| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
6. து³தியபவாரணஸிக்கா²பத³வண்ணனா
6. Dutiyapavāraṇasikkhāpadavaṇṇanā
242. ச²ட்ட²ஸிக்கா²பதே³ – அனாசாரங் ஆசரதீதி பண்ணத்திவீதிக்கமங் கரோதி. உபனந்தீ⁴தி உபனாஹங் ஜனெந்தோ தஸ்மிங் புக்³க³லே அத்தனோ கோத⁴ங் ப³ந்தி⁴; புனப்புனங் ஆகா⁴தங் ஜனேஸீதி அத்தோ². உபனத்³தோ⁴ பி⁴க்கூ²தி ஸோ ஜனிதஉபனாஹோ பி⁴க்கு².
242. Chaṭṭhasikkhāpade – anācāraṃ ācaratīti paṇṇattivītikkamaṃ karoti. Upanandhīti upanāhaṃ janento tasmiṃ puggale attano kodhaṃ bandhi; punappunaṃ āghātaṃ janesīti attho. Upanaddho bhikkhūti so janitaupanāho bhikkhu.
243. அபி⁴ஹட்டு²ங் பவாரெய்யாதி அபி⁴ஹரித்வா ‘‘ஹந்த³ பி⁴க்கு² கா²த³ வா பு⁴ஞ்ஜ வா’’தி ஏவங் பவாரெய்ய. பத³பா⁴ஜனே பன ‘‘ஹந்த³ பி⁴க்கூ²’’திஆதி³ங் அனுத்³த⁴ரித்வா ஸாதா⁴ரணமேவ அபி⁴ஹட்டு²ங் பவாரணாய அத்த²ங் த³ஸ்ஸேதுங் ‘‘யாவதகங் இச்ச²ஸி தாவதகங் க³ண்ஹாஹீ’’தி வுத்தங். ஜானந்தி பவாரிதபா⁴வங் ஜானந்தோ. தங் பனஸ்ஸ ஜானநங் யஸ்மா தீஹாகாரேஹி ஹோதி, தஸ்மா ‘‘ஜானாதி நாம ஸாமங் வா ஜானாதீ’’திஆதி³னா நயேன பத³பா⁴ஜனங் வுத்தங். ஆஸாத³னாபெக்கோ²தி ஆஸாத³னங் சோத³னங் மங்குகரணபா⁴வங் அபெக்க²மானோ.
243.Abhihaṭṭhuṃ pavāreyyāti abhiharitvā ‘‘handa bhikkhu khāda vā bhuñja vā’’ti evaṃ pavāreyya. Padabhājane pana ‘‘handa bhikkhū’’tiādiṃ anuddharitvā sādhāraṇameva abhihaṭṭhuṃ pavāraṇāya atthaṃ dassetuṃ ‘‘yāvatakaṃ icchasi tāvatakaṃ gaṇhāhī’’ti vuttaṃ. Jānanti pavāritabhāvaṃ jānanto. Taṃ panassa jānanaṃ yasmā tīhākārehi hoti, tasmā ‘‘jānāti nāma sāmaṃ vā jānātī’’tiādinā nayena padabhājanaṃ vuttaṃ. Āsādanāpekkhoti āsādanaṃ codanaṃ maṅkukaraṇabhāvaṃ apekkhamāno.
படிக்³க³ண்ஹாதி ஆபத்தி து³க்கடஸ்ஸாதி யஸ்ஸ அபி⁴ஹடங் தஸ்மிங் படிக்³க³ண்ஹந்தே அபி⁴ஹாரகஸ்ஸ பி⁴க்கு²னோ து³க்கடங். இதரஸ்ஸ பன ஸப்³போ³ ஆபத்திபே⁴தோ³ பட²மஸிக்கா²பதே³ வுத்தோ, இமஸ்மிங் பன ஸிக்கா²பதே³ ஸப்³பா³ ஆபத்தியோ அபி⁴ஹாரகஸ்ஸேவ வேதி³தப்³பா³. ஸேஸங் பட²மஸிக்கா²பதே³ வுத்தனயத்தா பாகடமேவ.
Paṭiggaṇhātiāpatti dukkaṭassāti yassa abhihaṭaṃ tasmiṃ paṭiggaṇhante abhihārakassa bhikkhuno dukkaṭaṃ. Itarassa pana sabbo āpattibhedo paṭhamasikkhāpade vutto, imasmiṃ pana sikkhāpade sabbā āpattiyo abhihārakasseva veditabbā. Sesaṃ paṭhamasikkhāpade vuttanayattā pākaṭameva.
திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
து³தியபவாரணஸிக்கா²பத³ங் ச²ட்ட²ங்.
Dutiyapavāraṇasikkhāpadaṃ chaṭṭhaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. து³தியபவாரணாஸிக்கா²பத³வண்ணனா • 6. Dutiyapavāraṇāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. து³தியபவாரணஸிக்கா²பத³வண்ணனா • 6. Dutiyapavāraṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. து³தியபவாரணாஸிக்கா²பத³வண்ணனா • 6. Dutiyapavāraṇāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. து³தியபவாரணஸிக்கா²பத³ங் • 6. Dutiyapavāraṇasikkhāpadaṃ
