| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༢. དུཏིཡཔརིམཎྜལསིཀྑཱཔདཝཎྞནཱ
2. Dutiyaparimaṇḍalasikkhāpadavaṇṇanā
པཊིཀྑིཏྟཾ གིཧིཔཱརུཏནྟི ཁུདྡཀཝཏྠུཁནྡྷཀེ པཊིཀྑིཏྟཾ གིཧིཔཱརུཏཾ། ཨིདཱནི ‘‘ན, བྷིཀྑཝེ’’ཏིཨཱདིནཱ (ཙཱུལ༹ཝ॰ ༢༨༠-༢༨༡) སངྑེཔེན ཝུཏྟམཏྠམེཝ ཝིཏྠཱརེཏྭཱ དསྶེཏུཾ ‘‘ཏཏྠཱ’’ཏིཨཱདིམཱཧ། ཡཾ ཀིཉྩི ཨཉྙཐཱ པཱརུཏནྟི སམྦནྡྷོ། ཏསྨཱཏི ཡསྨཱ སེཏཔཊཔཱརུཏཱདི གིཧིཔཱརུཏཾ ནཱམ, ཏསྨཱ། སེཏཔཊཱཏི ཨེཏསྶེཝ ཝིཝརཎཾ། ཨཌྜྷཔཱལཀནིགཎྛཱཏི ཨཌྜྷཾ པཱལེནྟཱིཏི ཨཌྜྷཔཱལཀཱ, ཨཌྜྷཔཱལཀཱ ཙ ཏེ ནིགཎྛཱ ཙཱཏི ཨཌྜྷཔཱལཀནིགཎྛཱ། ཏེ ཧི ཨུཔརི ཨེཀམེཝ སེཏཝཏྠཾ ཨུཔཀཙྪཀེ པཝེསེཏྭཱ པརིདཧནྟི, ཧེཊྛཱ ནགྒཱཔི ཨཌྜྷམེཝ པཱལེནྟི། པརིབྦཱཛཀཱཏི གིཧིབནྡྷནཾ པཧཱཡ པབྦཛྫཱུཔགཏཱ། ཨུརཾ ཝིཝརིཏྭཱཏི ཧདཡམཛ྄ཛྷཾ ཝིཝརིཏྭཱ། ཨཀྑིཏཱརཀཱམཏྟནྟི ཨཀྑིམཏྟཾ། ཨཱརཱམེ ཝཱཏི བུདྡྷཱུཔཊྛཱནཱདིཀཱལཾ སནྡྷཱཡ ཝུཏྟཾ། ཨནྟརགྷརེ ཝཱཏི ཨནྟརེ གྷརཱནི ཨེཏྠ, ཨེཏསྶཱཏི ཝཱ ‘‘ཨནྟརགྷར’’ནྟི ལདྡྷནཱམེ གཱམེ།
Paṭikkhittaṃgihipārutanti khuddakavatthukhandhake paṭikkhittaṃ gihipārutaṃ. Idāni ‘‘na, bhikkhave’’tiādinā (cūḷava. 280-281) saṅkhepena vuttamatthameva vitthāretvā dassetuṃ ‘‘tatthā’’tiādimāha. Yaṃ kiñci aññathā pārutanti sambandho. Tasmāti yasmā setapaṭapārutādi gihipārutaṃ nāma, tasmā. Setapaṭāti etasseva vivaraṇaṃ. Aḍḍhapālakanigaṇṭhāti aḍḍhaṃ pālentīti aḍḍhapālakā, aḍḍhapālakā ca te nigaṇṭhā cāti aḍḍhapālakanigaṇṭhā. Te hi upari ekameva setavatthaṃ upakacchake pavesetvā paridahanti, heṭṭhā naggāpi aḍḍhameva pālenti. Paribbājakāti gihibandhanaṃ pahāya pabbajjūpagatā. Uraṃ vivaritvāti hadayamajjhaṃ vivaritvā. Akkhitārakāmattanti akkhimattaṃ. Ārāme vāti buddhūpaṭṭhānādikālaṃ sandhāya vuttaṃ. Antaraghare vāti antare gharāni ettha, etassāti vā ‘‘antaraghara’’nti laddhanāme gāme.
དུཏིཡཔརིམཎྜལསིཀྑཱཔདཝཎྞནཱ ནིཊྛིཏཱ།
Dutiyaparimaṇḍalasikkhāpadavaṇṇanā niṭṭhitā.
