| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
২. দুতিযপীঠৰিমানৰণ্ণনা
2. Dutiyapīṭhavimānavaṇṇanā
পীঠং তে ৰেল়ুরিযমযন্তি দুতিযপীঠৰিমানং। তস্স অট্ঠুপ্পত্তি চ অত্থৰণ্ণনা চ পঠমে ৰুত্তনযেনেৰ ৰেদিতব্বা। অযং পন ৰিসেসো – সাৰত্থিৰাসিনী কির একা ইত্থী অত্তনো গেহং পিণ্ডায পৰিট্ঠং একং থেরং পস্সিত্ৰা পসন্নচিত্তা তস্স আসনং দেন্তী অত্তনো পীঠং উপরি নীলৰত্থেন অত্থরিত্ৰা অদাসি। তেন তস্সা দেৰলোকে নিব্বত্তায ৰেল়ুরিযমযং পল্লঙ্কৰিমানং নিব্বত্তং। তেন ৰুত্তং –
Pīṭhaṃte veḷuriyamayanti dutiyapīṭhavimānaṃ. Tassa aṭṭhuppatti ca atthavaṇṇanā ca paṭhame vuttanayeneva veditabbā. Ayaṃ pana viseso – sāvatthivāsinī kira ekā itthī attano gehaṃ piṇḍāya paviṭṭhaṃ ekaṃ theraṃ passitvā pasannacittā tassa āsanaṃ dentī attano pīṭhaṃ upari nīlavatthena attharitvā adāsi. Tena tassā devaloke nibbattāya veḷuriyamayaṃ pallaṅkavimānaṃ nibbattaṃ. Tena vuttaṃ –
৮.
8.
‘‘পীঠং তে ৰেল়ুরিযমযং উল়ারং, মনোজৰং গচ্ছতি যেনকামং।
‘‘Pīṭhaṃ te veḷuriyamayaṃ uḷāraṃ, manojavaṃ gacchati yenakāmaṃ;
অলঙ্কতে মল্যধরে সুৰত্থে, ওভাসসি ৰিজ্জুরিৰব্ভ কূটং॥
Alaṅkate malyadhare suvatthe, obhāsasi vijjurivabbha kūṭaṃ.
৯.
9.
‘‘কেন তেতাদিসো ৰণ্ণো, কেন তে ইধ মিজ্ঝতি।
‘‘Kena tetādiso vaṇṇo, kena te idha mijjhati;
উপ্পজ্জন্তি চ তে ভোগা, যে কেচি মনসো পিযা॥
Uppajjanti ca te bhogā, ye keci manaso piyā.
১০.
10.
‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং।
‘‘Pucchāmi taṃ devi mahānubhāve, manussabhūtā kimakāsi puññaṃ;
কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি॥
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
১১.
11.
‘‘সা দেৰতা অত্তমনা, মোগ্গল্লানেন পুচ্ছিতা।
‘‘Sā devatā attamanā, moggallānena pucchitā;
পঞ্হং পুট্ঠা ৰিযাকাসি, যস্স কম্মস্সিদং ফলং’’॥
Pañhaṃ puṭṭhā viyākāsi, yassa kammassidaṃ phalaṃ’’.
১২.
12.
‘‘অহং মনুস্সেসু মনুস্সভূতা, অব্ভাগতানাসনকং অদাসিং।
‘‘Ahaṃ manussesu manussabhūtā, abbhāgatānāsanakaṃ adāsiṃ;
অভিৰাদযিং অঞ্জলিকং অকাসিং, যথানুভাৰঞ্চ অদাসি দানং॥
Abhivādayiṃ añjalikaṃ akāsiṃ, yathānubhāvañca adāsi dānaṃ.
১৩.
13.
‘‘তেন মেতাদিসো ৰণ্ণো, তেন মে ইধ মিজ্ঝতি।
‘‘Tena metādiso vaṇṇo, tena me idha mijjhati;
উপ্পজ্জন্তি চ মে ভোগা, যে কেচি মনসো পিযা॥
Uppajjanti ca me bhogā, ye keci manaso piyā.
১৪.
14.
‘‘অক্খামি তে ভিক্খু মহানুভাৰ, মনুস্সভূতা যমকাসি পুঞ্ঞং।
‘‘Akkhāmi te bhikkhu mahānubhāva, manussabhūtā yamakāsi puññaṃ;
তেনম্হি এৰং জলিতানুভাৰা, ৰণ্ণো চ মে সব্বদিসা পভাসতী’’তি॥
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
৮. তত্থ ৰেল়ুরিযমযন্তি ৰেল়ুরিযমণিমযং। ৰেল়ুরিযমণি নাম ৰিল়ূরপব্বতস্স ৰিল়ূরগামস্স চ অৰিদূরে উপ্পজ্জনকমণি। তস্স কির ৰিল়ূরগামট্ঠানে আকরো, ৰিল়ূরস্স পন অৰিদূরে ভৰত্তা ৰেল়ুরিযন্তেৰ পঞ্ঞাযিত্থ। তংসদিসৰণ্ণনিভতায দেৰলোকেপিস্স তথেৰ নামং জাতং যথা তং মনুস্সলোকে লদ্ধনামৰসেনেৰ দেৰলোকে দেৰপুত্তানং। তং পন মযূরগীৰৰণ্ণং ৰা হোতি, ৰাযসপত্তৰণ্ণং ৰা, সিনিদ্ধৰেণুপত্তৰণ্ণং ৰা। ইধ পন মযূরগীৰৰণ্ণং ৰেদিতব্বং। সেসং সব্বং পঠমপীঠৰিমানে ৰুত্তসদিসমেৰাতি।
8. Tattha veḷuriyamayanti veḷuriyamaṇimayaṃ. Veḷuriyamaṇi nāma viḷūrapabbatassa viḷūragāmassa ca avidūre uppajjanakamaṇi. Tassa kira viḷūragāmaṭṭhāne ākaro, viḷūrassa pana avidūre bhavattā veḷuriyanteva paññāyittha. Taṃsadisavaṇṇanibhatāya devalokepissa tatheva nāmaṃ jātaṃ yathā taṃ manussaloke laddhanāmavaseneva devaloke devaputtānaṃ. Taṃ pana mayūragīvavaṇṇaṃ vā hoti, vāyasapattavaṇṇaṃ vā, siniddhaveṇupattavaṇṇaṃ vā. Idha pana mayūragīvavaṇṇaṃ veditabbaṃ. Sesaṃ sabbaṃ paṭhamapīṭhavimāne vuttasadisamevāti.
দুতিযপীঠৰিমানৰণ্ণনা নিট্ঠিতা।
Dutiyapīṭhavimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ২. দুতিযপীঠৰিমানৰত্থু • 2. Dutiyapīṭhavimānavatthu
