| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৬. দুতিযপৰারণসিক্খাপদৰণ্ণনা
6. Dutiyapavāraṇasikkhāpadavaṇṇanā
২৪২. ছট্ঠসিক্খাপদে – অনাচারং আচরতীতি পণ্ণত্তিৰীতিক্কমং করোতি। উপনন্ধীতি উপনাহং জনেন্তো তস্মিং পুগ্গলে অত্তনো কোধং বন্ধি; পুনপ্পুনং আঘাতং জনেসীতি অত্থো। উপনদ্ধো ভিক্খূতি সো জনিতউপনাহো ভিক্খু।
242. Chaṭṭhasikkhāpade – anācāraṃ ācaratīti paṇṇattivītikkamaṃ karoti. Upanandhīti upanāhaṃ janento tasmiṃ puggale attano kodhaṃ bandhi; punappunaṃ āghātaṃ janesīti attho. Upanaddho bhikkhūti so janitaupanāho bhikkhu.
২৪৩. অভিহট্ঠুং পৰারেয্যাতি অভিহরিত্ৰা ‘‘হন্দ ভিক্খু খাদ ৰা ভুঞ্জ ৰা’’তি এৰং পৰারেয্য। পদভাজনে পন ‘‘হন্দ ভিক্খূ’’তিআদিং অনুদ্ধরিত্ৰা সাধারণমেৰ অভিহট্ঠুং পৰারণায অত্থং দস্সেতুং ‘‘যাৰতকং ইচ্ছসি তাৰতকং গণ্হাহী’’তি ৰুত্তং। জানন্তি পৰারিতভাৰং জানন্তো। তং পনস্স জাননং যস্মা তীহাকারেহি হোতি, তস্মা ‘‘জানাতি নাম সামং ৰা জানাতী’’তিআদিনা নযেন পদভাজনং ৰুত্তং। আসাদনাপেক্খোতি আসাদনং চোদনং মঙ্কুকরণভাৰং অপেক্খমানো।
243.Abhihaṭṭhuṃ pavāreyyāti abhiharitvā ‘‘handa bhikkhu khāda vā bhuñja vā’’ti evaṃ pavāreyya. Padabhājane pana ‘‘handa bhikkhū’’tiādiṃ anuddharitvā sādhāraṇameva abhihaṭṭhuṃ pavāraṇāya atthaṃ dassetuṃ ‘‘yāvatakaṃ icchasi tāvatakaṃ gaṇhāhī’’ti vuttaṃ. Jānanti pavāritabhāvaṃ jānanto. Taṃ panassa jānanaṃ yasmā tīhākārehi hoti, tasmā ‘‘jānāti nāma sāmaṃ vā jānātī’’tiādinā nayena padabhājanaṃ vuttaṃ. Āsādanāpekkhoti āsādanaṃ codanaṃ maṅkukaraṇabhāvaṃ apekkhamāno.
পটিগ্গণ্হাতি আপত্তি দুক্কটস্সাতি যস্স অভিহটং তস্মিং পটিগ্গণ্হন্তে অভিহারকস্স ভিক্খুনো দুক্কটং। ইতরস্স পন সব্বো আপত্তিভেদো পঠমসিক্খাপদে ৰুত্তো, ইমস্মিং পন সিক্খাপদে সব্বা আপত্তিযো অভিহারকস্সেৰ ৰেদিতব্বা। সেসং পঠমসিক্খাপদে ৰুত্তনযত্তা পাকটমেৰ।
Paṭiggaṇhātiāpatti dukkaṭassāti yassa abhihaṭaṃ tasmiṃ paṭiggaṇhante abhihārakassa bhikkhuno dukkaṭaṃ. Itarassa pana sabbo āpattibhedo paṭhamasikkhāpade vutto, imasmiṃ pana sikkhāpade sabbā āpattiyo abhihārakasseva veditabbā. Sesaṃ paṭhamasikkhāpade vuttanayattā pākaṭameva.
তিসমুট্ঠানং – কাযচিত্ততো ৰাচাচিত্ততো কাযৰাচাচিত্ততো চ সমুট্ঠাতি, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি।
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
দুতিযপৰারণসিক্খাপদং ছট্ঠং।
Dutiyapavāraṇasikkhāpadaṃ chaṭṭhaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. ভোজনৰগ্গো • 4. Bhojanavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৬. দুতিযপৰারণাসিক্খাপদৰণ্ণনা • 6. Dutiyapavāraṇāsikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৬. দুতিযপৰারণসিক্খাপদৰণ্ণনা • 6. Dutiyapavāraṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৬. দুতিযপৰারণাসিক্খাপদৰণ্ণনা • 6. Dutiyapavāraṇāsikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৬. দুতিযপৰারণসিক্খাপদং • 6. Dutiyapavāraṇasikkhāpadaṃ
