| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
९. दुतियपरिहानिसुत्तं
9. Dutiyaparihānisuttaṃ
२९. ‘‘सत्तिमे , भिक्खवे, धम्मा उपासकस्स परिहानाय संवत्तन्ति । कतमे सत्त? भिक्खुदस्सनं हापेति, सद्धम्मस्सवनं पमज्जति, अधिसीले न सिक्खति, अप्पसादबहुलो होति , भिक्खूसु थेरेसु चेव नवेसु च मज्झिमेसु च उपारम्भचित्तो धम्मं सुणाति रन्धगवेसी, इतो बहिद्धा दक्खिणेय्यं गवेसति, तत्थ च पुब्बकारं करोति। इमे खो, भिक्खवे, सत्त धम्मा उपासकस्स परिहानाय संवत्तन्ति।
29. ‘‘Sattime , bhikkhave, dhammā upāsakassa parihānāya saṃvattanti . Katame satta? Bhikkhudassanaṃ hāpeti, saddhammassavanaṃ pamajjati, adhisīle na sikkhati, appasādabahulo hoti , bhikkhūsu theresu ceva navesu ca majjhimesu ca upārambhacitto dhammaṃ suṇāti randhagavesī, ito bahiddhā dakkhiṇeyyaṃ gavesati, tattha ca pubbakāraṃ karoti. Ime kho, bhikkhave, satta dhammā upāsakassa parihānāya saṃvattanti.
‘‘सत्तिमे, भिक्खवे, धम्मा उपासकस्स अपरिहानाय संवत्तन्ति। कतमे सत्त? भिक्खुदस्सनं न हापेति, सद्धम्मस्सवनं नप्पमज्जति, अधिसीले सिक्खति, पसादबहुलो होति, भिक्खूसु थेरेसु चेव नवेसु च मज्झिमेसु च अनुपारम्भचित्तो धम्मं सुणाति न रन्धगवेसी, न इतो बहिद्धा दक्खिणेय्यं गवेसति, इध च पुब्बकारं करोति। इमे खो, भिक्खवे, सत्त धम्मा उपासकस्स अपरिहानाय संवत्तन्ती’’ति। इदमवोच भगवा। इदं वत्वान सुगतो अथापरं एतदवोच सत्था –
‘‘Sattime, bhikkhave, dhammā upāsakassa aparihānāya saṃvattanti. Katame satta? Bhikkhudassanaṃ na hāpeti, saddhammassavanaṃ nappamajjati, adhisīle sikkhati, pasādabahulo hoti, bhikkhūsu theresu ceva navesu ca majjhimesu ca anupārambhacitto dhammaṃ suṇāti na randhagavesī, na ito bahiddhā dakkhiṇeyyaṃ gavesati, idha ca pubbakāraṃ karoti. Ime kho, bhikkhave, satta dhammā upāsakassa aparihānāya saṃvattantī’’ti. Idamavoca bhagavā. Idaṃ vatvāna sugato athāparaṃ etadavoca satthā –
‘‘दस्सनं भावितत्तानं, यो हापेति उपासको।
‘‘Dassanaṃ bhāvitattānaṃ, yo hāpeti upāsako;
सवनञ्च अरियधम्मानं, अधिसीले न सिक्खति॥
Savanañca ariyadhammānaṃ, adhisīle na sikkhati.
‘‘अप्पसादो च भिक्खूसु, भिय्यो भिय्यो पवड्ढति।
‘‘Appasādo ca bhikkhūsu, bhiyyo bhiyyo pavaḍḍhati;
उपारम्भकचित्तो च, सद्धम्मं सोतुमिच्छति॥
Upārambhakacitto ca, saddhammaṃ sotumicchati.
‘‘इतो च बहिद्धा अञ्ञं, दक्खिणेय्यं गवेसति।
‘‘Ito ca bahiddhā aññaṃ, dakkhiṇeyyaṃ gavesati;
तत्थेव च पुब्बकारं, यो करोति उपासको॥
Tattheva ca pubbakāraṃ, yo karoti upāsako.
‘‘एते खो परिहानिये, सत्त धम्मे सुदेसिते।
‘‘Ete kho parihāniye, satta dhamme sudesite;
उपासको सेवमानो, सद्धम्मा परिहायति॥
Upāsako sevamāno, saddhammā parihāyati.
‘‘दस्सनं भावितत्तानं, यो न हापेति उपासको।
‘‘Dassanaṃ bhāvitattānaṃ, yo na hāpeti upāsako;
सवनञ्च अरियधम्मानं, अधिसीले च सिक्खति॥
Savanañca ariyadhammānaṃ, adhisīle ca sikkhati.
‘‘पसादो चस्स भिक्खूसु, भिय्यो भिय्यो पवड्ढति।
‘‘Pasādo cassa bhikkhūsu, bhiyyo bhiyyo pavaḍḍhati;
अनुपारम्भचित्तो च, सद्धम्मं सोतुमिच्छति॥
Anupārambhacitto ca, saddhammaṃ sotumicchati.
‘‘न इतो बहिद्धा अञ्ञं, दक्खिणेय्यं गवेसति।
‘‘Na ito bahiddhā aññaṃ, dakkhiṇeyyaṃ gavesati;
इधेव च पुब्बकारं, यो करोति उपासको॥
Idheva ca pubbakāraṃ, yo karoti upāsako.
‘‘एते खो अपरिहानिये, सत्त धम्मे सुदेसिते।
‘‘Ete kho aparihāniye, satta dhamme sudesite;
उपासको सेवमानो, सद्धम्मा न परिहायती’’ति॥ नवमं।
Upāsako sevamāno, saddhammā na parihāyatī’’ti. navamaṃ;
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ९. दुतियपरिहानिसुत्तवण्णना • 9. Dutiyaparihānisuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ७-११. सञ्ञासुत्तादिवण्णना • 7-11. Saññāsuttādivaṇṇanā
