| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๙. ทุติยปริหานิสุตฺตํ
9. Dutiyaparihānisuttaṃ
๒๙. ‘‘สตฺติเม , ภิกฺขเว, ธมฺมา อุปาสกสฺส ปริหานาย สํวตฺตนฺติ ฯ กตเม สตฺต? ภิกฺขุทสฺสนํ หาเปติ, สทฺธมฺมสฺสวนํ ปมชฺชติ, อธิสีเล น สิกฺขติ, อปฺปสาทพหุโล โหติ , ภิกฺขูสุ เถเรสุ เจว นเวสุ จ มชฺฌิเมสุ จ อุปารมฺภจิโตฺต ธมฺมํ สุณาติ รนฺธคเวสี, อิโต พหิทฺธา ทกฺขิเณยฺยํ คเวสติ, ตตฺถ จ ปุพฺพการํ กโรติฯ อิเม โข, ภิกฺขเว, สตฺต ธมฺมา อุปาสกสฺส ปริหานาย สํวตฺตนฺติฯ
29. ‘‘Sattime , bhikkhave, dhammā upāsakassa parihānāya saṃvattanti . Katame satta? Bhikkhudassanaṃ hāpeti, saddhammassavanaṃ pamajjati, adhisīle na sikkhati, appasādabahulo hoti , bhikkhūsu theresu ceva navesu ca majjhimesu ca upārambhacitto dhammaṃ suṇāti randhagavesī, ito bahiddhā dakkhiṇeyyaṃ gavesati, tattha ca pubbakāraṃ karoti. Ime kho, bhikkhave, satta dhammā upāsakassa parihānāya saṃvattanti.
‘‘สตฺติเม, ภิกฺขเว, ธมฺมา อุปาสกสฺส อปริหานาย สํวตฺตนฺติฯ กตเม สตฺต? ภิกฺขุทสฺสนํ น หาเปติ, สทฺธมฺมสฺสวนํ นปฺปมชฺชติ, อธิสีเล สิกฺขติ, ปสาทพหุโล โหติ, ภิกฺขูสุ เถเรสุ เจว นเวสุ จ มชฺฌิเมสุ จ อนุปารมฺภจิโตฺต ธมฺมํ สุณาติ น รนฺธคเวสี, น อิโต พหิทฺธา ทกฺขิเณยฺยํ คเวสติ, อิธ จ ปุพฺพการํ กโรติฯ อิเม โข, ภิกฺขเว, สตฺต ธมฺมา อุปาสกสฺส อปริหานาย สํวตฺตนฺตี’’ติฯ อิทมโวจ ภควาฯ อิทํ วตฺวาน สุคโต อถาปรํ เอตทโวจ สตฺถา –
‘‘Sattime, bhikkhave, dhammā upāsakassa aparihānāya saṃvattanti. Katame satta? Bhikkhudassanaṃ na hāpeti, saddhammassavanaṃ nappamajjati, adhisīle sikkhati, pasādabahulo hoti, bhikkhūsu theresu ceva navesu ca majjhimesu ca anupārambhacitto dhammaṃ suṇāti na randhagavesī, na ito bahiddhā dakkhiṇeyyaṃ gavesati, idha ca pubbakāraṃ karoti. Ime kho, bhikkhave, satta dhammā upāsakassa aparihānāya saṃvattantī’’ti. Idamavoca bhagavā. Idaṃ vatvāna sugato athāparaṃ etadavoca satthā –
‘‘ทสฺสนํ ภาวิตตฺตานํ, โย หาเปติ อุปาสโก;
‘‘Dassanaṃ bhāvitattānaṃ, yo hāpeti upāsako;
สวนญฺจ อริยธมฺมานํ, อธิสีเล น สิกฺขติฯ
Savanañca ariyadhammānaṃ, adhisīle na sikkhati.
‘‘อปฺปสาโท จ ภิกฺขูสุ, ภิโยฺย ภิโยฺย ปวฑฺฒติ;
‘‘Appasādo ca bhikkhūsu, bhiyyo bhiyyo pavaḍḍhati;
อุปารมฺภกจิโตฺต จ, สทฺธมฺมํ โสตุมิจฺฉติฯ
Upārambhakacitto ca, saddhammaṃ sotumicchati.
‘‘อิโต จ พหิทฺธา อญฺญํ, ทกฺขิเณยฺยํ คเวสติ;
‘‘Ito ca bahiddhā aññaṃ, dakkhiṇeyyaṃ gavesati;
ตเตฺถว จ ปุพฺพการํ, โย กโรติ อุปาสโกฯ
Tattheva ca pubbakāraṃ, yo karoti upāsako.
‘‘เอเต โข ปริหานิเย, สตฺต ธเมฺม สุเทสิเต;
‘‘Ete kho parihāniye, satta dhamme sudesite;
อุปาสโก เสวมาโน, สทฺธมฺมา ปริหายติฯ
Upāsako sevamāno, saddhammā parihāyati.
‘‘ทสฺสนํ ภาวิตตฺตานํ, โย น หาเปติ อุปาสโก;
‘‘Dassanaṃ bhāvitattānaṃ, yo na hāpeti upāsako;
สวนญฺจ อริยธมฺมานํ, อธิสีเล จ สิกฺขติฯ
Savanañca ariyadhammānaṃ, adhisīle ca sikkhati.
‘‘ปสาโท จสฺส ภิกฺขูสุ, ภิโยฺย ภิโยฺย ปวฑฺฒติ;
‘‘Pasādo cassa bhikkhūsu, bhiyyo bhiyyo pavaḍḍhati;
อนุปารมฺภจิโตฺต จ, สทฺธมฺมํ โสตุมิจฺฉติฯ
Anupārambhacitto ca, saddhammaṃ sotumicchati.
‘‘น อิโต พหิทฺธา อญฺญํ, ทกฺขิเณยฺยํ คเวสติ;
‘‘Na ito bahiddhā aññaṃ, dakkhiṇeyyaṃ gavesati;
อิเธว จ ปุพฺพการํ, โย กโรติ อุปาสโกฯ
Idheva ca pubbakāraṃ, yo karoti upāsako.
‘‘เอเต โข อปริหานิเย, สตฺต ธเมฺม สุเทสิเต;
‘‘Ete kho aparihāniye, satta dhamme sudesite;
อุปาสโก เสวมาโน, สทฺธมฺมา น ปริหายตี’’ติฯ นวมํ;
Upāsako sevamāno, saddhammā na parihāyatī’’ti. navamaṃ;
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๙. ทุติยปริหานิสุตฺตวณฺณนา • 9. Dutiyaparihānisuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๗-๑๑. สญฺญาสุตฺตาทิวณฺณนา • 7-11. Saññāsuttādivaṇṇanā
