| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
6. දුතියපවාරණසික්‌ඛාපදවණ්‌ණනා
6. Dutiyapavāraṇasikkhāpadavaṇṇanā
242. ඡට්‌ඨසික්‌ඛාපදෙ – අනාචාරං ආචරතීති පණ්‌ණත්‌තිවීතික්‌කමං කරොති. උපනන්‌ධීති උපනාහං ජනෙන්‌තො තස්‌මිං පුග්‌ගලෙ අත්‌තනො කොධං බන්‌ධි; පුනප්‌පුනං ආඝාතං ජනෙසීති අත්‌ථො. උපනද්‌ධො භික්‌ඛූති සො ජනිතඋපනාහො භික්‌ඛු.
242. Chaṭṭhasikkhāpade – anācāraṃ ācaratīti paṇṇattivītikkamaṃ karoti. Upanandhīti upanāhaṃ janento tasmiṃ puggale attano kodhaṃ bandhi; punappunaṃ āghātaṃ janesīti attho. Upanaddho bhikkhūti so janitaupanāho bhikkhu.
243. අභිහට්‌ඨුං පවාරෙය්‍යාති අභිහරිත්‌වා ‘‘හන්‌ද භික්‌ඛු ඛාද වා භුඤ්‌ජ වා’’ති එවං පවාරෙය්‍ය. පදභාජනෙ පන ‘‘හන්‌ද භික්‌ඛූ’’තිආදිං අනුද්‌ධරිත්‌වා සාධාරණමෙව අභිහට්‌ඨුං පවාරණාය අත්‌ථං දස්‌සෙතුං ‘‘යාවතකං ඉච්‌ඡසි තාවතකං ගණ්‌හාහී’’ති වුත්‌තං. ජානන්‌ති පවාරිතභාවං ජානන්‌තො. තං පනස්‌ස ජානනං යස්‌මා තීහාකාරෙහි හොති, තස්‌මා ‘‘ජානාති නාම සාමං වා ජානාතී’’තිආදිනා නයෙන පදභාජනං වුත්‌තං. ආසාදනාපෙක්‌ඛොති ආසාදනං චොදනං මඞ්‌කුකරණභාවං අපෙක්‌ඛමානො.
243.Abhihaṭṭhuṃ pavāreyyāti abhiharitvā ‘‘handa bhikkhu khāda vā bhuñja vā’’ti evaṃ pavāreyya. Padabhājane pana ‘‘handa bhikkhū’’tiādiṃ anuddharitvā sādhāraṇameva abhihaṭṭhuṃ pavāraṇāya atthaṃ dassetuṃ ‘‘yāvatakaṃ icchasi tāvatakaṃ gaṇhāhī’’ti vuttaṃ. Jānanti pavāritabhāvaṃ jānanto. Taṃ panassa jānanaṃ yasmā tīhākārehi hoti, tasmā ‘‘jānāti nāma sāmaṃ vā jānātī’’tiādinā nayena padabhājanaṃ vuttaṃ. Āsādanāpekkhoti āsādanaṃ codanaṃ maṅkukaraṇabhāvaṃ apekkhamāno.
පටිග්‌ගණ්‌හාති ආපත්‌ති දුක්‌කටස්‌සාති යස්‌ස අභිහටං තස්‌මිං පටිග්‌ගණ්‌හන්‌තෙ අභිහාරකස්‌ස භික්‌ඛුනො දුක්‌කටං. ඉතරස්‌ස පන සබ්‌බො ආපත්‌තිභෙදො පඨමසික්‌ඛාපදෙ වුත්‌තො, ඉමස්‌මිං පන සික්‌ඛාපදෙ සබ්‌බා ආපත්‌තියො අභිහාරකස්‌සෙව වෙදිතබ්‌බා. සෙසං පඨමසික්‌ඛාපදෙ වුත්‌තනයත්‌තා පාකටමෙව.
Paṭiggaṇhātiāpatti dukkaṭassāti yassa abhihaṭaṃ tasmiṃ paṭiggaṇhante abhihārakassa bhikkhuno dukkaṭaṃ. Itarassa pana sabbo āpattibhedo paṭhamasikkhāpade vutto, imasmiṃ pana sikkhāpade sabbā āpattiyo abhihārakasseva veditabbā. Sesaṃ paṭhamasikkhāpade vuttanayattā pākaṭameva.
තිසමුට්‌ඨානං – කායචිත්‌තතො වාචාචිත්‌තතො කායවාචාචිත්‌තතො ච සමුට්‌ඨාති, කිරියං, සඤ්‌ඤාවිමොක්‌ඛං, සචිත්‌තකං, ලොකවජ්‌ජං, කායකම්‌මං, වචීකම්‌මං, අකුසලචිත්‌තං, දුක්‌ඛවෙදනන්‌ති.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
දුතියපවාරණසික්‌ඛාපදං ඡට්‌ඨං.
Dutiyapavāraṇasikkhāpadaṃ chaṭṭhaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 4. භොජනවග්‌ගො • 4. Bhojanavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 6. දුතියපවාරණාසික්‌ඛාපදවණ්‌ණනා • 6. Dutiyapavāraṇāsikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. දුතියපවාරණසික්‌ඛාපදවණ්‌ණනා • 6. Dutiyapavāraṇasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 6. දුතියපවාරණාසික්‌ඛාපදවණ්‌ණනා • 6. Dutiyapavāraṇāsikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 6. දුතියපවාරණසික්‌ඛාපදං • 6. Dutiyapavāraṇasikkhāpadaṃ
