| Library / Tipiṭaka / ತಿಪಿಟಕ • Tipiṭaka / ಭಿಕ್ಖುನೀವಿಭಙ್ಗ • Bhikkhunīvibhaṅga |
೨. ದುತಿಯಪಾರಾಜಿಕಂ
2. Dutiyapārājikaṃ
೬೬೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ। ತೇನ ಖೋ ಪನ ಸಮಯೇನ ಸುನ್ದರೀನನ್ದಾ ಭಿಕ್ಖುನೀ ಸಾಳ್ಹೇನ ಮಿಗಾರನತ್ತುನಾ ಗಬ್ಭಿನೀ ಹೋತಿ । ಯಾವ ಗಬ್ಭೋ ತರುಣೋ ಅಹೋಸಿ ತಾವ ಛಾದೇಸಿ। ಪರಿಪಕ್ಕೇ ಗಬ್ಭೇ ವಿಬ್ಭಮಿತ್ವಾ ವಿಜಾಯಿ। ಭಿಕ್ಖುನಿಯೋ ಥುಲ್ಲನನ್ದಂ ಭಿಕ್ಖುನಿಂ ಏತದವೋಚುಂ – ‘‘ಸುನ್ದರೀನನ್ದಾ ಖೋ, ಅಯ್ಯೇ, ಅಚಿರವಿಬ್ಭನ್ತಾ ವಿಜಾತಾ। ಕಚ್ಚಿ ನೋ ಸಾ ಭಿಕ್ಖುನೀಯೇವ ಸಮಾನಾ ಗಬ್ಭಿನೀ’’ತಿ? ‘‘ಏವಂ, ಅಯ್ಯೇ’’ತಿ। ‘‘ಕಿಸ್ಸ ಪನ ತ್ವಂ, ಅಯ್ಯೇ, ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಸಿ ನ ಗಣಸ್ಸ ಆರೋಚೇಸೀ’’ತಿ? ‘‘ಯೋ ಏತಿಸ್ಸಾ ಅವಣ್ಣೋ ಮಯ್ಹೇಸೋ ಅವಣ್ಣೋ, ಯಾ ಏತಿಸ್ಸಾ ಅಕಿತ್ತಿ ಮಯ್ಹೇಸಾ ಅಕಿತ್ತಿ, ಯೋ ಏತಿಸ್ಸಾ ಅಯಸೋ ಮಯ್ಹೇಸೋ ಅಯಸೋ, ಯೋ ಏತಿಸ್ಸಾ ಅಲಾಭೋ ಮಯ್ಹೇಸೋ ಅಲಾಭೋ। ಕ್ಯಾಹಂ, ಅಯ್ಯೇ, ಅತ್ತನೋ ಅವಣ್ಣಂ ಅತ್ತನೋ ಅಕಿತ್ತಿಂ ಅತ್ತನೋ ಅಯಸಂ ಅತ್ತನೋ ಅಲಾಭಂ ಪರೇಸಂ ಆರೋಚೇಸ್ಸಾಮೀ’’ತಿ? ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ॰… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಯ್ಯಾ ಥುಲ್ಲನನ್ದಾ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಸ್ಸತಿ ನ ಗಣಸ್ಸ ಆರೋಚೇಸ್ಸತೀ’’ತಿ! ಅಥ ಖೋ ತಾ ಭಿಕ್ಖುನಿಯೋ ಭಿಕ್ಖೂನಂ ಏತಮತ್ಥಂ ಆರೋಚೇಸುಂ। ಭಿಕ್ಖೂ 1 ಭಗವತೋ ಏತಮತ್ಥಂ ಆರೋಚೇಸುಂ। ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇತಿ 2 ನ ಗಣಸ್ಸ ಆರೋಚೇತೀ’’ತಿ 3? ‘‘ಸಚ್ಚಂ, ಭಗವಾ’’ತಿ। ವಿಗರಹಿ ಬುದ್ಧೋ ಭಗವಾ…ಪೇ॰… ಕಥಞ್ಹಿ ನಾಮ, ಭಿಕ್ಖವೇ, ಥುಲ್ಲನನ್ದಾ ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಸ್ಸತಿ ನ ಗಣಸ್ಸ ಆರೋಚೇಸ್ಸತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ॰… ಏವಞ್ಚ ಪನ, ಭಿಕ್ಖವೇ, ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –
664. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sundarīnandā bhikkhunī sāḷhena migāranattunā gabbhinī hoti . Yāva gabbho taruṇo ahosi tāva chādesi. Paripakke gabbhe vibbhamitvā vijāyi. Bhikkhuniyo thullanandaṃ bhikkhuniṃ etadavocuṃ – ‘‘sundarīnandā kho, ayye, aciravibbhantā vijātā. Kacci no sā bhikkhunīyeva samānā gabbhinī’’ti? ‘‘Evaṃ, ayye’’ti. ‘‘Kissa pana tvaṃ, ayye, jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodesi na gaṇassa ārocesī’’ti? ‘‘Yo etissā avaṇṇo mayheso avaṇṇo, yā etissā akitti mayhesā akitti, yo etissā ayaso mayheso ayaso, yo etissā alābho mayheso alābho. Kyāhaṃ, ayye, attano avaṇṇaṃ attano akittiṃ attano ayasaṃ attano alābhaṃ paresaṃ ārocessāmī’’ti? Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodessati na gaṇassa ārocessatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Bhikkhū 4 bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, thullanandā bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodeti 5 na gaṇassa ārocetī’’ti 6? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodessati na gaṇassa ārocessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
೬೬೫. ‘‘ಯಾ ಪನ ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಯ್ಯ ನ ಗಣಸ್ಸ ಆರೋಚೇಯ್ಯ, ಯದಾ ಚ ಸಾ ಠಿತಾ ವಾ ಅಸ್ಸ ಚುತಾ ವಾ ನಾಸಿತಾ ವಾ ಅವಸ್ಸಟಾ ವಾ, ಸಾ ಪಚ್ಛಾ ಏವಂ ವದೇಯ್ಯ – ‘ಪುಬ್ಬೇವಾಹಂ, ಅಯ್ಯೇ, ಅಞ್ಞಾಸಿಂ ಏತಂ ಭಿಕ್ಖುನಿಂ ಏವರೂಪಾ ಚ ಏವರೂಪಾ ಚ ಸಾ ಭಗಿನೀತಿ , ನೋ ಚ ಖೋ ಅತ್ತನಾ ಪಟಿಚೋದೇಸ್ಸಂ ನ ಗಣಸ್ಸ ಆರೋಚೇಸ್ಸ’ನ್ತಿ, ಅಯಮ್ಪಿ ಪಾರಾಜಿಕಾ ಹೋತಿ ಅಸಂವಾಸಾ ವಜ್ಜಪ್ಪಟಿಚ್ಛಾದಿಕಾ’’ತಿ।
665.‘‘Yā pana bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodeyya na gaṇassa āroceyya, yadā ca sā ṭhitā vā assa cutā vā nāsitā vā avassaṭā vā, sā pacchā evaṃ vadeyya – ‘pubbevāhaṃ, ayye, aññāsiṃ etaṃ bhikkhuniṃ evarūpā ca evarūpā ca sā bhaginīti, no ca kho attanā paṭicodessaṃ na gaṇassa ārocessa’nti, ayampi pārājikā hoti asaṃvāsā vajjappaṭicchādikā’’ti.
೬೬೬. ಯಾ ಪನಾತಿ ಯಾ ಯಾದಿಸಾ…ಪೇ॰… ಭಿಕ್ಖುನೀತಿ…ಪೇ॰… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ।
666.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ಜಾನಾತಿ ನಾಮ ಸಾಮಂ ವಾ ಜಾನಾತಿ, ಅಞ್ಞೇ ವಾ ತಸ್ಸಾ ಆರೋಚೇನ್ತಿ, ಸಾ ವಾ ಆರೋಚೇತಿ।
Jānāti nāma sāmaṃ vā jānāti, aññe vā tassā ārocenti, sā vā āroceti.
ಪಾರಾಜಿಕಂ ಧಮ್ಮಂ ಅಜ್ಝಾಪನ್ನನ್ತಿ ಅಟ್ಠನ್ನಂ ಪಾರಾಜಿಕಾನಂ ಅಞ್ಞತರಂ ಪಾರಾಜಿಕಂ ಅಜ್ಝಾಪನ್ನಂ।
Pārājikaṃ dhammaṃ ajjhāpannanti aṭṭhannaṃ pārājikānaṃ aññataraṃ pārājikaṃ ajjhāpannaṃ.
ನೇವತ್ತನಾ ಪಟಿಚೋದೇಯ್ಯಾತಿ ನ ಸಯಂ ಚೋದೇಯ್ಯ।
Nevattanāpaṭicodeyyāti na sayaṃ codeyya.
ನ ಗಣಸ್ಸ ಆರೋಚೇಯ್ಯಾತಿ ನ ಅಞ್ಞಾಸಂ ಭಿಕ್ಖುನೀನಂ ಆರೋಚೇಯ್ಯ।
Na gaṇassa āroceyyāti na aññāsaṃ bhikkhunīnaṃ āroceyya.
ಯದಾ ಚ ಸಾ ಠಿತಾ ವಾ ಅಸ್ಸ ಚುತಾ ವಾತಿ ಠಿತಾ ನಾಮ ಸಲಿಙ್ಗೇ ಠಿತಾ ವುಚ್ಚತಿ। ಚುತಾ ನಾಮ ಕಾಲಙ್ಕತಾ ವುಚ್ಚತಿ। ನಾಸಿತಾ ನಾಮ ಸಯಂ ವಾ ವಿಬ್ಭನ್ತಾ ಹೋತಿ ಅಞ್ಞೇಹಿ ವಾ ನಾಸಿತಾ। ಅವಸ್ಸಟಾ ನಾಮ ತಿತ್ಥಾಯತನಂ ಸಙ್ಕನ್ತಾ ವುಚ್ಚತಿ। ಸಾ ಪಚ್ಛಾ ಏವಂ ವದೇಯ್ಯ – ‘‘ಪುಬ್ಬೇವಾಹಂ, ಅಯ್ಯೇ, ಅಞ್ಞಾಸಿಂ ಏತಂ ಭಿಕ್ಖುನಿಂ ಏವರೂಪಾ ಚ ಏವರೂಪಾ ಚ ಸಾ ಭಗಿನೀ’’ತಿ।
Yadāca sā ṭhitā vā assa cutā vāti ṭhitā nāma saliṅge ṭhitā vuccati. Cutā nāma kālaṅkatā vuccati. Nāsitā nāma sayaṃ vā vibbhantā hoti aññehi vā nāsitā. Avassaṭā nāma titthāyatanaṃ saṅkantā vuccati. Sā pacchā evaṃ vadeyya – ‘‘pubbevāhaṃ, ayye, aññāsiṃ etaṃ bhikkhuniṃ evarūpā ca evarūpā ca sā bhaginī’’ti.
ನೋ ಚ ಖೋ ಅತ್ತನಾ ಪಟಿಚೋದೇಸ್ಸನ್ತಿ ಸಯಂ ವಾ ನ ಚೋದೇಸ್ಸಂ।
No ca kho attanā paṭicodessanti sayaṃ vā na codessaṃ.
ನ ಗಣಸ್ಸ ಆರೋಚೇಸ್ಸನ್ತಿ ನ ಅಞ್ಞಾಸಂ ಭಿಕ್ಖುನೀನಂ ಆರೋಚೇಸ್ಸಂ।
Na gaṇassa ārocessanti na aññāsaṃ bhikkhunīnaṃ ārocessaṃ.
ಅಯಮ್ಪೀತಿ ಪುರಿಮಾಯೋ ಉಪಾದಾಯ ವುಚ್ಚತಿ।
Ayampīti purimāyo upādāya vuccati.
ಪಾರಾಜಿಕಾ ಹೋತೀತಿ ಸೇಯ್ಯಥಾಪಿ ನಾಮ ಪಣ್ಡುಪಲಾಸೋ ಬನ್ಧನಾ ಪಮುತ್ತೋ ಅಭಬ್ಬೋ ಹರಿತತ್ಥಾಯ, ಏವಮೇವ ಭಿಕ್ಖುನೀ ಜಾನಂ ಪಾರಾಜಿಕಂ ಧಮ್ಮಂ ಅಜ್ಝಾಪನ್ನಂ ಭಿಕ್ಖುನಿಂ ನೇವತ್ತನಾ ಪಟಿಚೋದೇಸ್ಸಾಮಿ ನ ಗಣಸ್ಸ ಆರೋಚೇಸ್ಸಾಮೀತಿ ಧುರಂ ನಿಕ್ಖಿತ್ತಮತ್ತೇ ಅಸ್ಸಮಣೀ ಹೋತಿ ಅಸಕ್ಯಧೀತಾ। ತೇನ ವುಚ್ಚತಿ ಪಾರಾಜಿಕಾ ಹೋತೀತಿ।
Pārājikā hotīti seyyathāpi nāma paṇḍupalāso bandhanā pamutto abhabbo haritatthāya, evameva bhikkhunī jānaṃ pārājikaṃ dhammaṃ ajjhāpannaṃ bhikkhuniṃ nevattanā paṭicodessāmi na gaṇassa ārocessāmīti dhuraṃ nikkhittamatte assamaṇī hoti asakyadhītā. Tena vuccati pārājikā hotīti.
ಅಸಂವಾಸಾತಿ ಸಂವಾಸೋ ನಾಮ ಏಕಕಮ್ಮಂ ಏಕುದ್ದೇಸೋ ಸಮಸಿಕ್ಖತಾ। ಏಸೋ ಸಂವಾಸೋ ನಾಮ। ಸೋ ತಾಯ ಸದ್ಧಿಂ ನತ್ಥಿ। ತೇನ ವುಚ್ಚತಿ ಅಸಂವಾಸಾತಿ।
Asaṃvāsāti saṃvāso nāma ekakammaṃ ekuddeso samasikkhatā. Eso saṃvāso nāma. So tāya saddhiṃ natthi. Tena vuccati asaṃvāsāti.
೬೬೭. ಅನಾಪತ್ತಿ ‘‘ಸಙ್ಘಸ್ಸ ಭಣ್ಡನಂ ವಾ ಕಲಹೋ ವಾ ವಿಗ್ಗಹೋ ವಾ ವಿವಾದೋ ವಾ ಭವಿಸ್ಸತೀ’’ತಿ ನಾರೋಚೇತಿ, ‘‘ಸಙ್ಘಭೇದೋ ವಾ ಸಙ್ಘರಾಜಿ ವಾ ಭವಿಸ್ಸತೀ’’ತಿ ನಾರೋಚೇತಿ, ‘‘ಅಯಂ ಕಕ್ಖಳಾ ಫರುಸಾ ಜೀವಿತನ್ತರಾಯಂ ವಾ ಬ್ರಹ್ಮಚರಿಯನ್ತರಾಯಂ ವಾ ಕರಿಸ್ಸತೀ’’ತಿ ನಾರೋಚೇತಿ, ಅಞ್ಞಾ ಪತಿರೂಪಾ ಭಿಕ್ಖುನಿಯೋ ಅಪಸ್ಸನ್ತೀ ನಾರೋಚೇತಿ, ನಚ್ಛಾದೇತುಕಾಮಾ ನಾರೋಚೇತಿ, ಪಞ್ಞಾಯಿಸ್ಸತಿ ಸಕೇನ ಕಮ್ಮೇನಾತಿ ನಾರೋಚೇತಿ, ಉಮ್ಮತ್ತಿಕಾಯ…ಪೇ॰… ಆದಿಕಮ್ಮಿಕಾಯಾತಿ।
667. Anāpatti ‘‘saṅghassa bhaṇḍanaṃ vā kalaho vā viggaho vā vivādo vā bhavissatī’’ti nāroceti, ‘‘saṅghabhedo vā saṅgharāji vā bhavissatī’’ti nāroceti, ‘‘ayaṃ kakkhaḷā pharusā jīvitantarāyaṃ vā brahmacariyantarāyaṃ vā karissatī’’ti nāroceti, aññā patirūpā bhikkhuniyo apassantī nāroceti, nacchādetukāmā nāroceti, paññāyissati sakena kammenāti nāroceti, ummattikāya…pe… ādikammikāyāti.
ದುತಿಯಪಾರಾಜಿಕಂ ಸಮತ್ತಂ।
Dutiyapārājikaṃ samattaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಭಿಕ್ಖುನೀವಿಭಙ್ಗ-ಅಟ್ಠಕಥಾ • Bhikkhunīvibhaṅga-aṭṭhakathā / ೨. ದುತಿಯಪಾರಾಜಿಕಸಿಕ್ಖಾಪದವಣ್ಣನಾ • 2. Dutiyapārājikasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೨. ದುತಿಯಪಾರಾಜಿಕಸಿಕ್ಖಾಪದವಣ್ಣನಾ • 2. Dutiyapārājikasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೨. ದುತಿಯಪಾರಾಜಿಕಸಿಕ್ಖಾಪದವಣ್ಣನಾ • 2. Dutiyapārājikasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೨. ವಜ್ಜಪಟಿಚ್ಛಾದಿಕಸಿಕ್ಖಾಪದವಣ್ಣನಾ • 2. Vajjapaṭicchādikasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨. ದುತಿಯಪಾರಾಜಿಕಸಿಕ್ಖಾಪದಂ • 2. Dutiyapārājikasikkhāpadaṃ
