| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
2. දුතියපරිමණ්‌ඩලසික්‌ඛාපදවණ්‌ණනා
2. Dutiyaparimaṇḍalasikkhāpadavaṇṇanā
පටික්‌ඛිත්‌තං ගිහිපාරුතන්‌ති ඛුද්‌දකවත්‌ථුඛන්‌ධකෙ පටික්‌ඛිත්‌තං ගිහිපාරුතං. ඉදානි ‘‘න, භික්‌ඛවෙ’’තිආදිනා (චූළව. 280-281) සඞ්‌ඛෙපෙන වුත්‌තමත්‌ථමෙව විත්‌ථාරෙත්‌වා දස්‌සෙතුං ‘‘තත්‌ථා’’තිආදිමාහ. යං කිඤ්‌චි අඤ්‌ඤථා පාරුතන්‌ති සම්‌බන්‌ධො. තස්‌මාති යස්‌මා සෙතපටපාරුතාදි ගිහිපාරුතං නාම, තස්‌මා. සෙතපටාති එතස්‌සෙව විවරණං. අඩ්‌ඪපාලකනිගණ්‌ඨාති අඩ්‌ඪං පාලෙන්‌තීති අඩ්‌ඪපාලකා, අඩ්‌ඪපාලකා ච තෙ නිගණ්‌ඨා චාති අඩ්‌ඪපාලකනිගණ්‌ඨා. තෙ හි උපරි එකමෙව සෙතවත්‌ථං උපකච්‌ඡකෙ පවෙසෙත්‌වා පරිදහන්‌ති, හෙට්‌ඨා නග්‌ගාපි අඩ්‌ඪමෙව පාලෙන්‌ති. පරිබ්‌බාජකාති ගිහිබන්‌ධනං පහාය පබ්‌බජ්‌ජූපගතා. උරං විවරිත්‌වාති හදයමජ්‌ඣං විවරිත්‌වා. අක්‌ඛිතාරකාමත්‌තන්‌ති අක්‌ඛිමත්‌තං. ආරාමෙ වාති බුද්‌ධූපට්‌ඨානාදිකාලං සන්‌ධාය වුත්‌තං. අන්‌තරඝරෙ වාති අන්‌තරෙ ඝරානි එත්‌ථ, එතස්‌සාති වා ‘‘අන්‌තරඝර’’න්‌ති ලද්‌ධනාමෙ ගාමෙ.
Paṭikkhittaṃgihipārutanti khuddakavatthukhandhake paṭikkhittaṃ gihipārutaṃ. Idāni ‘‘na, bhikkhave’’tiādinā (cūḷava. 280-281) saṅkhepena vuttamatthameva vitthāretvā dassetuṃ ‘‘tatthā’’tiādimāha. Yaṃ kiñci aññathā pārutanti sambandho. Tasmāti yasmā setapaṭapārutādi gihipārutaṃ nāma, tasmā. Setapaṭāti etasseva vivaraṇaṃ. Aḍḍhapālakanigaṇṭhāti aḍḍhaṃ pālentīti aḍḍhapālakā, aḍḍhapālakā ca te nigaṇṭhā cāti aḍḍhapālakanigaṇṭhā. Te hi upari ekameva setavatthaṃ upakacchake pavesetvā paridahanti, heṭṭhā naggāpi aḍḍhameva pālenti. Paribbājakāti gihibandhanaṃ pahāya pabbajjūpagatā. Uraṃ vivaritvāti hadayamajjhaṃ vivaritvā. Akkhitārakāmattanti akkhimattaṃ. Ārāme vāti buddhūpaṭṭhānādikālaṃ sandhāya vuttaṃ. Antaraghare vāti antare gharāni ettha, etassāti vā ‘‘antaraghara’’nti laddhanāme gāme.
දුතියපරිමණ්‌ඩලසික්‌ඛාපදවණ්‌ණනා නිට්‌ඨිතා.
Dutiyaparimaṇḍalasikkhāpadavaṇṇanā niṭṭhitā.
