| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā |
༦. དུཏིཡཔཝཱརཎསིཀྑཱཔདཝཎྞནཱ
6. Dutiyapavāraṇasikkhāpadavaṇṇanā
༢༤༢. ཚཊྛསིཀྑཱཔདེ – ཨནཱཙཱརཾ ཨཱཙརཏཱིཏི པཎྞཏྟིཝཱིཏིཀྐམཾ ཀརོཏི། ཨུཔནནྡྷཱིཏི ཨུཔནཱཧཾ ཛནེནྟོ ཏསྨིཾ པུགྒལེ ཨཏྟནོ ཀོདྷཾ བནྡྷི; པུནཔྤུནཾ ཨཱགྷཱཏཾ ཛནེསཱིཏི ཨཏྠོ། ཨུཔནདྡྷོ བྷིཀྑཱུཏི སོ ཛནིཏཨུཔནཱཧོ བྷིཀྑུ།
242. Chaṭṭhasikkhāpade – anācāraṃ ācaratīti paṇṇattivītikkamaṃ karoti. Upanandhīti upanāhaṃ janento tasmiṃ puggale attano kodhaṃ bandhi; punappunaṃ āghātaṃ janesīti attho. Upanaddho bhikkhūti so janitaupanāho bhikkhu.
༢༤༣. ཨབྷིཧཊྛུཾ པཝཱརེཡྻཱཏི ཨབྷིཧརིཏྭཱ ‘‘ཧནྡ བྷིཀྑུ ཁཱད ཝཱ བྷུཉྫ ཝཱ’’ཏི ཨེཝཾ པཝཱརེཡྻ། པདབྷཱཛནེ པན ‘‘ཧནྡ བྷིཀྑཱུ’’ཏིཨཱདིཾ ཨནུདྡྷརིཏྭཱ སཱདྷཱརཎམེཝ ཨབྷིཧཊྛུཾ པཝཱརཎཱཡ ཨཏྠཾ དསྶེཏུཾ ‘‘ཡཱཝཏཀཾ ཨིཙྪསི ཏཱཝཏཀཾ གཎྷཱཧཱི’’ཏི ཝུཏྟཾ། ཛཱནནྟི པཝཱརིཏབྷཱཝཾ ཛཱནནྟོ། ཏཾ པནསྶ ཛཱནནཾ ཡསྨཱ ཏཱིཧཱཀཱརེཧི ཧོཏི, ཏསྨཱ ‘‘ཛཱནཱཏི ནཱམ སཱམཾ ཝཱ ཛཱནཱཏཱི’’ཏིཨཱདིནཱ ནཡེན པདབྷཱཛནཾ ཝུཏྟཾ། ཨཱསཱདནཱཔེཀྑོཏི ཨཱསཱདནཾ ཙོདནཾ མངྐུཀརཎབྷཱཝཾ ཨཔེཀྑམཱནོ།
243.Abhihaṭṭhuṃ pavāreyyāti abhiharitvā ‘‘handa bhikkhu khāda vā bhuñja vā’’ti evaṃ pavāreyya. Padabhājane pana ‘‘handa bhikkhū’’tiādiṃ anuddharitvā sādhāraṇameva abhihaṭṭhuṃ pavāraṇāya atthaṃ dassetuṃ ‘‘yāvatakaṃ icchasi tāvatakaṃ gaṇhāhī’’ti vuttaṃ. Jānanti pavāritabhāvaṃ jānanto. Taṃ panassa jānanaṃ yasmā tīhākārehi hoti, tasmā ‘‘jānāti nāma sāmaṃ vā jānātī’’tiādinā nayena padabhājanaṃ vuttaṃ. Āsādanāpekkhoti āsādanaṃ codanaṃ maṅkukaraṇabhāvaṃ apekkhamāno.
པཊིགྒཎྷཱཏི ཨཱཔཏྟི དུཀྐཊསྶཱཏི ཡསྶ ཨབྷིཧཊཾ ཏསྨིཾ པཊིགྒཎྷནྟེ ཨབྷིཧཱརཀསྶ བྷིཀྑུནོ དུཀྐཊཾ། ཨིཏརསྶ པན སབྦོ ཨཱཔཏྟིབྷེདོ པཋམསིཀྑཱཔདེ ཝུཏྟོ, ཨིམསྨིཾ པན སིཀྑཱཔདེ སབྦཱ ཨཱཔཏྟིཡོ ཨབྷིཧཱརཀསྶེཝ ཝེདིཏབྦཱ། སེསཾ པཋམསིཀྑཱཔདེ ཝུཏྟནཡཏྟཱ པཱཀཊམེཝ།
Paṭiggaṇhātiāpatti dukkaṭassāti yassa abhihaṭaṃ tasmiṃ paṭiggaṇhante abhihārakassa bhikkhuno dukkaṭaṃ. Itarassa pana sabbo āpattibhedo paṭhamasikkhāpade vutto, imasmiṃ pana sikkhāpade sabbā āpattiyo abhihārakasseva veditabbā. Sesaṃ paṭhamasikkhāpade vuttanayattā pākaṭameva.
ཏིསམུཊྛཱནཾ – ཀཱཡཙིཏྟཏོ ཝཱཙཱཙིཏྟཏོ ཀཱཡཝཱཙཱཙིཏྟཏོ ཙ སམུཊྛཱཏི, ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི།
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
དུཏིཡཔཝཱརཎསིཀྑཱཔདཾ ཚཊྛཾ།
Dutiyapavāraṇasikkhāpadaṃ chaṭṭhaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༤. བྷོཛནཝགྒོ • 4. Bhojanavaggo
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༦. དུཏིཡཔཝཱརཎཱསིཀྑཱཔདཝཎྞནཱ • 6. Dutiyapavāraṇāsikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༦. དུཏིཡཔཝཱརཎསིཀྑཱཔདཝཎྞནཱ • 6. Dutiyapavāraṇasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༦. དུཏིཡཔཝཱརཎཱསིཀྑཱཔདཝཎྞནཱ • 6. Dutiyapavāraṇāsikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༦. དུཏིཡཔཝཱརཎསིཀྑཱཔདཾ • 6. Dutiyapavāraṇasikkhāpadaṃ
