| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
2. දුතියපාටිදෙසනීයසික්‌ඛාපදං
2. Dutiyapāṭidesanīyasikkhāpadaṃ
557. තෙන සමයෙන බුද්‌ධො භගවා රාජගහෙ විහරති වෙළුවනෙ කලන්‌දකනිවාපෙ. තෙන ඛො පන සමයෙන භික්‌ඛූ කුලෙසු නිමන්‌තිතා භුඤ්‌ජන්‌ති. ඡබ්‌බග්‌ගියා භික්‌ඛුනියො ඡබ්‌බග්‌ගියානං භික්‌ඛූනං වොසාසන්‌තියො ඨිතා හොන්‌ති – ‘‘ඉධ සූපං දෙථ, ඉධ ඔදනං දෙථා’’ති. ඡබ්‌බග්‌ගියා භික්‌ඛූ යාවදත්‌ථං භුඤ්‌ජන්‌ති. අඤ්‌ඤෙ භික්‌ඛූ න චිත්‌තරූපං භුඤ්‌ජන්‌ති. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛූ භික්‌ඛුනියො වොසාසන්‌තියො න නිවාරෙස්‌සන්‌තී’’ති…පෙ.… සච්‌චං කිර තුම්‌හෙ, භික්‌ඛවෙ, භික්‌ඛුනියො වොසාසන්‌තියො න නිවාරෙථාති? ‘‘සච්‌චං, භගවා’’ති. විගරහි බුද්‌ධො භගවා …පෙ.… කථඤ්‌හි නාම තුම්‌හෙ, මොඝපුරිසා, භික්‌ඛුනියො වොසාසන්‌තියො න නිවාරෙස්‌සථ ! නෙතං, මොඝපුරිසා, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
557. Tena samayena buddho bhagavā rājagahe viharati veḷuvane kalandakanivāpe. Tena kho pana samayena bhikkhū kulesu nimantitā bhuñjanti. Chabbaggiyā bhikkhuniyo chabbaggiyānaṃ bhikkhūnaṃ vosāsantiyo ṭhitā honti – ‘‘idha sūpaṃ detha, idha odanaṃ dethā’’ti. Chabbaggiyā bhikkhū yāvadatthaṃ bhuñjanti. Aññe bhikkhū na cittarūpaṃ bhuñjanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū bhikkhuniyo vosāsantiyo na nivāressantī’’ti…pe… saccaṃ kira tumhe, bhikkhave, bhikkhuniyo vosāsantiyo na nivārethāti? ‘‘Saccaṃ, bhagavā’’ti. Vigarahi buddho bhagavā …pe… kathañhi nāma tumhe, moghapurisā, bhikkhuniyo vosāsantiyo na nivāressatha ! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
558. ‘‘භික්‌ඛූ පනෙව කුලෙසු නිමන්‌තිතා භුඤ්‌ජන්‌ති, තත්‍ර චෙ සා 1 භික්‌ඛුනී වොසාසමානරූපා ඨිතා හොති – ‘ඉධ සූපං දෙථ, ඉධ ඔදනං දෙථා’ති, තෙහි භික්‌ඛූහි සා භික්‌ඛුනී අපසාදෙතබ්‌බා – ‘අපසක්‌ක තාව, භගිනි, යාව භික්‌ඛූ භුඤ්‌ජන්‌තී’ති. එකස්‌ස චෙපි 2 භික්‌ඛුනො න පටිභාසෙය්‍ය තං භික්‌ඛුනිං අපසාදෙතුං – ‘අපසක්‌ක තාව, භගිනි, යාව භික්‌ඛූ භුඤ්‌ජන්‌තී’ති පටිදෙසෙතබ්‌බං තෙහි භික්‌ඛූහි – ‘ගාරය්‌හං, ආවුසො, ධම්‌මං ආපජ්‌ජිම්‌හා අසප්‌පායං පාටිදෙසනීයං, තං පටිදෙසෙමා’’’ති.
558.‘‘Bhikkhūpaneva kulesu nimantitā bhuñjanti, tatra ce sā 3 bhikkhunī vosāsamānarūpā ṭhitā hoti – ‘idha sūpaṃ detha, idha odanaṃ dethā’ti, tehi bhikkhūhi sā bhikkhunī apasādetabbā – ‘apasakka tāva, bhagini, yāva bhikkhū bhuñjantī’ti. Ekassa cepi 4 bhikkhuno na paṭibhāseyya taṃ bhikkhuniṃ apasādetuṃ – ‘apasakka tāva, bhagini, yāva bhikkhū bhuñjantī’ti paṭidesetabbaṃ tehi bhikkhūhi – ‘gārayhaṃ, āvuso, dhammaṃ āpajjimhā asappāyaṃ pāṭidesanīyaṃ, taṃ paṭidesemā’’’ti.
559. භික්‌ඛූ පනෙව කුලෙසු නිමන්‌තිතා භුඤ්‌ජන්‌තීති කුලං නාම චත්‌තාරි කුලානි – ඛත්‌තියකුලං, බ්‍රාහ්‌මණකුලං, වෙස්‌සකුලං, සුද්‌දකුලං.
559.Bhikkhū paneva kulesu nimantitā bhuñjantīti kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ, suddakulaṃ.
නිමන්‌තිතා භුඤ්‌ජන්‌තීති පඤ්‌චන්‌නං භොජනානං අඤ්‌ඤතරෙන භොජනෙන නිමන්‌තිතා භුඤ්‌ජන්‌ති.
Nimantitā bhuñjantīti pañcannaṃ bhojanānaṃ aññatarena bhojanena nimantitā bhuñjanti.
භික්‌ඛුනී නාම උභතොසඞ්‌ඝෙ උපසම්‌පන්‌නා.
Bhikkhunī nāma ubhatosaṅghe upasampannā.
වොසාසන්‌තී නාම යථාමිත්‌තතා යථාසන්‌දිට්‌ඨතා යථාසම්‌භත්‌තතා යථාසමානුපජ්‌ඣායකතා යථාසමානාචරියකතා – ‘‘ඉධ සූපං දෙථ, ඉධ ඔදනං දෙථා’’ති. එසා වොසාසන්‌තී නාම.
Vosāsantī nāma yathāmittatā yathāsandiṭṭhatā yathāsambhattatā yathāsamānupajjhāyakatā yathāsamānācariyakatā – ‘‘idha sūpaṃ detha, idha odanaṃ dethā’’ti. Esā vosāsantī nāma.
තෙහි භික්‌ඛූහීති භුඤ්‌ජමානෙහි භික්‌ඛූහි.
Tehi bhikkhūhīti bhuñjamānehi bhikkhūhi.
සා භික්‌ඛුනීති යා සා වොසාසන්‌තී භික්‌ඛුනී.
Sā bhikkhunīti yā sā vosāsantī bhikkhunī.
560. උපසම්‌පන්‌නාය උපසම්‌පන්‌නසඤ්‌ඤී වොසාසන්‌තියා න නිවාරෙති, ආපත්‌ති පාටිදෙසනීයස්‌ස . උපසම්‌පන්‌නාය වෙමතිකො වොසාසන්‌තියා න නිවාරෙති, ආපත්‌ති පාටිදෙසනීයස්‌ස. උපසම්‌පන්‌නාය අනුපසම්‌පන්‌නසඤ්‌ඤී වොසාසන්‌තියා න නිවාරෙති, ආපත්‌ති පාටිදෙසනීයස්‌ස.
560. Upasampannāya upasampannasaññī vosāsantiyā na nivāreti, āpatti pāṭidesanīyassa . Upasampannāya vematiko vosāsantiyā na nivāreti, āpatti pāṭidesanīyassa. Upasampannāya anupasampannasaññī vosāsantiyā na nivāreti, āpatti pāṭidesanīyassa.
එකතොඋපසම්‌පන්‌නාය වොසාසන්‌තියා න නිවාරෙති, ආපත්‌ති දුක්‌කටස්‌ස. අනුපසම්‌පන්‌නාය උපසම්‌පන්‌නසඤ්‌ඤී, ආපත්‌ති දුක්‌කටස්‌ස. අනුපසම්‌පන්‌නාය වෙමතිකො, ආපත්‌ති දුක්‌කටස්‌ස. අනුපසම්‌පන්‌නාය අනුපසම්‌පන්‌නසඤ්‌ඤී, අනාපත්‌ති.
Ekatoupasampannāya vosāsantiyā na nivāreti, āpatti dukkaṭassa. Anupasampannāya upasampannasaññī, āpatti dukkaṭassa. Anupasampannāya vematiko, āpatti dukkaṭassa. Anupasampannāya anupasampannasaññī, anāpatti.
561. අනාපත්‌ති අත්‌තනො භත්‌තං දාපෙති න දෙති, අඤ්‌ඤෙසං භත්‌තං දෙති න දාපෙති, යං න දින්‌නං තං දාපෙති, යත්‌ථ න දින්‌නං තත්‌ථ දාපෙති, සබ්‌බෙසං සමකං දාපෙති, සික්‌ඛමානා වොසාසති, සාමණෙරී වොසාසති, පඤ්‌ච භොජනානි ඨපෙත්‌වා සබ්‌බත්‌ථ, අනාපත්‌ති, උම්‌මත්‌තකස්‌ස, ආදිකම්‌මිකස්‌සාති.
561. Anāpatti attano bhattaṃ dāpeti na deti, aññesaṃ bhattaṃ deti na dāpeti, yaṃ na dinnaṃ taṃ dāpeti, yattha na dinnaṃ tattha dāpeti, sabbesaṃ samakaṃ dāpeti, sikkhamānā vosāsati, sāmaṇerī vosāsati, pañca bhojanāni ṭhapetvā sabbattha, anāpatti, ummattakassa, ādikammikassāti.
දුතියපාටිදෙසනීයසික්‌ඛාපදං නිට්‌ඨිතං.
Dutiyapāṭidesanīyasikkhāpadaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 2. දුතියපාටිදෙසනීයසික්‌ඛාපදවණ්‌ණනා • 2. Dutiyapāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 2. දුතියපාටිදෙසනීයසික්‌ඛාපදවණ්‌ණනා • 2. Dutiyapāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමපාටිදෙසනීයසික්‌ඛාපදවණ්‌ණනා • 1. Paṭhamapāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 2. දුතියපාටිදෙසනීයසික්‌ඛාපදං • 2. Dutiyapāṭidesanīyasikkhāpadaṃ
