| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
2. து³தியபாடிதே³ஸனீயஸிக்கா²பத³ங்
2. Dutiyapāṭidesanīyasikkhāpadaṃ
557. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன பி⁴க்கூ² குலேஸு நிமந்திதா பு⁴ஞ்ஜந்தி. ச²ப்³ப³க்³கி³யா பி⁴க்கு²னியோ ச²ப்³ப³க்³கி³யானங் பி⁴க்கூ²னங் வோஸாஸந்தியோ டி²தா ஹொந்தி – ‘‘இத⁴ ஸூபங் தே³த², இத⁴ ஓத³னங் தே³தா²’’தி. ச²ப்³ப³க்³கி³யா பி⁴க்கூ² யாவத³த்த²ங் பு⁴ஞ்ஜந்தி. அஞ்ஞே பி⁴க்கூ² ந சித்தரூபங் பு⁴ஞ்ஜந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² பி⁴க்கு²னியோ வோஸாஸந்தியோ ந நிவாரெஸ்ஸந்தீ’’தி…பே॰… ஸச்சங் கிர தும்ஹே, பி⁴க்க²வே, பி⁴க்கு²னியோ வோஸாஸந்தியோ ந நிவாரேதா²தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா …பே॰… கத²ஞ்ஹி நாம தும்ஹே, மோக⁴புரிஸா, பி⁴க்கு²னியோ வோஸாஸந்தியோ ந நிவாரெஸ்ஸத² ! நேதங், மோக⁴புரிஸா, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
557. Tena samayena buddho bhagavā rājagahe viharati veḷuvane kalandakanivāpe. Tena kho pana samayena bhikkhū kulesu nimantitā bhuñjanti. Chabbaggiyā bhikkhuniyo chabbaggiyānaṃ bhikkhūnaṃ vosāsantiyo ṭhitā honti – ‘‘idha sūpaṃ detha, idha odanaṃ dethā’’ti. Chabbaggiyā bhikkhū yāvadatthaṃ bhuñjanti. Aññe bhikkhū na cittarūpaṃ bhuñjanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū bhikkhuniyo vosāsantiyo na nivāressantī’’ti…pe… saccaṃ kira tumhe, bhikkhave, bhikkhuniyo vosāsantiyo na nivārethāti? ‘‘Saccaṃ, bhagavā’’ti. Vigarahi buddho bhagavā …pe… kathañhi nāma tumhe, moghapurisā, bhikkhuniyo vosāsantiyo na nivāressatha ! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
558. ‘‘பி⁴க்கூ² பனேவ குலேஸு நிமந்திதா பு⁴ஞ்ஜந்தி, தத்ர சே ஸா 1 பி⁴க்கு²னீ வோஸாஸமானரூபா டி²தா ஹோதி – ‘இத⁴ ஸூபங் தே³த², இத⁴ ஓத³னங் தே³தா²’தி, தேஹி பி⁴க்கூ²ஹி ஸா பி⁴க்கு²னீ அபஸாதே³தப்³பா³ – ‘அபஸக்க தாவ, ப⁴கி³னி, யாவ பி⁴க்கூ² பு⁴ஞ்ஜந்தீ’தி. ஏகஸ்ஸ சேபி 2 பி⁴க்கு²னோ ந படிபா⁴ஸெய்ய தங் பி⁴க்கு²னிங் அபஸாதே³துங் – ‘அபஸக்க தாவ, ப⁴கி³னி, யாவ பி⁴க்கூ² பு⁴ஞ்ஜந்தீ’தி படிதே³ஸேதப்³ப³ங் தேஹி பி⁴க்கூ²ஹி – ‘கா³ரய்ஹங், ஆவுஸோ, த⁴ம்மங் ஆபஜ்ஜிம்ஹா அஸப்பாயங் பாடிதே³ஸனீயங், தங் படிதே³ஸேமா’’’தி.
558.‘‘Bhikkhūpaneva kulesu nimantitā bhuñjanti, tatra ce sā 3 bhikkhunī vosāsamānarūpā ṭhitā hoti – ‘idha sūpaṃ detha, idha odanaṃ dethā’ti, tehi bhikkhūhi sā bhikkhunī apasādetabbā – ‘apasakka tāva, bhagini, yāva bhikkhū bhuñjantī’ti. Ekassa cepi 4 bhikkhuno na paṭibhāseyya taṃ bhikkhuniṃ apasādetuṃ – ‘apasakka tāva, bhagini, yāva bhikkhū bhuñjantī’ti paṭidesetabbaṃ tehi bhikkhūhi – ‘gārayhaṃ, āvuso, dhammaṃ āpajjimhā asappāyaṃ pāṭidesanīyaṃ, taṃ paṭidesemā’’’ti.
559. பி⁴க்கூ² பனேவ குலேஸு நிமந்திதா பு⁴ஞ்ஜந்தீதி குலங் நாம சத்தாரி குலானி – க²த்தியகுலங், ப்³ராஹ்மணகுலங், வெஸ்ஸகுலங், ஸுத்³த³குலங்.
559.Bhikkhū paneva kulesu nimantitā bhuñjantīti kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ, suddakulaṃ.
நிமந்திதா பு⁴ஞ்ஜந்தீதி பஞ்சன்னங் போ⁴ஜனானங் அஞ்ஞதரேன போ⁴ஜனேன நிமந்திதா பு⁴ஞ்ஜந்தி.
Nimantitā bhuñjantīti pañcannaṃ bhojanānaṃ aññatarena bhojanena nimantitā bhuñjanti.
பி⁴க்கு²னீ நாம உப⁴தோஸங்கே⁴ உபஸம்பன்னா.
Bhikkhunī nāma ubhatosaṅghe upasampannā.
வோஸாஸந்தீ நாம யதா²மித்ததா யதா²ஸந்தி³ட்ட²தா யதா²ஸம்ப⁴த்ததா யதா²ஸமானுபஜ்ஜா²யகதா யதா²ஸமானாசரியகதா – ‘‘இத⁴ ஸூபங் தே³த², இத⁴ ஓத³னங் தே³தா²’’தி. ஏஸா வோஸாஸந்தீ நாம.
Vosāsantī nāma yathāmittatā yathāsandiṭṭhatā yathāsambhattatā yathāsamānupajjhāyakatā yathāsamānācariyakatā – ‘‘idha sūpaṃ detha, idha odanaṃ dethā’’ti. Esā vosāsantī nāma.
தேஹி பி⁴க்கூ²ஹீதி பு⁴ஞ்ஜமானேஹி பி⁴க்கூ²ஹி.
Tehi bhikkhūhīti bhuñjamānehi bhikkhūhi.
ஸா பி⁴க்கு²னீதி யா ஸா வோஸாஸந்தீ பி⁴க்கு²னீ.
Sā bhikkhunīti yā sā vosāsantī bhikkhunī.
560. உபஸம்பன்னாய உபஸம்பன்னஸஞ்ஞீ வோஸாஸந்தியா ந நிவாரேதி, ஆபத்தி பாடிதே³ஸனீயஸ்ஸ . உபஸம்பன்னாய வேமதிகோ வோஸாஸந்தியா ந நிவாரேதி, ஆபத்தி பாடிதே³ஸனீயஸ்ஸ. உபஸம்பன்னாய அனுபஸம்பன்னஸஞ்ஞீ வோஸாஸந்தியா ந நிவாரேதி, ஆபத்தி பாடிதே³ஸனீயஸ்ஸ.
560. Upasampannāya upasampannasaññī vosāsantiyā na nivāreti, āpatti pāṭidesanīyassa . Upasampannāya vematiko vosāsantiyā na nivāreti, āpatti pāṭidesanīyassa. Upasampannāya anupasampannasaññī vosāsantiyā na nivāreti, āpatti pāṭidesanīyassa.
ஏகதோஉபஸம்பன்னாய வோஸாஸந்தியா ந நிவாரேதி, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞீ, ஆபத்தி து³க்கடஸ்ஸ. அனுபஸம்பன்னாய வேமதிகோ, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞீ, அனாபத்தி.
Ekatoupasampannāya vosāsantiyā na nivāreti, āpatti dukkaṭassa. Anupasampannāya upasampannasaññī, āpatti dukkaṭassa. Anupasampannāya vematiko, āpatti dukkaṭassa. Anupasampannāya anupasampannasaññī, anāpatti.
561. அனாபத்தி அத்தனோ ப⁴த்தங் தா³பேதி ந தே³தி, அஞ்ஞேஸங் ப⁴த்தங் தே³தி ந தா³பேதி, யங் ந தி³ன்னங் தங் தா³பேதி, யத்த² ந தி³ன்னங் தத்த² தா³பேதி, ஸப்³பே³ஸங் ஸமகங் தா³பேதி, ஸிக்க²மானா வோஸாஸதி, ஸாமணேரீ வோஸாஸதி, பஞ்ச போ⁴ஜனானி ட²பெத்வா ஸப்³ப³த்த², அனாபத்தி, உம்மத்தகஸ்ஸ, ஆதி³கம்மிகஸ்ஸாதி.
561. Anāpatti attano bhattaṃ dāpeti na deti, aññesaṃ bhattaṃ deti na dāpeti, yaṃ na dinnaṃ taṃ dāpeti, yattha na dinnaṃ tattha dāpeti, sabbesaṃ samakaṃ dāpeti, sikkhamānā vosāsati, sāmaṇerī vosāsati, pañca bhojanāni ṭhapetvā sabbattha, anāpatti, ummattakassa, ādikammikassāti.
து³தியபாடிதே³ஸனீயஸிக்கா²பத³ங் நிட்டி²தங்.
Dutiyapāṭidesanīyasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாடிதே³ஸனீயஸிக்கா²பத³வண்ணனா • 2. Dutiyapāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாடிதே³ஸனீயஸிக்கா²பத³வண்ணனா • Pāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியபாடிதே³ஸனீயஸிக்கா²பத³வண்ணனா • 2. Dutiyapāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மபாடிதே³ஸனீயஸிக்கா²பத³வண்ணனா • 1. Paṭhamapāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. து³தியபாடிதே³ஸனீயஸிக்கா²பத³ங் • 2. Dutiyapāṭidesanīyasikkhāpadaṃ
