগৰতা ভেদাপিতা । দেহি মে, আৰুসো, দারূনি। ইচ্ছামি দারুকুটিকং ⁵ কাতু’’ন্তি। ‘‘নত্থি, ভন্তে, তাদিসানি দারূনি যানাহং অয্যস্স দদেয্যং। অত্থি , ভন্তে, দেৰগহদারূনি নগরপটিসঙ্খারিকানি আপদত্থায নিক্খিত্তানি। সচে তানি দারূনি রাজা দাপেতি হরাপেথ, ভন্তে’’তি। ‘‘দিন্নানি, আৰুসো, রঞ্ঞা’’তি। অথ খো দারুগহে গণকস্স এতদহোসি – ‘‘ইমে খো সমণা সক্যপুত্তিযা ধম্মচারিনো সমচারিনো ⁶ ব্রহ্মচারিনো সচ্চৰাদিনো সীলৰন্তো কল্যাণধম্মা। রাজাপিমেসং অভিপ্পসন্নো। নারহতি অদিন্নং দিন্নন্তি ৰত্তু’’ন্তি। অথ খো দারুগহে গণকো আযস্মন্তং ধনিযং কুম্ভকারপুত্তং এতদৰোচ – ‘‘হরাপেথ, ভন্তে’’তি। অথ খো আযস্মা ধনিযো কুম্ভকারপুত্তো তানি দারূনি খণ্ডাখণ্ডিকং ছেদাপেত্ৰা সকটেহি নিব্বাহাপেত্ৰা দারুকুটিকং অকাসি।

86. Atha kho āyasmato dhaniyassa kumbhakāraputtassa etadahosi – ‘‘yāvatatiyakaṃ kho me gāmaṃ piṇḍāya paviṭṭhassa tiṇahāriyo kaṭṭhahāriyo tiṇakuṭikaṃ bhinditvā tiṇañca kaṭṭhañca ādāya agamaṃsu. Yāpi mayā sabbamattikāmayā kuṭikā katā sāpi bhagavatā bhedāpitā. Atthi ca me dārugahe gaṇako sandiṭṭho. Yaṃnūnāhaṃ dārugahe gaṇakaṃ dārūni yācitvā dārukuṭikaṃ kareyya’’nti. Atha kho āyasmā dhaniyo kumbhakāraputto yena dārugahe gaṇako tenupasaṅkami; upasaṅkamitvā dārugahe gaṇakaṃ etadavoca – ‘‘yāvatatiyakaṃ kho me, āvuso, gāmaṃ piṇḍāya paviṭṭhassa tiṇahāriyo kaṭṭhahāriyo tiṇakuṭikaṃ bhinditvā tiṇañca kaṭṭhañca ādāya agamaṃsu. Yāpi mayā sabbamattikāmayā kuṭikā katā sāpi bhagavatā bhedāpitā . Dehi me, āvuso, dārūni. Icchāmi dārukuṭikaṃ ⁷ kātu’’nti. ‘‘Natthi, bhante, tādisāni dārūni yānāhaṃ ayyassa dadeyyaṃ. Atthi , bhante, devagahadārūni nagarapaṭisaṅkhārikāni āpadatthāya nikkhittāni. Sace tāni dārūni rājā dāpeti harāpetha, bhante’’ti. ‘‘Dinnāni, āvuso, raññā’’ti. Atha kho dārugahe gaṇakassa etadahosi – ‘‘ime kho samaṇā sakyaputtiyā dhammacārino samacārino ⁸ brahmacārino saccavādino sīlavanto kalyāṇadhammā. Rājāpimesaṃ abhippasanno. Nārahati adinnaṃ dinnanti vattu’’nti. Atha kho dārugahe gaṇako āyasmantaṃ dhaniyaṃ kumbhakāraputtaṃ etadavoca – ‘‘harāpetha, bhante’’ti. Atha kho āyasmā dhaniyo kumbhakāraputto tāni dārūni khaṇḍākhaṇḍikaṃ chedāpetvā sakaṭehi nibbāhāpetvā dārukuṭikaṃ akāsi.

৮৭. অথ খো ৰস্সকারো ব্রাহ্মণো মগধমহামত্তো রাজগহে কম্মন্তে অনুসঞ্ঞাযমানো যেন দারুগহে গণকো তেনুপসঙ্কমি; উপসঙ্কমিত্ৰা দারুগহে গণকং এতদৰোচ – ‘‘যানি তানি, ভণে, দেৰগহদারূনি নগরপটিসঙ্খারিকানি আপদত্থায নিক্খিত্তানি কহং তানি দারূনী’’তি? ‘‘তানি, সামি, দারূনি দেৰেন অয্যস্স ধনিযস্স কুম্ভকারপুত্তস্স দিন্নানী’’তি। অথ খো ৰস্সকারো ব্রাহ্মণো মগধমহামত্তো অনত্তমনো অহোসি – ‘‘কথঞ্হি নাম দেৰো দেৰগহদারূনি নগরপটিসঙ্খারিকানি আপদত্থায নিক্খিত্তানি ধনিযস্স কুম্ভকারপুত্তস্স দস্সতী’’তি! অথ খো ৰস্সকারো ব্রাহ্মণো মগধমহামত্তো যেন রাজা মাগধো সেনিযো বিম্বিসারো তেনুপসঙ্কমি; উপসঙ্কমিত্ৰা রাজানং মাগধং সেনিযং বিম্বিসারং এতদৰোচ – ‘‘সচ্চং কির, দেৰেন ⁹ দেৰগহদারূনি নগরপটিসঙ্খারিকানি আপদত্থায নিক্খিত্তানি ধনিযস্স কুম্ভকারপুত্তস্স দিন্নানী’’তি? ‘‘কো এৰমাহা’’তি? ‘‘দারুগহে গণকো, দেৰা’’তি। ‘‘তেন হি, ব্রাহ্মণ, দারুগহে গণকং আণাপেহী’’তি। অথ খো ৰস্সকারো ব্রাহ্মণো মগধমহামত্তো দারুগহে গণকং বন্ধং ¹⁰ আণাপেসি। অদ্দস খো আযস্মা ধনিযো কুম্ভকারপুত্তো দারুগহে গণকং বন্ধং নিয্যমানং। দিস্ৰান দারুগহে গণকং এতদৰোচ – ‘‘কিস্স ত্ৰং, আৰুসো, বন্ধো নিয্যাসী’’তি? ‘‘তেসং, ভন্তে, দারূনং কিচ্চা’’তি। ‘‘গচ্ছাৰুসো, অহম্পি আগচ্ছামী’’তি। ‘‘এয্যাসি, ভন্তে, পুরাহং হঞ্ঞামী’’তি।

87. Atha kho vassakāro brāhmaṇo magadhamahāmatto rājagahe kammante anusaññāyamāno yena dārugahe gaṇako tenupasaṅkami; upasaṅkamitvā dārugahe gaṇakaṃ etadavoca – ‘‘yāni tāni, bhaṇe, devagahadārūni nagarapaṭisaṅkhārikāni āpadatthāya nikkhittāni kahaṃ tāni dārūnī’’ti? ‘‘Tāni, sāmi, dārūni devena ayyassa dhaniyassa kumbhakāraputtassa dinnānī’’ti. Atha kho vassakāro brāhmaṇo magadhamahāmatto anattamano ahosi – ‘‘kathañhi nāma devo devagahadārūni nagarapaṭisaṅkhārikāni āpadatthāya nikkhittāni dhaniyassa kumbhakāraputtassa dassatī’’ti! Atha kho vassakāro brāhmaṇo magadhamahāmatto yena rājā māgadho seniyo bimbisāro tenupasaṅkami; upasaṅkamitvā rājānaṃ māgadhaṃ seniyaṃ bimbisāraṃ etadavoca – ‘‘saccaṃ kira, devena ¹¹ devagahadārūni nagarapaṭisaṅkhārikāni āpadatthāya nikkhittāni dhaniyassa kumbhakāraputtassa dinnānī’’ti? ‘‘Ko evamāhā’’ti? ‘‘Dārugahe gaṇako, devā’’ti. ‘‘Tena hi, brāhmaṇa, dārugahe gaṇakaṃ āṇāpehī’’ti. Atha kho vassakāro brāhmaṇo magadhamahāmatto dārugahe gaṇakaṃ bandhaṃ ¹² āṇāpesi. Addasa kho āyasmā dhaniyo kumbhakāraputto dārugahe gaṇakaṃ bandhaṃ niyyamānaṃ. Disvāna dārugahe gaṇakaṃ etadavoca – ‘‘kissa tvaṃ, āvuso, bandho niyyāsī’’ti? ‘‘Tesaṃ, bhante, dārūnaṃ kiccā’’ti. ‘‘Gacchāvuso, ahampi āgacchāmī’’ti. ‘‘Eyyāsi, bhante, purāhaṃ haññāmī’’ti.

৮৮. অথ খো আযস্মা ধনিযো কুম্ভকারপুত্তো যেন রঞ্ঞো মাগধস্স সেনিযস্স বিম্বিসারস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো রাজা মাগধো সেনিযো বিম্বিসারো যেনাযস্মা ধনিযো কুম্ভকারপুত্তো তেনুপসঙ্কমি; উপসঙ্কমিত্ৰা আযস্মন্তং ধনিযং কুম্ভকারপুত্তং অভিৰাদেত্ৰা একমন্তং নিসীদি। একমন্তং নিসিন্নো খো রাজা মাগধো সেনিযো বিম্বিসারো আযস্মন্তং ধনিযং কুম্ভকারপুত্তং এতদৰোচ – ‘‘সচ্চং কির মযা, ভন্তে, দেৰগহদারূনি নগরপটিসঙ্খারিকানি আপদত্থায নিক্খিত্তানি অয্যস্স দিন্নানী’’তি? ‘‘এৰং, মহারাজা’’তি। ‘‘মযং খো, ভন্তে, রাজানো নাম বহুকিচ্চা বহুকরণীযা, দত্ৰাপি ন সরেয্যাম; ইঙ্ঘ, ভন্তে, সরাপেহী’’তি। ‘‘সরসি ত্ৰং, মহারাজ, পঠমাভিসিত্তো এৰরূপিং ৰাচং ভাসিতা – ‘‘দিন্নঞ্ঞেৰ সমণব্রাহ্মণানং তিণকট্ঠোদকং পরিভুঞ্জন্তূ’’তি। ‘‘সরামহং, ভন্তে। সন্তি, ভন্তে, সমণব্রাহ্মণা লজ্জিনো কুক্কুচ্চকা সিক্খাকামা। তেসং অপ্পমত্তকেপি কুক্কুচ্চং উপ্পজ্জতি। তেসং মযা সন্ধায ভাসিতং, তঞ্চ খো অরঞ্ঞে অপরিগ্গহিতং। সো ত্ৰং, ভন্তে, তেন লেসেন দারূনি অদিন্নং হরিতুং মঞ্ঞসি! কথঞ্হি নাম মাদিসো সমণং ৰা ব্রাহ্মণং ৰা ৰিজিতে ৰসন্তং হনেয্য ৰা বন্ধেয্য ৰা পব্বাজেয্য ৰা! গচ্ছ, ভন্তে, লোমেন ত্ৰং মুত্তোসি। মাস্সু পুনপি এৰরূপং অকাসী’’তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘অলজ্জিনো ইমে সমণা সক্যপুত্তিযা দুস্সীলা মুসাৰাদিনো। ইমে হি নাম ধম্মচারিনো সমচারিনো ব্রাহ্মচারিনো সচ্চৰাদিনো সীলৰন্তো কল্যাণধম্মা পটিজানিস্সন্তি! নত্থি ইমেসং সামঞ্ঞং, নত্থি ইমেসং ব্রহ্মঞ্ঞং। নট্ঠং ইমেসং সামঞ্ঞং, নট্ঠং ইমেসং ব্রহ্মঞ্ঞং। কুতো ইমেসং সামঞ্ঞং, কুতো ইমেসং ব্রহ্মঞ্ঞং! অপগতা ইমে সামঞ্ঞা, অপগতা ইমে ব্রহ্মঞ্ঞা। রাজানম্পি ইমে ৰঞ্চেন্তি, কিং পনঞ্ঞে মনুস্সে’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা সন্তুট্ঠা লজ্জিনো কুক্কুচ্চকা সিক্খাকামা তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা ধনিযো কুম্ভকারপুত্তো রঞ্ঞো দারূনি অদিন্নং আদিযিস্সতী’’তি! অথ খো তে ভিক্খূ আযস্মন্তং ধনিযং কুম্ভকারপুত্তং অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং ধনিযং কুম্ভকারপুত্তং পটিপুচ্ছি – ‘‘সচ্চং কির ত্ৰং, ধনিয, রঞ্ঞো দারূনি অদিন্নং আদিযী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম ত্ৰং, মোঘপুরিস , রঞ্ঞো দারূনি অদিন্নং আদিযিস্সসি! নেতং, মোঘপুরিস, অপ্পসন্নানং ৰা পসাদায পসন্নানং ৰা ভিয্যোভাৰায; অথখ্ৰেতং, মোঘপুরিস, অপ্পসন্নানঞ্চেৰ অপ্পসাদায পসন্নানঞ্চ একচ্চানং অঞ্ঞথত্তাযা’’তি।

88. Atha kho āyasmā dhaniyo kumbhakāraputto yena rañño māgadhassa seniyassa bimbisārassa nivesanaṃ tenupasaṅkami; upasaṅkamitvā paññatte āsane nisīdi. Atha kho rājā māgadho seniyo bimbisāro yenāyasmā dhaniyo kumbhakāraputto tenupasaṅkami; upasaṅkamitvā āyasmantaṃ dhaniyaṃ kumbhakāraputtaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro āyasmantaṃ dhaniyaṃ kumbhakāraputtaṃ etadavoca – ‘‘saccaṃ kira mayā, bhante, devagahadārūni nagarapaṭisaṅkhārikāni āpadatthāya nikkhittāni ayyassa dinnānī’’ti? ‘‘Evaṃ, mahārājā’’ti. ‘‘Mayaṃ kho, bhante, rājāno nāma bahukiccā bahukaraṇīyā, datvāpi na sareyyāma; iṅgha, bhante, sarāpehī’’ti. ‘‘Sarasi tvaṃ, mahārāja, paṭhamābhisitto evarūpiṃ vācaṃ bhāsitā – ‘‘dinnaññeva samaṇabrāhmaṇānaṃ tiṇakaṭṭhodakaṃ paribhuñjantū’’ti. ‘‘Sarāmahaṃ, bhante. Santi, bhante, samaṇabrāhmaṇā lajjino kukkuccakā sikkhākāmā. Tesaṃ appamattakepi kukkuccaṃ uppajjati. Tesaṃ mayā sandhāya bhāsitaṃ, tañca kho araññe apariggahitaṃ. So tvaṃ, bhante, tena lesena dārūni adinnaṃ harituṃ maññasi! Kathañhi nāma mādiso samaṇaṃ vā brāhmaṇaṃ vā vijite vasantaṃ haneyya vā bandheyya vā pabbājeyya vā! Gaccha, bhante, lomena tvaṃ muttosi. Māssu punapi evarūpaṃ akāsī’’ti. Manussā ujjhāyanti khiyyanti vipācenti – ‘‘alajjino ime samaṇā sakyaputtiyā dussīlā musāvādino. Ime hi nāma dhammacārino samacārino brāhmacārino saccavādino sīlavanto kalyāṇadhammā paṭijānissanti! Natthi imesaṃ sāmaññaṃ, natthi imesaṃ brahmaññaṃ. Naṭṭhaṃ imesaṃ sāmaññaṃ, naṭṭhaṃ imesaṃ brahmaññaṃ. Kuto imesaṃ sāmaññaṃ, kuto imesaṃ brahmaññaṃ! Apagatā ime sāmaññā, apagatā ime brahmaññā. Rājānampi ime vañcenti, kiṃ panaññe manusse’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā santuṭṭhā lajjino kukkuccakā sikkhākāmā te ujjhāyanti khiyyanti vipācenti – ‘‘kathañhi nāma āyasmā dhaniyo kumbhakāraputto rañño dārūni adinnaṃ ādiyissatī’’ti! Atha kho te bhikkhū āyasmantaṃ dhaniyaṃ kumbhakāraputtaṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ dhaniyaṃ kumbhakāraputtaṃ paṭipucchi – ‘‘saccaṃ kira tvaṃ, dhaniya, rañño dārūni adinnaṃ ādiyī’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa , rañño dārūni adinnaṃ ādiyissasi! Netaṃ, moghapurisa, appasannānaṃ vā pasādāya pasannānaṃ vā bhiyyobhāvāya; athakhvetaṃ, moghapurisa, appasannānañceva appasādāya pasannānañca ekaccānaṃ aññathattāyā’’ti.

তেন খো পন সমযেন অঞ্ঞতরো পুরাণৰোহারিকো মহামত্তো ভিক্খূসু পব্বজিতো ভগৰতো অৰিদূরে নিসিন্নো হোতি। অথ খো ভগৰা তং ভিক্খুং এতদৰোচ – ‘‘কিত্তকেন খো ভিক্খু রাজা মাগধো সেনিযো বিম্বিসারো চোরং গহেত্ৰা হনতি ৰা বন্ধতি ৰা পব্বাজেতি ৰা’’তি? ‘‘পাদেন ৰা, ভগৰা, পাদারহেন ৰা’’তি ¹³। তেন খো পন সমযেন রাজগহে পঞ্চমাসকো পাদো হোতি। অথ খো ভগৰা আযস্মন্তং ধনিযং কুম্ভকারপুত্তং অনেকপরিযাযেন ৰিগরহিত্ৰা দুব্ভরতায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

Tena kho pana samayena aññataro purāṇavohāriko mahāmatto bhikkhūsu pabbajito bhagavato avidūre nisinno hoti. Atha kho bhagavā taṃ bhikkhuṃ etadavoca – ‘‘kittakena kho bhikkhu rājā māgadho seniyo bimbisāro coraṃ gahetvā hanati vā bandhati vā pabbājeti vā’’ti? ‘‘Pādena vā, bhagavā, pādārahena vā’’ti ¹⁴. Tena kho pana samayena rājagahe pañcamāsako pādo hoti. Atha kho bhagavā āyasmantaṃ dhaniyaṃ kumbhakāraputtaṃ anekapariyāyena vigarahitvā dubbharatāya…pe… evañca pana, bhikkhave, imaṃ sikkhāpadaṃ uddiseyyātha –

৮৯. ‘‘যো পন ভিক্খু অদিন্নং থেয্যসঙ্খাতং আদিযেয্য, যথারূপে অদিন্নাদানে রাজানো চোরং গহেত্ৰা হনেয্যুং ৰা বন্ধেয্যুং ৰা পব্বাজেয্যুং ৰা – ‘চোরোসি বালোসি মূল়্হোসি থেনোসী’তি, তথারূপং ভিক্খু অদিন্নং আদিযমানো অযম্পি পারাজিকো হোতি অসংৰাসো’’তি।

89.‘‘Yo pana bhikkhu adinnaṃ theyyasaṅkhātaṃ ādiyeyya, yathārūpe adinnādāne rājāno coraṃ gahetvā haneyyuṃ vā bandheyyuṃ vā pabbājeyyuṃ vā – ‘corosi bālosi mūḷhosi thenosī’ti, tathārūpaṃ bhikkhu adinnaṃ ādiyamāno ayampi pārājiko hoti asaṃvāso’’ti.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।

Evañcidaṃ bhagavatā bhikkhūnaṃ sikkhāpadaṃ paññattaṃ hoti.

৯০. তেন খো পন সমযেন ছব্বগ্গিযা ভিক্খূ রজকত্থরণং গন্ত্ৰা রজকভণ্ডিকং অৰহরিত্ৰা আরামং হরিত্ৰা ভাজেসুং। ভিক্খূ এৰমাহংসু – ‘‘মহাপুঞ্ঞত্থ তুম্হে, আৰুসো। বহুং তুম্হাকং চীৰরং উপ্পন্ন’’ন্তি। ‘‘কুতো আৰুসো, অম্হাকং পুঞ্ঞং, ইদানি মযং রজকত্থরণং গন্ত্ৰা রজকভণ্ডিকং অৰহরিম্হা’’তি। ‘‘ননু, আৰুসো, ভগৰতা সিক্খাপদং পঞ্ঞত্তং। কিস্স তুম্হে, আৰুসো, রজকভণ্ডিকং অৰহরিত্থা’’তি ? ‘‘সচ্চং, আৰুসো, ভগৰতা সিক্খাপদং পঞ্ঞত্তং। তঞ্চ খো গামে, নো অরঞ্ঞে’’তি। ‘‘ননু, আৰুসো, তথেৰেতং হোতি। অননুচ্ছৰিকং, আৰুসো, অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম তুম্হে, আৰুসো, রজকভণ্ডিকং অৰহরিস্সথ! নেতং, আৰুসো, অপ্পসন্নানং ৰা পসাদায পসন্নানং ৰা ভিয্যোভাৰায; অথখ্ৰেতং, আৰুসো, অপ্পসন্নানঞ্চেৰ অপ্পসাদায পসন্নানঞ্চ একচ্চানং অঞ্ঞথত্তাযা’’তি। অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ছব্বগ্গিযে ভিক্খূ পটিপুচ্ছি – ‘‘সচ্চং কির তুম্হে, ভিক্খৰে, রজকত্থরণং গন্ত্ৰা রজকভণ্ডিকং অৰহরিত্থা’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিসা, অননুলোমিকং অপ্পটিরূপং অস্সামণকং অকপ্পিযং অকরণীযং। কথঞ্হি নাম তুম্হে, মোঘপুরিসা, রজকভণ্ডিকং অৰহরিস্সথ! নেতং, মোঘপুরিসা, অপ্পসন্নানং ৰা পসাদায পসন্নানং ৰা ভিয্যোভাৰায; অথ খ্ৰেতং, মোঘপুরিসা, অপ্পসন্নানঞ্চেৰ অপ্পসাদায পসন্নানঞ্চ একচ্চানং অঞ্ঞথত্তাযা’’তি। অথ খো ভগৰা ছব্বগ্গিযে ভিক্খূ অনেকপরিযাযেন ৰিগরহিত্ৰা দুব্ভরতায…পে॰… ৰীরিযারম্ভস্স ৰণ্ণং ভাসিত্ৰা ভিক্খূনং তদনুচ্ছৰিকং তদনুলোমিকং ধম্মিং কথং কত্ৰা ভিক্খূ আমন্তেসি…পে॰… ‘‘এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

90. Tena kho pana samayena chabbaggiyā bhikkhū rajakattharaṇaṃ gantvā rajakabhaṇḍikaṃ avaharitvā ārāmaṃ haritvā bhājesuṃ. Bhikkhū evamāhaṃsu – ‘‘mahāpuññattha tumhe, āvuso. Bahuṃ tumhākaṃ cīvaraṃ uppanna’’nti. ‘‘Kuto āvuso, amhākaṃ puññaṃ, idāni mayaṃ rajakattharaṇaṃ gantvā rajakabhaṇḍikaṃ avaharimhā’’ti. ‘‘Nanu, āvuso, bhagavatā sikkhāpadaṃ paññattaṃ. Kissa tumhe, āvuso, rajakabhaṇḍikaṃ avaharitthā’’ti ? ‘‘Saccaṃ, āvuso, bhagavatā sikkhāpadaṃ paññattaṃ. Tañca kho gāme, no araññe’’ti. ‘‘Nanu, āvuso, tathevetaṃ hoti. Ananucchavikaṃ, āvuso, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tumhe, āvuso, rajakabhaṇḍikaṃ avaharissatha! Netaṃ, āvuso, appasannānaṃ vā pasādāya pasannānaṃ vā bhiyyobhāvāya; athakhvetaṃ, āvuso, appasannānañceva appasādāya pasannānañca ekaccānaṃ aññathattāyā’’ti. Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā chabbaggiye bhikkhū paṭipucchi – ‘‘saccaṃ kira tumhe, bhikkhave, rajakattharaṇaṃ gantvā rajakabhaṇḍikaṃ avaharitthā’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisā, ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ. Kathañhi nāma tumhe, moghapurisā, rajakabhaṇḍikaṃ avaharissatha! Netaṃ, moghapurisā, appasannānaṃ vā pasādāya pasannānaṃ vā bhiyyobhāvāya; atha khvetaṃ, moghapurisā, appasannānañceva appasādāya pasannānañca ekaccānaṃ aññathattāyā’’ti. Atha kho bhagavā chabbaggiye bhikkhū anekapariyāyena vigarahitvā dubbharatāya…pe… vīriyārambhassa vaṇṇaṃ bhāsitvā bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi…pe… ‘‘evañca pana, bhikkhave, imaṃ sikkhāpadaṃ uddiseyyātha –

৯১. ‘‘যো পন ভিক্খু গামা ৰা অরঞ্ঞা ৰা অদিন্নং থেয্যসঙ্খাতং আদিযেয্য, যথারূপে অদিন্নাদানে রাজানো চোরং গহেত্ৰা হনেয্যুং ৰা বন্ধেয্যুং ৰা পব্বাজেয্যুং ৰা – ‘চোরোসি বালোসি মূল়্হোসি থেনোসী’তি, তথারূপং ভিক্খু অদিন্নং আদিযমানো অযম্পি পারাজিকো হোতি অসংৰাসো’’তি।

91.‘‘Yo pana bhikkhu gāmā vā araññā vā adinnaṃ theyyasaṅkhātaṃ ādiyeyya, yathārūpe adinnādāne rājāno coraṃ gahetvā haneyyuṃ vā bandheyyuṃ vā pabbājeyyuṃ vā – ‘corosi bālosi mūḷhosi thenosī’ti, tathārūpaṃ bhikkhu adinnaṃ ādiyamāno ayampi pārājiko hoti asaṃvāso’’ti.

৯২. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।

92.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

গামো নাম এককুটিকোপি গামো, দ্ৰিকুটিকোপি গামো, তিকুটিকোপি গামো, চতুকুটিকোপি গামো, সমনুস্সোপি গামো, অমনুস্সোপি গামো, পরিক্খিত্তোপি গামো, অপরিক্খিত্তোপি গামো, গোনিসাদিনিৰিট্ঠোপি গামো, যোপি সত্থো অতিরেকচতুমাসনিৰিট্ঠো সোপি ৰুচ্চতি গামো।

Gāmo nāma ekakuṭikopi gāmo, dvikuṭikopi gāmo, tikuṭikopi gāmo, catukuṭikopi gāmo, samanussopi gāmo, amanussopi gāmo, parikkhittopi gāmo, aparikkhittopi gāmo, gonisādiniviṭṭhopi gāmo, yopi sattho atirekacatumāsaniviṭṭho sopi vuccati gāmo.

গামূপচারো নাম পরিক্খিত্তস্স গামস্স ইন্দখীলে ¹⁵ ঠিতস্স মজ্ঝিমস্স পুরিসস্স লেড্ডুপাতো, অপরিক্খিত্তস্স গামস্স ঘরূপচারে ঠিতস্স মজ্ঝিমস্স পুরিসস্স লেড্ডুপাতো।

Gāmūpacāro nāma parikkhittassa gāmassa indakhīle ¹⁶ ṭhitassa majjhimassa purisassa leḍḍupāto, aparikkhittassa gāmassa gharūpacāre ṭhitassa majjhimassa purisassa leḍḍupāto.

অরঞ্ঞং নাম ঠপেত্ৰা গামঞ্চ গামূপচারঞ্চ অৰসেসং অরঞ্ঞং নাম।

Araññaṃ nāma ṭhapetvā gāmañca gāmūpacārañca avasesaṃ araññaṃ nāma.

অদিন্নং নামং যং অদিন্নং অনিস্সট্ঠং অপরিচ্চত্তং রক্খিতং গোপিতং মমাযিতং পরপরিগ্গহিতং। এতং অদিন্নং নাম।

Adinnaṃ nāmaṃ yaṃ adinnaṃ anissaṭṭhaṃ apariccattaṃ rakkhitaṃ gopitaṃ mamāyitaṃ parapariggahitaṃ. Etaṃ adinnaṃ nāma.

থেয্যসঙ্খাতন্তি থেয্যচিত্তো অৰহরণচিত্তো।

Theyyasaṅkhātanti theyyacitto avaharaṇacitto.

আদিযেয্যাতি আদিযেয্য হরেয্য অৰহরেয্য ইরিযাপথং ৰিকোপেয্য ঠানা চাৰেয্য সঙ্কেতং ৰীতিনামেয্য।

Ādiyeyyāti ādiyeyya hareyya avahareyya iriyāpathaṃ vikopeyya ṭhānā cāveyya saṅketaṃ vītināmeyya.

যথারূপং নাম পাদং ৰা পাদারহং ৰা অতিরেকপাদং ৰা।

Yathārūpaṃ nāma pādaṃ vā pādārahaṃ vā atirekapādaṃ vā.

রাজানো নাম পথব্যারাজা পদেসরাজা মণ্ডলিকা অন্তরভোগিকা অক্খদস্সা মহামত্তা, যে ৰা পন ছেজ্জভেজ্জং করোন্তা অনুসাসন্তি। এতে রাজানো নাম।

Rājāno nāma pathabyārājā padesarājā maṇḍalikā antarabhogikā akkhadassā mahāmattā, ye vā pana chejjabhejjaṃ karontā anusāsanti. Ete rājāno nāma.

চোরো নাম যো পঞ্চমাসকং ৰা অতিরেকপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি। এসো চোরো নাম।

Coro nāma yo pañcamāsakaṃ vā atirekapañcamāsakaṃ vā agghanakaṃ adinnaṃ theyyasaṅkhātaṃ ādiyati. Eso coro nāma.

হনেয্যুং ৰাতি হত্থেন ৰা পাদেন ৰা কসায ৰা ৰেত্তেন ৰা অড্ঢদণ্ডকেন ৰা ছেজ্জায ৰা হনেয্যুং।

Haneyyuṃ vāti hatthena vā pādena vā kasāya vā vettena vā aḍḍhadaṇḍakena vā chejjāya vā haneyyuṃ.

বন্ধেয্যুং ৰাতি রজ্জুবন্ধনেন ৰা অন্দুবন্ধনেন ৰা সঙ্খলিকবন্ধনেন ৰা ঘরবন্ধনেন ৰা নগরবন্ধনেন ৰা গামবন্ধনেন ৰা নিগমবন্ধনেন ৰা বন্ধেয্যুং, পুরিসগুত্তিং ৰা করেয্যুং।

Bandheyyuṃ vāti rajjubandhanena vā andubandhanena vā saṅkhalikabandhanena vā gharabandhanena vā nagarabandhanena vā gāmabandhanena vā nigamabandhanena vā bandheyyuṃ, purisaguttiṃ vā kareyyuṃ.

পব্বাজেয্যুং ৰাতি গামা ৰা নিগমা ৰা নগরা ৰা জনপদা ৰা জনপদপদেসা ৰা পব্বাজেয্যুং।

Pabbājeyyuṃ vāti gāmā vā nigamā vā nagarā vā janapadā vā janapadapadesā vā pabbājeyyuṃ.

চোরোসি বালোসি মূল়্হোসি থেনোসীতি পরিভাসো এসো।

Corosi bālosi mūḷhosi thenosīti paribhāso eso.

তথারূপং নাম পাদং ৰা পাদারহং ৰা অতিরেকপাদং ৰা।

Tathārūpaṃ nāma pādaṃ vā pādārahaṃ vā atirekapādaṃ vā.

আদিযমানোতি আদিযমানো হরমানো অৰহরমানো ইরিযাপথং ৰিকোপযমানো ঠানা চাৰযমানো সঙ্কেতং ৰীতিনামযমানো।

Ādiyamānoti ādiyamāno haramāno avaharamāno iriyāpathaṃ vikopayamāno ṭhānā cāvayamāno saṅketaṃ vītināmayamāno.

অযম্পীতি পুরিমং উপাদায ৰুচ্চতি।

Ayampīti purimaṃ upādāya vuccati.

পারাজিকো হোতীতি সেয্যথাপি নাম পণ্ডুপলাসো বন্ধনা পৰুত্তো ¹⁷ অভব্বো হরিতত্থায ¹⁸, এৰমেৰ ভিক্খু পাদং ৰা পাদারহং ৰা অতিরেকপাদং ৰা অদিন্নং থেয্যসঙ্খাতং আদিযিত্ৰা অস্সমণো হোতি অসক্যপুত্তিযো। তেন ৰুচ্চতি – ‘পারাজিকো হোতী’তি।

Pārājikohotīti seyyathāpi nāma paṇḍupalāso bandhanā pavutto ¹⁹ abhabbo haritatthāya ²⁰, evameva bhikkhu pādaṃ vā pādārahaṃ vā atirekapādaṃ vā adinnaṃ theyyasaṅkhātaṃ ādiyitvā assamaṇo hoti asakyaputtiyo. Tena vuccati – ‘pārājiko hotī’ti.

অসংৰাসোতি সংৰাসো নাম এককম্মং একুদ্দেসো সমসিক্খতা। এসো সংৰাসো নাম। সো তেন সদ্ধিং নত্থি। তেন ৰুচ্চতি – ‘অসংৰাসো’তি।

Asaṃvāsoti saṃvāso nāma ekakammaṃ ekuddeso samasikkhatā. Eso saṃvāso nāma. So tena saddhiṃ natthi. Tena vuccati – ‘asaṃvāso’ti.

৯৩. ভূমট্ঠং থলট্ঠং আকাসট্ঠং ৰেহাসট্ঠং উদকট্ঠং নাৰট্ঠং যানট্ঠং ভারট্ঠং আরামট্ঠং ৰিহারট্ঠং খেত্তট্ঠং ৰত্থুট্ঠং গামট্ঠং অরঞ্ঞট্ঠং উদকং দন্তপোণং ²¹ ৰনপ্পতি হরণকং উপনিধি সুঙ্কঘাতং পাণো অপদং দ্ৰিপদং চতুপ্পদং বহুপ্পদং ওচরকো ওণিরক্খো সংৰিদাৰহারো সঙ্কেতকম্মং নিমিত্তকম্মন্তি।

93. Bhūmaṭṭhaṃ thalaṭṭhaṃ ākāsaṭṭhaṃ vehāsaṭṭhaṃ udakaṭṭhaṃ nāvaṭṭhaṃ yānaṭṭhaṃ bhāraṭṭhaṃ ārāmaṭṭhaṃ vihāraṭṭhaṃ khettaṭṭhaṃ vatthuṭṭhaṃ gāmaṭṭhaṃ araññaṭṭhaṃ udakaṃ dantapoṇaṃ ²² vanappati haraṇakaṃ upanidhi suṅkaghātaṃ pāṇo apadaṃ dvipadaṃ catuppadaṃ bahuppadaṃ ocarako oṇirakkho saṃvidāvahāro saṅketakammaṃ nimittakammanti.

৯৪. ভূমট্ঠং নাম ভণ্ডং ভূমিযং নিক্খিত্তং হোতি নিখাতং পটিচ্ছন্নং। ভূমট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি কুদালং ৰা পিটকং ৰা পরিযেসতি গচ্ছতি ৰা, আপত্তি দুক্কটস্স। তত্থ জাতকং কট্ঠং ৰা লতং ৰা ছিন্দতি, আপত্তি দুক্কটস্স। তত্থ পংসুং খণতি ৰা ব্যূহতি ²³ ৰা উদ্ধরতি ৰা, আপত্তি দুক্কটস্স। কুম্ভিং আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। অত্তনো ভাজনং পৰেসেত্ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। অত্তনো ভাজনগতং ৰা করোতি মুট্ঠিং ৰা ছিন্দতি, আপত্তি পারাজিকস্স। সুত্তারুল়্হং ভণ্ডং পামঙ্গং ৰা কণ্ঠসুত্তকং ৰা কটিসুত্তকং ৰা সাটকং ৰা ৰেঠনং ৰা থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। কোটিযং গহেত্ৰা উচ্চারেতি, আপত্তি থুল্লচ্চযস্স। ঘংসন্তো নীহরতি, আপত্তি থুল্লচ্চযস্স। অন্তমসো কেসগ্গমত্তম্পি কুম্ভিমুখা মোচেতি, আপত্তি পারাজিকস্স। সপ্পিং ৰা তেলং ৰা মধুং ৰা ফাণিতং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো একেন পযোগেন পিৰতি, আপত্তি পারাজিকস্স। তত্থেৰ ভিন্দতি ৰা ছড্ডেতি ৰা ঝাপেতি ৰা অপরিভোগং ৰা করোতি, আপত্তি দুক্কটস্স।

94.Bhūmaṭṭhaṃ nāma bhaṇḍaṃ bhūmiyaṃ nikkhittaṃ hoti nikhātaṃ paṭicchannaṃ. Bhūmaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati kudālaṃ vā piṭakaṃ vā pariyesati gacchati vā, āpatti dukkaṭassa. Tattha jātakaṃ kaṭṭhaṃ vā lataṃ vā chindati, āpatti dukkaṭassa. Tattha paṃsuṃ khaṇati vā byūhati ²⁴ vā uddharati vā, āpatti dukkaṭassa. Kumbhiṃ āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Attano bhājanaṃ pavesetvā pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Attano bhājanagataṃ vā karoti muṭṭhiṃ vā chindati, āpatti pārājikassa. Suttāruḷhaṃ bhaṇḍaṃ pāmaṅgaṃ vā kaṇṭhasuttakaṃ vā kaṭisuttakaṃ vā sāṭakaṃ vā veṭhanaṃ vā theyyacitto āmasati, āpatti dukkaṭassa. Phandāpeti, āpatti thullaccayassa. Koṭiyaṃ gahetvā uccāreti, āpatti thullaccayassa. Ghaṃsanto nīharati, āpatti thullaccayassa. Antamaso kesaggamattampi kumbhimukhā moceti, āpatti pārājikassa. Sappiṃ vā telaṃ vā madhuṃ vā phāṇitaṃ vā pañcamāsakaṃ vā atirekapañcamāsakaṃ vā agghanakaṃ theyyacitto ekena payogena pivati, āpatti pārājikassa. Tattheva bhindati vā chaḍḍeti vā jhāpeti vā aparibhogaṃ vā karoti, āpatti dukkaṭassa.

৯৫. থলট্ঠং নাম ভণ্ডং থলে নিক্খিত্তং হোতি। থলট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

95.Thalaṭṭhaṃ nāma bhaṇḍaṃ thale nikkhittaṃ hoti. Thalaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

৯৬. আকাসট্ঠং নাম ভণ্ডং আকাসগতং হোতি। মোরো ৰা কপিঞ্জরো ৰা তিত্তিরো ৰা ৰট্টকো ৰা, সাটকং ৰা ৰেঠনং ৰা হিরঞ্ঞং ৰা সুৰণ্ণং ৰা ছিজ্জমানং পততি। আকাসট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স । গমনং উপচ্ছিন্দতি, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

96.Ākāsaṭṭhaṃ nāma bhaṇḍaṃ ākāsagataṃ hoti. Moro vā kapiñjaro vā tittiro vā vaṭṭako vā, sāṭakaṃ vā veṭhanaṃ vā hiraññaṃ vā suvaṇṇaṃ vā chijjamānaṃ patati. Ākāsaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa . Gamanaṃ upacchindati, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

৯৭. ৰেহাসট্ঠং নাম ভণ্ডং ৰেহাসগতং হোতি। মঞ্চে ৰা পীঠে ৰা চীৰরৰংসে ৰা চীৰররজ্জুযা ৰা ভিত্তিখিলে ৰা নাগদন্তে ৰা রুক্খে ৰা লগ্গিতং হোতি, অন্তমসো পত্তাধারকেপি। ৰেহাসট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

97.Vehāsaṭṭhaṃ nāma bhaṇḍaṃ vehāsagataṃ hoti. Mañce vā pīṭhe vā cīvaravaṃse vā cīvararajjuyā vā bhittikhile vā nāgadante vā rukkhe vā laggitaṃ hoti, antamaso pattādhārakepi. Vehāsaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

৯৮. উদকট্ঠং নাম ভণ্ডং উদকে নিক্খিত্তং হোতি। উদকট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। নিমুজ্জতি ৰা উম্মুজ্জতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। তত্থ জাতকং উপ্পলং ৰা পদুমং ৰা পুণ্ডরীকং ৰা ভিসং ৰা মচ্ছং ৰা কচ্ছপং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

98.Udakaṭṭhaṃ nāma bhaṇḍaṃ udake nikkhittaṃ hoti. Udakaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Nimujjati vā ummujjati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Tattha jātakaṃ uppalaṃ vā padumaṃ vā puṇḍarīkaṃ vā bhisaṃ vā macchaṃ vā kacchapaṃ vā pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

৯৯. নাৰা নাম যায তরতি। নাৰট্ঠং নাম ভণ্ডং নাৰায নিক্খিত্তং হোতি। ‘‘নাৰট্ঠং ভণ্ডং অৰহরিস্সামী’’তি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। নাৰং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। বন্ধনং মোচেতি, আপত্তি দুক্কটস্স। বন্ধনং মোচেত্ৰা আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। উদ্ধং ৰা অধো ৰা তিরিযং ৰা অন্তমসো কেসগ্গমত্তম্পি সঙ্কামেতি, আপত্তি পারাজিকস্স।

99.Nāvā nāma yāya tarati. Nāvaṭṭhaṃ nāma bhaṇḍaṃ nāvāya nikkhittaṃ hoti. ‘‘Nāvaṭṭhaṃ bhaṇḍaṃ avaharissāmī’’ti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Nāvaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Bandhanaṃ moceti, āpatti dukkaṭassa. Bandhanaṃ mocetvā āmasati, āpatti dukkaṭassa. Phandāpeti, āpatti thullaccayassa. Uddhaṃ vā adho vā tiriyaṃ vā antamaso kesaggamattampi saṅkāmeti, āpatti pārājikassa.

১০০. যানং নাম ৰয্হং রথো সকটং সন্দমানিকা। যানট্ঠং নাম ভণ্ডং যানে নিক্খিত্তং হোতি। যানট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। যানং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

100.Yānaṃ nāma vayhaṃ ratho sakaṭaṃ sandamānikā. Yānaṭṭhaṃ nāma bhaṇḍaṃ yāne nikkhittaṃ hoti. Yānaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Yānaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

১০১. ভারো নাম সীসভারো খন্ধভারো কটিভারো ওলম্বকো। সীসে ভারং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। খন্ধং ওরোপেতি, আপত্তি পারাজিকস্স। খন্ধে ভারং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। কটিং ওরোপেতি, আপত্তি পারাজিকস্স। কটিযা ভারং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। হত্থেন গণ্হাতি, আপত্তি পারাজিকস্স। হত্থে ভারং থেয্যচিত্তো ভূমিযং নিক্খিপতি, আপত্তি পারাজিকস্স। থেয্যচিত্তো ভূমিতো গণ্হাতি, আপত্তি পারাজিকস্স।

101.Bhāro nāma sīsabhāro khandhabhāro kaṭibhāro olambako. Sīse bhāraṃ theyyacitto āmasati, āpatti dukkaṭassa. Phandāpeti, āpatti thullaccayassa. Khandhaṃ oropeti, āpatti pārājikassa. Khandhe bhāraṃ theyyacitto āmasati, āpatti dukkaṭassa. Phandāpeti, āpatti thullaccayassa. Kaṭiṃ oropeti, āpatti pārājikassa. Kaṭiyā bhāraṃ theyyacitto āmasati, āpatti dukkaṭassa. Phandāpeti, āpatti thullaccayassa. Hatthena gaṇhāti, āpatti pārājikassa. Hatthe bhāraṃ theyyacitto bhūmiyaṃ nikkhipati, āpatti pārājikassa. Theyyacitto bhūmito gaṇhāti, āpatti pārājikassa.

১০২. আরামো নাম পুপ্ফারামো ফলারামো। আরামট্ঠং নাম ভণ্ডং আরামে চতূহি ঠানেহি নিক্খিত্তং হোতি – ভূমট্ঠং থলট্ঠং, আকাসট্ঠং, ৰেহাসট্ঠং। আরামট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। তত্থ জাতকং মূলং ৰা তচং ৰা পত্তং ৰা পুপ্ফং ৰা ফলং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। আরামং অভিযুঞ্জতি, আপত্তি দুক্কটস্স। সামিকস্স ৰিমতিং উপ্পাদেতি, আপত্তি থুল্লচ্চযস্স। সামিকো ন ময্হং ভৰিস্সতীতি ধুরং নিক্খিপতি, আপত্তি পারাজিকস্স। ধম্মং চরন্তো সামিকং পরাজেতি, আপত্তি পারাজিকস্স। ধম্মং চরন্তো পরজ্জতি, আপত্তি থুল্লচ্চযস্স।

102.Ārāmo nāma pupphārāmo phalārāmo. Ārāmaṭṭhaṃ nāma bhaṇḍaṃ ārāme catūhi ṭhānehi nikkhittaṃ hoti – bhūmaṭṭhaṃ thalaṭṭhaṃ, ākāsaṭṭhaṃ, vehāsaṭṭhaṃ. Ārāmaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Tattha jātakaṃ mūlaṃ vā tacaṃ vā pattaṃ vā pupphaṃ vā phalaṃ vā pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Ārāmaṃ abhiyuñjati, āpatti dukkaṭassa. Sāmikassa vimatiṃ uppādeti, āpatti thullaccayassa. Sāmiko na mayhaṃ bhavissatīti dhuraṃ nikkhipati, āpatti pārājikassa. Dhammaṃ caranto sāmikaṃ parājeti, āpatti pārājikassa. Dhammaṃ caranto parajjati, āpatti thullaccayassa.

১০৩. ৰিহারট্ঠং নাম ভণ্ডং ৰিহারে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং। ৰিহারট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। ৰিহারং অভিযুঞ্জতি, আপত্তি দুক্কটস্স। সামিকস্স ৰিমতিং উপ্পাদেতি, আপত্তি থুল্লচ্চযস্স। সামিকো ন ময্হং ভৰিস্সতীতি ধুরং নিক্খিপতি, আপত্তি পারাজিকস্স। ধম্মং চরন্তো সামিকং পরাজেতি, আপত্তি পারাজিকস্স। ধম্মং চরন্তো পরজ্জতি, আপত্তি থুল্লচ্চযস্স।

103.Vihāraṭṭhaṃ nāma bhaṇḍaṃ vihāre catūhi ṭhānehi nikkhittaṃ hoti – bhūmaṭṭhaṃ, thalaṭṭhaṃ, ākāsaṭṭhaṃ, vehāsaṭṭhaṃ. Vihāraṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Vihāraṃ abhiyuñjati, āpatti dukkaṭassa. Sāmikassa vimatiṃ uppādeti, āpatti thullaccayassa. Sāmiko na mayhaṃ bhavissatīti dhuraṃ nikkhipati, āpatti pārājikassa. Dhammaṃ caranto sāmikaṃ parājeti, āpatti pārājikassa. Dhammaṃ caranto parajjati, āpatti thullaccayassa.

১০৪. খেত্তং নাম যত্থ পুব্বণ্ণং ৰা অপরণ্ণং ৰা জাযতি। খেত্তট্ঠং নাম ভণ্ডং খেত্তে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং। খেত্তট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি, দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। তত্থ জাতকং পুব্বণ্ণং ৰা অপরণ্ণং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। খেত্তং অভিযুঞ্জতি, আপত্তি দুক্কটস্স। সামিকস্স ৰিমতিং উপ্পাদেতি, আপত্তি থুল্লচ্চযস্স। সামিকো ন ময্হং ভৰিস্সতীতি ধুরং নিক্খিপতি, আপত্তি পারাজিকস্স। ধম্মং চরন্তো সামিকং পরাজেতি, আপত্তি পারাজিকস্স। ধম্মং চরন্তো পরজ্জতি, আপত্তি থুল্লচ্চযস্স। খিলং ৰা রজ্জুং ৰা ৰতিং ৰা মরিযাদং ৰা সঙ্কামেতি, আপত্তি দুক্কটস্স। একং পযোগং অনাগতে, আপত্তি থুল্লচ্চযস্স। তস্মিং পযোগে আগতে, আপত্তি পারাজিকস্স।

104.Khettaṃ nāma yattha pubbaṇṇaṃ vā aparaṇṇaṃ vā jāyati. Khettaṭṭhaṃ nāma bhaṇḍaṃ khette catūhi ṭhānehi nikkhittaṃ hoti – bhūmaṭṭhaṃ, thalaṭṭhaṃ, ākāsaṭṭhaṃ, vehāsaṭṭhaṃ. Khettaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti, dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Tattha jātakaṃ pubbaṇṇaṃ vā aparaṇṇaṃ vā pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Khettaṃ abhiyuñjati, āpatti dukkaṭassa. Sāmikassa vimatiṃ uppādeti, āpatti thullaccayassa. Sāmiko na mayhaṃ bhavissatīti dhuraṃ nikkhipati, āpatti pārājikassa. Dhammaṃ caranto sāmikaṃ parājeti, āpatti pārājikassa. Dhammaṃ caranto parajjati, āpatti thullaccayassa. Khilaṃ vā rajjuṃ vā vatiṃ vā mariyādaṃ vā saṅkāmeti, āpatti dukkaṭassa. Ekaṃ payogaṃ anāgate, āpatti thullaccayassa. Tasmiṃ payoge āgate, āpatti pārājikassa.

১০৫. ৰত্থু নাম আরামৰত্থু ৰিহারৰত্থু। ৰত্থুট্ঠং নাম ভণ্ডং ৰত্থুস্মিং চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং। ৰত্থুট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। ৰত্থুং অভিযুঞ্জতি, আপত্তি দুক্কটস্স। সামিকস্স ৰিমতিং উপ্পাদেতি, আপত্তি থুল্লচ্চযস্স। সামিকো ন ময্হং ভৰিস্সতীতি ধুরং নিক্খিপতি, আপত্তি পারাজিকস্স। ধম্মং চরন্তো সামিকং পরাজেতি, আপত্তি পারাজিকস্স। ধম্মং চরন্তো পরজ্জতি, আপত্তি থুল্লচ্চযস্স। খীলং ৰা রজ্জুং ৰা ৰতিং ৰা পাকারং ৰা সঙ্কামেতি, আপত্তি দুক্কটস্স। একং পযোগং অনাগতে আপত্তি থুল্লচ্চযস্স। তস্মিং পযোগে আগতে আপত্তি পারাজিকস্স।

105.Vatthu nāma ārāmavatthu vihāravatthu. Vatthuṭṭhaṃ nāma bhaṇḍaṃ vatthusmiṃ catūhi ṭhānehi nikkhittaṃ hoti – bhūmaṭṭhaṃ, thalaṭṭhaṃ, ākāsaṭṭhaṃ, vehāsaṭṭhaṃ. Vatthuṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Vatthuṃ abhiyuñjati, āpatti dukkaṭassa. Sāmikassa vimatiṃ uppādeti, āpatti thullaccayassa. Sāmiko na mayhaṃ bhavissatīti dhuraṃ nikkhipati, āpatti pārājikassa. Dhammaṃ caranto sāmikaṃ parājeti, āpatti pārājikassa. Dhammaṃ caranto parajjati, āpatti thullaccayassa. Khīlaṃ vā rajjuṃ vā vatiṃ vā pākāraṃ vā saṅkāmeti, āpatti dukkaṭassa. Ekaṃ payogaṃ anāgate āpatti thullaccayassa. Tasmiṃ payoge āgate āpatti pārājikassa.

১০৬. গামট্ঠং নাম ভণ্ডং গামে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং। গামট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

106.Gāmaṭṭhaṃ nāma bhaṇḍaṃ gāme catūhi ṭhānehi nikkhittaṃ hoti – bhūmaṭṭhaṃ, thalaṭṭhaṃ, ākāsaṭṭhaṃ, vehāsaṭṭhaṃ. Gāmaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

১০৭. অরঞ্ঞং নাম যং মনুস্সানং পরিগ্গহিতং হোতি, তং অরঞ্ঞং। অরঞ্ঞট্ঠং নাম ভণ্ডং অরঞ্ঞে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং। অরঞ্ঞট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। তত্থ জাতকং কট্ঠং ৰা লতং ৰা তিণং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

107.Araññaṃ nāma yaṃ manussānaṃ pariggahitaṃ hoti, taṃ araññaṃ. Araññaṭṭhaṃ nāma bhaṇḍaṃ araññe catūhi ṭhānehi nikkhittaṃ hoti – bhūmaṭṭhaṃ, thalaṭṭhaṃ, ākāsaṭṭhaṃ, vehāsaṭṭhaṃ. Araññaṭṭhaṃ bhaṇḍaṃ avaharissāmīti theyyacitto dutiyaṃ vā pariyesati gacchati vā, āpatti dukkaṭassa. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Tattha jātakaṃ kaṭṭhaṃ vā lataṃ vā tiṇaṃ vā pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

১০৮. উদকং নাম ভাজনগতং ৰা হোতি পোক্খরণিযা ৰা তল়াকে ৰা। থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স । অত্তনো ভাজনং পৰেসেত্ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং উদকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। অত্তনো ভাজনগতং করোতি, আপত্তি পারাজিকস্স। মরিযাদং ভিন্দতি, আপত্তি দুক্কটস্স। মরিযাদং ভিন্দিত্ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং উদকং নিক্খামেতি, আপত্তি পারাজিকস্স। অতিরেকমাসকং ৰা ঊনপঞ্চমাসকং ৰা অগ্ঘনকং উদকং নিক্খামেতি, আপত্তি থুল্লচ্চযস্স। মাসকং ৰা ঊনমাসকং ৰা অগ্ঘনকং উদকং নিক্খামেতি, আপত্তি দুক্কটস্স।

108.Udakaṃ nāma bhājanagataṃ vā hoti pokkharaṇiyā vā taḷāke vā. Theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa . Attano bhājanaṃ pavesetvā pañcamāsakaṃ vā atirekapañcamāsakaṃ vā agghanakaṃ udakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Attano bhājanagataṃ karoti, āpatti pārājikassa. Mariyādaṃ bhindati, āpatti dukkaṭassa. Mariyādaṃ bhinditvā pañcamāsakaṃ vā atirekapañcamāsakaṃ vā agghanakaṃ udakaṃ nikkhāmeti, āpatti pārājikassa. Atirekamāsakaṃ vā ūnapañcamāsakaṃ vā agghanakaṃ udakaṃ nikkhāmeti, āpatti thullaccayassa. Māsakaṃ vā ūnamāsakaṃ vā agghanakaṃ udakaṃ nikkhāmeti, āpatti dukkaṭassa.

১০৯. দন্তপোণং নাম ছিন্নং ৰা অচ্ছিন্নং ৰা। পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

109.Dantapoṇaṃ nāma chinnaṃ vā acchinnaṃ vā. Pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

১১০. ৰনপ্পতি নাম যো মনুস্সানং পরিগ্গহিতো হোতি রুক্খো পরিভোগো। থেয্যচিত্তো ছিন্দতি, পহারে পহারে আপত্তি দুক্কটস্স। একং পহারং অনাগতে, আপত্তি থুল্লচ্চযস্স। তস্মিং পহারে আগতে, আপত্তি পারাজিকস্স।

110.Vanappati nāma yo manussānaṃ pariggahito hoti rukkho paribhogo. Theyyacitto chindati, pahāre pahāre āpatti dukkaṭassa. Ekaṃ pahāraṃ anāgate, āpatti thullaccayassa. Tasmiṃ pahāre āgate, āpatti pārājikassa.

১১১. হরণকং নাম অঞ্ঞস্স হরণকং ভণ্ডং। থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। সহভণ্ডহারকং পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স। দুতিযং পাদং সঙ্কামেতি, আপত্তি পারাজিকস্স। পতিতং ভণ্ডং গহেস্সামীতি পাতাপেতি, আপত্তি দুক্কটস্স। পতিতং ভণ্ডং পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

111.Haraṇakaṃ nāma aññassa haraṇakaṃ bhaṇḍaṃ. Theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Sahabhaṇḍahārakaṃ padasā nessāmīti paṭhamaṃ pādaṃ saṅkāmeti, āpatti thullaccayassa. Dutiyaṃ pādaṃ saṅkāmeti, āpatti pārājikassa. Patitaṃ bhaṇḍaṃ gahessāmīti pātāpeti, āpatti dukkaṭassa. Patitaṃ bhaṇḍaṃ pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

১১২. উপনিধি নাম উপনিক্খিত্তং ভণ্ডং। দেহি মে ভণ্ডন্তি ৰুচ্চমানো নাহং গণ্হামীতি ভণতি, আপত্তি দুক্কটস্স। সামিকস্স ৰিমতিং উপ্পাদেতি , আপত্তি থুল্লচ্চযস্স । সামিকো ন ময্হং দস্সতীতি ধুরং নিক্খিপতি, আপত্তি পারাজিকস্স। ধম্মং চরন্তো সামিকং পরাজেতি, আপত্তি পারাজিকস্স। ধম্মং চরন্তো পরজ্জতি, আপত্তি থুল্লচ্চযস্স।

112.Upanidhi nāma upanikkhittaṃ bhaṇḍaṃ. Dehi me bhaṇḍanti vuccamāno nāhaṃ gaṇhāmīti bhaṇati, āpatti dukkaṭassa. Sāmikassa vimatiṃ uppādeti , āpatti thullaccayassa . Sāmiko na mayhaṃ dassatīti dhuraṃ nikkhipati, āpatti pārājikassa. Dhammaṃ caranto sāmikaṃ parājeti, āpatti pārājikassa. Dhammaṃ caranto parajjati, āpatti thullaccayassa.

১১৩. সুঙ্কঘাতং নাম রঞ্ঞা ঠপিতং হোতি পব্বতখণ্ডে ৰা নদীতিত্থে ৰা গামদ্ৰারে ৰা – ‘অত্র পৰিট্ঠস্স সুঙ্কং গণ্হন্তূ’তি। তত্র পৰিসিত্ৰা রাজগ্গং ²⁵ ভণ্ডং পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। পঠমং পাদং সুঙ্কঘাতং অতিক্কামেতি, আপত্তি থুল্লচ্চযস্স। দুতিযং পাদং অতিক্কামেতি, আপত্তি পারাজিকস্স। অন্তোসুঙ্কঘাতে ঠিতো বহিসুঙ্কঘাতং পাতেতি, আপত্তি পারাজিকস্স। সুঙ্কং পরিহরতি, আপত্তি দুক্কটস্স।

113.Suṅkaghātaṃ nāma raññā ṭhapitaṃ hoti pabbatakhaṇḍe vā nadītitthe vā gāmadvāre vā – ‘atra paviṭṭhassa suṅkaṃ gaṇhantū’ti. Tatra pavisitvā rājaggaṃ ²⁶ bhaṇḍaṃ pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Paṭhamaṃ pādaṃ suṅkaghātaṃ atikkāmeti, āpatti thullaccayassa. Dutiyaṃ pādaṃ atikkāmeti, āpatti pārājikassa. Antosuṅkaghāte ṭhito bahisuṅkaghātaṃ pāteti, āpatti pārājikassa. Suṅkaṃ pariharati, āpatti dukkaṭassa.

১১৪. পাণো নাম মনুস্সপাণো ৰুচ্চতি। থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স। দুতিযং পাদং সঙ্কামেতি, আপত্তি পারাজিকস্স।

114.Pāṇo nāma manussapāṇo vuccati. Theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Padasā nessāmīti paṭhamaṃ pādaṃ saṅkāmeti, āpatti thullaccayassa. Dutiyaṃ pādaṃ saṅkāmeti, āpatti pārājikassa.

অপদং নাম অহি মচ্ছা। পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

Apadaṃ nāma ahi macchā. Pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

১১৫. দ্ৰিপদং নাম মনুস্সা, পক্খজাতা। থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স। দুতিযং পাদং সঙ্কামেতি, আপত্তি পারাজিকস্স।

115.Dvipadaṃ nāma manussā, pakkhajātā. Theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Padasā nessāmīti paṭhamaṃ pādaṃ saṅkāmeti, āpatti thullaccayassa. Dutiyaṃ pādaṃ saṅkāmeti, āpatti pārājikassa.

১১৬. চতুপ্পদং নাম – হত্থী অস্সা ওট্ঠা গোণা গদ্রভা পসুকা। থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স। দুতিযং পাদং সঙ্কামেতি, আপত্তি থুল্লচ্চযস্স। ততিযং পাদং সঙ্কামেতি, আপত্তি থুল্লচ্চযস্স। চতুত্থং পাদং সঙ্কামেতি, আপত্তি পারাজিকস্স।

116.Catuppadaṃ nāma – hatthī assā oṭṭhā goṇā gadrabhā pasukā. Theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Padasā nessāmīti paṭhamaṃ pādaṃ saṅkāmeti, āpatti thullaccayassa. Dutiyaṃ pādaṃ saṅkāmeti, āpatti thullaccayassa. Tatiyaṃ pādaṃ saṅkāmeti, āpatti thullaccayassa. Catutthaṃ pādaṃ saṅkāmeti, āpatti pārājikassa.

১১৭. বহুপ্পদং নাম – ৰিচ্ছিকা সতপদী উচ্চালিঙ্গপাণকা। পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স। পদসা নেস্সামীতি সঙ্কামেতি, পদে পদে আপত্তি থুল্লচ্চযস্স। পচ্ছিমং পাদং সঙ্কামেতি, আপত্তি পারাজিকস্স।

117.Bahuppadaṃ nāma – vicchikā satapadī uccāliṅgapāṇakā. Pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa. Padasā nessāmīti saṅkāmeti, pade pade āpatti thullaccayassa. Pacchimaṃ pādaṃ saṅkāmeti, āpatti pārājikassa.

১১৮. ওচরকো নাম ভণ্ডং ওচরিত্ৰা আচিক্খতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স। সো তং ভণ্ডং অৰহরতি, আপত্তি উভিন্নং পারাজিকস্স।

118.Ocarako nāma bhaṇḍaṃ ocaritvā ācikkhati – ‘‘itthannāmaṃ bhaṇḍaṃ avaharā’’ti, āpatti dukkaṭassa. So taṃ bhaṇḍaṃ avaharati, āpatti ubhinnaṃ pārājikassa.

ওণিরক্খো নাম আহটং ভণ্ডং গোপেন্তো পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

Oṇirakkho nāma āhaṭaṃ bhaṇḍaṃ gopento pañcamāsakaṃ vā atirekapañcamāsakaṃ vā agghanakaṃ theyyacitto āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

সংৰিদাৰহারো নাম সম্বহুলা সংৰিদহিত্ৰা একো ভণ্ডং অৰহরতি, আপত্তি সব্বেসং পারাজিকস্স।

Saṃvidāvahāro nāma sambahulā saṃvidahitvā eko bhaṇḍaṃ avaharati, āpatti sabbesaṃ pārājikassa.

১১৯. সঙ্কেতকম্মং নাম সঙ্কেতং করোতি – ‘‘পুরেভত্তং ৰা পচ্ছাভত্তং ৰা রত্তিং ৰা দিৰা ৰা তেন সঙ্কেতেন তং ভণ্ডং অৰহরা’’তি, আপত্তি দুক্কটস্স। তেন সঙ্কেতেন তং ভণ্ডং অৰহরতি, আপত্তি উভিন্নং পারাজিকস্স। তং সঙ্কেতং পুরে ৰা পচ্ছা ৰা তং ভণ্ডং অৰহরতি, মূলট্ঠস্স অনাপত্তি। অৰহারকস্স আপত্তি পারাজিকস্স।

119.Saṅketakammaṃ nāma saṅketaṃ karoti – ‘‘purebhattaṃ vā pacchābhattaṃ vā rattiṃ vā divā vā tena saṅketena taṃ bhaṇḍaṃ avaharā’’ti, āpatti dukkaṭassa. Tena saṅketena taṃ bhaṇḍaṃ avaharati, āpatti ubhinnaṃ pārājikassa. Taṃ saṅketaṃ pure vā pacchā vā taṃ bhaṇḍaṃ avaharati, mūlaṭṭhassa anāpatti. Avahārakassa āpatti pārājikassa.

১২০. নিমিত্তকম্মং নাম নিমিত্তং করোতি। অক্খিং ৰা নিখণিস্সামি ভমুকং ৰা উক্খিপিস্সামি সীসং ৰা উক্খিপিস্সামি, তেন নিমিত্তেন তং ভণ্ডং অৰহরাতি, আপত্তি দুক্কটস্স। তেন নিমিত্তেন তং ভণ্ডং অৰহরতি, আপত্তি উভিন্নং পারাজিকস্স। তং নিমিত্তং পুরে ৰা পচ্ছা ৰা তং ভণ্ডং অৰহরতি, মূলট্ঠস্স অনাপত্তি। অৰহারকস্স আপত্তি পারাজিকস্স।

120.Nimittakammaṃ nāma nimittaṃ karoti. Akkhiṃ vā nikhaṇissāmi bhamukaṃ vā ukkhipissāmi sīsaṃ vā ukkhipissāmi, tena nimittena taṃ bhaṇḍaṃ avaharāti, āpatti dukkaṭassa. Tena nimittena taṃ bhaṇḍaṃ avaharati, āpatti ubhinnaṃ pārājikassa. Taṃ nimittaṃ pure vā pacchā vā taṃ bhaṇḍaṃ avaharati, mūlaṭṭhassa anāpatti. Avahārakassa āpatti pārājikassa.

১২১. ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স। সো তং মঞ্ঞমানো তং অৰহরতি, আপত্তি উভিন্নং পারাজিকস্স।

121. Bhikkhu bhikkhuṃ āṇāpeti – ‘‘itthannāmaṃ bhaṇḍaṃ avaharā’’ti, āpatti dukkaṭassa. So taṃ maññamāno taṃ avaharati, āpatti ubhinnaṃ pārājikassa.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স। সো তং মঞ্ঞমানো অঞ্ঞং অৰহরতি, মূলট্ঠস্স অনাপত্তি। অৰহারকস্স আপত্তি পারাজিকস্স।

Bhikkhu bhikkhuṃ āṇāpeti – ‘‘itthannāmaṃ bhaṇḍaṃ avaharā’’ti, āpatti dukkaṭassa. So taṃ maññamāno aññaṃ avaharati, mūlaṭṭhassa anāpatti. Avahārakassa āpatti pārājikassa.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স। সো অঞ্ঞং মঞ্ঞমানো তং অৰহরতি, আপত্তি উভিন্নং পারাজিকস্স।

Bhikkhu bhikkhuṃ āṇāpeti – ‘‘itthannāmaṃ bhaṇḍaṃ avaharā’’ti, āpatti dukkaṭassa. So aññaṃ maññamāno taṃ avaharati, āpatti ubhinnaṃ pārājikassa.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স। সো অঞ্ঞং মঞ্ঞমানো অঞ্ঞং অৰহরতি, মূলট্ঠস্স অনাপত্তি। অৰহারকস্স আপত্তি পারাজিকস্স।

Bhikkhu bhikkhuṃ āṇāpeti – ‘‘itthannāmaṃ bhaṇḍaṃ avaharā’’ti, āpatti dukkaṭassa. So aññaṃ maññamāno aññaṃ avaharati, mūlaṭṭhassa anāpatti. Avahārakassa āpatti pārājikassa.

ভিক্খু ভিক্খুং আণাপেতি – ‘‘ইত্থন্নামস্স পাৰদ – ‘ইত্থন্নামো ইত্থন্নামস্স পাৰদতু – ইত্থন্নামো ইত্থন্নামং ভণ্ডং অৰহরতূ’’’তি, আপত্তি দুক্কটস্স। সো ইতরস্স আরোচেতি, আপত্তি দুক্কটস্স। অৰহারকো পটিগ্গণ্হাতি, মূলট্ঠস্স আপত্তি থুল্লচ্চযস্স। সো তং ভণ্ডং অৰহরতি, আপত্তি সব্বেসং পারাজিকস্স।

Bhikkhu bhikkhuṃ āṇāpeti – ‘‘itthannāmassa pāvada – ‘itthannāmo itthannāmassa pāvadatu – itthannāmo itthannāmaṃ bhaṇḍaṃ avaharatū’’’ti, āpatti dukkaṭassa. So itarassa āroceti, āpatti dukkaṭassa. Avahārako paṭiggaṇhāti, mūlaṭṭhassa āpatti thullaccayassa. So taṃ bhaṇḍaṃ avaharati, āpatti sabbesaṃ pārājikassa.

ভিক্খু ভিক্খুং আণাপেতি – ‘‘ইত্থন্নামস্স পাৰদ – ‘ইত্থন্নামো ইত্থন্নামস্স পাৰদতু – ইত্থন্নামো ইত্থন্নামং ভণ্ডং অৰহরতূ’’’তি, আপত্তি দুক্কটস্স। সো অঞ্ঞং আণাপেতি, আপত্তি দুক্কটস্স। অৰহারকো পটিগ্গণ্হাতি, আপত্তি দুক্কটস্স। সো তং ভণ্ডং অৰহরতি, মূলট্ঠস্স অনাপত্তি। আণাপকস্স চ অৰহারকস্স চ আপত্তি পারাজিকস্স।

Bhikkhu bhikkhuṃ āṇāpeti – ‘‘itthannāmassa pāvada – ‘itthannāmo itthannāmassa pāvadatu – itthannāmo itthannāmaṃ bhaṇḍaṃ avaharatū’’’ti, āpatti dukkaṭassa. So aññaṃ āṇāpeti, āpatti dukkaṭassa. Avahārako paṭiggaṇhāti, āpatti dukkaṭassa. So taṃ bhaṇḍaṃ avaharati, mūlaṭṭhassa anāpatti. Āṇāpakassa ca avahārakassa ca āpatti pārājikassa.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স। সো গন্ত্ৰা পুন পচ্চাগচ্ছতি – ‘‘নাহং সক্কোমি তং ভণ্ডং অৰহরিতু’’ন্তি। সো পুন আণাপেতি – ‘‘যদা সক্কোসি তদা তং ভণ্ডং অৰহরা’’তি, আপত্তি দুক্কটস্স। সো তং ভণ্ডং অৰহরতি, আপত্তি উভিন্নং পারাজিকস্স।

Bhikkhu bhikkhuṃ āṇāpeti – ‘‘itthannāmaṃ bhaṇḍaṃ avaharā’’ti, āpatti dukkaṭassa. So gantvā puna paccāgacchati – ‘‘nāhaṃ sakkomi taṃ bhaṇḍaṃ avaharitu’’nti. So puna āṇāpeti – ‘‘yadā sakkosi tadā taṃ bhaṇḍaṃ avaharā’’ti, āpatti dukkaṭassa. So taṃ bhaṇḍaṃ avaharati, āpatti ubhinnaṃ pārājikassa.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স। সো আণাপেত্ৰা ৰিপ্পটিসারী ন সাৰেতি – ‘‘মা অৰহরী’’তি। সো তং ভণ্ডং অৰহরতি, আপত্তি উভিন্নং পারাজিকস্স।

Bhikkhu bhikkhuṃ āṇāpeti – ‘‘itthannāmaṃ bhaṇḍaṃ avaharā’’ti, āpatti dukkaṭassa. So āṇāpetvā vippaṭisārī na sāveti – ‘‘mā avaharī’’ti. So taṃ bhaṇḍaṃ avaharati, āpatti ubhinnaṃ pārājikassa.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স। সো আণাপেত্ৰা ৰিপ্পটিসারী সাৰেতি – ‘‘মা অৰহরী’’তি। সো ‘‘আণত্তো অহং তযা’’তি, তং ভণ্ডং অৰহরতি, মূলট্ঠস্স অনাপত্তি। অৰহারকস্স আপত্তি পারাজিকস্স।

Bhikkhu bhikkhuṃ āṇāpeti – ‘‘itthannāmaṃ bhaṇḍaṃ avaharā’’ti, āpatti dukkaṭassa. So āṇāpetvā vippaṭisārī sāveti – ‘‘mā avaharī’’ti. So ‘‘āṇatto ahaṃ tayā’’ti, taṃ bhaṇḍaṃ avaharati, mūlaṭṭhassa anāpatti. Avahārakassa āpatti pārājikassa.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স। সো আণাপেত্ৰা ৰিপ্পটিসারী সাৰেতি – ‘‘মা অৰহরী’’তি। সো ‘‘সাধূ’’তি ²⁷? ওরমতি, উভিন্নং অনাপত্তি।

Bhikkhu bhikkhuṃ āṇāpeti – ‘‘itthannāmaṃ bhaṇḍaṃ avaharā’’ti, āpatti dukkaṭassa. So āṇāpetvā vippaṭisārī sāveti – ‘‘mā avaharī’’ti. So ‘‘sādhū’’ti ²⁸? Oramati, ubhinnaṃ anāpatti.

১২২. পঞ্চহি আকারেহি অদিন্নং আদিযন্তস্স আপত্তি পারাজিকস্স – পরপরিগ্গহিতঞ্চ হোতি, পরপরিগ্গহিতসঞ্ঞী চ, গরুকো চ হোতি পরিক্খারো, পঞ্চমাসকো ৰা অতিরেকপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি। আমসতি, আপত্তি দুক্কটস্স। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

122. Pañcahi ākārehi adinnaṃ ādiyantassa āpatti pārājikassa – parapariggahitañca hoti, parapariggahitasaññī ca, garuko ca hoti parikkhāro, pañcamāsako vā atirekapañcamāsako vā, theyyacittañca paccupaṭṭhitaṃ hoti. Āmasati, āpatti dukkaṭassa. Phandāpeti, āpatti thullaccayassa. Ṭhānā cāveti, āpatti pārājikassa.

১২৩. পঞ্চহি আকারেহি অদিন্নং আদিযন্তস্স আপত্তি থুল্লচ্চযস্স – পরপরিগ্গহিতঞ্চ হোতি, পরপরিগ্গহিতসঞ্ঞী চ, লহুকো চ হোতি পরিক্খারো, অতিরেকমাসকো ৰা ঊনপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি। আমসতি, আপত্তি দুক্কটস্স। ফন্দাপেতি, আপত্তি দুক্কটস্স। ঠানা চাৰেতি, আপত্তি থুল্লচ্চযস্স।

123. Pañcahi ākārehi adinnaṃ ādiyantassa āpatti thullaccayassa – parapariggahitañca hoti, parapariggahitasaññī ca, lahuko ca hoti parikkhāro, atirekamāsako vā ūnapañcamāsako vā, theyyacittañca paccupaṭṭhitaṃ hoti. Āmasati, āpatti dukkaṭassa. Phandāpeti, āpatti dukkaṭassa. Ṭhānā cāveti, āpatti thullaccayassa.

১২৪. পঞ্চহি আকারেহি অদিন্নং আদিযন্তস্স আপত্তি দুক্কটস্স। পরপরিগ্গহিতঞ্চ হোতি, পরপরিগ্গহিতসঞ্ঞী চ, লহুকো চ হোতি পরিক্খারো, মাসকো ৰা ঊনমাসকো ৰা, থেয্যচিত্তঞ্চ পচ্চুপট্ঠিতং হোতি। আমসতি, আপত্তি দুক্কটস্স। ফন্দাপেতি, আপত্তি দুক্কটস্স। ঠানা চাৰেতি, আপত্তি দুক্কটস্স।

124. Pañcahi ākārehi adinnaṃ ādiyantassa āpatti dukkaṭassa. Parapariggahitañca hoti, parapariggahitasaññī ca, lahuko ca hoti parikkhāro, māsako vā ūnamāsako vā, theyyacittañca paccupaṭṭhitaṃ hoti. Āmasati, āpatti dukkaṭassa. Phandāpeti, āpatti dukkaṭassa. Ṭhānā cāveti, āpatti dukkaṭassa.

১২৫. ছহি আকারেহি অদিন্নং আদিযন্তস্স আপত্তি পারাজিকস্স। ন চ সকসঞ্ঞী, ন চ ৰিস্সাসগ্গাহী, ন চ তাৰকালিকং, গরুকো চ হোতি পরিক্খারো, পঞ্চমাসকো ৰা অতিরেকপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি। আমসতি, আপত্তি দুক্কটস। ফন্দাপেতি, আপত্তি থুল্লচ্চযস্স। ঠানা চাৰেতি, আপত্তি পারাজিকস্স।

125. Chahi ākārehi adinnaṃ ādiyantassa āpatti pārājikassa. Na ca sakasaññī, na ca vissāsaggāhī, na ca tāvakālikaṃ, garuko ca hoti parikkhāro, pañcamāsako vā atirekapañcamāsako vā, theyyacittañca paccupaṭṭhitaṃ hoti. Āmasati, āpatti dukkaṭasa. Phandāpeti, āpatti thullaccayassa. Ṭhānā cāveti, āpatti pārājikassa.

১২৬. ছহি আকারেহি অদিন্নং আদিযন্তস্স আপত্তি থুল্লচ্চযস্স। ন চ সকসঞ্ঞী, ন চ ৰিস্সাসগ্গাহী, ন চ তাৰকালিকং, লহুকো চ হোতি পরিক্খারো অতিরেকমাসকো ৰা ঊনপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি। আমসতি, আপত্তি দুক্কটস্স। ফন্দাপেতি, আপত্তি দুক্কটস্স। ঠানা চাৰেতি, আপত্তি থুল্লচ্চযস্স।

126. Chahi ākārehi adinnaṃ ādiyantassa āpatti thullaccayassa. Na ca sakasaññī, na ca vissāsaggāhī, na ca tāvakālikaṃ, lahuko ca hoti parikkhāro atirekamāsako vā ūnapañcamāsako vā, theyyacittañca paccupaṭṭhitaṃ hoti. Āmasati, āpatti dukkaṭassa. Phandāpeti, āpatti dukkaṭassa. Ṭhānā cāveti, āpatti thullaccayassa.

১২৭. ছহি আকারেহি অদিন্নং আদিযন্তস্স আপত্তি দুক্কটস্স। ন চ সকসঞ্ঞী, ন চ ৰিস্সাসগ্গাহী, ন চ তাৰকালিকং, লহুকো চ হোতি পরিক্খারো, মাসকো ৰা ঊনমাসকো ৰা, থেয্যচিত্তঞ্চ পচ্চুপট্ঠিতং হোতি। আমসতি, আপত্তি দুক্কটস্স। ফন্দাপেতি, আপত্তি দুক্কটস্স। ঠানা চাৰেতি, আপত্তি দুক্কটস্স।

127. Chahi ākārehi adinnaṃ ādiyantassa āpatti dukkaṭassa. Na ca sakasaññī, na ca vissāsaggāhī, na ca tāvakālikaṃ, lahuko ca hoti parikkhāro, māsako vā ūnamāsako vā, theyyacittañca paccupaṭṭhitaṃ hoti. Āmasati, āpatti dukkaṭassa. Phandāpeti, āpatti dukkaṭassa. Ṭhānā cāveti, āpatti dukkaṭassa.

১২৮. পঞ্চহি আকারেহি অদিন্নং আদিযন্তস্স আপত্তি দুক্কটস্স। ন চ পরপরিগ্গহিতং হোতি, পরপরিগ্গহিতসঞ্ঞী চ, গরুকো চ হোতি পরিক্খারো, পঞ্চমাসকো ৰা অতিরেকপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি। আমসতি, আপত্তি দুক্কটস্স। ফন্দাপেতি, আপত্তি দুক্কটস্স। ঠানা চাৰেতি, আপত্তি দুক্কটস্স।

128. Pañcahi ākārehi adinnaṃ ādiyantassa āpatti dukkaṭassa. Na ca parapariggahitaṃ hoti, parapariggahitasaññī ca, garuko ca hoti parikkhāro, pañcamāsako vā atirekapañcamāsako vā, theyyacittañca paccupaṭṭhitaṃ hoti. Āmasati, āpatti dukkaṭassa. Phandāpeti, āpatti dukkaṭassa. Ṭhānā cāveti, āpatti dukkaṭassa.

১২৯. পঞ্চহি আকারেহি অদিন্নং আদিযন্তস্স আপত্তি দুক্কটস্স। ন চ পরপরিগ্গহিতং হোতি, পরপরিগ্গহিতসঞ্ঞী চ, লহুকো চ হোতি পরিক্খারো, অতিরেকমাসকো ৰা ঊনপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি। আমসতি, আপত্তি দুক্কটস্স। ফন্দাপেতি, আপত্তি দুক্কটস্স। ঠানা চাৰেতি, আপত্তি দুক্কটস্স।

129. Pañcahi ākārehi adinnaṃ ādiyantassa āpatti dukkaṭassa. Na ca parapariggahitaṃ hoti, parapariggahitasaññī ca, lahuko ca hoti parikkhāro, atirekamāsako vā ūnapañcamāsako vā, theyyacittañca paccupaṭṭhitaṃ hoti. Āmasati, āpatti dukkaṭassa. Phandāpeti, āpatti dukkaṭassa. Ṭhānā cāveti, āpatti dukkaṭassa.

১৩০. পঞ্চহি আকারেহি অদিন্নং আদিযন্তস্স আপত্তি দুক্কটস্স। ন চ পরপরিগ্গহিতং হোতি, পরপরিগ্গহিতসঞ্ঞী চ, লহুকো চ হোতি পরিক্খারো, মাসকো ৰা ঊনমাসকো ৰা, থেয্যচিত্তঞ্চ পচ্চুপট্ঠিতং হোতি। আমসতি, আপত্তি দুক্কটস্স। ফন্দাপেতি, আপত্তি দুক্কটস্স। ঠানা চাৰেতি, আপত্তি দুক্কটস্স।

130. Pañcahi ākārehi adinnaṃ ādiyantassa āpatti dukkaṭassa. Na ca parapariggahitaṃ hoti, parapariggahitasaññī ca, lahuko ca hoti parikkhāro, māsako vā ūnamāsako vā, theyyacittañca paccupaṭṭhitaṃ hoti. Āmasati, āpatti dukkaṭassa. Phandāpeti, āpatti dukkaṭassa. Ṭhānā cāveti, āpatti dukkaṭassa.

১৩১. অনাপত্তি সসঞ্ঞিস্স, ৰিস্সাসগ্গাহে, তাৰকালিকে, পেতপরিগ্গহে, তিরচ্ছানগতপরিগ্গহে, পংসুকূলসঞ্ঞিস্স, উম্মত্তকস্স, (খিত্তচিত্তস্স ৰেদনাট্টস্স) ²⁹ আদিকম্মিকস্সাতি।

131. Anāpatti sasaññissa, vissāsaggāhe, tāvakālike, petapariggahe, tiracchānagatapariggahe, paṃsukūlasaññissa, ummattakassa, (khittacittassa vedanāṭṭassa) ³⁰ ādikammikassāti.

অদিন্নাদানম্হি পঠমভাণৰারো নিট্ঠিতো।

Adinnādānamhi paṭhamabhāṇavāro niṭṭhito.

ৰিনীতৰত্থুউদ্দানগাথা

Vinītavatthuuddānagāthā

রজকেহি পঞ্চ অক্খাতা, চতুরো অত্থরণেহি চ।

Rajakehi pañca akkhātā, caturo attharaṇehi ca;

অন্ধকারেন ৰে পঞ্চ, পঞ্চ হারণকেন চ॥

Andhakārena ve pañca, pañca hāraṇakena ca.

নিরুত্তিযা পঞ্চ অক্খাতা, ৰাতেহি অপরে দুৰে।

Niruttiyā pañca akkhātā, vātehi apare duve;

অসম্ভিন্নে কুসাপাতো, জন্তগ্গেন ³¹ সহা দস॥

Asambhinne kusāpāto, jantaggena ³² sahā dasa.

ৰিঘাসেহি পঞ্চ অক্খাতা, পঞ্চ চেৰ অমূলকা।

Vighāsehi pañca akkhātā, pañca ceva amūlakā;

দুব্ভিক্খে কুরমংসঞ্চ ³³, পূৰসক্খলিমোদকা॥

Dubbhikkhe kuramaṃsañca ³⁴, pūvasakkhalimodakā.

ছপরিক্খারথৰিকা , ভিসিৰংসা ন নিক্খমে।

Chaparikkhārathavikā , bhisivaṃsā na nikkhame;

খাদনীযঞ্চ ৰিস্সাসং, সসঞ্ঞাযপরে দুৰে॥

Khādanīyañca vissāsaṃ, sasaññāyapare duve.

সত্ত নাৰহরামাতি, সত্ত চেৰ অৰাহরুং।

Satta nāvaharāmāti, satta ceva avāharuṃ;

সঙ্ঘস্স অৰহরুং সত্ত, পুপ্ফেহি অপরে দুৰে॥

Saṅghassa avaharuṃ satta, pupphehi apare duve.

তযো চ ৰুত্তৰাদিনো, মণি তীণি অতিক্কমে।

Tayo ca vuttavādino, maṇi tīṇi atikkame;

সূকরা চ মিগা মচ্ছা, যানঞ্চাপি পৰত্তযি॥

Sūkarā ca migā macchā, yānañcāpi pavattayi.

দুৰে পেসী দুৰে দারূ, পংসুকূলং দুৰে দকা।

Duve pesī duve dārū, paṃsukūlaṃ duve dakā;

অনুপুব্বৰিধানেন , তদঞ্ঞো ন পরিপূরযি॥

Anupubbavidhānena , tadañño na paripūrayi.

সাৰত্থিযা চতুরো মুট্ঠী, দ্ৰে ৰিঘাসা দুৰে তিণা।

Sāvatthiyā caturo muṭṭhī, dve vighāsā duve tiṇā;

সঙ্ঘস্স ভাজযুং সত্ত, সত্ত চেৰ অস্সামিকা॥

Saṅghassa bhājayuṃ satta, satta ceva assāmikā.

দারুদকা মত্তিকা দ্ৰে তিণানি।

Dārudakā mattikā dve tiṇāni;

সঙ্ঘস্স সত্ত অৰহাসি সেয্যং।

Saṅghassa satta avahāsi seyyaṃ;

সস্সামিকং ন চাপি নীহরেয্য।

Sassāmikaṃ na cāpi nīhareyya;

হরেয্য সস্সামিকং তাৰকালিকং॥

Hareyya sassāmikaṃ tāvakālikaṃ.

চম্পা রাজগহে চেৰ, ৰেসালিযা চ অজ্জুকো।

Campā rājagahe ceva, vesāliyā ca ajjuko;

বারাণসী চ কোসম্বী, সাগলা দল়্হিকেন চাতি॥

Bārāṇasī ca kosambī, sāgalā daḷhikena cāti.

ৰিনীতৰত্থু

Vinītavatthu

১৩২. তেন খো পন সমযেন ছব্বগ্গিযা ভিক্খূ রজকত্থরণং গন্ত্ৰা রজকভণ্ডিকং অৰহরিংসু। তেসং কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং। কচ্চি নু খো মযং পারাজিকং আপত্তিং আপন্না’’তি । ভগৰতো এতমত্থং আরোচেসুং। ‘‘আপত্তিং তুম্হে, ভিক্খৰে, আপন্না পারাজিক’’ন্তি।

132. Tena kho pana samayena chabbaggiyā bhikkhū rajakattharaṇaṃ gantvā rajakabhaṇḍikaṃ avahariṃsu. Tesaṃ kukkuccaṃ ahosi – ‘‘bhagavatā sikkhāpadaṃ paññattaṃ. Kacci nu kho mayaṃ pārājikaṃ āpattiṃ āpannā’’ti . Bhagavato etamatthaṃ ārocesuṃ. ‘‘Āpattiṃ tumhe, bhikkhave, āpannā pārājika’’nti.

তেন খো পন সমযেন অঞ্ঞতরো ভিক্খু রজকত্থরণং গন্ত্ৰা মহগ্ঘং দুস্সং পস্সিত্ৰা থেয্যচিত্তং উপ্পাদেসি। তস্স কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং, কচ্চি নু খো অহং পারাজিকং আপত্তিং আপন্নো’’তি? ভগৰতো এতমত্থং আরোচেসি। ‘‘অনাপত্তি, ভিক্খু, চিত্তুপ্পাদে’’তি।

Tena kho pana samayena aññataro bhikkhu rajakattharaṇaṃ gantvā mahagghaṃ dussaṃ passitvā theyyacittaṃ uppādesi. Tassa kukkuccaṃ ahosi – ‘‘bhagavatā sikkhāpadaṃ paññattaṃ, kacci nu kho ahaṃ pārājikaṃ āpattiṃ āpanno’’ti? Bhagavato etamatthaṃ ārocesi. ‘‘Anāpatti, bhikkhu, cittuppāde’’ti.

তেন খো পন সমযেন অঞ্ঞতরো ভিক্খু রজকত্থরণং গন্ত্ৰা মহগ্ঘং দুস্সং পস্সিত্ৰা থেয্যচিত্তো আমসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। আপত্তি দুক্কটস্সা’’তি।

Tena kho pana samayena aññataro bhikkhu rajakattharaṇaṃ gantvā mahagghaṃ dussaṃ passitvā theyyacitto āmasi. Tassa kukkuccaṃ ahosi…pe… ‘‘anāpatti, bhikkhu, pārājikassa. Āpatti dukkaṭassā’’ti.

তেন খো পন সমযেন অঞ্ঞতরো ভিক্খু রজকত্থরণং গন্ত্ৰা মহগ্ঘং দুস্সং পস্সিত্ৰা থেয্যচিত্তো ফন্দাপেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। আপত্তি থুল্লচ্চযস্সা’’তি।

Tena kho pana samayena aññataro bhikkhu rajakattharaṇaṃ gantvā mahagghaṃ dussaṃ passitvā theyyacitto phandāpesi. Tassa kukkuccaṃ ahosi…pe… ‘‘anāpatti, bhikkhu, pārājikassa. Āpatti thullaccayassā’’ti.

তেন খো পন সমযেন অঞ্ঞতরো ভিক্খু রজকত্থরণং গন্ত্ৰা মহগ্ঘং দুস্সং পস্সিত্ৰা থেয্যচিত্তো ঠানা চাৰেসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu rajakattharaṇaṃ gantvā mahagghaṃ dussaṃ passitvā theyyacitto ṭhānā cāvesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৩৩. তেন খো পন সমযেন অঞ্ঞতরো পিণ্ডচারিকো ভিক্খু মহগ্ঘং উত্তরত্থরণং পস্সিত্ৰা থেয্যচিত্তং উপ্পাদেসি…পে॰… থেয্যচিত্তো আমসি…পে॰… থেয্যচিত্তো ফন্দাপেসি…পে॰… থেয্যচিত্তো ঠানা চাৰেসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

133. Tena kho pana samayena aññataro piṇḍacāriko bhikkhu mahagghaṃ uttarattharaṇaṃ passitvā theyyacittaṃ uppādesi…pe… theyyacitto āmasi…pe… theyyacitto phandāpesi…pe… theyyacitto ṭhānā cāvesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৩৪. তেন খো পন সমযেন অঞ্ঞতরো ভিক্খু দিৰা ভণ্ডং পস্সিত্ৰা নিমিত্তং অকাসি – ‘রত্তিং অৰহরিস্সামী’তি। সো তং মঞ্ঞমানো তং অৰহরি…পে॰… তং মঞ্ঞমানো অঞ্ঞং অৰহরি…পে॰… অঞ্ঞং মঞ্ঞমানো তং অৰহরি…পে॰… অঞ্ঞং মঞ্ঞমানো অঞ্ঞং অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি ।

134. Tena kho pana samayena aññataro bhikkhu divā bhaṇḍaṃ passitvā nimittaṃ akāsi – ‘rattiṃ avaharissāmī’ti. So taṃ maññamāno taṃ avahari…pe… taṃ maññamāno aññaṃ avahari…pe… aññaṃ maññamāno taṃ avahari…pe… aññaṃ maññamāno aññaṃ avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti .

তেন খো পন সমযেন অঞ্ঞতরো ভিক্খু দিৰা ভণ্ডং পস্সিত্ৰা নিমিত্তং অকাসি – ‘‘রত্তিং অৰহরিস্সামী’’তি। সো তং মঞ্ঞমানো অত্তনো ভণ্ডং অৰহরি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। আপত্তি দুক্কটস্সা’’তি।

Tena kho pana samayena aññataro bhikkhu divā bhaṇḍaṃ passitvā nimittaṃ akāsi – ‘‘rattiṃ avaharissāmī’’ti. So taṃ maññamāno attano bhaṇḍaṃ avahari. Tassa kukkuccaṃ ahosi…pe… ‘‘anāpatti, bhikkhu, pārājikassa. Āpatti dukkaṭassā’’ti.

তেন খো পন সমযেন অঞ্ঞতরো ভিক্খু অঞ্ঞস্স ভণ্ডং হরন্তো সীসে ভারং থেয্যচিত্তো আমসি…পে॰… থেয্যচিত্তো ফন্দাপেসি…পে॰… থেয্যচিত্তো খন্ধং ওরোপেসি…পে॰… খন্ধে ভারং থেয্যচিত্তো আমসি…পে॰… থেয্যচিত্তো ফন্দাপেসি…পে॰… থেয্যচিত্তো কটিং ওরোপেসি…পে॰… কটিযা ভারং থেয্যচিত্তো আমসি…পে॰… থেয্যচিত্তো ফন্দাপেসি…পে॰… থেয্যচিত্তো হত্থেন অগ্গহেসি…পে॰… হত্থে ভারং থেয্যচিত্তো ভূমিযং নিক্খিপি…পে॰… থেয্যচিত্তো ভূমিতো অগ্গহেসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu aññassa bhaṇḍaṃ haranto sīse bhāraṃ theyyacitto āmasi…pe… theyyacitto phandāpesi…pe… theyyacitto khandhaṃ oropesi…pe… khandhe bhāraṃ theyyacitto āmasi…pe… theyyacitto phandāpesi…pe… theyyacitto kaṭiṃ oropesi…pe… kaṭiyā bhāraṃ theyyacitto āmasi…pe… theyyacitto phandāpesi…pe… theyyacitto hatthena aggahesi…pe… hatthe bhāraṃ theyyacitto bhūmiyaṃ nikkhipi…pe… theyyacitto bhūmito aggahesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৩৫. তেন খো পন সমযেন অঞ্ঞতরো ভিক্খু অজ্ঝোকাসে চীৰরং পত্থরিত্ৰা ৰিহারং পাৰিসি। অঞ্ঞতরো ভিক্খু – ‘মাযিদং চীৰরং নস্সী’তি, পটিসামেসি। সো নিক্খমিত্ৰা তং ভিক্খুং পুচ্ছি – ‘‘আৰুসো, ময্হং চীৰরং কেন অৰহট’’ন্তি ? সো এৰমাহ – ‘‘মযা অৰহট’’ন্তি। ‘‘সো তং আদিযি, অস্সমণোসি ত্ৰ’’ন্তি। তস্স কুক্কুচ্চং অহোসি…পে॰…। ভগৰতো এতমত্থং আরোচেসি। ‘‘কিংচিত্তো ত্ৰং, ভিক্খূ’’তি? ‘‘নিরুত্তিপথো অহং, ভগৰা’’তি। ‘‘অনাপত্তি, ভিক্খু, নিরুত্তিপথে’’তি।

135. Tena kho pana samayena aññataro bhikkhu ajjhokāse cīvaraṃ pattharitvā vihāraṃ pāvisi. Aññataro bhikkhu – ‘māyidaṃ cīvaraṃ nassī’ti, paṭisāmesi. So nikkhamitvā taṃ bhikkhuṃ pucchi – ‘‘āvuso, mayhaṃ cīvaraṃ kena avahaṭa’’nti ? So evamāha – ‘‘mayā avahaṭa’’nti. ‘‘So taṃ ādiyi, assamaṇosi tva’’nti. Tassa kukkuccaṃ ahosi…pe…. Bhagavato etamatthaṃ ārocesi. ‘‘Kiṃcitto tvaṃ, bhikkhū’’ti? ‘‘Niruttipatho ahaṃ, bhagavā’’ti. ‘‘Anāpatti, bhikkhu, niruttipathe’’ti.

তেন খো পন সমযেন অঞ্ঞতরো ভিক্খু পীঠে চীৰরং নিক্খিপিত্ৰা। পীঠে নিসীদনং নিক্খিপিত্ৰা… হেট্ঠাপীঠে পত্তং নিক্খিপিত্ৰা ৰিহারং পাৰিসি। অঞ্ঞতরো ভিক্খু – ‘‘মাযং পত্তো নস্সী’’তি পটিসামেসি। সো নিক্খমিত্ৰা তং ভিক্খুং পুচ্ছি – ‘‘আৰুসো, ময্হং পত্তো কেন অৰহটো’’তি? সো এৰমাহ – ‘‘মযা অৰহটো’’তি। ‘‘সো তং আদিযি, অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, নিরুত্তিপথে’’তি।

Tena kho pana samayena aññataro bhikkhu pīṭhe cīvaraṃ nikkhipitvā. Pīṭhe nisīdanaṃ nikkhipitvā… heṭṭhāpīṭhe pattaṃ nikkhipitvā vihāraṃ pāvisi. Aññataro bhikkhu – ‘‘māyaṃ patto nassī’’ti paṭisāmesi. So nikkhamitvā taṃ bhikkhuṃ pucchi – ‘‘āvuso, mayhaṃ patto kena avahaṭo’’ti? So evamāha – ‘‘mayā avahaṭo’’ti. ‘‘So taṃ ādiyi, assamaṇosi tva’’nti. Tassa kukkuccaṃ ahosi…pe… ‘‘anāpatti, bhikkhu, niruttipathe’’ti.

তেন খো পন সমযেন অঞ্ঞতরা ভিক্খুনী ৰতিযা চীৰরং পত্থরিত্ৰা ৰিহারং পাৰিসি। অঞ্ঞতরা ভিক্খুনী – ‘মাযিদং চীৰরং নস্সী’তি পটিসামেসি। সা নিক্খমিত্ৰা তং ভিক্খুনিং পুচ্ছি – ‘‘অয্যে, ময্হং চীৰরং কেন অৰহট’’ন্তি? সা এৰমাহ – ‘‘মযা অৰহট’’ন্তি। ‘‘সা তং আদিযি, অস্সমণীসি ত্ৰ’’ন্তি। তস্সা কুক্কুচ্চং অহোসি। অথ খো সা ভিক্খুনী ভিক্খুনীনং এতমত্থং আরোচেসি। ভিক্খুনিযো ভিক্খূনং এতমত্থং আরোচেসুং। ভিক্খূ ভগৰতো এতমত্থং আরোচেসুং…পে॰… ‘‘অনাপত্তি, ভিক্খৰে, নিরুত্তিপথে’’তি।

Tena kho pana samayena aññatarā bhikkhunī vatiyā cīvaraṃ pattharitvā vihāraṃ pāvisi. Aññatarā bhikkhunī – ‘māyidaṃ cīvaraṃ nassī’ti paṭisāmesi. Sā nikkhamitvā taṃ bhikkhuniṃ pucchi – ‘‘ayye, mayhaṃ cīvaraṃ kena avahaṭa’’nti? Sā evamāha – ‘‘mayā avahaṭa’’nti. ‘‘Sā taṃ ādiyi, assamaṇīsi tva’’nti. Tassā kukkuccaṃ ahosi. Atha kho sā bhikkhunī bhikkhunīnaṃ etamatthaṃ ārocesi. Bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ…pe… ‘‘anāpatti, bhikkhave, niruttipathe’’ti.

১৩৬. তেন খো পন সমযেন অঞ্ঞতরো ভিক্খু ৰাতমণ্ডলিকায উক্খিত্তং সাটকং পস্সিত্ৰা সামিকানং দস্সামীতি, অগ্গহেসি। সামিকা তং ভিক্খুং চোদেসুং – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘কিংচিত্তো ত্ৰং ভিক্খূ’’তি? ‘‘অথেয্যচিত্তো অহং, ভগৰা’’তি। অনাপত্তি, ভিক্খু, অথেয্যচিত্তস্সা’’তি।

136. Tena kho pana samayena aññataro bhikkhu vātamaṇḍalikāya ukkhittaṃ sāṭakaṃ passitvā sāmikānaṃ dassāmīti, aggahesi. Sāmikā taṃ bhikkhuṃ codesuṃ – ‘‘assamaṇosi tva’’nti. Tassa kukkuccaṃ ahosi…pe… ‘‘kiṃcitto tvaṃ bhikkhū’’ti? ‘‘Atheyyacitto ahaṃ, bhagavā’’ti. Anāpatti, bhikkhu, atheyyacittassā’’ti.

তেন খো পন সমযেন অঞ্ঞতরো ভিক্খু ৰাতমণ্ডলিকায উক্খিত্তং ৰেঠনং পস্সিত্ৰা ‘পুরে সামিকা পস্সন্তী’তি থেয্যচিত্তো অগ্গহেসি। সামিকা তং ভিক্খুং চোদেসুং – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu vātamaṇḍalikāya ukkhittaṃ veṭhanaṃ passitvā ‘pure sāmikā passantī’ti theyyacitto aggahesi. Sāmikā taṃ bhikkhuṃ codesuṃ – ‘‘assamaṇosi tva’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৩৭. তেন খো পন সমযেন অঞ্ঞতরো ভিক্খু সুসানং গন্ত্ৰা অভিন্নে সরীরে পংসুকূলং অগ্গহেসি। তস্মিঞ্চ সরীরে পেতো অধিৰত্থো হোতি । অথ খো সো পেতো তং ভিক্খুং এতদৰোচ – ‘‘মা, ভন্তে, ময্হং সাটকং অগ্গহেসী’’তি। সো ভিক্খু অনাদিযন্তো অগমাসি । অথ খো তং সরীরং উট্ঠহিত্ৰা তস্স ভিক্খুনো পিট্ঠিতো পিট্ঠিতো অনুবন্ধি। অথ খো সো ভিক্খু ৰিহারং পৰিসিত্ৰা দ্ৰারং থকেসি। অথ খো তং সরীরং তত্থেৰ পরিপতি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। ন চ, ভিক্খৰে, অভিন্নে সরীরে পংসুকূলং গহেতব্বং। সো গণ্হেয্য, আপত্তি দুক্কটস্সা’’তি।

137. Tena kho pana samayena aññataro bhikkhu susānaṃ gantvā abhinne sarīre paṃsukūlaṃ aggahesi. Tasmiñca sarīre peto adhivattho hoti . Atha kho so peto taṃ bhikkhuṃ etadavoca – ‘‘mā, bhante, mayhaṃ sāṭakaṃ aggahesī’’ti. So bhikkhu anādiyanto agamāsi . Atha kho taṃ sarīraṃ uṭṭhahitvā tassa bhikkhuno piṭṭhito piṭṭhito anubandhi. Atha kho so bhikkhu vihāraṃ pavisitvā dvāraṃ thakesi. Atha kho taṃ sarīraṃ tattheva paripati. Tassa kukkuccaṃ ahosi…pe… ‘‘anāpatti, bhikkhu, pārājikassa. Na ca, bhikkhave, abhinne sarīre paṃsukūlaṃ gahetabbaṃ. So gaṇheyya, āpatti dukkaṭassā’’ti.

১৩৮. তেন খো পন সমযেন অঞ্ঞতরো ভিক্খু সঙ্ঘস্স চীৰরে ভাজীযমানে থেয্যচিত্তো কুসং সঙ্কামেত্ৰা চীৰরং অগ্গহেসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

138. Tena kho pana samayena aññataro bhikkhu saṅghassa cīvare bhājīyamāne theyyacitto kusaṃ saṅkāmetvā cīvaraṃ aggahesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৩৯. তেন খো পন সমযেন আযস্মা আনন্দো জন্তাঘরে অঞ্ঞতরস্স ভিক্খুনো অন্তরৰাসকং অত্তনো মঞ্ঞমানো নিৰাসেসি। অথ খো সো ভিক্খু আযস্মন্তং আনন্দং এতদৰোচ – ‘‘কিস্স মে ত্ৰং, আৰুসো আনন্দ, অন্তরৰাসকং নিৰাসেসী’’তি? ‘‘সকসঞ্ঞী অহং, আৰুসো’’তি। ভগৰতো এতমত্থং আরোচেসুং। ‘‘অনাপত্তি, ভিক্খৰে, সকসঞ্ঞিস্সা’’তি।

139. Tena kho pana samayena āyasmā ānando jantāghare aññatarassa bhikkhuno antaravāsakaṃ attano maññamāno nivāsesi. Atha kho so bhikkhu āyasmantaṃ ānandaṃ etadavoca – ‘‘kissa me tvaṃ, āvuso ānanda, antaravāsakaṃ nivāsesī’’ti? ‘‘Sakasaññī ahaṃ, āvuso’’ti. Bhagavato etamatthaṃ ārocesuṃ. ‘‘Anāpatti, bhikkhave, sakasaññissā’’ti.

১৪০. তেন খো পন সমযেন সম্বহুলা ভিক্খূ গিজ্ঝকূটা পব্বতা ওরোহন্তা সীহৰিঘাসং পস্সিত্ৰা পচাপেত্ৰা পরিভুঞ্জিংসু। তেসং কুক্কুচ্চং অহোসি…পে॰… ‘‘অনাপত্তি, ভিক্খৰে, সীহৰিঘাসে’’তি।

140. Tena kho pana samayena sambahulā bhikkhū gijjhakūṭā pabbatā orohantā sīhavighāsaṃ passitvā pacāpetvā paribhuñjiṃsu. Tesaṃ kukkuccaṃ ahosi…pe… ‘‘anāpatti, bhikkhave, sīhavighāse’’ti.

তেন খো পন সমযেন সম্বহুলা ভিক্খূ গিজ্ঝকূটা পব্বতা ওরোহন্তা ব্যগ্ঘৰিঘাসং পস্সিত্ৰা… দীপিৰিঘাসং পস্সিত্ৰা… তরচ্ছৰিঘাসং পস্সিত্ৰা… কোকৰিঘাসং পস্সিত্ৰা পচাপেত্ৰা পরিভুঞ্জিংসু। তেসং কুক্কুচ্চং অহোসি…পে॰… ‘‘অনাপত্তি, ভিক্খৰে, তিরচ্ছানগতপরিগ্গহে’’তি।

Tena kho pana samayena sambahulā bhikkhū gijjhakūṭā pabbatā orohantā byagghavighāsaṃ passitvā… dīpivighāsaṃ passitvā… taracchavighāsaṃ passitvā… kokavighāsaṃ passitvā pacāpetvā paribhuñjiṃsu. Tesaṃ kukkuccaṃ ahosi…pe… ‘‘anāpatti, bhikkhave, tiracchānagatapariggahe’’ti.

১৪১. তেন খো পন সমযেন অঞ্ঞতরো ভিক্খু সঙ্ঘস্স ওদনে ভাজীযমানে – ‘অপরস্স ভাগং দেহী’তি অমূলকং অগ্গহেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। আপত্তি সম্পজানমুসাৰাদে পাচিত্তিযস্সা’’তি।

141. Tena kho pana samayena aññataro bhikkhu saṅghassa odane bhājīyamāne – ‘aparassa bhāgaṃ dehī’ti amūlakaṃ aggahesi. Tassa kukkuccaṃ ahosi…pe… ‘‘anāpatti, bhikkhu, pārājikassa. Āpatti sampajānamusāvāde pācittiyassā’’ti.

তেন খো পন সমযেন অঞ্ঞতরো ভিক্খু সঙ্ঘস্স খাদনীযে ভাজিযমানে… সঙ্ঘস্স পূৰে ভাজিযমানে… সঙ্ঘস্স উচ্ছুম্হি ভাজিযমানে… সঙ্ঘস্স তিম্বরূসকে ভাজিযমানে – ‘অপরস্স ভাগং দেহী’তি অমূলকং অগ্গহেসি। তস্স কুক্কুচ্চং অহোসি…পে॰…। ‘‘অনাপত্তি, ভিক্খু, পারাজিকস্স। আপত্তি সম্পজানমুসাৰাদে পাচিত্তিযস্সা’’তি।

Tena kho pana samayena aññataro bhikkhu saṅghassa khādanīye bhājiyamāne… saṅghassa pūve bhājiyamāne… saṅghassa ucchumhi bhājiyamāne… saṅghassa timbarūsake bhājiyamāne – ‘aparassa bhāgaṃ dehī’ti amūlakaṃ aggahesi. Tassa kukkuccaṃ ahosi…pe…. ‘‘Anāpatti, bhikkhu, pārājikassa. Āpatti sampajānamusāvāde pācittiyassā’’ti.

১৪২. তেন খো পন সমযেন অঞ্ঞতরো ভিক্খু দুব্ভিক্খে ওদনীযঘরং পৰিসিত্ৰা পত্তপূরং ওদনং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

142. Tena kho pana samayena aññataro bhikkhu dubbhikkhe odanīyagharaṃ pavisitvā pattapūraṃ odanaṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু দুব্ভিক্খে সূনঘরং ³⁵ পৰিসিত্ৰা পত্তপূরং মংসং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu dubbhikkhe sūnagharaṃ ³⁶ pavisitvā pattapūraṃ maṃsaṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু দুব্ভিক্খে পূৰঘরং পৰিসিত্ৰা পত্তপূরং পূৰং থেয্যচিত্তো অৰহরি…পে॰… পত্তপূরা সক্খলিযো থেয্যচিত্তো অৰহরি…পে॰… পত্তপূরে মোদকে থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu dubbhikkhe pūvagharaṃ pavisitvā pattapūraṃ pūvaṃ theyyacitto avahari…pe… pattapūrā sakkhaliyo theyyacitto avahari…pe… pattapūre modake theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৪৩. তেন খো পন সমযেন অঞ্ঞতরো ভিক্খু দিৰা পরিক্খারং পস্সিত্ৰা নিমিত্তং অকাসি – ‘‘রত্তিং অৰহরিস্সামী’’তি। সো তং মঞ্ঞমানো তং অৰহরি…পে॰… তং মঞ্ঞমানো অঞ্ঞং অৰহরি…পে॰… অঞ্ঞং মঞ্ঞমানো তং অৰহরি…পে॰… অঞ্ঞং মঞ্ঞমানো অঞ্ঞং অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

143. Tena kho pana samayena aññataro bhikkhu divā parikkhāraṃ passitvā nimittaṃ akāsi – ‘‘rattiṃ avaharissāmī’’ti. So taṃ maññamāno taṃ avahari…pe… taṃ maññamāno aññaṃ avahari…pe… aññaṃ maññamāno taṃ avahari…pe… aññaṃ maññamāno aññaṃ avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু দিৰা পরিক্খারং পস্সিত্ৰা নিমিত্তং অকাসি – ‘‘রত্তিং অৰহরিস্সামী’’তি। সো তং মঞ্ঞমানো অত্তনো পরিক্খারং অৰহরি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। আপত্তি দুক্কটস্সা’’তি।

Tena kho pana samayena aññataro bhikkhu divā parikkhāraṃ passitvā nimittaṃ akāsi – ‘‘rattiṃ avaharissāmī’’ti. So taṃ maññamāno attano parikkhāraṃ avahari. Tassa kukkuccaṃ ahosi…pe… ‘‘anāpatti, bhikkhu, pārājikassa. Āpatti dukkaṭassā’’ti.

১৪৪. তেন খো পন সমযেন অঞ্ঞতরো ভিক্খু পীঠে থৰিকং পস্সিত্ৰা – ‘‘ইতো গণ্হন্তো পারাজিকো ভৰিস্সামী’’তি সহ পীঠকেন সঙ্কামেত্ৰা অগ্গহেসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

144. Tena kho pana samayena aññataro bhikkhu pīṭhe thavikaṃ passitvā – ‘‘ito gaṇhanto pārājiko bhavissāmī’’ti saha pīṭhakena saṅkāmetvā aggahesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু সঙ্ঘস্স ভিসিং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu saṅghassa bhisiṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৪৫. তেন খো পন সমযেন অঞ্ঞতরো ভিক্খু চীৰরৰংসে চীৰরং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

145. Tena kho pana samayena aññataro bhikkhu cīvaravaṃse cīvaraṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু ৰিহারে চীৰরং অৰহরিত্ৰা – ‘‘ইতো নিক্খমন্তো পারাজিকো ভৰিস্সামী’’তি ৰিহারা ন নিক্খমি…পে॰… ভগৰতো এতমত্থং আরোচেসুং। ‘‘নিক্খমি ³⁷ ৰা সো, ভিক্খৰে, মোঘপুরিসো ন ৰা নিক্খমি ³⁸, আপত্তি পারাজিকস্সা’’তি।

Tena kho pana samayena aññataro bhikkhu vihāre cīvaraṃ avaharitvā – ‘‘ito nikkhamanto pārājiko bhavissāmī’’ti vihārā na nikkhami…pe… bhagavato etamatthaṃ ārocesuṃ. ‘‘Nikkhami ³⁹ vā so, bhikkhave, moghapuriso na vā nikkhami ⁴⁰, āpatti pārājikassā’’ti.

১৪৬. তেন খো পন সমযেন দ্ৰে ভিক্খূ সহাযকা হোন্তি। একো ভিক্খু গামং পিণ্ডায পাৰিসি। দুতিযো ভিক্খু সঙ্ঘস্স খাদনীযে ভাজীযমানে সহাযকস্স ভাগং গহেত্ৰা তস্স ৰিস্সসন্তো পরিভুঞ্জি। সো জানিত্ৰা তং চোদেসি – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘কিং চিত্তো ত্ৰং, ভিক্খূ’’তি? ‘‘ৰিস্সাসগ্গাহো অহং, ভগৰা’’তি। ‘‘অনাপত্তি, ভিক্খু, ৰিস্সাসগ্গাহে’’তি।

146. Tena kho pana samayena dve bhikkhū sahāyakā honti. Eko bhikkhu gāmaṃ piṇḍāya pāvisi. Dutiyo bhikkhu saṅghassa khādanīye bhājīyamāne sahāyakassa bhāgaṃ gahetvā tassa vissasanto paribhuñji. So jānitvā taṃ codesi – ‘‘assamaṇosi tva’’nti. Tassa kukkuccaṃ ahosi…pe… ‘‘kiṃ citto tvaṃ, bhikkhū’’ti? ‘‘Vissāsaggāho ahaṃ, bhagavā’’ti. ‘‘Anāpatti, bhikkhu, vissāsaggāhe’’ti.

১৪৭. তেন খো পন সমযেন সম্বহুলা ভিক্খূ চীৰরকম্মং করোন্তি। সঙ্ঘস্স খাদনীযে ভাজীযমানে সব্বেসং পটিৰিসা আহরিত্ৰা উপনিক্খিত্তা হোন্তি। অঞ্ঞতরো ভিক্খু অঞ্ঞতরস্স ভিক্খুনো পটিৰিসং অত্তনো মঞ্ঞমানো পরিভুঞ্জি। সো জানিত্ৰা তং চোদেসি – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘কিংচিত্তো ত্ৰং, ভিক্খূ’’তি? ‘‘সকসঞ্ঞী অহং, ভগৰা’’তি। ‘‘অনাপত্তি, ভিক্খু, সকসঞ্ঞিস্সা’’তি।

147. Tena kho pana samayena sambahulā bhikkhū cīvarakammaṃ karonti. Saṅghassa khādanīye bhājīyamāne sabbesaṃ paṭivisā āharitvā upanikkhittā honti. Aññataro bhikkhu aññatarassa bhikkhuno paṭivisaṃ attano maññamāno paribhuñji. So jānitvā taṃ codesi – ‘‘assamaṇosi tva’’nti. Tassa kukkuccaṃ ahosi…pe… ‘‘kiṃcitto tvaṃ, bhikkhū’’ti? ‘‘Sakasaññī ahaṃ, bhagavā’’ti. ‘‘Anāpatti, bhikkhu, sakasaññissā’’ti.

তেন খো পন সমযেন সম্বহুলা ভিক্খূ চীৰরকম্মং করোন্তি। সঙ্ঘস্স খাদনীযে ভাজিযমানে অঞ্ঞতরস্স ভিক্খুনো পত্তেন অঞ্ঞতরস্স ভিক্খুনো পটিৰিসো আহরিত্ৰা উপনিক্খিত্তো হোতি। পত্তসামিকো ভিক্খু অত্তনো মঞ্ঞমানো পরিভুঞ্জি। সো জানিত্ৰা তং চোদেসি – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, সকসঞ্ঞিস্সা’’তি।

Tena kho pana samayena sambahulā bhikkhū cīvarakammaṃ karonti. Saṅghassa khādanīye bhājiyamāne aññatarassa bhikkhuno pattena aññatarassa bhikkhuno paṭiviso āharitvā upanikkhitto hoti. Pattasāmiko bhikkhu attano maññamāno paribhuñji. So jānitvā taṃ codesi – ‘‘assamaṇosi tva’’nti. Tassa kukkuccaṃ ahosi…pe… ‘‘anāpatti, bhikkhu, sakasaññissā’’ti.

১৪৮. তেন খো পন সমযেন অম্বচোরকা অম্বং পাতেত্ৰা ভণ্ডিকং আদায অগমংসু। সামিকা তে চোরকে অনুবন্ধিংসু। চোরকা সামিকে পস্সিত্ৰা ভণ্ডিকং পাতেত্ৰা পলাযিংসু। ভিক্খূ পংসুকূলসঞ্ঞিনো পটিগ্গহাপেত্ৰা পরিভুঞ্জিংসু। সামিকা তে ভিক্খূ চোদেসুং – ‘‘অস্সমণাত্থ তুম্হে’’তি। তেসং কুক্কুচ্চং অহোসি…পে॰… ভগৰতো এতমত্থং আরোচেসুং। ‘‘কিংচিত্তা তুম্হে, ভিক্খৰে’’তি? ‘‘পংসুকূলসঞ্ঞিনো মযং, ভগৰা’’তি। ‘‘অনাপত্তি, ভিক্খৰে, পংসুকূলসঞ্ঞিস্সা’’তি।

148. Tena kho pana samayena ambacorakā ambaṃ pātetvā bhaṇḍikaṃ ādāya agamaṃsu. Sāmikā te corake anubandhiṃsu. Corakā sāmike passitvā bhaṇḍikaṃ pātetvā palāyiṃsu. Bhikkhū paṃsukūlasaññino paṭiggahāpetvā paribhuñjiṃsu. Sāmikā te bhikkhū codesuṃ – ‘‘assamaṇāttha tumhe’’ti. Tesaṃ kukkuccaṃ ahosi…pe… bhagavato etamatthaṃ ārocesuṃ. ‘‘Kiṃcittā tumhe, bhikkhave’’ti? ‘‘Paṃsukūlasaññino mayaṃ, bhagavā’’ti. ‘‘Anāpatti, bhikkhave, paṃsukūlasaññissā’’ti.

তেন খো পন সমযেন জম্বুচোরকা… লবুজচোরকা… পনসচোরকা… তালপক্কচোরকা… উচ্ছুচোরকা… তিম্বরূসকচোরকা তিম্বরূসকে উচ্চিনিত্ৰা ভণ্ডিকং আদায অগমংসু। সামিকা তে চোরকে অনুবন্ধিংসু। চোরকা সামিকে পস্সিত্ৰা ভণ্ডিকং পাতেত্ৰা পলাযিংসু। ভিক্খূ পংসুকূলসঞ্ঞিনো পটিগ্গহাপেত্ৰা পরিভুঞ্জিংসু। সামিকা তে ভিক্খূ চোদেসুং – ‘‘অস্সমণাত্থ তুম্হে’’তি। তেসং কুক্কুচ্চং অহোসি…পে॰… ‘‘অনাপত্তি, ভিক্খৰে, পংসুকূলসঞ্ঞিস্সা’’তি।

Tena kho pana samayena jambucorakā… labujacorakā… panasacorakā… tālapakkacorakā… ucchucorakā… timbarūsakacorakā timbarūsake uccinitvā bhaṇḍikaṃ ādāya agamaṃsu. Sāmikā te corake anubandhiṃsu. Corakā sāmike passitvā bhaṇḍikaṃ pātetvā palāyiṃsu. Bhikkhū paṃsukūlasaññino paṭiggahāpetvā paribhuñjiṃsu. Sāmikā te bhikkhū codesuṃ – ‘‘assamaṇāttha tumhe’’ti. Tesaṃ kukkuccaṃ ahosi…pe… ‘‘anāpatti, bhikkhave, paṃsukūlasaññissā’’ti.

তেন খো পন সমযেন অম্বচোরকা অম্বং পাতেত্ৰা ভণ্ডিকং আদায অগমংসু। সামিকা তে চোরকে অনুবন্ধিংসু। চোরকা সামিকে পস্সিত্ৰা ভণ্ডিকং পাতেত্ৰা পলাযিংসু। ভিক্খূ – ‘পুরে সামিকা পস্সন্তী’তি, থেয্যচিত্তা পরিভুঞ্জিংসু। সামিকা তে ভিক্খূ চোদেসুং – ‘‘অস্সমণাত্থ তুম্হে’’তি। তেসং কুক্কুচ্চং অহোসি…পে॰… ‘‘আপত্তিং তুম্হে, ভিক্খৰে, আপন্না পারাজিক’’ন্তি।

Tena kho pana samayena ambacorakā ambaṃ pātetvā bhaṇḍikaṃ ādāya agamaṃsu. Sāmikā te corake anubandhiṃsu. Corakā sāmike passitvā bhaṇḍikaṃ pātetvā palāyiṃsu. Bhikkhū – ‘pure sāmikā passantī’ti, theyyacittā paribhuñjiṃsu. Sāmikā te bhikkhū codesuṃ – ‘‘assamaṇāttha tumhe’’ti. Tesaṃ kukkuccaṃ ahosi…pe… ‘‘āpattiṃ tumhe, bhikkhave, āpannā pārājika’’nti.

তেন খো পন সমযেন জম্বুচোরকা… লবুজচোরকা… পনসচোরকা… তালপক্কচোরকা… উচ্ছুচোরকা… তিম্বরূসকচোরকা তিম্বরূসকে উচ্চিনিত্ৰা ভণ্ডিকং আদায অগমংসু। সামিকা তে চোরকে অনুবন্ধিংসু। চোরকা সামিকে পস্সিত্ৰা ভণ্ডিকং পাতেত্ৰা পলাযিংসু। ভিক্খূ – ‘পুরে সামিকা পস্সন্তী’তি, থেয্যচিত্তা পরিভুঞ্জিংসু। সামিকা তে ভিক্খূ চোদেসুং – ‘‘অস্সমণাত্থ তুম্হে’’তি। তেসং কুক্কুচ্চং অহোসি…পে॰… ‘‘আপত্তিং তুম্হে, ভিক্খৰে, আপন্না পারাজিক’’ন্তি।

Tena kho pana samayena jambucorakā… labujacorakā… panasacorakā… tālapakkacorakā… ucchucorakā… timbarūsakacorakā timbarūsake uccinitvā bhaṇḍikaṃ ādāya agamaṃsu. Sāmikā te corake anubandhiṃsu. Corakā sāmike passitvā bhaṇḍikaṃ pātetvā palāyiṃsu. Bhikkhū – ‘pure sāmikā passantī’ti, theyyacittā paribhuñjiṃsu. Sāmikā te bhikkhū codesuṃ – ‘‘assamaṇāttha tumhe’’ti. Tesaṃ kukkuccaṃ ahosi…pe… ‘‘āpattiṃ tumhe, bhikkhave, āpannā pārājika’’nti.

তেন খো পন সমযেন অঞ্ঞতরো ভিক্খু সঙ্ঘস্স অম্বং থেয্যচিত্তো অৰহরি… সঙ্ঘস্স জম্বুং… সঙ্ঘস্স লবুজং… সঙ্ঘস্স পনসং… সঙ্ঘস্স তালপক্কং… সঙ্ঘস্স উচ্ছুং… সঙ্ঘস্স তিম্বরূসকং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu saṅghassa ambaṃ theyyacitto avahari… saṅghassa jambuṃ… saṅghassa labujaṃ… saṅghassa panasaṃ… saṅghassa tālapakkaṃ… saṅghassa ucchuṃ… saṅghassa timbarūsakaṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৪৯. তেন খো পন সমযেন অঞ্ঞতরো ভিক্খু পুপ্ফারামং গন্ত্ৰা ওচিতং পুপ্ফং পঞ্চমাসগ্ঘনকং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

149. Tena kho pana samayena aññataro bhikkhu pupphārāmaṃ gantvā ocitaṃ pupphaṃ pañcamāsagghanakaṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু পুপ্ফারামং গন্ত্ৰা পুপ্ফং ওচিনিত্ৰা পঞ্চমাসগ্ঘনকং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু আপন্নো পারাজিক’’ন্তি।

Tena kho pana samayena aññataro bhikkhu pupphārāmaṃ gantvā pupphaṃ ocinitvā pañcamāsagghanakaṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu āpanno pārājika’’nti.

১৫০. তেন খো পন সমযেন অঞ্ঞতরো ভিক্খু গামকং গচ্ছন্তো অঞ্ঞতরং ভিক্খুং এতদৰোচ – ‘‘আৰুসো, তুয্হং উপট্ঠাককুলং ৰুত্তো ৰজ্জেমী’’তি। সো গন্ত্ৰা একং সাটকং আহরাপেত্ৰা অত্তনা পরিভুঞ্জি। সো জানিত্ৰা তং চোদেসি – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। ন চ, ভিক্খৰে, ৰুত্তো ৰজ্জেমীতি ৰত্তব্বো। যো ৰদেয্য, আপত্তি দুক্কটস্সা’’তি।

150. Tena kho pana samayena aññataro bhikkhu gāmakaṃ gacchanto aññataraṃ bhikkhuṃ etadavoca – ‘‘āvuso, tuyhaṃ upaṭṭhākakulaṃ vutto vajjemī’’ti. So gantvā ekaṃ sāṭakaṃ āharāpetvā attanā paribhuñji. So jānitvā taṃ codesi – ‘‘assamaṇosi tva’’nti. Tassa kukkuccaṃ ahosi…pe… ‘‘anāpatti, bhikkhu, pārājikassa. Na ca, bhikkhave, vutto vajjemīti vattabbo. Yo vadeyya, āpatti dukkaṭassā’’ti.

তেন খো পন সমযেন অঞ্ঞতরো ভিক্খু গামকং গচ্ছতি। অঞ্ঞতরো ভিক্খু তং ভিক্খুং এতদৰোচ – ‘‘আৰুসো, ময্হং উপট্ঠাককুলং ৰুত্তো ৰজ্জেহী’’তি। সো গন্ত্ৰা যুগসাটকং আহরাপেত্ৰা একং অত্তনা পরিভুঞ্জি, একং তস্স ভিক্খুনো অদাসি। সো জানিত্ৰা তং চোদেসি – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। ন চ, ভিক্খৰে, ৰুত্তো ৰজ্জেহীতি ৰত্তব্বো। যো ৰদেয্য, আপত্তি দুক্কটস্সা’’তি।

Tena kho pana samayena aññataro bhikkhu gāmakaṃ gacchati. Aññataro bhikkhu taṃ bhikkhuṃ etadavoca – ‘‘āvuso, mayhaṃ upaṭṭhākakulaṃ vutto vajjehī’’ti. So gantvā yugasāṭakaṃ āharāpetvā ekaṃ attanā paribhuñji, ekaṃ tassa bhikkhuno adāsi. So jānitvā taṃ codesi – ‘‘assamaṇosi tva’’nti. Tassa kukkuccaṃ ahosi…pe… ‘‘anāpatti, bhikkhu, pārājikassa. Na ca, bhikkhave, vutto vajjehīti vattabbo. Yo vadeyya, āpatti dukkaṭassā’’ti.

তেন খো পন সমযেন অঞ্ঞতরো ভিক্খু গামকং গচ্ছন্তো অঞ্ঞতরং ভিক্খুং এতদৰোচ – ‘‘আৰুসো, তুয্হং উপট্ঠাককুলং ৰুত্তো ৰজ্জেমী’’তি। সোপি এৰমাহ – ‘‘ৰুত্তো ৰজ্জেহী’’তি। সো গন্ত্ৰা আল়্হকং সপ্পিং তুলং গুল়ং দোণং তণ্ডুলং আহরাপেত্ৰা অত্তনা পরিভুঞ্জি। সো জানিত্ৰা তং চোদেসি – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। ন চ, ভিক্খৰে, ৰুত্তো ৰজ্জেমীতি ৰত্তব্বো, ন চ ৰুত্তো ৰজ্জেহীতি ৰত্তব্বো। যো ৰদেয্য, আপত্তি দুক্কটস্সা’’তি।

Tena kho pana samayena aññataro bhikkhu gāmakaṃ gacchanto aññataraṃ bhikkhuṃ etadavoca – ‘‘āvuso, tuyhaṃ upaṭṭhākakulaṃ vutto vajjemī’’ti. Sopi evamāha – ‘‘vutto vajjehī’’ti. So gantvā āḷhakaṃ sappiṃ tulaṃ guḷaṃ doṇaṃ taṇḍulaṃ āharāpetvā attanā paribhuñji. So jānitvā taṃ codesi – ‘‘assamaṇosi tva’’nti. Tassa kukkuccaṃ ahosi…pe… ‘‘anāpatti, bhikkhu, pārājikassa. Na ca, bhikkhave, vutto vajjemīti vattabbo, na ca vutto vajjehīti vattabbo. Yo vadeyya, āpatti dukkaṭassā’’ti.

১৫১. তেন খো পন সমযেন অঞ্ঞতরো পুরিসো মহগ্ঘং মণিং আদায অঞ্ঞতরেন ভিক্খুনা সদ্ধিং অদ্ধানমগ্গপ্পটিপন্নো হোতি। অথ খো সো পুরিসো সুঙ্কট্ঠানং পস্সিত্ৰা তস্স ভিক্খুনো অজানন্তস্স থৰিকায মণিং পক্খিপিত্ৰা সুঙ্কট্ঠানং অতিক্কমিত্ৰা অগ্গহেসি। তস্স কুক্কুচ্চং অহোসি…পে॰… ‘‘কিংচিত্তো ত্ৰং, ভিক্খূ’’তি? ‘‘নাহং, ভগৰা, জানামী’’তি। ‘‘অনাপত্তি, ভিক্খু, অজানন্তস্সা’’তি।

151. Tena kho pana samayena aññataro puriso mahagghaṃ maṇiṃ ādāya aññatarena bhikkhunā saddhiṃ addhānamaggappaṭipanno hoti. Atha kho so puriso suṅkaṭṭhānaṃ passitvā tassa bhikkhuno ajānantassa thavikāya maṇiṃ pakkhipitvā suṅkaṭṭhānaṃ atikkamitvā aggahesi. Tassa kukkuccaṃ ahosi…pe… ‘‘kiṃcitto tvaṃ, bhikkhū’’ti? ‘‘Nāhaṃ, bhagavā, jānāmī’’ti. ‘‘Anāpatti, bhikkhu, ajānantassā’’ti.

তেন খো পন সমযেন অঞ্ঞতরো পুরিসো মহগ্ঘং মণিং আদায অঞ্ঞতরেন ভিক্খুনা সদ্ধিং অদ্ধানমগ্গপ্পটিপন্নো হোতি। অথ খো সো পুরিসো সুঙ্কট্ঠানং পস্সিত্ৰা গিলানালযং করিত্ৰা অত্তনো ভণ্ডিকং তস্স ভিক্খুনো অদাসি। অথ খো সো পুরিসো সুঙ্কট্ঠানং অতিক্কমিত্ৰা তং ভিক্খুং এতদৰোচ – ‘‘আহর মে, ভন্তে, ভণ্ডিকং; নাহং অকল্লকো’’তি। ‘‘কিস্স পন ত্ৰং, আৰুসো, এৰরূপং অকাসী’’তি? অথ খো সো পুরিসো তস্স ভিক্খুনো এতমত্থং আরোচেসি। তস্স কুক্কুচ্চং অহোসি…পে॰… ‘‘কিংচিত্তো ত্ৰং, ভিক্খূ’’তি? ‘‘নাহং, ভগৰা, জানামী’’তি। ‘‘অনাপত্তি, ভিক্খু, অজানন্তস্সা’’তি।

Tena kho pana samayena aññataro puriso mahagghaṃ maṇiṃ ādāya aññatarena bhikkhunā saddhiṃ addhānamaggappaṭipanno hoti. Atha kho so puriso suṅkaṭṭhānaṃ passitvā gilānālayaṃ karitvā attano bhaṇḍikaṃ tassa bhikkhuno adāsi. Atha kho so puriso suṅkaṭṭhānaṃ atikkamitvā taṃ bhikkhuṃ etadavoca – ‘‘āhara me, bhante, bhaṇḍikaṃ; nāhaṃ akallako’’ti. ‘‘Kissa pana tvaṃ, āvuso, evarūpaṃ akāsī’’ti? Atha kho so puriso tassa bhikkhuno etamatthaṃ ārocesi. Tassa kukkuccaṃ ahosi…pe… ‘‘kiṃcitto tvaṃ, bhikkhū’’ti? ‘‘Nāhaṃ, bhagavā, jānāmī’’ti. ‘‘Anāpatti, bhikkhu, ajānantassā’’ti.

১৫২. তেন খো পন সমযেন অঞ্ঞতরো ভিক্খু সত্থেন সদ্ধিং অদ্ধানমগ্গপ্পটিপন্নো হোতি। অঞ্ঞতরো পুরিসো তং ভিক্খুং আমিসেন উপলাপেত্ৰা সুঙ্কট্ঠানং পস্সিত্ৰা মহগ্ঘং মণিং তস্স ভিক্খুনো অদাসি – ‘‘ইমং, ভন্তে, মণিং সুঙ্কট্ঠানং অতিক্কামেহী’’তি। অথ খো সো ভিক্খু তং মণিং সুঙ্কট্ঠানং অতিক্কামেসি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

152. Tena kho pana samayena aññataro bhikkhu satthena saddhiṃ addhānamaggappaṭipanno hoti. Aññataro puriso taṃ bhikkhuṃ āmisena upalāpetvā suṅkaṭṭhānaṃ passitvā mahagghaṃ maṇiṃ tassa bhikkhuno adāsi – ‘‘imaṃ, bhante, maṇiṃ suṅkaṭṭhānaṃ atikkāmehī’’ti. Atha kho so bhikkhu taṃ maṇiṃ suṅkaṭṭhānaṃ atikkāmesi. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৫৩. তেন খো পন সমযেন অঞ্ঞতরো ভিক্খু পাসে বন্ধং সূকরং কারুঞ্ঞেন মুঞ্চি। তস্স কুক্কুচ্চং অহোসি…পে॰… ‘‘কিংচিত্তো ত্ৰং, ভিক্খূ’’তি? ‘‘কারুঞ্ঞাধিপ্পাযো অহং, ভগৰা’’তি। ‘‘অনাপত্তি, ভিক্খু, কারুঞ্ঞাধিপ্পাযস্সা’’তি।

153. Tena kho pana samayena aññataro bhikkhu pāse bandhaṃ sūkaraṃ kāruññena muñci. Tassa kukkuccaṃ ahosi…pe… ‘‘kiṃcitto tvaṃ, bhikkhū’’ti? ‘‘Kāruññādhippāyo ahaṃ, bhagavā’’ti. ‘‘Anāpatti, bhikkhu, kāruññādhippāyassā’’ti.

তেন খো পন সমযেন অঞ্ঞতরো ভিক্খু পাসে বন্ধং সূকরং – ‘‘পুরে সামিকা পস্সন্তী’’তি, থেয্যচিত্তো মুঞ্চি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu pāse bandhaṃ sūkaraṃ – ‘‘pure sāmikā passantī’’ti, theyyacitto muñci. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু পাসে বন্ধং মিগং কারুঞ্ঞেন মুঞ্চি… পাসে বন্ধং মিগং – ‘‘পুরে সামিকা পস্সন্তী’’তি, থেয্যচিত্তো মুঞ্চি … কুমিনে বন্ধে মচ্ছে কারুঞ্ঞেন মুঞ্চি… কুমিনে বন্ধে মচ্ছে – ‘‘পুরে সামিকা পস্সন্তী’’তি থেয্যচিত্তো মুঞ্চি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu pāse bandhaṃ migaṃ kāruññena muñci… pāse bandhaṃ migaṃ – ‘‘pure sāmikā passantī’’ti, theyyacitto muñci … kumine bandhe macche kāruññena muñci… kumine bandhe macche – ‘‘pure sāmikā passantī’’ti theyyacitto muñci. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু যানে ভণ্ডং পস্সিত্ৰা – ‘‘ইতো গণ্হন্তো পারাজিকো ভৰিস্সামী’’তি, অতিক্কমিত্ৰা পৰট্টেত্ৰা ⁴¹ অগ্গহেসি। তস্স কুক্কুচ্চং অহোসি…পে॰… ‘‘আপত্তিং ত্ৰং , ভিক্খু, আপন্নো পারাজিক’’ন্তি।

Tena kho pana samayena aññataro bhikkhu yāne bhaṇḍaṃ passitvā – ‘‘ito gaṇhanto pārājiko bhavissāmī’’ti, atikkamitvā pavaṭṭetvā ⁴² aggahesi. Tassa kukkuccaṃ ahosi…pe… ‘‘āpattiṃ tvaṃ , bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু কুললেন উক্খিত্তং মংসপেসিং – ‘‘সামিকানং দস্সামী’’তি অগ্গহেসি। সামিকা তং ভিক্খুং চোদেসুং – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, অথেয্যচিত্তস্সা’’তি।

Tena kho pana samayena aññataro bhikkhu kulalena ukkhittaṃ maṃsapesiṃ – ‘‘sāmikānaṃ dassāmī’’ti aggahesi. Sāmikā taṃ bhikkhuṃ codesuṃ – ‘‘assamaṇosi tva’’nti. Tassa kukkuccaṃ ahosi…pe… ‘‘anāpatti, bhikkhu, atheyyacittassā’’ti.

তেন খো পন সমযেন অঞ্ঞতরো ভিক্খু কুললেন উক্খিত্তং মংসপেসিং – ‘‘পুরে সামিকা পস্সন্তী’’তি, থেয্যচিত্তো অগ্গহেসি। সামিকা তং ভিক্খুং চোদেসুং – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu kulalena ukkhittaṃ maṃsapesiṃ – ‘‘pure sāmikā passantī’’ti, theyyacitto aggahesi. Sāmikā taṃ bhikkhuṃ codesuṃ – ‘‘assamaṇosi tva’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৫৪. তেন খো পন সমযেন মনুস্সা উল়ুম্পং বন্ধিত্ৰা অচিরৰতিযা নদিযা ওসারেন্তি। বন্ধনে ছিন্নে কট্ঠানি ৰিপ্পকিণ্ণানি অগমংসু। ভিক্খূ পংসুকূলসঞ্ঞিনো উত্তারেসুং। সামিকা তে ভিক্খূ চোদেসুং – ‘‘অস্সমণাত্থ তুম্হে’’তি। তেসং কুক্কুচ্চং অহোসি…পে॰… ‘‘অনাপত্তি, ভিক্খৰে, পংসুকূলসঞ্ঞিস্সা’’তি।

154. Tena kho pana samayena manussā uḷumpaṃ bandhitvā aciravatiyā nadiyā osārenti. Bandhane chinne kaṭṭhāni vippakiṇṇāni agamaṃsu. Bhikkhū paṃsukūlasaññino uttāresuṃ. Sāmikā te bhikkhū codesuṃ – ‘‘assamaṇāttha tumhe’’ti. Tesaṃ kukkuccaṃ ahosi…pe… ‘‘anāpatti, bhikkhave, paṃsukūlasaññissā’’ti.

তেন খো পন সমযেন মনুস্সা উল়ুম্পং বন্ধিত্ৰা অচিরৰতিযা নদিযা ওসারেন্তি। বন্ধনে ছিন্নে কট্ঠানি ৰিপ্পকিণ্ণানি অগমংসু। ভিক্খূ – ‘‘পুরে সামিকা পস্সন্তী’’তি, থেয্যচিত্তা উত্তারেসুং। সামিকা তে ভিক্খূ চোদেসুং – ‘‘অস্সমণাত্থ তুম্হে’’তি। তেসং কুক্কুচ্চং অহোসি…পে॰… ‘‘আপত্তিং তুম্হে, ভিক্খৰে, আপন্না পারাজিক’’ন্তি।

Tena kho pana samayena manussā uḷumpaṃ bandhitvā aciravatiyā nadiyā osārenti. Bandhane chinne kaṭṭhāni vippakiṇṇāni agamaṃsu. Bhikkhū – ‘‘pure sāmikā passantī’’ti, theyyacittā uttāresuṃ. Sāmikā te bhikkhū codesuṃ – ‘‘assamaṇāttha tumhe’’ti. Tesaṃ kukkuccaṃ ahosi…pe… ‘‘āpattiṃ tumhe, bhikkhave, āpannā pārājika’’nti.

তেন খো পন সমযেন অঞ্ঞতরো গোপালকো রুক্খে সাটকং আলগ্গেত্ৰা উচ্চারং অগমাসি। অঞ্ঞতরো ভিক্খু পংসুকূলসঞ্ঞী অগ্গহেসি । অথ খো সো গোপালকো তং ভিক্খুং চোদেসি – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পংসুকূলসঞ্ঞিস্সা’’তি।

Tena kho pana samayena aññataro gopālako rukkhe sāṭakaṃ ālaggetvā uccāraṃ agamāsi. Aññataro bhikkhu paṃsukūlasaññī aggahesi . Atha kho so gopālako taṃ bhikkhuṃ codesi – ‘‘assamaṇosi tva’’nti. Tassa kukkuccaṃ ahosi…pe… ‘‘anāpatti, bhikkhu, paṃsukūlasaññissā’’ti.

তেন খো পন সমযেন অঞ্ঞতরস্স ভিক্খুনো নদিং তরন্তস্স রজকানং হত্থতো মুত্তং সাটকং পাদে লগ্গং হোতি। সো ভিক্খু – ‘‘সামিকানং দস্সামী’’তি অগ্গহেসি। সামিকা তং ভিক্খুং চোদেসুং – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, অথেয্যচিত্তস্সা’’তি।

Tena kho pana samayena aññatarassa bhikkhuno nadiṃ tarantassa rajakānaṃ hatthato muttaṃ sāṭakaṃ pāde laggaṃ hoti. So bhikkhu – ‘‘sāmikānaṃ dassāmī’’ti aggahesi. Sāmikā taṃ bhikkhuṃ codesuṃ – ‘‘assamaṇosi tva’’nti. Tassa kukkuccaṃ ahosi…pe… ‘‘anāpatti, bhikkhu, atheyyacittassā’’ti.

তেন খো পন সমযেন অঞ্ঞতরস্স ভিক্খুনো নদিং তরন্তস্স রজকানং হত্থতো মুত্তং সাটকং পাদে লগ্গং হোতি । সো ভিক্খু – ‘‘পুরে সামিকা পস্সন্তী’’তি, থেয্যচিত্তো অগ্গহেসি। সামিকা তং ভিক্খুং চোদেসুং – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññatarassa bhikkhuno nadiṃ tarantassa rajakānaṃ hatthato muttaṃ sāṭakaṃ pāde laggaṃ hoti . So bhikkhu – ‘‘pure sāmikā passantī’’ti, theyyacitto aggahesi. Sāmikā taṃ bhikkhuṃ codesuṃ – ‘‘assamaṇosi tva’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৫৫. তেন খো পন সমযেন অঞ্ঞতরো ভিক্খু সপ্পিকুম্ভিং পস্সিত্ৰা থোকং থোকং পরিভুঞ্জি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স; আপত্তি দুক্কটস্সা’’তি।

155. Tena kho pana samayena aññataro bhikkhu sappikumbhiṃ passitvā thokaṃ thokaṃ paribhuñji. Tassa kukkuccaṃ ahosi…pe… ‘‘anāpatti, bhikkhu, pārājikassa; āpatti dukkaṭassā’’ti.

তেন খো পন সমযেন সম্বহুলা ভিক্খূ সংৰিদহিত্ৰা অগমংসু – ‘‘ভণ্ডং অৰহরিস্সামা’’তি। একো ভণ্ডং অৰহরি। তে এৰমাহংসু – ‘‘ন মযং পারাজিকা। যো অৰহটো সো পারাজিকো’’তি। ভগৰতো এতমত্থং আরোচেসুং… ‘‘আপত্তিং তুম্হে, ভিক্খৰে, আপন্না পারাজিক’’ন্তি।

Tena kho pana samayena sambahulā bhikkhū saṃvidahitvā agamaṃsu – ‘‘bhaṇḍaṃ avaharissāmā’’ti. Eko bhaṇḍaṃ avahari. Te evamāhaṃsu – ‘‘na mayaṃ pārājikā. Yo avahaṭo so pārājiko’’ti. Bhagavato etamatthaṃ ārocesuṃ… ‘‘āpattiṃ tumhe, bhikkhave, āpannā pārājika’’nti.

তেন খো পন সমযেন সম্বহুলা ভিক্খূ সংৰিদহিত্ৰা ভণ্ডং অৰহরিত্ৰা ভাজেসুং । তেহি ভাজীযমানে একমেকস্স পটিৰিসো ন পঞ্চমাসকো পূরি। তে এৰমাহংসু – ‘‘ন মযং পারাজিকা’’তি। ভগৰতো এতমত্থং আরোচেসুং। ‘‘আপত্তিং তুম্হে, ভিক্খৰে, আপন্না পারাজিক’’ন্তি।

Tena kho pana samayena sambahulā bhikkhū saṃvidahitvā bhaṇḍaṃ avaharitvā bhājesuṃ . Tehi bhājīyamāne ekamekassa paṭiviso na pañcamāsako pūri. Te evamāhaṃsu – ‘‘na mayaṃ pārājikā’’ti. Bhagavato etamatthaṃ ārocesuṃ. ‘‘Āpattiṃ tumhe, bhikkhave, āpannā pārājika’’nti.

তেন খো পন সমযেন অঞ্ঞতরো ভিক্খু সাৰত্থিযং দুব্ভিক্খে আপণিকস্স তণ্ডুলমুট্ঠিং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu sāvatthiyaṃ dubbhikkhe āpaṇikassa taṇḍulamuṭṭhiṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু সাৰত্থিযং দুব্ভিক্খে আপণিকস্স মুগ্গমুট্ঠিং… মাসমুট্ঠিং… তিলমুট্ঠিং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু আপন্নো পারাজিক’’ন্তি।

Tena kho pana samayena aññataro bhikkhu sāvatthiyaṃ dubbhikkhe āpaṇikassa muggamuṭṭhiṃ… māsamuṭṭhiṃ… tilamuṭṭhiṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu āpanno pārājika’’nti.

তেন খো পন সমযেন সাৰত্থিযং অন্ধৰনে চোরকা গাৰিং হন্ত্ৰা মংসং খাদিত্ৰা সেসকং পটিসামেত্ৰা অগমংসু। ভিক্খূ পংসুকূলসঞ্ঞিনো পটিগ্গহাপেত্ৰা পরিভুঞ্জিংসু। চোরকা তে ভিক্খূ চোদেসুং – ‘‘অস্সমণাত্থ তুম্হে’’তি। তেসং কুক্কুচ্চং অহোসি…পে॰… ‘‘অনাপত্তি, ভিক্খৰে, পংসুকূলসঞ্ঞিস্সা’’তি।

Tena kho pana samayena sāvatthiyaṃ andhavane corakā gāviṃ hantvā maṃsaṃ khāditvā sesakaṃ paṭisāmetvā agamaṃsu. Bhikkhū paṃsukūlasaññino paṭiggahāpetvā paribhuñjiṃsu. Corakā te bhikkhū codesuṃ – ‘‘assamaṇāttha tumhe’’ti. Tesaṃ kukkuccaṃ ahosi…pe… ‘‘anāpatti, bhikkhave, paṃsukūlasaññissā’’ti.

তেন খো পন সমযেন সাৰত্থিযং অন্ধৰনে চোরকা সূকরং হন্ত্ৰা মংসং খাদিত্ৰা সেসকং পটিসামেত্ৰা অগমংসু। ভিক্খূ পংসুকূলসঞ্ঞিনো পটিগ্গহাপেত্ৰা পরিভুঞ্জিংসু। চোরকা তে ভিক্খূ চোদেসুং – ‘‘অস্সমণাত্থ তুম্হে’’তি। তেসং কুক্কুচ্চং অহোসি…পে॰… ‘‘অনাপত্তি, ভিক্খৰে, পংসুকূলসঞ্ঞিস্সা’’তি।

Tena kho pana samayena sāvatthiyaṃ andhavane corakā sūkaraṃ hantvā maṃsaṃ khāditvā sesakaṃ paṭisāmetvā agamaṃsu. Bhikkhū paṃsukūlasaññino paṭiggahāpetvā paribhuñjiṃsu. Corakā te bhikkhū codesuṃ – ‘‘assamaṇāttha tumhe’’ti. Tesaṃ kukkuccaṃ ahosi…pe… ‘‘anāpatti, bhikkhave, paṃsukūlasaññissā’’ti.

তেন খো পন সমযেন অঞ্ঞতরো ভিক্খু তিণক্খেত্তং গন্ত্ৰা লূতং তিণং পঞ্চমাসগ্ঘনকং থেয্যচিত্তো অৰহরি। তস্স কুক্কুচ্চং অহোসি …পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu tiṇakkhettaṃ gantvā lūtaṃ tiṇaṃ pañcamāsagghanakaṃ theyyacitto avahari. Tassa kukkuccaṃ ahosi …pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু তিণক্খেত্তং গন্ত্ৰা তিণং লাযিত্ৰা পঞ্চমাসগ্ঘনকং থেয্যচিত্তো অৰহরি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu tiṇakkhettaṃ gantvā tiṇaṃ lāyitvā pañcamāsagghanakaṃ theyyacitto avahari. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৫৬. তেন খো পন সমযেন আগন্তুকা ভিক্খূ সঙ্ঘস্স অম্বং ভাজাপেত্ৰা পরিভুঞ্জিংসু। আৰাসিকা ভিক্খূ তে ভিক্খূ চোদেসুং – ‘‘অস্সমণাত্থ তুম্হে’’তি। তেসং কুক্কুচ্চং অহোসি…পে॰… ভগৰতো এতমত্থং আরোচেসুং। ‘‘কিংচিত্তা তুম্হে, ভিক্খৰে’’তি? ‘‘পরিভোগত্থায ⁴³ মযং ভগৰা’’তি। ‘‘অনাপত্তি, ভিক্খৰে, পরিভোগত্থাযা’’তি।

156. Tena kho pana samayena āgantukā bhikkhū saṅghassa ambaṃ bhājāpetvā paribhuñjiṃsu. Āvāsikā bhikkhū te bhikkhū codesuṃ – ‘‘assamaṇāttha tumhe’’ti. Tesaṃ kukkuccaṃ ahosi…pe… bhagavato etamatthaṃ ārocesuṃ. ‘‘Kiṃcittā tumhe, bhikkhave’’ti? ‘‘Paribhogatthāya ⁴⁴ mayaṃ bhagavā’’ti. ‘‘Anāpatti, bhikkhave, paribhogatthāyā’’ti.

তেন খো পন সমযেন আগন্তুকা ভিক্খূ সঙ্ঘস্স জম্বুং… সঙ্ঘস্স লবুজং… সঙ্ঘস্স পনসং… সঙ্ঘস্স তালপক্কং… সঙ্ঘস্স উচ্ছুং… সঙ্ঘস্স তিম্বরূসকং ভাজাপেত্ৰা পরিভুঞ্জিংসু। আৰাসিকা ভিক্খূ তে ভিক্খূ চোদেসুং – ‘‘অস্সমণাত্থ, তুম্হে’’তি। তেসং কুক্কুচ্চং অহোসি…পে॰… ‘‘অনাপত্তি, ভিক্খৰে, পরিভোগত্থাযা’’তি।

Tena kho pana samayena āgantukā bhikkhū saṅghassa jambuṃ… saṅghassa labujaṃ… saṅghassa panasaṃ… saṅghassa tālapakkaṃ… saṅghassa ucchuṃ… saṅghassa timbarūsakaṃ bhājāpetvā paribhuñjiṃsu. Āvāsikā bhikkhū te bhikkhū codesuṃ – ‘‘assamaṇāttha, tumhe’’ti. Tesaṃ kukkuccaṃ ahosi…pe… ‘‘anāpatti, bhikkhave, paribhogatthāyā’’ti.

তেন খো পন সমযেন অম্বপালকা ভিক্খূনং অম্বফলং দেন্তি। ভিক্খূ – ‘‘গোপেতুং ইমে ইস্সরা, নযিমে দাতু’’ন্তি, কুক্কুচ্চাযন্তা ন পটিগ্গণ্হন্তি। ভগৰতো এতমত্থং আরোচেসুং। ‘‘অনাপত্তি, ভিক্খৰে, গোপকস্স দানে’’তি।

Tena kho pana samayena ambapālakā bhikkhūnaṃ ambaphalaṃ denti. Bhikkhū – ‘‘gopetuṃ ime issarā, nayime dātu’’nti, kukkuccāyantā na paṭiggaṇhanti. Bhagavato etamatthaṃ ārocesuṃ. ‘‘Anāpatti, bhikkhave, gopakassa dāne’’ti.

তেন খো পন সমযেন জম্বুপালকা… লবুজপালকা… পনসপালকা… তালপক্কপালকা… উচ্ছুপালকা… তিম্বরূসকপালকা ভিক্খূনং তিম্বরূসকং দেন্তি। ভিক্খূ – ‘‘গোপেতুং ইমে ইস্সরা, নযিমে দাতু’’ন্তি, কুক্কুচ্চাযন্তা ন পটিগ্গণ্হন্তি। ভগৰতো এতমত্থং আরোচেসুং। ‘‘অনাপত্তি, ভিক্খৰে, গোপকস্স দানে’’তি।

Tena kho pana samayena jambupālakā… labujapālakā… panasapālakā… tālapakkapālakā… ucchupālakā… timbarūsakapālakā bhikkhūnaṃ timbarūsakaṃ denti. Bhikkhū – ‘‘gopetuṃ ime issarā, nayime dātu’’nti, kukkuccāyantā na paṭiggaṇhanti. Bhagavato etamatthaṃ ārocesuṃ. ‘‘Anāpatti, bhikkhave, gopakassa dāne’’ti.

তেন খো পন সমযেন অঞ্ঞতরো ভিক্খু সঙ্ঘস্স দারুং তাৰকালিকং হরিত্ৰা অত্তনো ৰিহারস্স কুট্টং উপত্থম্ভেসি। ভিক্খূ তং ভিক্খুং চোদেসুং – ‘‘অস্সমণোসি ত্ৰ’’ন্তি। তস্স কুক্কুচ্চং অহোসি। ভগৰতো এতমত্থং আরোচেসি। ‘‘কিংচিত্তো ত্ৰং, ভিক্খূ’’তি? ‘‘তাৰকালিকো অহং, ভগৰা’’তি। ‘‘অনাপত্তি, ভিক্খু, তাৰকালিকে’’তি।

Tena kho pana samayena aññataro bhikkhu saṅghassa dāruṃ tāvakālikaṃ haritvā attano vihārassa kuṭṭaṃ upatthambhesi. Bhikkhū taṃ bhikkhuṃ codesuṃ – ‘‘assamaṇosi tva’’nti. Tassa kukkuccaṃ ahosi. Bhagavato etamatthaṃ ārocesi. ‘‘Kiṃcitto tvaṃ, bhikkhū’’ti? ‘‘Tāvakāliko ahaṃ, bhagavā’’ti. ‘‘Anāpatti, bhikkhu, tāvakālike’’ti.

তেন খো পন সমযেন অঞ্ঞতরো ভিক্খু সঙ্ঘস্স উদকং থেয্যচিত্তো অৰহরি… সঙ্ঘস্স মত্তিকং থেয্যচিত্তো অৰহরি… সঙ্ঘস্স পুঞ্জকিতং তিণং থেয্যচিত্তো অৰহরি… তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu saṅghassa udakaṃ theyyacitto avahari… saṅghassa mattikaṃ theyyacitto avahari… saṅghassa puñjakitaṃ tiṇaṃ theyyacitto avahari… tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু সঙ্ঘস্স পুঞ্জকিতং তিণং থেয্যচিত্তো ঝাপেসি। তস্স কুক্কুচ্চং অহোসি…পে॰… ‘‘অনাপত্তি, ভিক্খু, পারাজিকস্স। আপত্তি দুক্কটস্সা’’তি।

Tena kho pana samayena aññataro bhikkhu saṅghassa puñjakitaṃ tiṇaṃ theyyacitto jhāpesi. Tassa kukkuccaṃ ahosi…pe… ‘‘anāpatti, bhikkhu, pārājikassa. Āpatti dukkaṭassā’’ti.

তেন খো পন সমযেন অঞ্ঞতরো ভিক্খু সঙ্ঘস্স মঞ্চং থেয্যচিত্তো অৰহরি… তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu saṅghassa mañcaṃ theyyacitto avahari… tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

তেন খো পন সমযেন অঞ্ঞতরো ভিক্খু সঙ্ঘস্স পীঠং… সঙ্ঘস্স ভিসিং… সঙ্ঘস্স বিব্বোহনং ⁴⁵ … সঙ্ঘস্স কৰাটং… সঙ্ঘস্স আলোকসন্ধিং… সঙ্ঘস্স গোপানসিং থেয্যচিত্তো অৰহরি… তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো পারাজিক’’ন্তি।

Tena kho pana samayena aññataro bhikkhu saṅghassa pīṭhaṃ… saṅghassa bhisiṃ… saṅghassa bibbohanaṃ ⁴⁶ … saṅghassa kavāṭaṃ… saṅghassa ālokasandhiṃ… saṅghassa gopānasiṃ theyyacitto avahari… tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno pārājika’’nti.

১৫৭. ⁴⁷ তেন খো পন সমযেন ভিক্খূ অঞ্ঞতরস্স উপাসকস্স ৰিহারপরিভোগং সেনাসনং অঞ্ঞত্র পরিভুঞ্জন্তি। অথ খো সো উপাসকো উজ্ঝাযতি খিয্যতি ৰিপাচেতি – ‘‘কথঞ্হি নাম ভদন্তা অঞ্ঞত্র পরিভোগং অঞ্ঞত্র পরিভুঞ্জিস্সন্তী’’তি! ভগৰতো এতমত্থং আরোচেসুং। ‘‘ন, ভিক্খৰে, অঞ্ঞত্র পরিভোগো অঞ্ঞত্র পরিভুঞ্জিতব্বো। যো পরিভুঞ্জেয্য, আপত্তি দুক্কটস্সা’’তি।

157.⁴⁸ Tena kho pana samayena bhikkhū aññatarassa upāsakassa vihāraparibhogaṃ senāsanaṃ aññatra paribhuñjanti. Atha kho so upāsako ujjhāyati khiyyati vipāceti – ‘‘kathañhi nāma bhadantā aññatra paribhogaṃ aññatra paribhuñjissantī’’ti! Bhagavato etamatthaṃ ārocesuṃ. ‘‘Na, bhikkhave, aññatra paribhogo aññatra paribhuñjitabbo. Yo paribhuñjeyya, āpatti dukkaṭassā’’ti.

⁴⁹ তেন খো পন সমযেন ভিক্খূ উপোসথগ্গম্পি সন্নিসজ্জম্পি হরিতুং কুক্কুচ্চাযন্তা ছমাযং নিসীদন্তি। গত্তানিপি চীৰরানিপি পংসুকিতানি হোন্তি। ভগৰতো এতমত্থং আরোচেসুং। ‘‘অনুজানামি, ভিক্খৰে, তাৰকালিকং হরিতু’’ন্তি।

⁵⁰ Tena kho pana samayena bhikkhū uposathaggampi sannisajjampi harituṃ kukkuccāyantā chamāyaṃ nisīdanti. Gattānipi cīvarānipi paṃsukitāni honti. Bhagavato etamatthaṃ ārocesuṃ. ‘‘Anujānāmi, bhikkhave, tāvakālikaṃ haritu’’nti.

তেন খো পন সমযেন চম্পাযং থুল্লনন্দায ভিক্খুনিযা অন্তেৰাসিনী ভিক্খুনী থুল্লনন্দায ভিক্খুনিযা উপট্ঠাককুলং গন্ত্ৰা – ‘‘অয্যা ইচ্ছতি তেকটুলযাগুং পাতু’’ন্তি, পচাপেত্ৰা হরিত্ৰা অত্তনা পরিভুঞ্জি। সা জানিত্ৰা তং চোদেসি – ‘‘অস্সমণীসি ত্ৰ’’ন্তি। তস্সা কুক্কুচ্চং অহোসি। অথ খো সা ভিক্খুনী ভিক্খুনীনং এতমত্থং আরোচেসি। ভিক্খুনিযো ভিক্খূনং এতমত্থং আরোচেসুং। ভিক্খূ ভগৰতো এতমত্থং আরোচেসুং। ‘‘অনাপত্তি, ভিক্খৰে, পারাজিকস্স; আপত্তি সম্পজানমুসাৰাদে পাচিত্তিযস্সা’’তি।

Tena kho pana samayena campāyaṃ thullanandāya bhikkhuniyā antevāsinī bhikkhunī thullanandāya bhikkhuniyā upaṭṭhākakulaṃ gantvā – ‘‘ayyā icchati tekaṭulayāguṃ pātu’’nti, pacāpetvā haritvā attanā paribhuñji. Sā jānitvā taṃ codesi – ‘‘assamaṇīsi tva’’nti. Tassā kukkuccaṃ ahosi. Atha kho sā bhikkhunī bhikkhunīnaṃ etamatthaṃ ārocesi. Bhikkhuniyo bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. ‘‘Anāpatti, bhikkhave, pārājikassa; āpatti sampajānamusāvāde pācittiyassā’’ti.

তেন খো পন সমযেন রাজগহে থুল্লনন্দায ভিক্খুনিযা অন্তেৰাসিনী ভিক্খুনী থুল্লনন্দায ভিক্খুনিযা উপট্ঠাককুলং গন্ত্ৰা – ‘‘অয্যা ইচ্ছতি মধুগোল়কং খাদিতু’’ন্তি, পচাপেত্ৰা হরিত্ৰা অত্তনা পরিভুঞ্জি। সা জানিত্ৰা তং চোদেসি – ‘‘অস্সমণীসি ত্ৰ’’ন্তি। তস্সা কুক্কুচ্চং অহোসি…পে॰… ‘‘অনাপত্তি, ভিক্খৰে, পারাজিকস্স; আপত্তি সম্পজানমুসাৰাদে পাচিত্তিযস্সা’’তি।

Tena kho pana samayena rājagahe thullanandāya bhikkhuniyā antevāsinī bhikkhunī thullanandāya bhikkhuniyā upaṭṭhākakulaṃ gantvā – ‘‘ayyā icchati madhugoḷakaṃ khāditu’’nti, pacāpetvā haritvā attanā paribhuñji. Sā jānitvā taṃ codesi – ‘‘assamaṇīsi tva’’nti. Tassā kukkuccaṃ ahosi…pe… ‘‘anāpatti, bhikkhave, pārājikassa; āpatti sampajānamusāvāde pācittiyassā’’ti.

১৫৮. তেন খো পন সমযেন ৰেসালিযং আযস্মতো অজ্জুকস্স উপট্ঠাকস্স গহপতিনো দ্ৰে দারকা হোন্তি – পুত্তো চ ভাগিনেয্যো চ। অথ খো সো গহপতি আযস্মন্তং অজ্জুকং এতদৰোচ – ‘‘ইমং, ভন্তে, ওকাসং যো ইমেসং দ্ৰিন্নং দারকানং সদ্ধো হোতি পসন্নো তস্স আচিক্খেয্যাসী’’তি ⁵¹। তেন খো পন সমযেন তস্স গহপতিনো ভাগিনেয্যো সদ্ধো হোতি পসন্নো। অথ খো আযস্মা অজ্জুকো তং ওকাসং তস্স দারকস্স আচিক্খি। সো তেন সাপতেয্যেন কুটুম্বঞ্চ সণ্ঠপেসি দানঞ্চ পট্ঠপেসি। অথ খো তস্স গহপতিনো পুত্তো আযস্মন্তং আনন্দং এতদৰোচ – ‘‘কো নু খো, ভন্তে আনন্দ, পিতুনো দাযজ্জো – পুত্তো ৰা ভাগিনেয্যো ৰা’’তি? ‘‘পুত্তো খো, আৰুসো, পিতুনো দাযজ্জো’’তি। ‘‘অযং, ভন্তে, অয্যো অজ্জুকো অম্হাকং সাপতেয্যং অম্হাকং মেথুনকস্স আচিক্খী’’তি। ‘‘অস্সমণো, আৰুসো, আযস্মা অজ্জুকো’’তি। অথ খো আযস্মা অজ্জুকো আযস্মন্তং আনন্দং এতদৰোচ – ‘‘দেহি মে, আৰুসো আনন্দ, ৰিনিচ্ছয’’ন্তি। তেন খো পন সমযেন আযস্মা উপালি আযস্মতো অজ্জুকস্স পক্খো হোতি। অথ খো আযস্মা উপালি আযস্মন্তং আনন্দং এতদৰোচ – ‘‘যো নু খো, আৰুসো আনন্দ, সামিকেন ‘ইমং ওকাসং ইত্থন্নামস্স আচিক্খেয্যাসী’তি ৰুত্তো তস্স আচিক্খতি, কিং সো আপজ্জতী’’তি? ‘‘ন, ভন্তে, কিঞ্চি আপজ্জতি, অন্তমসো দুক্কটমত্তম্পী’’তি। ‘‘অযং, আৰুসো, আযস্মা অজ্জুকো সামিকেন – ‘ইমং ওকাসং ইত্থন্নামস্স আচিক্খা’তি ৰুত্তো তস্স আচিক্খতি; অনাপত্তি, আৰুসো, আযস্মতো অজ্জুকস্সা’’তি।

158. Tena kho pana samayena vesāliyaṃ āyasmato ajjukassa upaṭṭhākassa gahapatino dve dārakā honti – putto ca bhāgineyyo ca. Atha kho so gahapati āyasmantaṃ ajjukaṃ etadavoca – ‘‘imaṃ, bhante, okāsaṃ yo imesaṃ dvinnaṃ dārakānaṃ saddho hoti pasanno tassa ācikkheyyāsī’’ti ⁵². Tena kho pana samayena tassa gahapatino bhāgineyyo saddho hoti pasanno. Atha kho āyasmā ajjuko taṃ okāsaṃ tassa dārakassa ācikkhi. So tena sāpateyyena kuṭumbañca saṇṭhapesi dānañca paṭṭhapesi. Atha kho tassa gahapatino putto āyasmantaṃ ānandaṃ etadavoca – ‘‘ko nu kho, bhante ānanda, pituno dāyajjo – putto vā bhāgineyyo vā’’ti? ‘‘Putto kho, āvuso, pituno dāyajjo’’ti. ‘‘Ayaṃ, bhante, ayyo ajjuko amhākaṃ sāpateyyaṃ amhākaṃ methunakassa ācikkhī’’ti. ‘‘Assamaṇo, āvuso, āyasmā ajjuko’’ti. Atha kho āyasmā ajjuko āyasmantaṃ ānandaṃ etadavoca – ‘‘dehi me, āvuso ānanda, vinicchaya’’nti. Tena kho pana samayena āyasmā upāli āyasmato ajjukassa pakkho hoti. Atha kho āyasmā upāli āyasmantaṃ ānandaṃ etadavoca – ‘‘yo nu kho, āvuso ānanda, sāmikena ‘imaṃ okāsaṃ itthannāmassa ācikkheyyāsī’ti vutto tassa ācikkhati, kiṃ so āpajjatī’’ti? ‘‘Na, bhante, kiñci āpajjati, antamaso dukkaṭamattampī’’ti. ‘‘Ayaṃ, āvuso, āyasmā ajjuko sāmikena – ‘imaṃ okāsaṃ itthannāmassa ācikkhā’ti vutto tassa ācikkhati; anāpatti, āvuso, āyasmato ajjukassā’’ti.

১৫৯. তেন খো পন সমযেন বারাণসিযং আযস্মতো পিলিন্দৰচ্ছস্স উপট্ঠাককুলং চোরেহি উপদ্দুতং হোতি। দ্ৰে চ দারকা নীতা হোন্তি। অথ খো আযস্মা পিলিন্দৰচ্ছো তে দারকে ইদ্ধিযা আনেত্ৰা পাসাদে ঠপেসি। মনুস্সা তে দারকে পস্সিত্ৰা – ‘‘অয্যস্সাযং পিলিন্দৰচ্ছস্স ইদ্ধানুভাৰো’’তি, আযস্মন্তে পিলিন্দৰচ্ছে অভিপ্পসীদিংসু। ভিক্খূ উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা পিলিন্দৰচ্ছো চোরেহি নীতে দারকে আনেস্সতী’’তি! ভগৰতো এতমত্থং আরোচেসুং। ‘‘অনাপত্তি, ভিক্খৰে ⁵³, ইদ্ধিমস্স ইদ্ধিৰিসযে’’তি।

159. Tena kho pana samayena bārāṇasiyaṃ āyasmato pilindavacchassa upaṭṭhākakulaṃ corehi upaddutaṃ hoti. Dve ca dārakā nītā honti. Atha kho āyasmā pilindavaccho te dārake iddhiyā ānetvā pāsāde ṭhapesi. Manussā te dārake passitvā – ‘‘ayyassāyaṃ pilindavacchassa iddhānubhāvo’’ti, āyasmante pilindavacche abhippasīdiṃsu. Bhikkhū ujjhāyanti khiyyanti vipācenti – ‘‘kathañhi nāma āyasmā pilindavaccho corehi nīte dārake ānessatī’’ti! Bhagavato etamatthaṃ ārocesuṃ. ‘‘Anāpatti, bhikkhave ⁵⁴, iddhimassa iddhivisaye’’ti.

১৬০. তেন খো পন সমযেন দ্ৰে ভিক্খূ সহাযকা হোন্তি – পণ্ডুকো চ কপিলো চ। একো গামকে ৰিহরতি, একো কোসম্বিযং। অথ খো তস্স ভিক্খুনো গামকা কোসম্বিং গচ্ছন্তস্স অন্তরামগ্গে নদিং তরন্তস্স সূকরিকানং হত্থতো মুত্তা মেদৰট্টি পাদে লগ্গা হোতি। সো ভিক্খু – ‘‘সামিকানং দস্সামী’’তি অগ্গহেসি। সামিকা তং ভিক্খুং চোদেসুং – ‘‘অস্সমণোসি ত্ৰ’’ন্তি। তং উত্তিণ্ণং গোপালিকা ⁵⁵ পস্সিত্ৰা এতদৰোচ – ‘‘এহি, ভন্তে, মেথুনং ধম্মং পটিসেৰা’’তি। সো – ‘‘পকতিযাপাহং অস্সমণো’’তি তস্সা মেথুনং ধম্মং পটিসেৰিত্ৰা কোসম্বিং গন্ত্ৰা ভিক্খূনং এতমত্থং আরোচেসি। ভিক্খূ ভগৰতো এতমত্থং ওরোচেসুং। ‘‘অনাপত্তি, ভিক্খৰে, অদিন্নাদানে পারাজিকস্স; আপত্তি মেথুনধম্মসমাযোগে পারাজিকস্সা’’তি।

160. Tena kho pana samayena dve bhikkhū sahāyakā honti – paṇḍuko ca kapilo ca. Eko gāmake viharati, eko kosambiyaṃ. Atha kho tassa bhikkhuno gāmakā kosambiṃ gacchantassa antarāmagge nadiṃ tarantassa sūkarikānaṃ hatthato muttā medavaṭṭi pāde laggā hoti. So bhikkhu – ‘‘sāmikānaṃ dassāmī’’ti aggahesi. Sāmikā taṃ bhikkhuṃ codesuṃ – ‘‘assamaṇosi tva’’nti. Taṃ uttiṇṇaṃ gopālikā ⁵⁶ passitvā etadavoca – ‘‘ehi, bhante, methunaṃ dhammaṃ paṭisevā’’ti. So – ‘‘pakatiyāpāhaṃ assamaṇo’’ti tassā methunaṃ dhammaṃ paṭisevitvā kosambiṃ gantvā bhikkhūnaṃ etamatthaṃ ārocesi. Bhikkhū bhagavato etamatthaṃ orocesuṃ. ‘‘Anāpatti, bhikkhave, adinnādāne pārājikassa; āpatti methunadhammasamāyoge pārājikassā’’ti.

১৬১. তেন খো পন সমযেন সাগলাযং আযস্মতো দল়্হিকস্স সদ্ধিৰিহারিকো ভিক্খু অনভিরতিযা পীল়িতো আপণিকস্স ৰেঠনং অৰহরিত্ৰা আযস্মন্তং দল়্হিকং এতদৰোচ – ‘‘অস্সমণো অহং, ভন্তে, ৰিব্ভমিস্সামী’’তি। ‘‘কিং তযা, আৰুসো, কত’’ন্তি? সো তমত্থং আরোচেসি। আহরাপেত্ৰা অগ্ঘাপেসি। তং অগ্ঘাপেন্তং ন পঞ্চমাসকে অগ্ঘতি । ‘‘অনাপত্তি, আৰুসো, পারাজিকস্সা’’তি। ধম্মকথং অকাসি। সো ভিক্খু অভিরমতীতি ⁵⁷।

161. Tena kho pana samayena sāgalāyaṃ āyasmato daḷhikassa saddhivihāriko bhikkhu anabhiratiyā pīḷito āpaṇikassa veṭhanaṃ avaharitvā āyasmantaṃ daḷhikaṃ etadavoca – ‘‘assamaṇo ahaṃ, bhante, vibbhamissāmī’’ti. ‘‘Kiṃ tayā, āvuso, kata’’nti? So tamatthaṃ ārocesi. Āharāpetvā agghāpesi. Taṃ agghāpentaṃ na pañcamāsake agghati . ‘‘Anāpatti, āvuso, pārājikassā’’ti. Dhammakathaṃ akāsi. So bhikkhu abhiramatīti ⁵⁸.

দুতিযপারাজিকং সমত্তং।

Dutiyapārājikaṃ samattaṃ.

Next: ৩. ততিযপারাজিকং • 3. Tatiyapārājikaṃ

Footnotes:

1. লোহিতকা (স্যা॰)

2. কিঙ্কিণিকসদ্দো (সী॰ স্যা॰)

3. lohitakā (syā.)

4. kiṅkiṇikasaddo (sī. syā.)

5. দারুকুড্ডিকং কুটিকং (সী॰)

6. সম্মচারিনো (ক॰)

7. dārukuḍḍikaṃ kuṭikaṃ (sī.)

8. sammacārino (ka.)

9. সচ্চং কির দেৰ দেৰেন (সী॰)

10. বদ্ধং (সী॰)

11. saccaṃ kira deva devena (sī.)

12. baddhaṃ (sī.)

13. পাদারহেনৰা অতিরেকপাদেনৰাতি (স্যা॰)

14. pādārahenavā atirekapādenavāti (syā.)

15. ইন্দখিলে (ক॰)

16. indakhile (ka.)

17. হরিতত্তায (সী॰ স্যা॰)

18. হরিতত্তায (সী॰ স্যা॰)

19. haritattāya (sī. syā.)

20. haritattāya (sī. syā.)

21. দন্তপোনং (সী॰ ক॰)

22. dantaponaṃ (sī. ka.)

23. ৰিযূহতি (স্যা॰)

24. viyūhati (syā.)

25. রাজগ্ঘং (সী॰ স্যা॰)

26. rājagghaṃ (sī. syā.)

27. সুট্ঠূতি (ক॰)

28. suṭṭhūti (ka.)

29. (খিত্তচিত্তস্স ৰেদনাট্টস্স) কত্থচি নত্থি

30. (khittacittassa vedanāṭṭassa) katthaci natthi

31. জন্তাঘরেন (স্যা॰)

32. jantāgharena (syā.)

33. কূরমংসঞ্চ (স্যা॰)

34. kūramaṃsañca (syā.)

35. সূনাঘরং (সী॰ স্যা)

36. sūnāgharaṃ (sī. syā)

37. নিক্খমেয্য (সী॰ স্যা॰)

38. নিক্খমেয্য (সী॰ স্যা॰)

39. nikkhameyya (sī. syā.)

40. nikkhameyya (sī. syā.)

41. পৰত্তেত্ৰা (ক॰)

42. pavattetvā (ka.)

43. পরিভোগত্থা (সী॰)

44. paribhogatthā (sī.)

45. বিম্বোহনং (সী॰ স্যা॰)

46. bimbohanaṃ (sī. syā.)

47. চূল়ৰ॰ ৩২৪

48. cūḷava. 324

49. চূল়ৰ॰ ৩২৪

50. cūḷava. 324

51. আচিক্খেয্যাসীতি সো কালমকাসি (স্যা॰)

52. ācikkheyyāsīti so kālamakāsi (syā.)

53. ইদ্ধিমতো (সী॰), ইদ্ধিমন্তস্স (স্যা॰)

54. iddhimato (sī.), iddhimantassa (syā.)

55. অঞ্ঞতরা গোপালিকা (সী॰ স্যা॰)

56. aññatarā gopālikā (sī. syā.)

57. অভিরমীতি (সী॰ স্যা॰)

58. abhiramīti (sī. syā.)

Related texts:

অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. দুতিযপারাজিকং • 2. Dutiyapārājikaṃ

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact