| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၆. ဒုတိယပဝာရဏသိက္ခာပဒဝဏ္ဏနာ
6. Dutiyapavāraṇasikkhāpadavaṇṇanā
၂၄၂. ဆဋ္ဌသိက္ခာပဒေ – အနာစာရံ အာစရတီတိ ပဏ္ဏတ္တိဝီတိက္ကမံ ကရောတိ။ ဥပနန္ဓီတိ ဥပနာဟံ ဇနေန္တော တသ္မိံ ပုဂ္ဂလေ အတ္တနော ကောဓံ ဗန္ဓိ; ပုနပ္ပုနံ အာဃာတံ ဇနေသီတိ အတ္ထော။ ဥပနဒ္ဓော ဘိက္ခူတိ သော ဇနိတဥပနာဟော ဘိက္ခု။
242. Chaṭṭhasikkhāpade – anācāraṃ ācaratīti paṇṇattivītikkamaṃ karoti. Upanandhīti upanāhaṃ janento tasmiṃ puggale attano kodhaṃ bandhi; punappunaṃ āghātaṃ janesīti attho. Upanaddho bhikkhūti so janitaupanāho bhikkhu.
၂၄၃. အဘိဟဋ္ဌုံ ပဝာရေယ္ယာတိ အဘိဟရိတ္ဝာ ‘‘ဟန္ဒ ဘိက္ခု ခာဒ ဝာ ဘုဉ္ဇ ဝာ’’တိ ဧဝံ ပဝာရေယ္ယ။ ပဒဘာဇနေ ပန ‘‘ဟန္ဒ ဘိက္ခူ’’တိအာဒိံ အနုဒ္ဓရိတ္ဝာ သာဓာရဏမေဝ အဘိဟဋ္ဌုံ ပဝာရဏာယ အတ္ထံ ဒသ္သေတုံ ‘‘ယာဝတကံ ဣစ္ဆသိ တာဝတကံ ဂဏ္ဟာဟီ’’တိ ဝုတ္တံ။ ဇာနန္တိ ပဝာရိတဘာဝံ ဇာနန္တော။ တံ ပနသ္သ ဇာနနံ ယသ္မာ တီဟာကာရေဟိ ဟောတိ, တသ္မာ ‘‘ဇာနာတိ နာမ သာမံ ဝာ ဇာနာတီ’’တိအာဒိနာ နယေန ပဒဘာဇနံ ဝုတ္တံ။ အာသာဒနာပေက္ခောတိ အာသာဒနံ စောဒနံ မင္ကုကရဏဘာဝံ အပေက္ခမာနော။
243.Abhihaṭṭhuṃ pavāreyyāti abhiharitvā ‘‘handa bhikkhu khāda vā bhuñja vā’’ti evaṃ pavāreyya. Padabhājane pana ‘‘handa bhikkhū’’tiādiṃ anuddharitvā sādhāraṇameva abhihaṭṭhuṃ pavāraṇāya atthaṃ dassetuṃ ‘‘yāvatakaṃ icchasi tāvatakaṃ gaṇhāhī’’ti vuttaṃ. Jānanti pavāritabhāvaṃ jānanto. Taṃ panassa jānanaṃ yasmā tīhākārehi hoti, tasmā ‘‘jānāti nāma sāmaṃ vā jānātī’’tiādinā nayena padabhājanaṃ vuttaṃ. Āsādanāpekkhoti āsādanaṃ codanaṃ maṅkukaraṇabhāvaṃ apekkhamāno.
ပဋိဂ္ဂဏ္ဟာတိ အာပတ္တိ ဒုက္ကဋသ္သာတိ ယသ္သ အဘိဟဋံ တသ္မိံ ပဋိဂ္ဂဏ္ဟန္တေ အဘိဟာရကသ္သ ဘိက္ခုနော ဒုက္ကဋံ။ ဣတရသ္သ ပန သဗ္ဗော အာပတ္တိဘေဒော ပဌမသိက္ခာပဒေ ဝုတ္တော, ဣမသ္မိံ ပန သိက္ခာပဒေ သဗ္ဗာ အာပတ္တိယော အဘိဟာရကသ္သေဝ ဝေဒိတဗ္ဗာ။ သေသံ ပဌမသိက္ခာပဒေ ဝုတ္တနယတ္တာ ပာကဋမေဝ။
Paṭiggaṇhātiāpatti dukkaṭassāti yassa abhihaṭaṃ tasmiṃ paṭiggaṇhante abhihārakassa bhikkhuno dukkaṭaṃ. Itarassa pana sabbo āpattibhedo paṭhamasikkhāpade vutto, imasmiṃ pana sikkhāpade sabbā āpattiyo abhihārakasseva veditabbā. Sesaṃ paṭhamasikkhāpade vuttanayattā pākaṭameva.
တိသမုဋ္ဌာနံ – ကာယစိတ္တတော ဝာစာစိတ္တတော ကာယဝာစာစိတ္တတော စ သမုဋ္ဌာတိ, ကိရိယံ, သညာဝိမောက္ခံ, သစိတ္တကံ, လောကဝဇ္ဇံ, ကာယကမ္မံ, ဝစီကမ္မံ, အကုသလစိတ္တံ, ဒုက္ခဝေဒနန္တိ။
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
ဒုတိယပဝာရဏသိက္ခာပဒံ ဆဋ္ဌံ။
Dutiyapavāraṇasikkhāpadaṃ chaṭṭhaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၄. ဘောဇနဝဂ္ဂော • 4. Bhojanavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၆. ဒုတိယပဝာရဏာသိက္ခာပဒဝဏ္ဏနာ • 6. Dutiyapavāraṇāsikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၆. ဒုတိယပဝာရဏသိက္ခာပဒဝဏ္ဏနာ • 6. Dutiyapavāraṇasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၆. ဒုတိယပဝာရဏာသိက္ခာပဒဝဏ္ဏနာ • 6. Dutiyapavāraṇāsikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၆. ဒုတိယပဝာရဏသိက္ခာပဒံ • 6. Dutiyapavāraṇasikkhāpadaṃ
