| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
१०. दुतियरागसुत्तं
10. Dutiyarāgasuttaṃ
६९. वुत्तञ्हेतं भगवता, वुत्तमरहताति मे सुतं –
69. Vuttañhetaṃ bhagavatā, vuttamarahatāti me sutaṃ –
‘‘यस्स कस्सचि, भिक्खवे, भिक्खुस्स वा भिक्खुनिया वा रागो अप्पहीनो, दोसो अप्पहीनो, मोहो अप्पहीनो – अयं वुच्चति, भिक्खवे, न ‘अतरि 1 समुद्दं सऊमिं सवीचिं सावट्टं सगहं सरक्खसं’। यस्स कस्सचि, भिक्खवे, भिक्खुस्स वा भिक्खुनिया वा रागो पहीनो, दोसो पहीनो, मोहो पहीनो – अयं वुच्चति, भिक्खवे, ‘अतरि समुद्दं सऊमिं सवीचिं सावट्टं सगहं सरक्खसं, तिण्णो पारङ्गतो 2 थले तिट्ठति ब्राह्मणो’’’ति। एतमत्थं भगवा अवोच। तत्थेतं इति वुच्चति –
‘‘Yassa kassaci, bhikkhave, bhikkhussa vā bhikkhuniyā vā rāgo appahīno, doso appahīno, moho appahīno – ayaṃ vuccati, bhikkhave, na ‘atari 3 samuddaṃ saūmiṃ savīciṃ sāvaṭṭaṃ sagahaṃ sarakkhasaṃ’. Yassa kassaci, bhikkhave, bhikkhussa vā bhikkhuniyā vā rāgo pahīno, doso pahīno, moho pahīno – ayaṃ vuccati, bhikkhave, ‘atari samuddaṃ saūmiṃ savīciṃ sāvaṭṭaṃ sagahaṃ sarakkhasaṃ, tiṇṇo pāraṅgato 4 thale tiṭṭhati brāhmaṇo’’’ti. Etamatthaṃ bhagavā avoca. Tatthetaṃ iti vuccati –
‘‘यस्स रागो च दोसो च, अविज्जा च विराजिता।
‘‘Yassa rāgo ca doso ca, avijjā ca virājitā;
सोमं समुद्दं सगहं सरक्खसं, सऊमिभयं दुत्तरं अच्चतारि॥
Somaṃ samuddaṃ sagahaṃ sarakkhasaṃ, saūmibhayaṃ duttaraṃ accatāri.
‘‘सङ्गातिगो मच्चुजहो निरूपधि, पहासि दुक्खं अपुनब्भवाय।
‘‘Saṅgātigo maccujaho nirūpadhi, pahāsi dukkhaṃ apunabbhavāya;
अत्थङ्गतो सो न पमाणमेति, अमोहयि मच्चुराजन्ति ब्रूमी’’ति॥
Atthaṅgato so na pamāṇameti, amohayi maccurājanti brūmī’’ti.
अयम्पि अत्थो वुत्तो भगवता, इति मे सुतन्ति। दसमं।
Ayampi attho vutto bhagavatā, iti me sutanti. Dasamaṃ.
दुतियो वग्गो निट्ठितो।
Dutiyo vaggo niṭṭhito.
तस्सुद्दानं –
Tassuddānaṃ –
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / १०. दुतियरागसुत्तवण्णना • 10. Dutiyarāgasuttavaṇṇanā
