| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. து³தியப²லஸுத்தங்
5. Dutiyaphalasuttaṃ
981. ‘‘ஆனாபானஸ்ஸதி, பி⁴க்க²வே, பா⁴விதா ப³ஹுலீகதா மஹப்ப²லா ஹோதி மஹானிஸங்ஸா. கத²ங் பா⁴விதா ச, பி⁴க்க²வே, ஆனாபானஸ்ஸதி கத²ங் ப³ஹுலீகதா மஹப்ப²லா ஹோதி மஹானிஸங்ஸா? இத⁴, பி⁴க்க²வே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா நிஸீத³தி பல்லங்கங் ஆபு⁴ஜித்வா உஜுங் காயங் பணிதா⁴ய பரிமுக²ங் ஸதிங் உபட்ட²பெத்வா. ஸோ ஸதோவ அஸ்ஸஸதி, ஸதோவ பஸ்ஸஸதி…பே॰… ‘படினிஸ்ஸக்³கா³னுபஸ்ஸீ அஸ்ஸஸிஸ்ஸாமீ’தி ஸிக்க²தி, ‘படினிஸ்ஸக்³கா³னுபஸ்ஸீ பஸ்ஸஸிஸ்ஸாமீ’தி ஸிக்க²தி. ஏவங் பா⁴விதா கோ², பி⁴க்க²வே, ஆனாபானஸ்ஸதி ஏவங் ப³ஹுலீகதா மஹப்ப²லா ஹோதி மஹானிஸங்ஸா.
981. ‘‘Ānāpānassati, bhikkhave, bhāvitā bahulīkatā mahapphalā hoti mahānisaṃsā. Kathaṃ bhāvitā ca, bhikkhave, ānāpānassati kathaṃ bahulīkatā mahapphalā hoti mahānisaṃsā? Idha, bhikkhave, bhikkhu araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. So satova assasati, satova passasati…pe… ‘paṭinissaggānupassī assasissāmī’ti sikkhati, ‘paṭinissaggānupassī passasissāmī’ti sikkhati. Evaṃ bhāvitā kho, bhikkhave, ānāpānassati evaṃ bahulīkatā mahapphalā hoti mahānisaṃsā.
‘‘ஏவங் பா⁴விதாய கோ², பி⁴க்க²வே, ஆனாபானஸ்ஸதியா ஏவங் ப³ஹுலீகதாய ஸத்த ப²லா ஸத்தானிஸங்ஸா பாடிகங்கா². கதமே ஸத்த ப²லா ஸத்தானிஸங்ஸா? தி³ட்டே²வ த⁴ம்மே படிகச்ச அஞ்ஞங் ஆராதே⁴தி; நோ சே தி³ட்டே²வ த⁴ம்மே படிகச்ச அஞ்ஞங் ஆராதே⁴தி. அத² மரணகாலே அஞ்ஞங் ஆராதே⁴தி; நோ சே தி³ட்டே²வ த⁴ம்மே படிகச்ச அஞ்ஞங் ஆராதே⁴தி , நோ சே மரணகாலே அஞ்ஞங் ஆராதே⁴தி. அத² பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா அந்தராபரினிப்³பா³யீ ஹோதி… உபஹச்சபரினிப்³பா³யீ ஹோதி… அஸங்கா²ரபரினிப்³பா³யீ ஹோதி… ஸஸங்கா²ரபரினிப்³பா³யீ ஹோதி… உத்³த⁴ங்ஸோதோ ஹோதி அகனிட்ட²கா³மீ – ஏவங் பா⁴விதாய கோ², பி⁴க்க²வே, ஆனாபானஸ்ஸதியா ஏவங் ப³ஹுலீகதாய இமே ஸத்த ப²லா ஸத்தானிஸங்ஸா பாடிகங்கா²’’தி. பஞ்சமங்.
‘‘Evaṃ bhāvitāya kho, bhikkhave, ānāpānassatiyā evaṃ bahulīkatāya satta phalā sattānisaṃsā pāṭikaṅkhā. Katame satta phalā sattānisaṃsā? Diṭṭheva dhamme paṭikacca aññaṃ ārādheti; no ce diṭṭheva dhamme paṭikacca aññaṃ ārādheti. Atha maraṇakāle aññaṃ ārādheti; no ce diṭṭheva dhamme paṭikacca aññaṃ ārādheti , no ce maraṇakāle aññaṃ ārādheti. Atha pañcannaṃ orambhāgiyānaṃ saṃyojanānaṃ parikkhayā antarāparinibbāyī hoti… upahaccaparinibbāyī hoti… asaṅkhāraparinibbāyī hoti… sasaṅkhāraparinibbāyī hoti… uddhaṃsoto hoti akaniṭṭhagāmī – evaṃ bhāvitāya kho, bhikkhave, ānāpānassatiyā evaṃ bahulīkatāya ime satta phalā sattānisaṃsā pāṭikaṅkhā’’ti. Pañcamaṃ.
